¿Ndépa reservíraʼe yma Jehovápe? Ikatu oime repensa reservi jeývo chupe, péro ndereikuaái nderresivi jeýtapa. Oimérõ reñeñandu upéicha, romokyreʼỹ rehesaʼỹijo hag̃ua ko artíkulo ha pe oúva upe rire, ojejapovaʼekue ndéve g̃uarãite.

PETEĨ kuña heʼi: “Añemboʼe meméva Ñandejárape ha ajerure asy chupe ohejamínte hag̃ua añemoag̃ui jey hese ha che perdonami hag̃ua umi mbaʼe vai ajapovaʼekuére”. Haʼe ningo michĩ guive oĩ Ñandejára organisasiónpe, péro upe rire ou oñemomombyry chugui. ¿Rembyasýpa repensávo mbaʼeichaitépa oiméne ohasa asýraʼe? Ikatu reñeporandu mbaʼépa oiméne Ñandejára oñandu koʼã tapicháre, oimépa imanduʼa hesekuéra, térã oipotápa oñemoag̃ui jey hese. Tuicha nembopyʼaguapýta proféta Jeremías ohaivaʼekue (elee Jeremías 31:18-20).

Ñepyrũrã jahechami mbaʼérõ guarépa ojehai koʼã mbaʼe. Heta tiémpo Jeremías onase mboyve, Jehová oheja umi Asiriaygua ipuʼaka pe rréino de diez trívu rehe oĩva Israélpe, áño 740-pe Jesús ou mboyve. Upérõ umi Asiriaygua ogueraha umi isrraelítape oreko hag̃ua chupekuéra ipoguýpe. a Haʼekuéra ningo ojapovaʼekue oikóvo umi mbaʼe ivai vaivéva Ñandejára renondépe, upévare haʼe oñemoñeʼẽ jey jey chupekuéra umi proféta rupive, ha naiñeʼẽrendúimarõ odesidi okorrehi chupekuéra (2 Reyes 17:5-18). ¿Mbaʼépa oiko chuguikuéra oĩrõ guare mombyry Ñandejára ha hetãgui? ¿Okambiáparaʼe hikuái? ¿Hesaráipa chuguikuéra Jehová? ¿Orresivi jeýnepa chupekuéra?

“Añembyasy”

Umi isrraelíta oĩ aja tetã ambue poguýpe ohechakuaa ojavy hague ha oñearrepenti hikuái. Jehová ohecha oñembyasyha hikuái ipyʼaite guive. Upéva jahechakuaa Jehová heʼivaʼekuére Efraín rehe, orrepresentáva ambue trívupe oĩva Israélpe.

“Ahendúma Efraínpe heʼívo oñembyasyha.” (Versíkulo 18, NM.) Ñandejára ohendu jepi umi isrraelítape mbaʼéichapa oñeñandu umi mbaʼe ohasávare hembiapo vai haguére. Peteĩ diksionário evréo heʼi pe ñeʼẽ “ñembyasy” heʼiseha avei “oñakãmbovava”, ojapoháicha peteĩ taʼýra irrevéldeva ohechakuaávo ojavy hague, oñembyasy ha ouse jey hógape (Lucas 15:11-17). Upéicharõ, ¿mbaʼéichapa umi isrraelíta ohechaukavaʼekue oñembyasyha?

“Chekorrehivaʼekue [...] peteĩ tororaʼy saitéicha.” (Versíkulo 18, NM.) Umi isrraelíta ohechakuaa iporã hague Jehová okorrehi chupekuéra. Oiméne oñembojoja hikuái pe tororaʼy saitére imanduʼágui upeichagua mymba “oikotevẽha pikána” (heʼiháicha peteĩ lívrope).

“Ehejamína taju jey, ha pyaʼe añemoag̃uíta nderehe, nde niko hína Jehová che Jára.” (Versíkulo 18, NM.) Oñearrepenti hikuái ha ombaʼejerure asy Ñandejárape. Haʼekuéra voi oñemomombyry chugui ha ojapo heta mbaʼe  ivaietereíva. Péro oipota Jehová operdona ha oipytyvõ chupekuéra.

“Añembyasy [...]. Atĩeterei ha ndaikuaái mbaʼépa ajapóta.” (Versíkulo 19, NM.) Umi isrraelíta ombyasyeterei umi mbaʼe vai ojapovaʼekue ha ohechakuaa ojavy hague. Ndovyʼavéi ha oñedeprimi hikuái (Lucas 15:18, 19, 21).

