Nahibalo Ka Ba?

Unsay gipasabot ni Jesus sa pag-uban ug ikaduhang milya?

▪ Sa iyang gibantog nga Wali sa Bukid, si Jesus miingon: “Kon ang tawong may awtoridad magpugos kanimo sa pag-alagad ug usa ka milya, ubani siya ug duha ka milya.” (Mateo 5:41) Lagmit nasabtan sa mga mamiminaw nga kana nagtumong sa pinugos nga trabaho, nga puwedeng ibaod sa mga awtoridad sa mga lungsoranon.

Sa unang siglo C.E., ang Israel gisakop sa mga Romano. Wala sila magpanuko sa pagpugos sa mga tawo o sa mga hayop sa pagtrabaho alang nila o sa pagkontrolar sa bisan unsa nga ilang giisip nga gikinahanglan aron mapadali ang ilang opisyal nga buluhaton. Pananglitan, gipugos sa Romanong kasundalohan si Simon nga taga-Cirene sa pagpas-an sa estaka sa pagsakit ni Jesus paingon sa dapit nga siya gilansang. (Mateo 27:32) Ang maong mga sugo mapig-oton, dili dalawaton, ug gikayugtan gayod sa mga Hudiyo.

Wala mahibal-i kon asa kutob nga mahimong pugson ang mga tawo sa pagtrabaho. Apan, lagmit gayod nga dili sila andam mobuhat ug labaw pa kay sa gibaod kanila. Busa sa dihang giawhag ni Jesus ang iyang mga mamiminaw sa pag-uban ug ikaduhang milya, ingnon ta, iyang giingnan sila nga dili magbagulbol sa pagbuhat sa mga buluhaton nga gibaod sa mga awtoridad kanila.—Marcos 12:17.

Kinsa ang Anas nga gihisgotan sa mga Ebanghelyo?

▪ Panahon sa paghusay kang Jesus, si Anas (Ananus) gihubit ingong “pangulong saserdote.” (Lucas 3:2; Juan 18:13; Buhat 4:6) Gani, siya ang ugangan sa hataas nga saserdote sa Israel, si Caifas, ug siya mismo nag-alagad ingong hataas nga saserdote gikan sa 6 o 7 C.E. hangtod sa mga 15 C.E., sa dihang siya gitangtangag katungdanan sa Romanong opisyal nga si Valerius Gratus. Bisan pa niana, ingong kanhing hataas nga saserdote, si Anas dako gihapog impluwensiya sa Israel. Sa ulahi, ang lima sa iyang mga anak nga lalaki ug ang iyang umagad nahimong hataas nga saserdote.

Samtang ang Israel magpabiling independente, mahuptan sa hataas nga saserdote ang iyang katungdanan sa tibuok niyang kinabuhi. (Numeros 35:25) Apan, ubos sa pagmando sa Roma, ang pag-alagad sa hataas nga saserdote nagdepende sa Romanong mga gobernador ug sa mga hari nga gitudlo sa Roma, ug puwede sab nila siyang tangtangag katungdanan. Gireport sa historyanong si Flavius Josephus nga si Quirinius, ang Romanong gobernador sa Sirya, nagtangtang kang Joazar sa pagkahataas nga saserdote sa mga 6 o 7 C.E. ug nagtudlo kang Anas sa maong katungdanan. Apan mopatim-awng gipili niining paganong mga magmamando ang bag-ong mga tinudlo gikan sa mga saserdote.

Ang pamilya ni Anas nadungog sa ilang kahakog ug kaadunahan kaayo. Dayag nga nangadato sila kay ilang gimonopoliya ang pagbaligya sa mga kinahanglanon sa paghalad diha sa templo, sama sa mga salampati, karnero, lana, ug bino. Si Josephus miingon nga si Ananus (Ananias), nga anak ni Anas, may “mga sulugoong grabe kaabusado ug kinsa mangilog sa ikanapulo nga iya sa mga saserdote; ug ilang kulatahon kadtong dili mohatag.”