Xana I Swa Nkoka Ku Tiva Tinhlamulo?

“Mi ta tiva ntiyiso, kutani ntiyiso wu ta mi ntshunxa.”—YOHANE 8:32.

BIBELE yi tamele ntiyiso lowu nga hi ntshunxaka eka vukhongeri lebyi pfilunganyaka kumbe lebyi kanganyisaka malunghana na Yesu. Kambe xana leswi hi swi tshembaka malunghana na yena i swa nkoka hakunene? Ina, i swa nkoka. I swa nkoka eka Yehovha. I swa nkoka eka Yesu. Naswona swi fanele swi va swa nkoka eka hina.

● Ha yini swi ri swa nkoka eka Yehovha? Hikuva “Xikwembu i rirhandzu.” (1 Yohane 4:8) Yehovha u lava leswaku hi tshama hi tsakile hilaha ku nga heriki. Yesu u te: “Xikwembu xi rhandze misava [ku nga vanhu] swinene xi kala xi nyikela hi N’wana wa xona la tswariweke a ri swakwe, leswaku un’wana ni un’wana loyi a kombisaka ripfumelo eka yena . . . a va ni vutomi lebyi nga heriki.” (Yohane 3:16) Xikwembu xi rhumele N’wana wa xona leswaku a va Mukutsuri wa hina ni ku hi pfulela ndlela yo hanya hilaha ku nga heriki eParadeyisini laha misaveni, hi ku pfumelelana ni xikongomelo xa xona xo sungula. (Genesa 1:28) Xikwembu xi tiyimisele ku nyika nyiko ya vutomi lebyi nga heriki eka lava dyondzaka ntiyiso malunghana ni N’wana wa xona kutani va hanya hi ku pfumelelana na wona.—Varhoma 6:23.

● Ha yini swi ri swa nkoka eka Yesu? Yesu na yena u rhandza vanhu. Hi ku swi rhandza u kombise rirhandzu leri nga riki ni vutianakanyi hi ku nyikela hi vutomi byakwe hikwalaho ka hina. (Yohane 15:13) A a swi twisisa leswaku hikwalaho ka sweswo a a nyikela ndlela yin’we ya ku ponisiwa. (Yohane 14:6) Xana swi nga hi hlamarisa leswaku Yesu u lava ku vona vanhu vo tala va vuyeriwa eka xitlhavelo xakwe xa nkutsulo? Hi swona leswi endleke leswaku a lerisa valandzeri vakwe va ntiyiso leswaku va dyondzisa vanhu emisaveni hinkwayo malunghana ni ku rhandza ka Xikwembu ni xikongomelo xa xona.—Matewu 24:14; 28:19, 20.

● Ha yini swi fanele swi va swa nkoka eka hina? Anakanya katsongo hi swilo leswi handle ko kanakana swi nga swa nkoka eka wena—rihanyo ra wena ni ndyangu wa wena. Xana u navela leswaku wena ni varhandziwa va wena mi va ni rihanyo lerinene ni vutomi byo antswa? Hi ku tirhisa Yesu, Yehovha u nyika wena ni varhandziwa va wena ntshembo wo va ni rihanyo leri hetisekeke ni vutomi lebyi nga heriki emisaveni leyintshwa, lebyi nga riki ni switlhavi ni ku xaniseka. (Pisalema 37:11, 29; Nhlavutelo 21:3, 4) Xana u nga swi tsakela ku hanya emisaveni yo tano? Loko swi ri tano, ku ni swin’wana leswi u faneleke u swi endla.

Tlhela u languta ndzimana leyi nge, “Mi ta tiva ntiyiso, kutani ntiyiso wu ta mi ntshunxa,” leyi tshahiweke ni nhloko-mhaka leyi. Ntiyiso malunghana na Yesu ni ntirho wakwe eku hetisiseni ka xikongomelo xa Xikwembu wu nga hi ntshunxa eka vuhlonga hinkwabyo lebyi chavisaka—vuhlonga bya xidyoho ni rifu. Leswaku u kuma ntshunxeko wolowo, u fanele u “tiva ntiyiso.” Ha yini u nga dyondzi leswi engetelekeke hi ntiyiso lowu ni ndlela leyi wena ni varhandziwa va wena mi nga ta vuyeriwa ha yona eka wona? Timbhoni ta Yehovha ti ta swi tsakela ku ku pfuna.