Dati kadi nga agserserbika ken Jehova? Napampanunotmo kadin ti agserbi manen kenkuana ngem agduaduaka no awatennaka pay? Pangngaasim ta basaem daytoy nga artikulo agraman ti sumaruno. Nairanta para kenka dagitoy nga artikulo.

“INKARARAGKO ken Jehova nga awatennak koma manen ken pakawanennak ta pinagladingitko.” Kasta ti kinuna ti maysa a babai a nangtallikud kadagiti Nakristianuan a prinsipio a naisuro kenkuana sipud kinaubingna. Mariknam kadi ti marikriknana? Nalabit naisaludsodmon, ‘Ania ti rikna ti Dios kadagidiay dati nga agserserbi kenkuana? Malagipna pay ngata ida? Kayatna kadi nga agsublida kenkuana?’ Tapno masungbatan dagitoy a saludsod, usigentayo ti sasao nga insurat ni Jeremias. Maragsakanka la ketdi kadagiti sungbat.​—Basaem ti Jeremias 31:18-20.

Ania ti kasasaad idi insurat ni Jeremias dagitoy a sasao? Idi 740 B.C.E., adu a tawen sakbay ti kaaldawan ni Jeremias, pinalubosan ni Jehova a dadaelen ken papanawen dagiti Asirio ti sangapulo-tribu a pagarian ti Israel. * Impalubos ti Dios daytoy a didigra kas pangdisiplina iti nakaro a basol ti ilina ken iti dida panangikankano iti maulit-ulit a pakdaar dagiti propetana. (2 Ar-ari 17:5-18) Nagbalbaliwda ngata idi nga agrigrigatda gapu ta naisinada iti Diosda ken napagtalawda iti dagada? Naan-anay kadi a linipat ida ni Jehova? Awatennanto kadi manen ida?

“Nagbabawiak”

Naamiris dagiti Israelita ti kasasaadda bayat a napagtalawda ket natignayda nga agbabawi. Nakita ni Jehova ti naimpusuan a panagbabawida. Usigem ti panangiladawan ni Jehova iti kababalin ken rikrikna dagiti napagtalaw nga Israelita a natukoy kas Efraim.

“Pudno a nangngegak a ni Efraim umas-asug a mismo,” kuna ni Jehova. (Bersikulo 18) Nangngegna ti panagpakpakaasi dagiti Israelita gapu iti nasaem nga epekto ti panagbasolda. Kuna ti maysa nga eskolar a ti sasao nga “umas-asug” mabalin a kaipapananna ti “panagpigerger wenno panagdayyeg.” Kaslada iti maysa nga anak nga agwingwingiwing idi maamirisna a ti panagrigatna ket resulta ti panagsukirna ken kayatnan ti agawid iti pagtaenganda. (Lucas 15:11-17) Ania ti ibagbaga dagiti Israelita?

“Linintegnak . . . kas iti maysa a kigaw a baka a saan a nasanay.” (Bersikulo 18) Binigbigda a maikarida iti dayta a disiplina. Nayarigda iti baka a saan pay a nasanay, a di koma “nasaktan iti tirad a pangabug no dina inwang-it ti sangol,” kuna ti maysa a reperensia.

“Pagsubliennak, ket sisasaganaakto nga agsubli, ta sika ni Jehova a Diosko.” (Bersikulo 18) Naimpusuan a nagpakumbabada ket immawagda iti Dios. Nayaw-awanda gapu iti basolda ngem umararawda itan iti tulong tapno anamongan manen ida ti Dios. Kuna ti maysa a patarus:  “Sika ti Diosmi​—pangngaasim ta awatennakami manen.”​—Contemporary English Version.

“Nagbabawiak. . . . Nagbainak, ket nariknak met ti pannakaipababa.” (Bersikulo 19) Nagladingitda gapu panagbasolda ket inadmitirda ti dakes nga inaramidda. Mariknada ti napalalo a bain ken pannakaipababa nga arigna dandanogenda ti barukongda.​—Lucas 15:18, 19, 21.

