“Bika Beto Vutukila Nzambi”

Keti nge mesadilaka Yehowa na ntangu mosi buna? Keti nge keyindulaka nde nge lenda sadila yandi dyaka kansi nge kekudiyulaka kana yandi tandima nge dyaka? Tanga disolo yai na dikebi yonso. Bo sonikaka yo mpenza sambu na nge.

NKENTO mosi buna ya yambulaka kusadila Nzambi mpi salaka mambu yina kewakana ve ti minsiku ya Bukristu tubaka nde: “Mono sambaka Yehowa sambu na kuvutukila yandi mpi sambu yandi lolula mono na mbi yina mono salaka yandi.” Keti nge kewila yandi mawa? Kudiyula nde: ‘Inki mutindu Nzambi kekudiwaka sambu na bantu yina mesadilaka yandi ntete? Keti yandi keyibukaka bo? Keti yandi kezolaka nde bo “vutukila” yandi?’ Sambu na kubaka bamvutu na bangyufula yai, bika beto tadila bangogo yina Yeremia tubaka. Ntembe kele ve nde bamvutu yina tasepedisa ntima na nge.​—Tanga Yeremia 31:18-20.

Tadila mambu yina pusaka Yeremia na kusonika bangogo yina. Bamvula mingi na ntwala ya bilumbu ya yandi, Yehowa pesaka nzila nde bantu ya Asiria kunata kimfumu ya makanda kumi ya Izraele na kimpika na mvu 740 N.T.B. a Nzambi pesaka bantu na yandi ndola yai sambu bo salaka masumu ya nene, mpi bo zitisaka ve balukebisu yina yandi vandaka kupesa bo mbala na mbala na nzila ya bambikudi. (2 Bantotila 17:5-18) Keti bo sobaka nkadilu na bo sambu na mambu yina bo kutanaka ti yo na kimpika ntangu bo kabwanaka ti Nzambi na bo mpi bo vandaka ntama ti nsi na bo? Keti Yehowa vilaka bo kimakulu? Keti Yehowa ndimaka ve nde bo vutukila yandi?

‘Mono Monaka Mpasi na Ntima’

Bantu ya Izraele bakisaka masumu na bo ntangu bo vandaka na kimpika mpi bo balulaka ntima. Yehowa monaka nde bo balulaka ntima na masonga yonso. Tala mutindu Yehowa tubilaka nkadilu mpi mawi ya bantu ya Izraele yina vandaka na kimpika, ntangu yandi tubilaka bo na kimvuka na kubingaka bo Efrayimi.

Yehowa tubaka nde: “Mono ke wa bantu ya Efrayimi ke dila.” (Verse 18) Yandi waka ntangu bantu ya Izraele vandaka kudila sambu na masumu na bo. Muntu mosi ya mayele tubaka nde bangogo “ke dila” lenda tendula “kutekita na boma.” Bo vandaka bonso mwana yina mesala mbi mpi kenikisa ntu sambu na mpasi ya ngolo yina yandi kele na yo. (Luka 15:11-17) Inki mambu bo vandaka kutuba?

“Beto vandaka kilau bonso bangombe ya babakala, kansi nge longaka beto.” (Verse 18) Bantu ya Izraele bakisaka nde bo fwete baka ndola. Bo vandaka bonso ngombe ya bakala yina bo melongaka ve. Mukanda mosi ketuba nde kufwanisa ya mutindu yai lenda tendula nde bo vandaka bonso mwana ya ngombe yina bo “kebulaka fimbu sambu yandi kebuya lutwadisu ya mfumu na yandi.”

“Vutula beto, beto ta vutuka, sambu nge Mfumu Nzambi kele Nzambi na beto.” (Verse 18) Sambu bantu ya Izraele kudikulumusaka, bo sambaka Nzambi. Bo vilaka nzila ntangu bo salaka masumu kansi, bo lombaka lusadisu na Nzambi sambu yandi ndima bo. Mbalula mosi ketuba nde: “Nge kele Nzambi na beto—bika beto vutukila nge.”​—Contemporary English Version.

