Ika daw dating naglilingkod kaidto ki Jehova? Pinag-iisipan mo daw na maglingkod giraray sa saiya pero dai ka segurado kun baga aakoon ka nia? Maingat tabing basahon an artikulong ini asin an saro pa na kasunod. Isinurat an mga ini na ika nanggad an nasa isip.

“NAMIBI ako ki Jehova na logod togotan nia akong bumalik asin patawadon huling nakolgan ko sia.” Iyan an sabi nin sarong babae na naparayo sa saiyang dinakulaan na Kristianong mga pamantayan. Namamatean mo daw an nasa puso nia? Naiisip mo daw: ‘Ano an heling nin Dios sa mga dating naglilingkod kaidto sa saiya? Nagigirumdoman pa daw nia sinda? Gusto pa daw nia sindang “bumalik”?’ Tanganing masimbag an mga hapot na iyan, pag-adalan niato an mga tataramon na isinurat ni Jeremias. Siertong maoogma ka sa simbag.​—⁠Basahon an Jeremias 31:​18-20.

Estudyare an kamugtakan kan isurat ini ni Jeremias. Kan 740 B.C.E., mga dekada bago kan panahon ni Jeremias, pinabayaan ni Jehova na mabihag kan mga Asirio an sampulong tribong kahadean nin Israel. * Itinogot nin Dios an kapahamakan na ini bilang disiplina huling an saiyang banwaan na Israel nagkasala nin grabe, na binaliwala an paorootrong patanid kan mga propeta nia. (2 Hade 17:​5-18) Nakapabago daw sa sainda an kasakitan huli sa pagkadistiero, kan sinda suway sa saindang Dios asin harayo sa dagang tinuboan ninda? Talaga daw na nalingawan na sinda ni Jehova? Aakoon pa daw nia sinda pagbalik ninda?

“Nagsolsol Ako”

Mantang nasa pagkabihag, nakapag-isip-isip an mga Israelita asin napahiro na magsolsol. Dai binaliwala ni Jehova an saindang odok sa pusong pagbasol. Helinga an sinabi ni Jehova dapit sa atitud asin saboot kan desteradong mga Israelita, na bilang sarong grupo inapod na Efraim.

‘Nadangog ko si Efraim na naghihinanakit,’ an sabi ni Jehova. (Bersikulo 18) Nadangog nia an mga Israelita mantang nagtatangis sinda huli sa mga epekto kan kasalan ninda. An terminong “naghihinanakit” o nananambitan puedeng mangahulogan nin “pagtanyog o pagyugyug,” an sabi nin sarong parasiyasat. Arog sinda sa sarong sutil na aki na nagpipilingpiling huli sa pagbasol mantang naiisip nia an kasakitan na kagigibohan nia mismo asin hinahanaphanap an dati niang buhay sa saindang harong. (Lucas 15:​11-17) Ano an sinasabi kan mga Israelita?

“Hinampak mo ako . . . na garo sarong ogbon nin baka na dai pa minaboot.” (Bersikulo 18) Inadmitir ninda na angay sindang disiplinahon. Kun sa bagay, sinda siring sa ogbon na baka na dai pa namanso. An pagkakaagid na ini puedeng mangahulogan na sinda siring sa sarong ogbon na baka na dai kutana “pinakol nin sogkod na pang-alaw kun kan primero inako na kaini an sakal,” an sabi nin sarong reperensia.

“Birika ako, asin ta mabibirik ako; huli ta ika si Jehova na sakuyang Dios.” (Bersikulo 18) An mga Israelita nagpakumbaba asin nag-apod sa Dios.  Nalagalag sinda huli sa pagkakasala ninda, pero ngonyan nakikimaherak sindang tabangan na makabalik sa pabor nin Dios. An sarong bersion kan Biblia nagsasabi: “Ika an samong Dios​—⁠togoti man tabi kaming bumalik.”​—⁠Contemporary English Version.

‘Nagsolsol ako, nasupog ako, asin naribaraw ako.’ (Bersikulo 19) Namondo an mga Israelita huling nagkasala sinda. Inako ninda na sinda an dapat basolon asin inadmitir an kasalan ninda. Sinda nasupog asin pinangluyahan man nin boot, na garo man sana tinutubtob an saindang daghan.​—⁠Lucas 15:​18, 19, 21.

