Nag-alagad ka ba kang Jehova kaniadto? Nakahunahuna ka ba sa pag-alagad kaniya pag-usab apan nagduhaduha kon dawaton ka pa niya? Palihog basahag maayo kining artikuloha ug ang mosunod pa niini. Para gyod ni nimo.

“AKO nag-ampo kang Jehova nga unta iya kong pabalikon ug pasayloon sa akong nahimong sala.” Mao nay giingon sa usa ka babaye nga mihunong pag-alagad sa Diyos. Naluoy ka ba niya? Naghunahuna ka ba: ‘Unsay pagbati sa Diyos niadtong nag-alagad niya kaniadto? Nahinumdom ba siya nila? Gusto ba niyang pabalikon sila?’ Sa pagtubag niana, atong susihon ang giingon ni Jeremias. Seguradong matandog ka sa tubag.—Basaha ang Jeremias 31:18-20.

Tagda ang kahimtang sa dihang gisulti kana ni Jeremias. Sa 740 B.C.E., daghang dekada una pa sa adlaw ni Jeremias, gitugotan ni Jehova nga ang napulo ka tribong gingharian sa Israel mabihag sa mga Asiryanhon. * Gitugotan niya kadto isip disiplina kay ang iyang katawhan nakahimog grabeng mga sala, nga wala manumbaling sa sublisubling pasidaan sa iyang mga propeta. (2 Hari 17:5-18) Nag-usab ba ang katawhan tungod sa kalisdanan nga naagoman nila sa ilang pagkabihag, sa dihang sila nahimulag sa Diyos ug halayo sa ilang yutang natawhan? Nakalimtan na ba sila ni Jehova? Dawaton ba niya sila pag-usab?

“Ako Nagbasol”

Ang katawhan nakaamgo tungod sa ilang pagkabihag ug natukmod sa paghinulsol. Namatikdan ni Jehova ang ilang kinasingkasing nga paghinulsol. Pamati samtang gihubit ni Jehova ang tinamdan ug pagbati sa nabihag nga mga Israelitas, nga sa tingob gitawag ug Epraim.

“Nadungog ko gayod si Epraim nga nagbakho,” miingon si Jehova. (Bersikulo 18) Iyang nadunggan ang pagtuaw sa mga Israelitas tungod sa epekto sa ilang makasasalang dalan. Ang pulong nga ‘pagbakho’ mahimong magkahulogag “pagkurog o pag-uyog-uyog,” matod sa usa ka eskolar. Sama silag makasasalang anak nga nagpanglingo tungod sa grabeng kaguol samtang naghunahuna siya sa kalisdanan nga gipahinabo niya sa iyang kaugalingon ug nangandoy sa iyang kinabuhi kaniadto. (Lucas 15:11-17) Unsay giingon sa katawhan?

“Gitul-id mo ako . . . sama sa usa ka nating baka nga wala mamanso.” (Bersikulo 18) Gidawat sa katawhan nga sila angayng disiplinahon. Kon buot hunahunaon, sila nahisamag nating baka nga wala mamanso. Kini nga pagtandi lagmit nagpasabot nga sila nahisamag nating baka nga dili gayod unta “masakitan kon wala pa kini mosuki,” matod sa usa ka reperensiya.

“Pabalika ako, ug ako andam nga mobalik, kay ikaw mao si Jehova nga akong Diyos.” (Bersikulo 18) Kay sila nagmapainubsanon, ang katawhan misangpit sa Diyos. Nahisalaag sila tungod sa ilang makasasalang dalan, apan karon sila mituaw alang sa tabang aron mabatonan pag-usab ang iyang pag-uyon. Ang usa ka hubad nag-ingon: “Ikaw  ang among Diyos—palihog pabalika kami.”—Contemporary English Version.

“Ako nagbasol. . . . Ako naulaw, ug ako mibating napaubos usab.” (Bersikulo 19) Ang katawhan nagbasol kay sila nakasala. Ilang giangkon ang ilang kasaypanan. Samag nagpamukpok sa ilang dughan, mibati usab silag kaulaw ug tumang kaguol.—Lucas 15:18, 19, 21.

