Dọnsẹpọ Jiwheyẹwhe

“Jaale Gọalọna Mí Nado Lẹkọwa Whégbè”

Be hiẹ ko sẹ̀n Jehovah to ojlẹ de mẹ wayi wẹ ya? Be hiẹ to linlẹn nado vọ́ jẹ sinsẹ̀n ẹn ji ṣigba bọ obu to didi we dọ ewọ ma na gọ̀ we yí wẹ ya? Jaale bo yí sọwhiwhe do hia hosọ ehe po dehe bọdego po. Hiẹ wutu wẹ yé do yin awuwlena.

“N’HODẸ̀ hlan Jehovah dọ ni gọalọna mi nado lẹkọwa whégbè bosọ jona mi na n’hẹn homẹgble e wutu.” Nuhe nawe de he danbú sọn ali Klistiani tọn ji dọ niyẹn. Be onú etọn ma biọ lanmẹ na we ya? Hiẹ sọgan ko kanse dewe pọ́n dọ: ‘Etẹwẹ yin numọtolanmẹ Jiwheyẹwhe tọn gando mẹhe sẹ̀n ẹn to ojlẹ de mẹ wayi lẹ go? Be e nọ flin yé ya? Be e jlo dọ yé ni “lẹkọwa whégbè” ya?’ Nado na gblọndo kanbiọ enẹlẹ tọn, mì gbọ mí ni gbadopọnna kandai Jelemia tọn. Matin ayihaawe, gblọndo kanbiọ enẹlẹ tọn na miọnhomẹna we.—Hia Jelemia 31:18-20. a

Lẹnnupọndo lẹdo hodidọ hogbe Jelemia tọn lẹ tọn ji. To 740 J.W.M., yèdọ owhe susu jẹnukọnna azán Jelemia tọn, Jehovah jotẹnna Assilianu lẹ nado bẹ ahọluduta whẹndo ao Islaeli tọn yì kanlinmọgbenu. b Jiwheyẹwhe dike nugbajẹmẹji enẹ ni wá yé ji nado domẹplọnlọ yé go, na omẹ etọn lẹ yí ylando do dó aṣa bo dovọ́na avase he yẹwhegán etọn lẹ nọ na yé whẹwhẹ lẹ wutu. (2 Ahọlu lẹ 17:5-18) Be awufiẹsa kanlinmọgbenu-ninọ lọ tọn gọalọna yé nado diọ to whenue yé tin dẹn do Jiwheyẹwhe bo tin to olá na otò yetọn ya? Be Jehovah wọn yé petepete wẹ ya? Be ewọ na kẹalọyi yé wá whégbè pọ́n gbede ya?

“Yẹn Na Blawu”

Gbẹtọ lọ lẹ gọ̀ biọ yede mẹ to whenue yé tin to kanlinmọgbenu bo yin whinwhàn nado lẹnvọjọ. Jehovah doayi lẹnvọjọ ahundopo tọn yetọn go. Pọ́n lehe Jehovah basi zẹẹmẹ nuyiwa po numọtolanmẹ Islaelivi he to kanlinmọgbenu lẹ po tọn do, mẹhe sọ nọ yin yiylọ to pọmẹ dọ Eflaimi.

“Yẹn ko sè bọ Eflaimi to aluẹmẹ gando ede go,” wẹ Jehovah dọ. (Wefọ 18) Ewọ sè to whenue Islaelivi lẹ to lewu na kọdetọn ylando yetọn tọn wutu. Hodidọ lọ “to aluẹmẹ gando ede go” sọgan zẹẹmẹdo “numọtolanmẹ sinsinyẹn awubla tọn,” wẹ weyọnẹntọ de dọ. Yé taidi visunnu atẹṣitọ de he to ota mimí dile e to nulẹnpọn gando oyà he e hẹnwa ede ji go bọ gbẹzan he e jodo to whégbè to jijlo e. (Luku 15:11-17) Etẹwẹ Islaelivi lẹ to didọ?

“Hiẹ ko wọhẹ mi . . . taidi oyìnvu he yè ma ko plọnazọ́n.” (Wefọ 18) Islaelivi lẹ yigbe dọ yé jẹna mẹplọnlọdomẹgo lọ. Na nugbo tọn, yé ko yinuwa taidi oyìnvu he yè ma plọnazọ́n. Nuyijlẹdonugo ehe sọgan zẹẹmẹdo dọ yé yinuwa taidi oyìnvu tasinyẹntọ he “yin hihò po atin tlọ́ntlọ́n po na e gbẹ́ nado hẹn agbàn wutu,” wẹ owe alọdlẹndonu tọn de dọ.

“Gọkọna mi, podọ e họnwun dọ yẹn na lẹkọ, na hiẹ wẹ Jehovah Jiwheyẹwhe ṣie.” (Wefọ 18) Islaelivi  lẹ whiwhẹ yede bo dawhá ylọ Jiwheyẹwhe. Ylanwiwa ko hẹn yé buali, ṣigba todin yé vẹvẹ bo biọ alọgọ nado mọ nukundagbe etọn. Lẹdogbedevomẹ de dọmọ: “Hiẹ wẹ Jiwheyẹwhe mítọn—jaale gọalọna mí nado lẹkọwa whégbè.”—Contemporary English Version.

“Yẹn na blawu. . . . Winyan hù mi, yẹn sọ tindo numọtolanmẹ mẹdèpo tọn.” (Wefọ 19) Islaelivi lẹ blawu na ylando he yé wà wutu. Yé kẹalọyi whẹgbledomẹ lọ bo yigbe nuṣiwa yetọn tọn. Winyan to hùhù yé bọ yé to awubla.—Luku 15:18, 19, 21.

