Diosar jakʼachasipjjam

“Kuttʼanjjañ munta, mayamp katoqtʼjjeta”

¿Jumajj Jehová Diosan markap taypinkayätati? Inas kuttʼanjjañ amtasksta, ukampis Jehová Diosajj janjakiw mayamp katoqkitaspati sasin inas amuysta. Ukhamächi ukhajja, aka yatichäwi ukat akjjar yatichäwiki uksa, sum yatjjatañamatakiw chamañchtʼapjjsma, uka yatichäwinakajj jumatak wakichtʼatawa.

“JAN wali luratanakajat perdonita ukat juman ukaruw kuttʼanjjañ wal munta” sasaw mä warmejj Diosar oracionan mayisïna. Jupajja, Diosan markap taypins jilsuwaykchïnjja, qhepatjj jitheqtjjataynawa. Qhawqhsa tʼaqhespachäna ukat chuymaps usuyaspachän ¿uk amuytati? Inas jumajj akham jisktʼasiraksta: ¿Diosajj jupanakat sintʼaspachati ukat amtasiskarakpachati? jan ukajj ¿Jupar jakʼachasisin kuttʼanjjapjjañap munpachäti? sasa. Uk amuyañatakejj kuna chuymachäwis Jeremías qellqatan utji uk jichhajj uñjañäni (Jeremías 31:18-20 liytʼäta).

Kunapachas uka arunakajj qhanañchasïna uk jichhajj uñjañäni. Janïr Jeremiasajj naskäna ukhajja, Jehová Diosajj israelitanakar ukhamak apanuküna. Ukatwa asirionakajj Israelan 10 tribunakap katuntata 740 maran apjjapjjäna. * Jupanakajja jachʼa juchanakwa lurasipkäna, ukat janirakiw Jehová Diosan khitanit profetanakaparus istʼapkänti, ukatwa Diosajj jupanakar yatichañatakejj jaytanuküna (2 Reyes 17:5-18). Ukham yaqha markankasinjja, ¿kunjamakis Diosar jaytasina ukat oraqenakap jaytasas jikjjatasipjjpachäna? ¿Jan wali luratanakapat arrepentisipjjpachänti? ¿Diosajj jupanakat armasjjpachänti? Ukat ¿mayamp jupanakar katoqaskakispati?

‘Walpun amtasta’

Israelitanakajj jan wali luräwinakapat amuyasipjjänwa: Ukham jaytanukuta ukat yaqha markan uñjasisajja, amuyasisin juchanakapat arrepentisipjjänwa. Ukat Jehová Diosajj ukham taqe chuym arrepentisipjjatapjja, sum amuyarakïna. Uk sum amuyañatakejj kunjamsa Jehová Diosajj israelitanakat parläna uk jichhajj uñjañäni. Israelitanakat parlañatakejja Efraín sutwa ayti.

“Efraín markan tʼaqhesitapjja istʼtwa.” (18 jiskʼa tʼaqa.) Kunjamsa israelitanakajj jan wali luratanakapat tʼaqhesipjjäna ukjja Diosajj sum istʼäna. Mä hebreo diccionarionjja, ‘tʼaqhesiña’ sasinjja, ‘pʼeq khiwiña’ sañ muni, kunjamtï mä munañaparjam sarnaqer wawajj jan walin uñjasisajj utapar kuttʼjjañ wal munkejja ukhama (Lucas 15:11-17). Ukhamajj ¿kunjamsa israelitanakajj tʼaqhesitap uñachtʼayapjjäna?

‘Nayajj mä uri waka qallur uñtatayatwa, ukampis jumajj manso tukuyistajja.’ (18 jiskʼa tʼaqa.) Israelitanak pachpaw ‘ukham tʼaqhesiskañasajj wakisipuniwa’ sasajj sapjjäna. Inas ukham sarnaqatapatjja mä uri wakaqallupkaspas ukham amuyasipjjchïna. Cheqansa, mä uri wakaqallurojja, chicotemp jawqʼantasaw yatichapjjerïna sasaw mä qellqatajj qhanañchi.

“Juman ukaru kuttayanjjeta, jumataw [Jehová] Tatitujjajja, Diosajjasa.” (18 jiskʼa tʼaqa.) Taqe chuymapuniw arrepentisipjjäna, ukatwa Diosar ukham achiktʼasipjjäna. Cheqansa Diosat jitheqtasinjja, kunayman juchanak lurapjjäna.  Ukampisa, Jupan perdonapwa munapjjäna, ukatwa Jupar yanapa mayipjjarakïna.

“Nayajj [...] phenqʼachata, jiskʼachjatarakiw uñjasta.” (19 jiskʼa tʼaqa.) Israelitanakajj ukham juchanak lurapjjatapatjja, wal pisayasipjjäna. Ukat wali llakita ukat qʼala aynachtʼata ukhamapjjänwa (Lucas 15:18, 19, 21).

