San̄a Kpere Abasi

“Mbọk Yak Ifiak Inyọn̄ Ibịne Fi”

Ndi afo ama esinam n̄kpọ Jehovah ini kiet ko? Ndi ọdọn̄ fi ndifiak nnam edi ufiọkke m̀mê enye ayadara fi. Mbọk nen̄ede kot ibuotikọ emi ye enye oro etienede. Ẹwet ibuotikọ iba emi ẹnọ fi.

“EYENAN̄WAN kiet, emi eketrede ndidu uwem nte Ikọ Abasi emi ẹkedade ẹkpep n̄kpọ enye toto ke edet iba etemede, ọkọdọhọ ete: “Mma mbọn̄ akam n̄kpe Jehovah ubọk nte enye ayak mi mfiak nnyọn̄ mbịne enye, nnyụn̄ mben̄e enye nte efen ọnọ mi ke ndikanam esịt ayat enye.” Ndi mbọm eyenan̄wan emi anam fi? Ndi emesikere m̀mê Abasi ese didie mbon oro ẹkesinamde n̄kpọ esie ke eset? Ndi enye ke eteti mmọ, mîdịghe ndi enye oyom mmọ ‘ẹfiak ẹtiene imọ?’ Ẹyak idụn̄ọde mme ikọ emi Jeremiah ekewetde inyụn̄ ida mmọ ibọrọ mme mbụme emi. Esịt eyenem fi ndidiọn̄ọ ibọrọ mbụme emi.—Kot Jeremiah 31:18-20.

Kere ban̄a ini ye se ikanamde Jeremiah ewet ikọ emi. Ke isua 740 M.E.N., oro edi ediwak isua mbemiso Jeremiah amana, Jehovah ama ayak mbon Assyria ẹda obio ubọn̄ esien Israel duop ẹka ntan̄mfep. * Emi ama adian̄ade mmọ ọkpọn̄ Abasi mmọ. Abasi akayak ẹmia ikọt esie ufen emi sia mmọ ẹkenamde ikpọ idiọkn̄kpọ, mîkonyụn̄ inyịmeke ndinam se mme prọfet oro Enye ọkọdọn̄de utom ọnọ mmọ ediwak ini ẹketịn̄de. (2 Ndidem 17:5-18) Ndi ufen emi mmọ ẹkebọde ke ntan̄mfep mi ama anam mmọ ẹkabade esịt? Ndi Jehovah ama efre ofụri ofụri aban̄a mmọ? Ndi enye eyenyịme mmọ ẹfiak ẹtiene imọ?

“Mma Ntua N̄kpọfiọk”

Enyịn ama edin̄wan̄a mmọ ke ini mmọ ẹkedude ke ntan̄mfep, ndien emi ama anam mmọ ẹkabade esịt. Jehovah ama okụt ke mmọ ẹnen̄ede ẹkabade esịt. Jehovah akada enyịn̄ esien oro akawakde akan okot mmọ. Kop ndien nte enye eketịn̄de nte eketiede mmọ nditọ Israel oro ẹketan̄de ẹka ntan̄mfep do ke idem.

Jehovah ọkọdọhọ ete: “Ke akpanikọ mmokop nte Ephraim esemede idem.” (Ufan̄ikọ 18) Jehovah ama okop nte nditọ Israel emi ẹkesemede idem ẹban̄a idiọkn̄kpọ emi mmọ ẹkenamde. Ata anam ndụn̄ọde kiet ọdọhọ ke ikọ oro “esemede idem” ekeme ndiwọrọ owo ndifụn̄ ibuot. Mmọ ẹketie nte idiọk eyen emi ofụn̄de ibuot ke ini enye ekerede aban̄a kpukpru edịm emi enye okotde ọbọn̄ idem onyụn̄ oyomde ndifiak n̄ketie nte enye eketiede. (Luke 15:11-17) Nditọ Israel emi ẹkedọhọ didie?

“Afo emenen̄ede mi . . . nte eyen enan̄ oro owo mînọhọ ukpep.” (Ufan̄ikọ 18) Mmọ ẹma ẹdiọn̄ọ ke mmimọ imodot ndibọ ntụnọ oro. N̄wed ndụn̄ọde kiet ọdọhọ ke ikọ emi ọwọrọ ke mmọ ẹkebiet eyen ayaraenan̄ oro owo “mîkpekeyịbike edieke enye mîkpọkọsọn̄ke ibuot ifọrọde ke ọkpọnọ.”

“Nam mi mfiak edem, ndien ami nyọsọsọp  mfiak edem, koro afo edide Jehovah Abasi mi.” (Ufan̄ikọ 18) Mmọ ẹma ẹsụhọde idem ẹseme ẹkot Abasi. Mmọ ẹkesop usụn̄ ke ntak idiọkn̄kpọ, edi idahaemi mmọ ẹma ẹkpe Abasi ubọk ẹte an̄wam mmimọ ifiak itiene Enye. Bible kiet esịn ufan̄ikọ emi ntem: “Afo edi Abasi nnyịn. Mbọk yak ifiak inyọn̄ ibịne fi.”—Contemporary English Version.