Nagsolsol an mga Israelita. Sinda nagmondo nanggad, nagtuga kan saindang mga kasalan sa Dios, asin tuminalikod sa maraot na mga gibo ninda. Mapapalumoy daw kan saindang pagsolsol an puso nin Dios? Totogotan pa daw nia sindang bumalik?

‘Magkakaigwa Nanggad Ako sa Saiya nin Pagkaherak’

Si Jehova may espesyal na pagpadangat sa mga Israelita. Sia nagsabi: ‘Huli ta sa Israel ako an Ama, saka an Efraim iyo an sakuyang panganay.’ (Jeremias 31:⁠9) Paano masasayumahan nin mamomoton na ama an sarong aki na an puso tunay na nagbabasol? Helinga kun paano ipinapahayag ni Jehova an saiyang arog sa amang saboot para sa banwaan nia.

‘Bakong si Efraim mahal na aki sa sakuya? Bakong si Efraim makawiwiling aki? Tara poon kan pagtaram ko dapit sa saiya, danay ko siang nagigirumdoman.’ (Bersikulo 20) Mapagpadangat nanggad na mga tataramon iyan! Arog sa sarong marigon pero mamomoton na magurang, kaipuhan nin Dios na magtaram tumang sa saiyang mga aki, na paorootrong pinapatanidan sinda dapit sa mga kasalan ninda. Kan sinda habo nanggad na magdangog, pinabayaan nia sindang madistiero​—⁠na garo man sana sinda pinahale sa harong. Pero, dawa ngani kaipuhan nia sindang padusahan, dai nia sinda liningawan. Dai nia noarin man iyan magigibo. Dai malilingawan nin mamomoton na ama an mga aki nia. Pero, ano daw an namatean ni Jehova kan maheling nia an tunay na pagsolsol kan saiyang mga aki?

‘An sakuyang tulak nagkataranyog nin huli saiya. * Magkakaigwa nanggad ako sa saiya nin pagkaherak.’ (Bersikulo 20) Napungaw nanggad si Jehova sa mga aki nia. Napahiro an puso nia huli sa sinserong pagsolsol ninda, asin talagang hinidaw nia an pagbalik ninda sa saiya. Arog kan ama sa parabola ni Jesus dapit sa gastador na aki, ‘napahiro nin pagkaherak’ si Jehova asin gustong-gusto niang akoon giraray an mga aki nia.​—⁠Lucas 15:⁠20.

‘Jehova, Togoti Man Akong Bumalik!’

An mga tataramon sa Jeremias 31:​18-20, nagtatao sa sato nin pakasabot sa mapagpadangat na pagmalasakit asin pagkaherak ni Jehova. Dai linilingawan nin Dios an mga dating naglilingkod kaidto sa saiya. Kumusta kun sinda gusto nang bumalik sa saiya? An Dios ‘mapagpatawad.’ (Salmo 86:⁠5) Nungka niang sasayumahan an mga minabalik sa saiya na may pusong nagsosolsol. (Salmo 51:17) Sa kabaliktaran, naoogma siang akoon giraray sinda.​—⁠Luke 15:​22-24.

An babae na sinambit sa enotan nagsadiring boot na bumalik ki Jehova asin nagbisita sa lokal na kongregasyon kan Mga Saksi ni Jehova. Kan primero, kaipuhan niang pangganahan an saiyang negatibong saboot. “Pagmate ko mayo na akong halaga,” an nagigirumdoman nia. Pero, pinakosog sia kan mga elder sa kongregasyon asin tinabangan siang ikabalik an saiyang relasyon sa Dios. Huli sa pusong pano nin pag-apresyar, sia nagsabi, “Maogmahon ako na tinogotan ako ni Jehova na bumalik sa saiya!”

Kun ika dating naglilingkod kaidto ki Jehova asin pinag-iisipan mong maglingkod giraray sa saiya, iniimbitaran mi ika na magbisita sa kongregasyon kan Mga Saksi ni Jehova sa lugar nindo. Girumdomon mo na si Jehova nagmamalasakit asin naheherak kun an mga nagsosolsol minaarang sa saiya, “Togoti man tabi kaming bumalik.”

Isinusuherir na babasahon sa Biblia para sa Abril:

▪ Jeremias 17-31

[Mga Nota sa Ibaba]