Maaram Ka Ba?

Ano an iginpapasabot ni Jesus han sumiring hiya nga upod hin duha ka milya?

▪ Ha bantogan nga Sermon ni Jesus ha Bukid, hiya siniring: “Bisan hin-o an maglugos ha imo paglakat hin usa ka milya, upod ha iya hin duha.” (Mateo 5:41) Posible nga iginkaw-ing han mga mamarati ni Jesus ito nga mga pulong ha obligado nga pagserbisyo nga mahimo igpirit han may awtoridad ha mga tuminungnong.

Ha siyahan nga siglo K.P., an Israel sakop han mga Romano. Salit diri hira nag-aalang ha pagpatrabaho han mga kalalakin-an o mga hayop, o ha pagkontrol han bisan ano nga ha ira hunahuna kinahanglan basi mapalaksi an trabaho. Pananglitan, gin-obligar han Romano nga mga sundalo hi Simon han Sirene nga pas-anon an pasakitan nga kahoy ni Jesus ngadto ha lugar diin papatayon hi Jesus. (Mateo 27:32) An sugad nga pamirit matalumpiguson, ngan nasisina gud hito an mga Judio.

Diri kita maaram kon tubtob ha ano nga kahirayo mahimo pwersahon an usa ha pagpas-an hin usa ka butang. Kondi, baga hin imposible nga maruyag ito pagpas-an hin sobra pa kay han gin-oobligar hito. Salit han ginsidngan ni Jesus an iya mga mamarati nga umupod hin duha ka milya, siring pa, karuyag niya ipasabot ha ira nga sadang nira himoon nga malipayon an mga serbisyo nga makatadunganon nga iginpapabuhat han awtoridad.—Markos 12:17.

Hin-o an Anas nga ginhisgotan ha rekord han Ebanghelyo?

▪ Han ginbista hi Jesus, hi Anas (Ananus) an gin-unabi nga ‘gihitaasi nga saserdote.’ (Lukas 3:2; Juan 18:13; Buhat 4:6) Ha pagkamatuod, hiya an ugangan nga lalaki han hitaas nga saserdote han Israel nga hi Kaipas, kondi hiya liwat an hitaas nga saserdote tikang han mga 6/7 K.P. tubtob han mga 15 K.P. han paiwason hiya ha katungdanan ni Gobernador Valerius Gratus han Roma. Bisan pa hito, tungod han naglabay nga katungdanan, nagpadayon an iya impluwensya. Lima han iya anak nga lalaki ngan usa nga umagad an nagin hitaas nga saserdote liwat.

Han independente pa an nasud han Israel, nagpapabilin ha serbisyo an hitaas nga saserdote ha iya bug-os nga kinabuhi. (Numeros 35:25) Kondi han masakop na ini han Roma, an serbisyo han hitaas nga saserdote nadepende ha mga gobernador han Roma ngan ha mga hadi nga iginbutang ha pwesto han Roma, ngan mahimo nira ito paiwason ha katungdanan. An historyador nga hi Flavius Josephus nagsiring nga ginpaiwas ha katungdanan ni Quirinius, nga Romano nga gobernador han Sirya, hi Joazar nga usa nga hitaas nga saserdote han mga 6/7 K.P. ngan iginliwan hi Anas. Kondi baga hin matin-aw nga tikang gihap ha mga saserdote pumili ini nga mga pagano nga magmarando hin bag-o nga hitaas nga saserdote.

An pamilya ni Anas duro kahakog ngan sobra kariko. Posible nga nagriko hira tungod kay kontrolado nira an pagbaligya han mga ginkikinahanglan ha paghalad, sugad han sarapati, karnero, lana, ngan alaksiw. Hi Josephus nagsiring nga hi Ananus (Ananias), anak nga lalaki ni Anas, may “mga uripon nga abusado ngan namimirit ha pagkuha han ikanapulo ka bahin han mga saserdote ngan diri nag-aalang pagkastigo hadton nadiri paghatag.”