Ammoyo Kadi?

Ania ti kayat a sawen ni Jesus idi imbagana a ‘kumuyogka iti dua a milia’?

▪ Iti nalatak a sermon ni Jesus iti bantay, inrekomendana: “No ti asinoman iti turay pilitennaka nga agserbi iti maysa a milia, kumuyogka kenkuana iti dua a milia.” (Mateo 5:41) Mabalin nga impapan dagiti dumdumngeg ken Jesus a tuktukoyenna ti kapilitan a panagserbi nga impabaklay ti turay kadagiti umili.

Idi umuna a siglo C.E., ti Israel ket sakup dagiti Romano. Puersaenda dagiti tattao ken animal nga agtrabaho para kadakuada wenno ipaaramidda ti aniaman a nasken tapno alisto a maileppas dagiti trabaho ti gobierno. Kas pagarigan, impilit dagiti Romano a soldado nga ibaklay ni Simon a taga-Cirene ti kayo a pagtutuokan ni Jesus agingga iti lugar a pakabitayanna. (Mateo 27:32) Naulpit ti kasta nga aramid ket di magustuan ken kagurgura dagiti Judio.

Saantayo nga ammo no kasano kaadayo ti masapul a lasaten dagiti umili a naobligar nga agbagkat. Ngem siempre, asino koma ti mayat a mapan iti ad-adayo ngem iti makalikaguman? Isu nga idi dinakamat ni Jesus ti ipapan iti ‘maikadua a milia,’ ibagbagana kadagiti dumdumngeg a situtulok koma nga aramidenda dagiti serbisio a kalikaguman dagiti agtuturay.​—Marcos 12:17.

Asino ti Anas a nadakamat kadagiti salaysay ti Ebanghelio?

▪ Iti Biblia, nadakamat ni Anas (Ananus) kas “panguluen a padi,” ket kasta pay laeng ti akemna idi naisaklang ni Jesus. (Lucas 3:2; Juan 18:13; Aramid 4:6) Isu ti katugangan ni Caifas a nangato a padi ti Israel. Nagserbi met ni Anas kas nangato a padi idi agarup 6 wenno 7 C.E. agingga idi agarup 15 C.E., idi inikkat ti Romano a prokurador a ni Valerius Gratus. Ngem kas dati a nangato a padi, napigsa pay laeng ti impluensiana iti Israel. Nagbalin met a nangato a padi ti lima kadagiti annakna ken ti manugangna.

Idi agwaywayas pay ti nasion ti Israel, saan a masukatan ti nangato a padi agingga a matay. (Numeros 35:25) Ngem idi sinakup dagiti Romano ti Israel, dagiti gobernador ken dagiti ari a dinutokan ti Roma ti nagpili iti agserbi a nangato a padi, ket mabalinda a sukatan dayta iti kanito a kayatda. Sigun iti historiador a ni Flavius Josephus, ti Romano a gobernador ti Siria a ni Quirinio inikkatna ti nangato a padi nga agnagan Joazar idi agarup 6 wenno 7 C.E. ket insukatna ni Anas. Ngem agparang a dagiti mismo a papadi ti nangpilian dagitoy a pagano nga agtuturay iti dinutokanda a nangato a padi.

Pagaammo a nakaag-agum ken nakabakbaknang ti pamilia ni Anas. Mabalin a bimmaknangda gapu ta binukodanda dagiti tagilako iti paraangan ti templo​—kas iti maidaton a kalapati, karnero, lana, ken arak. Kinuna ni Josephus a ni Ananus (Ananias) nga anak ni Anas ket “addaan kadagiti nakadakdakes nga adipen a mangagaw kadagiti apagkapullo ti papadi; ket kabilenda dagidiay agkedked a mangted.”