Pudno nga agbabbabawi dagiti Israelita. Agladladingitda, impudnoda iti Dios dagiti basolda, ken tinallikudanda dagiti dakes nga aramidda. Maasian ngata ti Dios gapu iti panagbabawida? Awatenna kadi manen ida?

“Sigurado a Maasianakto Kenkuana”

Adda naisangsangayan a singgalut iti nagbaetan ni Jehova ken dagiti Israelita. Kinunana: “Nagbalinak a maysa nga Ama iti Israel; ket no maipapan ken Efraim, isu ti inaunak.” (Jeremias 31:9) Pagkedkedan ngata ti naayat nga ama ti agsubsubli nga anakna a naimpusuan nga agbabbabawi? Kitaem no kasano nga inyebkas ni Jehova ti rikriknana kas ama ti ilina.

“Ni Efraim maysa kadi a napateg nga anak kaniak, wenno maysa nga ubing a natrato a siaayat? Ta no kasano ti kinakaro ti panagsaok a maibusor kenkuana di bumurong nga isu malagipkonto nga ad-adda pay.” (Bersikulo 20) Anian a kinadungngo! Kas iti natibker ngem naayat a nagannak, nagsao ti Dios “maibusor” kadagiti annakna, a maulit-ulit a pakdaaranna ida maipapan iti dakes nga ar-aramidda. Idi talaga a saanda a kayat ti dumngeg, impalubosna a mapagtalawda iti dagada. Nupay masapul a dusaenna ida, saanna a binaybay-an ida ta dina pulos maaramid dayta. Saan a maaramid ti naayat nga ama a lipaten dagiti annakna. Ania ngarud ti narikna ni Jehova idi nakitana ti naimpusuan a panagbabawi dagiti annakna?

“Dagiti bagisko nagbalin a naariwawa maipaay kenkuana. * Sigurado a maasianakto kenkuana.” (Bersikulo 20) Kailiw unay ni Jehova dagiti annakna. Natukay ti pusona iti pudno a panagbabawida, ket kayatna nga agsublida kenkuana. Kas iti ama iti pangngarig ni Jesus maipapan iti bayanggudaw nga anak, ‘simnek ti asi’ ni Jehova ken magagaran a mangawat manen kadagiti annakna.​—Lucas 15:20.

“Awatennak Kadi Manen Jehova!”

Ammotayo a nadungngo ken naasi ni Jehova gapu iti sasao a nailanad iti Jeremias 31:18-20. Saanto a lipaten ti Dios dagidiay dati nga agserserbi kenkuana. No kayatda ti agsubli iti Dios, ‘sisasagana a pakawanenna ida.’ (Salmo 86:5) Dinanto pulos paayen dagidiay naimpusuan nga agsubsubli kenkuana. (Salmo 51:17) Imbes ketdi, maragsakan a mangawat manen kadakuada.​—Lucas 15:22-24.

Nagtignay ti babai a nadakamat itay tapno makasubli ken Jehova. Napan nakigimong iti kongregasion dagiti Saksi ni Jehova iti lugarda. Idi damo, masapul a labananna ti negatibo a rikriknana. Kunana: “Panagriknak idi ket diak maikari.” Ngem pinabileg dagiti panglakayen iti kongregasion ket tinulonganda a mangpasubli iti relasionna iti Dios. Kasta unay ti panagyamanna ket kinunana, “Nagimbag unay ni Jehova ta inawatnak manen!”

No dati nga agserserbika ken Jehova ket kayatmo manen ti agserbi kenkuana, umatenderka koma iti kongregasion dagiti Saksi ni Jehova iti lugaryo. Laglagipem a nadungngo ken naasi ni Jehova kadagiti agbabbabawi ken agpakpakaasi kenkuana, “Pangngaasim ta awatennakami manen.”

Singasing a basaen iti Biblia iti Abril:

▪ Jeremias 17-31

[Dagiti Footnote]