Islaelivi lẹ lẹnvọjọ. Yé blawu bo yigbe ylando yetọn lẹ tọn na Jiwheyẹwhe bosọ lẹ́ sọn aliho ylankan yetọn lẹ ji. Be lẹnvọjọ yetọn na fahomẹna Jiwheyẹwhe ya? Be e na dike yé ni lẹkọwa whégbè ya?

“Hú Popolẹpo, Yẹn Na Wàlẹblanu Na Ẹn”

Jehovah yiwanna Islaelivi lẹ taun. E dọmọ: “Otọ́ de wẹ yẹn hlan Islaeli, Eflaimi sọ wẹ plọnji ṣie.” (Jelemia 31:9) Be otọ́ owanyinọ de sọgan gbẹ́ nado kẹalọyi visunnu etọn he ko lẹnvọjọ nugbonugbo de ya? Doayi lehe Jehovah do numọtolanmẹ Otọ́ tọn nkọ hia omẹ etọn lẹ do go.

“Be e ma yin visunnu vivẹ́, yèdọ ovi he yin kikẹ́ de wẹ Eflaimi yin na mi ya? Na dile yẹn na tlẹ gblewhẹdo e sọ, ayihaawe ma tin dọ yẹn nasọ flin in ga.” (Wefọ 20) Be hogbe enẹlẹ ma do mẹtọnhopọn hia ya? Taidi mẹjitọ owanyinọ he nọ yinuwa po nujikudo po de, Jiwheyẹwhe to dandannu glọ nado “gblewhẹdo” ovi etọn lẹ gbọn avase nina yé whẹwhẹ gando ylando yetọn lẹ go dali. To whenue yé sinyẹnta bo gbẹ́ nado setonu, e dike yé ni yì kanlinmọgbenu, bo gbọnmọ dali hẹn yé nado yì sọn whégbè. Ṣigba, dile etlẹ yindọ e dona sayana yé, e ma wọnji yé go. E ma sọgan wàmọ gbede. Otọ́ owanyinọ de ma nọ wọnji ovi etọn lẹ go. Ṣigba, etẹwẹ yin numọtolanmẹ Jehovah tọn to whenue e mọdọ ovi emitọn lẹ do lẹnvọjọ nujọnu tọn hia?

“Adọ̀vi ṣie lẹ sè vivẹ́ na etọn wutu. c Hú popolẹpo, yẹn na wàlẹblanu na ẹn.” (Wefọ 20) Mọwẹ, Jehovah tindo ojlo to ovi etọn lẹ mẹ taun. Lẹnvọjọ ahundopo tọn yetọn yinuwado e ji podọ e tindo ojlo vẹkuvẹku dọ yé ni lẹkọwa emi dè. Taidi otọ́ visunnu duvanọ he go Jesu donù to oló etọn mẹ lọ tọn, “lẹblanu whàn” Jehovah bọ e to jejeji dọ ovi emitọn lẹ ni lẹkọwa whégbè.—Luku 15:20.

“Jehovah Gọalọna Mi Nado Lẹkọwa Whégbè!”

Hogbe he tin to Jelemia 31:18-20 mẹ lẹ na mí nukunnumọjẹnumẹ gando awuvẹmẹ sisosiso po lẹblanu Jehovah tọn po go. Jiwheyẹwhe ma nọ wọnji mẹhe sẹ̀n ẹn to ojlẹ de mẹ wayi lẹ go gba. Etẹwẹ lo eyin omẹ mọnkọtọn lẹ jlo na lẹkọwa e dè? Jiwheyẹwhe ko “wleawu nado jona.” (Psalm 86:5) Ewọ ma na gbẹ́ mẹhe lẹnvọjọ nugbonugbo bo lẹkọwa e dè lẹ dai pọ́n gbede. (Psalm 51:17) Kakatimọ, homẹ etọn nọ hùn nado kẹalọyi yé wá whégbè.—Luku 15:22-24.

Nawe he yin nùdego to bẹjẹeji lọ ze afọdide lẹ nado lẹkọwa Jehovah dè bo yì agun Kunnudetọ Jehovah tọn lẹ tọn he tin to lẹdo etọn mẹ de mẹ. To tintan whenu, e dona duto numọtolanmẹ agọ̀ etọn lẹ ji. E dọmọ: “N’tindo numọtolanmẹ dọ n’ma sọgan lẹkọwa Jehovah dè.” Ṣigba, mẹho agun tọn lẹ na ẹn tuli bo gọalọna ẹn nado lodo to gbigbọ-liho whladopo dogọ. E do pinpẹn-nutọn-yinyọnẹn hia dọmọ: “Lehe homẹ ṣie hùn dọ Jehovah gọalọna mi nado lẹkọwa whégbè do sọ!”

Eyin hiẹ ko sẹ̀n Jehovah to ojlẹ de mẹ wayi bo to linlẹn nado vọ́ jẹ sinsẹ̀n ẹn ji, mí basi oylọna we nado yì agun Kunnudetọ Jehovah tọn lẹ tọn he tin to lẹdo towe mẹ de mẹ. Flindọ Jehovah nọ do awuvẹmẹ po lẹblanu po hia mẹhe lẹnvọjọ bo dawhá hlan ẹn dọ, “Jaale gọalọna mí nado lẹkọwa whégbè” lẹ.

[Nudọnamẹ odò tọn]