Zaaroy Erana Koshshiyaabee?

“Intte tumatettaakka erana; qassi tumatettai inttena ailletettaappe kessana.”—YOH. 8:32.

YESUUSABAA kirqqi giidabaa woy ubba balettiyaabaa tamaarissiyoobaappe nuna naxa kessiya tumay Geeshsha Maxaafan deˈees. SHin, abaa tumaa eriyoogee koshshiyaabee? Ee. Hegee Yihoowaynne Yesuusi koyiyooba. Nuunikka koyana bessiyaaba.

● Yihooway koyiyooba gididoy aybissee? “Xoossai siiqo” gidiyo gishshataassa. (1 Yoh. 4:8) Yihooway nuuni merinau ufayssan deˈanaadan koyees. Yesuusi, “Xoossaa Na7aa ammaniya ubbai merinaa de7uwaa [ekkana] . . . mala, Xoossai ha sa7aa [asaa naatu alamiyaa] keehi siiqido gishshau, ba mexi issi Na7aa immiis” yaagiis. (Yoh. 3:16) Xoossay, nuna wozanaunne I koyro halchido merinaa deˈuwaa Gannate saˈan nuuyyo immiyo ogiyaa dooyanau ba Naˈaa kiittiis. (Doo. 1:28) Xoossay, ba Naˈaabaa tumaa tamaaridi hegaadan deˈiyaageetussi merinaa deˈuwaa immanau koyees.—Roo. 6:23.

● Yesuusi koyiyooba gididoy aybissee? Yesuusikka asaa naata siiqees. I nuuni goˈettanaadan bana aatti immiyoogan dumma siiquwaa bessiis. (Yoh. 15:13) I hegaadan oottiyoogan asay deˈuwaa demmiyo mexi issi ogiyaa dooyiyoogaa erees. (Yoh. 14:6) Yesuusi daro asay ba wozuwaa yarshshuwan goˈettanaadan koyiyoogee erettidaba. I wozanappe bana kaalliyaageeti Xoossaa sheniyaabaanne a halchuwaabaa alame yuushuwan asaa tamaarissanaadan azazidoy hegaassa.—Maa. 24:14; 28:19, 20.

● Nuuyyo koshshiyaaba gididoy aybissee? Neeni xoqqu oottada xeelliyo, ne payyatettaabaanne ne so asaabaa issi kutti ane qoppa. Neeninne ne siiqiyoogeeti payyatettan, qaassi loˈˈo deˈuwaa deˈanaadan amottikkii? Yihooway Yesuusa baggaara intte polo payyatettaa, qassi waayeenne metoy baynna ooratta alamiyan merinaa deˈuwaa demmanaadan shoobbees. (Maz. 37:11, 29; Ajj. 21:3, 4) Neeni hegaa mala alamiyan deˈanau koyay? Koyiyaaba gidikko, neeni oottana koshshiyaabay deˈees.

Qommoora deˈiya, “Intte tumatettaakka erana; qassi tumatettai inttena ailletettaappe kessana” giya xiqisiyaa ane zaarettada qoppa. Yesuusabaanne Xoossaa halchoy polettiyoogaara gayttidaagan ayyo deˈiya maataabaa tumaa eriyoogee keehippe iita gidida, nagaraanne hayquwaa aylletettaappe nuna kessana danddayees. SHin he aylletettaappe kiyanau neeni ‘tumaa erana’ koshshees. He tumaabaa, qassi neeninne ne siiqiyoogeeti an goˈettiyo ogiyaabaa aybissi gujjada tamaarikkii? Yihoowa Markkati nena ufayssan maaddana.