“Mma . . . ntua n̄kpọfiọk. . . . Mma n̄kop bụt, ye esuene n̄ko.” (Ufan̄ikọ 19) Mmọ ẹma ẹtua n̄kpọfiọk ke ndikanam idiọkn̄kpọ. Mmọ ẹma ẹnyịme idiọkn̄kpọ mmọ. Bụt ama enen̄ede anam mmọ.—Luke 15:18, 19, 21.

Nditọ Israel ẹma ẹkabade esịt. Mmọ ẹma ẹtua n̄kpọfiọk, ẹyarade idiọkn̄kpọ mmọ ẹnọ Abasi, ẹnyụn̄ ẹwọn̄ọde ẹkpọn̄ idiọk usụn̄ mmọ. Ndi mmọ ndinam kpukpru emi ama anam Abasi efen ọnọ mmọ? Ndi enye ayayak mmọ ẹfiak ẹtiene imọ?

“Ami Nditreke Nditua Enye Mbọm”

Jehovah ama enen̄ede ama nditọ Israel. Enye ọkọdọhọ ete: “Mmakabade ndi Ete nnọ Israel; ndien amaedi Ephraim, enye edi akpan mi.” (Jeremiah 31:9) Ete emi amade eyen esie akpasasan̄a didie etre ndidara eyen esie oro enen̄erede akabade esịt? Kop nte Jehovah etịn̄de nte imade ikọt esie mi.

“Nte Ephraim edi edima eyen ọnọ mi, m̀mê eyen oro ẹnamde n̄kpọ ye enye ke ima? Koro adan̄a nte n̄kọdọhọde idiọk mban̄a enye, kpa ntre ke ami nditọn̄ọ ntak nti enye.” (Ufan̄ikọ 20) O, mme utọ ikọ emi ẹtụk owo didie ntem ke idem! Abasi akanam n̄kpọ kpa nte edima ete oro enyenede iwụk, etịn̄ ikọ ye nditọ esie ediwak ini, odụri mmọ utọn̄ ke idiọkn̄kpọ mmọ ayada mmọ ekesịn ke fehesan̄. Ke ini mmọ ẹkesọn̄de ibuot ẹnyụn̄ ẹsịnde ndikop, enye ayak mmọ ẹka ntan̄mfep. Edi kpa ye oro enye akamiade mmọ ufen, enye ikefreke mmọ. Enye akpanam didie efre mmọ? Ata ete isifreke ndima nditọ esie. Edi eketie Jehovah didie ke idem ke ini enye okokụtde nte nditọ esie ẹnen̄erede ẹkabade esịt?

“Nsia [oyomo] mi aban̄a enye. Ami nditreke nditua enye mbọm.” (Ufan̄ikọ 20) Itọn̄ nditọ esie ama enen̄ede ọdọn̄ Jehovah. Enye ama enem esịt ndikụt nte mmọ ẹnen̄erede ẹkabade esịt, ama onyụn̄ ọdọn̄ enye ndikụt mmọ ẹfiakde ẹtiene imọ. Ukem nte ete idiọk udọ oro Jesus eketịn̄de aban̄a, ‘mbọm mmọ ama anam’ Jehovah, onyụn̄ enem enye ndidara nditọ esie oro ẹnyọn̄de ẹbịne enye.—Luke 15:20.

‘Jehovah Ayak Mi Mfiak Nnyọn̄ Mbịne Enye!’

Se idude ke Jeremiah 31:18-20 owụt nnyịn nte ke Jehovah esitua owo mbọm etieti. Abasi isifreke mbon oro ẹkenamde n̄kpọ esie. Nso ikpetịbe edieke utọ mbon oro ẹyomde ndifiak ntiene enye? Abasi ‘ekpefen ọnọ mmọ.’ (Psalm 86:5) Enye idibịnke mbon emi ẹkabarede esịt ẹfiak ẹtiene enye. (Psalm 51:17) Utu ke oro, esikam enenem enye ndidara mmọ.—Luke 15:22-24.

Eyenan̄wan oro iketịn̄de iban̄a ke ntọn̄ọ do ama afiak etiene Jehovah onyụn̄ aka esop Mme Ntiense Jehovah ke obio mmọ. Akpa kan̄a, ikanaha enye okop ndịk. Enye ọdọhọ ete: “Eketie mi nte ke n̄wọrọke n̄kpọ ndomokiet.” Edi mbiowo esop oro ẹma ẹsịn udọn̄ ẹnọ enye ẹnyụn̄ ẹn̄wam enye ndifiak nnam n̄kpọ Abasi. Enye etịn̄ ye ọyọhọ inemesịt ete: “Enen̄ede enem mi nte Jehovah ayakde mi mfiak nnyọn̄ mbịne enye!”

Edieke edide afo ama esinam n̄kpọ Jehovah ke eset edieke onyụn̄ ekerede aban̄a ndifiak nnam, imesịn udọn̄ inọ fi ite aka esop Mme Ntiense Jehovah. Ti ete ke Jehovah esitua mbon oro ẹkabarede esịt mbọm ke ini mmọ ẹkpede enye ubọk ete, “Mbọk yak ifiak inyọn̄ ibịne fi!”

[Ikọ Idakisọn̄]

Itie Bible Emi Okpokotde ke April:

◼ Jeremiah 17-31