Cheqansa, taqe chuymaw arrepentisipjjäna. Ukat wali phenqʼachat uñjasisajja, taqe juchanakap Diosar yatiyapjjäna. Ukat janiw ukham sarnaqjjapjjänti. Ukhamajj ¿uk lurapjjatapatakti Diosajj perdonaspäna ukat oraqepar kuttʼayjjaspäna?

‘Juparojj khuyapayapunïwa’

Jehová Diosajj israelitanakarojj wal munasïna. “Efrainasti jilïri yoqall wawajarakiwa” sasaw Jeremías 31:9 qellqatajj qhanañchi. Ukhamajj taqe chuyma arrepentisir wali munat wawapar ¿kunjamarak mä awkejj jan perdonkaspasti? Uk amuyañatakejja, Diosajj kunjamsa markapar munasi ukjja aka arunakampiw uñachtʼayäna.

“Efraín markajj nayatakejj munat wawajjawa; taqenit sipansa sinti munat wawajjawa. Juparu roncantka ukasa, janipuniw nayajj jupatjja armaskti” (20 jiskʼa tʼaqa.) Uka arunakajj wali sumapuniwa. Cheqasa, Jehová Diosajj wali munasir Awkiwa. Ukampis jan istʼapkäna ukhajja, jan pächasisaw ewjjtʼäna, ukhamarak kuntï jupanak contra arskäna uksa phoqharakïnwa. Ukatwa kunapachatï israelitanakajj ewjjtʼanakapar jan istʼañ munapkäna ukhajja, Jehová Diosajj yaqha markar apatañapatakiw jaytanuküna. Ukhamäkchïn ukhasa, janiw jupanakat armaskänti kunjamtï mä munasir awkejj wawapat jan armaskejja ukhama. ¿Markapar taqe chuym arrepentisir uñjasajj kunjamas jikjjatasïna?

“Chuymajjajj chʼalljjtituwa, jupatsti walpun khuyapayasiraktjja.” (20 jiskʼa tʼaqa.) Jehová Diosajja, wawanakapan kuttʼaniñapjja wal munaskäna. Niyakejay jupanakajj taqe chuym arrepentisipchïnjja, Diosan chuymapjj chʼallytayapjjänwa, ukatwa wawanakapan kuttʼaniñapjja wal munäna. Kunjamtï herencia tukuntir waynan awkipajj wawapat wal khuyaptʼayasïnjja, ukhamarakiw Jehová Diosajj wawanakapat wal “khuyaptʼayasi” (Lucas 15:20). Ukat wawanakap kuttʼaniñapjja wal suyarakïna.

“Kuttʼaniñatakejj Diosaw yanaptʼitu”

Jeremías 31:18-20 jiskʼa tʼaqanakanjja, Jehová Diosajj kunja munasirisa ukat khuyapayasirisa uk amuyañwa yanaptʼistu. Jupajj janiw khitinakatï mä tiemponjj sum loqtapjjäna ukat qhepat jitheqtawayjjapjje ukanakat armaskiti. Jupanakatï kuttʼaniñ munapjjchejja, juch ‘pampachañatakejj’ jan ukajj perdonañatakejj Jehová Diosajj jankʼakiwa (Salmo 86:5). Khitinakatï taqe chuyma arrepentisis kuntʼanjjapjje ukanakatjja janiw armaskiti (Salmo 51:17). Jan ukasti wali kusisit chuymampiw katoqe (Lucas 15:22-24).

¿Qalltan parlkayätan uka warmit amtasktati? Jupajja Diosan markapar kuttʼañ wal munäna, ukatwa kawkhantï jakaskäna uka cheqanjja, Jehová Diosan Qhanañchirinakapan tamapar yanap mayïna. Qalltanjja “janjakiw Diosajj perdonkitaspati”, sasaw ajjsarayasïna. Ukampisa irpir chuymaninakaw Diosar sum loqtjjañapatakejj yanaptʼapjjäna. Qhepatjja, akham sasaw taqe chuym arstʼasi: “Kuttʼaniñajatakejj Jehová Diosaw yanaptʼitu ukat walpun yuspärta” sasa.

Jumatï Diosan markapat jitheqtawaysta ukampis jichhajj kuttʼaniñ wal munasksta ukhajja, Jehová Diosan Qhanañchirinakapan tamaparuw yanaptʼa mayiñamatakiw chʼamachtʼapjjsma. Janipun ak armasimti Jehová Diosajj khititï “Kuttʼanjjañ munta, mayamp katoqtʼjjeta” sasin taqe chuym arrepentisisin Jupar jakachasipki ukanakarojja, munasiñampiw katoqjje.

[Qhanañchäwi]