Na ke Habohlokoa ho Fumana Likarabo?

“Le tla tseba ’nete, ’me ’nete e tla le lokolla.”—JOHANNE 8:32.

BIBELE e re bolella ’nete e ka re lokollang litumelong tse ferekanyang le tseo e seng ’nete ka Jesu. Empa na ke habohlokoa hore na re lumela’ng ka eena? E, ke habohlokoa. Ke habohlokoa ho Jehova. Ke habohlokoa ho Jesu. Ebile e lokela ho ba habohlokoa ho rōna.

● Ke hobane’ng ha e le habohlokoa ho Jehova? Karabo e bonolo feela ke hore “Molimo ke lerato.” (1 Johanne 4:8) Jehova o batla hore re phele re thabile ka ho sa feleng. Jesu o ile a re: “Molimo o ratile lefatše [batho] haholo hoo a ileng a fana ka Mora oa hae ea tsoetsoeng a ’notši, e le hore e mong le e mong ea bontšang tumelo ho eena . . . a be le bophelo bo sa feleng.” (Johanne 3:16) Molimo o ile a romela Mora oa hae hore a tl’o re lopolla ’me re phele ka ho sa feleng Paradeiseng lefatšeng, e leng seo a neng a se rerile qalong. (Genese 1:28) Molimo o ikemiselitse ho fana ka bophelo bo sa feleng ho batho ba ithutang ’nete ka Mora oa hae ’me ba phela tumellanong le seo ba ithutang sona.—Baroma 6:23.

Ke hobane’ng ha e le habohlokoa ho Jesu? Jesu le eena o rata batho. O ile a bontša lerato le se nang boithati ka hore a ithaopele ho re shoela. (Johanne 15:13) O ne a tseba hore ka ho etsa joalo o ne a bula tsela ea hore re pholohe. (Johanne 14:6) Na ke ntho e makatsang hore ebe Jesu o batla ho bona batho ba bangata kamoo ho ka khonehang ba rua molemo sehlabelong sa hae sa thekollo? Ke kahoo a ileng a laela balateli ba hae ba ’nete hore ba rute batho lefatšeng lohle ka thato ea Molimo le morero oa Hae.—Matheu 24:14; 28:19, 20.

Ke hobane’ng ha e le habohlokoa ho rōna? Ak’u nahane feela ka lintho tseo joang kapa joang e leng tsa bohlokoa ho uena—tse kang bophelo ba hao ba ’mele le lelapa la hao. Na u batla ho phela hantle ’meleng le hore u be le bophelo bo molemo, uena esita le baratuoa ba hao? Ka Jesu, Jehova o fa uena le baratuoa ba hao monyetla oa ho phela hantle ’meleng le ho phela ka ho sa feleng lefatšeng le lecha, le se nang bohloko le mahlomola. (Pesaleme ea 37:11, 29; Tšenolo 21:3, 4) Na u ka rata ho phela lefatšeng le joalo? Haeba ho joalo, ho na le seo u lokelang ho se etsa.

Ak’u shebe lengolo lena hape le qotsitsoeng sehloohong: “Le tla tseba ’nete, ’me ’nete e tla le lokolla.” Ho tseba ’nete ka Jesu le karolo eo a e phethang ho phethahatseng morero oa Molimo, ho ka re lokolla botlamuoeng bo bohloko ka ho fetisisa—e leng botlamuoa ba sebe le lefu. Empa e le hore u lokolohe u lokela ho “tseba ’nete.” Ke hobane’ng ha u sa ithute ’nete ka taba ee ’me u fumane hore na uena le baratuoa ba hao le ka rua molemo ofe ho eona? Lipaki Tsa Jehova li tla thabela ho u thusa.