Ang mga Israelitas mahinulsolon. Sila naguol pag-ayo, nagsugid sa ilang mga sala ngadto sa Diyos, ug mibiya sa ilang daotang dalan. Malukmay kaha ang Diyos sa ilang paghinulsol? Tugotan kaha niya sila sa pagbalik kaniya?

“Kaluy-an Ko Gayod Siya”

Si Jehova adunay linaing relasyon sa mga Israelitas. Siya miingon: “Ako nahimong Amahan sa Israel; ug bahin sa Epraim, siya akong panganay.” (Jeremias 31:9) Makaako kaha ang usa ka mahigugmaong amahan nga dili dawaton pag-usab ang anak nga sinserong naghinulsol? Matikdi kon giunsa pagpahayag ni Jehova ang iyang Amahanong pagbati ngadto sa iyang katawhan.

“Si Epraim ba usa ka bililhong anak alang kanako, o usa ka pinangga nga bata? Kay sa sukod nga ako magasulti batok kaniya ako sa walay pakyas maghinumdom kaniya nga dugang pa.” (Bersikulo 20) Makapatandog kanang mga pulonga! Sama sa usa ka estrikto apan mahigugmaong ginikanan, ang Diyos naobligar sa pagsulti “batok” sa iyang mga anak, nga balikbalik nga nagpasidaan kanila bahin sa ilang makasasalang dalan. Sa dihang wala gayod sila mamati, gitugotan niya silang mabihag—sa ingon, nagpalayas kanila. Apan bisag kinahanglan niya silang silotan, wala siya malimot kanila. Dili gayod niya kana mahimo. Ang usa ka mahigugmaong amahan dili makalimot sa iyang mga anak. Apan, unsay gibati ni Jehova sa dihang nakita niya ang tinuod nga paghinulsol sa iyang mga anak?

“Ang akong ginhawaan nagsaba alang kaniya. * Kaluy-an ko gayod siya.” (Bersikulo 20) Gihandom pag-ayo ni Jehova ang iyang mga anak. Ang ilang sinserong paghinulsol nakatandog sa iyang kasingkasing, ug siya nangandoy gayod nga sila mobalik kaniya. Sama sa amahan sa sambingay ni Jesus sa mausikong anak, si Jehova “giabot ug kaluoy” ug naghinamhinam sa pagdawat pag-usab sa iyang mga anak.—Lucas 15:20.

“Gipabalik Ako ni Jehova!”

Ang mga pulong sa Jeremias 31:18-20 makatabang nato nga masabtan ang pagkamabination ug pagkamaluluy-on ni Jehova. Ang Diyos dili malimot niadtong nag-alagad niya kaniadto. Komosta kon buot na nilang mobalik kaniya? Ang Diyos “andam sa pagpasaylo.” (Salmo 86:5) Dili gayod niya isalikway kadtong moduol niya nga may mahinulsolong kasingkasing. (Salmo 51:17) Sa kasukwahi, siya malipay sa pagdawat pag-usab kanila.—Lucas 15:22-24.

Ang babayeng gihisgotan sa sinugdan mihimog lakang sa pagbalik kang Jehova ug mitambong sa usa ka kongregasyon sa mga Saksi ni Jehova sa ilang dapit. Sa sinugdan, kinahanglang buntogon niya ang negatibong pagbati. “Gibati nako nga dili ko takos,” siya nahinumdom. Apan siya gidasig sa mga ansiyano sa maong kongregasyon ug gitabangang molig-on pag-usab sa espirituwal. Kay mapasalamaton kaayo, siya miingon, “Makapalipay gayod nga gipabalik ako ni Jehova!”

Kon nag-alagad ka kang Jehova kaniadto ug naghunahunang moalagad pag-usab kaniya, gidapit ka namo sa pagtambong sa kongregasyon sa mga Saksi ni Jehova sa inyong dapit. Hinumdoming si Jehova maluoy gayod sa dihang ang mga mahinulsolon mohangyo kaniya, “Palihog pabalika kami.”

SUGYOT NGA PAGBASA SA BIBLIYA SA ABRIL:

▪ Jeremias 17–31

[Mga footnote]