Ojekuaa porãiterei hesekuéra oñearrepentiha. Otĩeterei rupi omombeʼu hikuái Ñandejárape hembiapo vaikue ha ndojapoveiete. Péro, ¿upévantepa ojapovaʼerã Jehová operdona ha oheja hag̃ua chupekuéra oho jey hetãme?

“Añetehápe aiporiahuverekóta chupe”

Jehová ohayhuetereivaʼekue umi isrraelítape. Jeremías 31:9-pe heʼi: “Che ningo Israel Ru ha che raʼy ypykue hína Efraín”. ¿Mbaʼéicha piko peteĩ túva ohayhúva ifamília ha ohechakuaáva oñembyasyha ipyʼaite guive ndohejamoʼãi ou jey? Jehová ningo peteĩ túvaicha ohechauka ohayhuha ipuévlope koʼã mbaʼe heʼívare.

“¿Efraín piko ndahaʼéi che raʼy aguerohoryvéva, térã pe mitã ahayhuvéva? Akorrehíramo jepe, arakaʼeve ndacheresaraimoʼãi chugui.” (Versíkulo 20, NM.) ¡Ajépa iporãite ko heʼíva hese! Añetehápe Jehová haʼe peteĩ túva oporohayhúva. Upéicharõ jepe, oñemoñeʼẽ porã itaʼyrakuérape ha heʼi mbaʼépa oikóta hesekuéra ndohejáiramo hembiapo vai. Haʼe heʼi jey jey chupekuéra ha naiñeʼẽrendúi hikuái. Upéicha rupi, okastiga chupekuéra ohejávo ojegueraha oiko hag̃ua tetã ambue poguýpe. Péro Ñandejára ndahesaráiri chuguikuéra, peteĩ túva ndahesarairiháicha ifamília ohayhúvagui. ¿Mbaʼéichapa Jehová oñeñandu ohechávo ipuévlo oñearrepentiha ipyʼaite guive?

“Che pyʼa angekói hese, añetehápe aiporiahuverekóta chupe.” (Versíkulo 20, NM.) Jehová ningo oipota itaʼyrakuéra oñemoag̃ui jey hese. Opokoiterei hese ohechávo mbaʼéichapa oñearrepenti hikuái ha oipota ou jey hendápe. Haʼete avei pe túva Jesús oñeʼẽ hague peteĩ ehémplope, Jehová “oiporiahuvereko” itaʼyrakuérape (Lucas 15:20, NM). Haʼe oipotaiterei itaʼyrakuéra oñemoag̃ui jey hese.

“Jehová oheja aju jey iñorganisasiónpe”

Jeremías 31:18-20 ohechauka mbaʼéichapa Ñandejára oporoporiahuvereko ha imbaʼeporã. Haʼe arakaʼeve ndahesaráiri umi oservivaʼekuégui chupe. Ha ouse jeýramo iñorganisasiónpe, haʼe ‘oheja reíta chupe hembiapo vaikue’ (Salmo 86:5). Jehová arakaʼeve nomboykéi umi oñembyasývape ipyʼaite guive (Salmo 51:17). Vyʼápe uvei orresivi jey chupekuéra iñorganisasiónpe (Lucas 15:22-24).

¿Nemanduʼápa pe kuña ñañeʼẽ hague ko artíkulo oñepyrũvo? Haʼe odesidi oñemoag̃ui jey Ñandejárare ha oñepytyvõ hag̃ua chupe oho umi testígo de Jehová kongregasiónpe. Ñepyrũrã ijetuʼueterei chupe. ¿Mbaʼérepa? Haʼe heʼi: “Che apensa namereseiha Ñandejára che perdona”. Péro umi ansiáno omokyreʼỹ ha oipytyvõ chupe omombarete hag̃ua ijerovia. ¿Mbaʼépa oiko upe rire? Haʼe omombeʼu: “Jehová oheja aju jey iñorganisasiónpe ha aagradeseterei chupe upévare”.

Oiméramo nde reñemomombyrýraʼe Jehovágui ha reñemoag̃uise jey hese, romokyreʼỹ rejerure hag̃ua umi testígo de Jehovápe tanepytyvõ. Nemanduʼákena Ñandejára imbaʼeporã ha oiporiahuverekoha umi ipyʼaite guive oñembyasy ha heʼívape: “Ehejamína taju jey, ha pyaʼe añemog̃uíta nderehe”.

[Nóta]