Importante ba an mga Baton?

“Mahibabaro kamo han kamatuoran, ngan an kamatuoran maghahatag ha iyo hin kagawasan.”—JUAN 8:32, NW.

HA Biblia mababasa an kamatuoran nga makakahatag ha aton hin kagawasan tikang ha nakakagupong o nakakalimbong nga mga impormasyon mahitungod kan Jesus. Kondi, importante gud ba kon ano an aton gintotoohan mahitungod ha iya? Oo. Importante ito kan Jehova. Importante ito kan Jesus. Ngan sadang ito magin importante ha aton.

● Kay ano nga importante ito kan Jehova? Ha direkta nga baton, tungod kay “an Dios amo an gugma.” (1 Juan 4:8) Karuyag niya nga mabuhi kita nga malipayon tubtob ha kadayonan. Hi Jesus nagsiring: “An Dios naghigugma gud han kalibotan [han katawohan], nga iya iginhatag an iya Bugtong nga Anak, basi nga an ngatanan nga natoo ha iya . . . ma may kinabuhi nga waray kataposan.” (Juan 3:16) Ginsugo han Dios an iya Anak ha paglukat ha aton ngan ha pag-abri han dalan ngadto ha kinabuhi nga waray kataposan ha Paraiso nga tuna, uyon han iya orihinal nga katuyoan. (Genesis 1:28) Karuyag han Dios nga ihatag an regalo nga kinabuhi nga waray kataposan ha mga nakuha hin kahibaro han kamatuoran mahitungod han iya Anak ngan nagios uyon han ira hinbaroan.—Roma 6:23.

● Kay ano nga importante ito kan Jesus? Hinigugma liwat ni Jesus an katawohan. Iginpakita niya ini ha iya kinaburut-on nga paghatag han iya kinabuhi para ha aton. (Juan 15:13) Maaram hiya nga hiya la an dalan ngadto ha kaluwasan. (Juan 14:6) Salit diri urusahon nga maruyag hiya nga damu an magpahimulos han iya lukat, tubtob nga posible. Ito an hinungdan kon kay ano nga iya ginsugo an iya tinuod nga mga sumurunod nga tutdoan an mga tawo ha bug-os nga kalibotan mahitungod han kaburut-on ngan katuyoan han Dios.—Mateo 24:14; 28:19, 20.

● Kay ano nga sadang ito magin importante ha aton? Hunahunaa an mga butang nga importante ha imo—an imo kahimsog ngan an imo pamilya. Naghihingyap ka ba hin maopay nga kahimsog ngan maopay nga kinabuhi para ha imo ngan ha imo mga hinigugma? Pinaagi kan Jesus, igintatanyag ni Jehova ha imo ngan ha imo mga hinigugma an paglaom nga mabuhi ha hingpit nga kahimsog ha waray kataposan ha bag-o nga kalibotan, diin waray na kasakit ngan pag-antos. (Salmo 37:11, 29; Pahayag 21:3, 4) Karuyag mo ba ito? Kon oo, may-ada ka sadang buhaton.

Aton balikon an teksto katapos han ulohan: “Mahibabaro kamo han kamatuoran, ngan an kamatuoran maghahatag ha iyo hin kagawasan.” An kamatuoran mahitungod kan Jesus ngan han iya bahin ha katumanan han katuyoan han Dios makakahatag ha aton hin kagawasan tikang ha pinakamaraot nga klase han pagkauripon—pagkauripon ha sala ngan kamatayon. Kondi basi maeksperyensyahan ito, sadang mo ‘hibaroan an kamatuoran.’ Kay ano nga diri kumuha hin kahibaro mahitungod hini nga kamatuoran ngan kon paonan-o ka ngan an imo mga hinigugma makakapahimulos tikang hini? Malilipay an mga Saksi ni Jehova ha pagbulig ha imo.