“Beto monaka mpasi na ntima. Nsoni simbaka beto mingi.” (Verse 19) Bantu ya Izraele waka mpasi mingi sambu bo salaka masumu.  Bo bakisaka kifu na bo mpi ndimaka yo. Kaka bonso nde bo vandaka kubula na ntulu sambu na kusonga mawa na bo, bo waka nsoni mpi bo lembaka nitu.​—Luka 15:18, 19, 21.

Bantu ya Izraele balulaka ntima. Mawa ya ngolo simbaka bo, bo fungunaka masumu na Nzambi mpi bo yambulaka banzila na bo ya mbi. Keti mutindu bo balulaka ntima lembikaka ntima ya Nzambi? Keti Nzambi ndimaka nde bo vutukila yandi?

“Ntima na Mono Yonso Kele na Nge, Mono Fweti Wila Nge Mawa”

Yehowa zolaka bantu ya Izraele mingi. Yandi tubaka nde: “Mono kele tata ya bantu ya Israele, ebuna Efrayimi kele mwana na mono ya ntete.” (Yeremia 31:9) Inki mutindu tata ya zola lenda buya nde mwana yina mebalula ntima kuvutukila yandi? Tala mutindu Yehowa monisaka mawi yina Tata kemonisilaka bana na yandi.

“Efrayimi, nge kele mwana ya mono ke zolaka mingi; konso ntangu kana mono tanga zina na nge, mono fweti yindula nge na ntima na mono yonso.” (Verse 20) Bangogo yai kemonisa mpenza zola! Bonso kibuti yina kele makambu ngolo kansi ya zola, Nzambi vandaka ti nswa ya kunganina bana na yandi mpi vandaka kukebisa bo sambu na masumu na bo. Na ntu ngolo yonso bo buyaka kuwila yandi, yo yina Nzambi pesaka nzila nde bo kwenda na kimpika​—na kusalaka buna, yandi bikaka nde bo yambula yandi. Kansi, ata yandi pesaka bo ndola, yandi vilaka bo ve. Yandi lendaka kusala ve mutindu yina ata fyoti. Tata ya zola kevilaka ve bana na yandi. Kansi, inki mutindu Yehowa kudiwaka ntangu yandi monaka nde bana na yandi mebalula ntima na masonga yonso?

“Ntima na mono yonso kele na nge b, mono fweti wila nge mawa.” (Verse 20) Yehowa waka mpusa ya ngolo sambu na bana na yandi. Mutindu bo balulaka ntima na masonga yonso simbaka ntima na yandi mpi yandi waka mpusa ya ngolo sambu bo vutukila yandi. Mutindu tata yina kingana ya Yezu ya mwana ya vilaka salaka mambu, Yehowa “wilaka [bo] mawa” mpi yandi vandaka na mpusa ya ngolo ya kuyamba bana yina vutukilaka yandi.​—Luka 15:20.

“Yehowa Bika Mono Vutukila Nge!”

Bangogo yina kele na Yeremia 31:18-20 kepesa beto mayele na yina metala mawa mpi bumbote ya Yehowa. Nzambi kevilaka ve bayina mesadilaka yandi ntete. Inki beto lenda tuba kana bantu yina yambulaka yandi kezola kuvutukila yandi? Nzambi kele ya kuyilama sambu na kulolula bo. (Nkunga 86:5) Yandi tayambula ve ata fyoti bayina kevutukila yandi mpi kebalula mpenza ntima. (Nkunga 51:19) Kansi, yandi kevandaka na kyese ya kuyamba bo.​—Luka 15:22-24.

Nkento yina beto tubilaka na luyantiku bakaka lukanu ya kuvutukila Yehowa mpi kwendaka na dibundu ya Bambangi ya Yehowa. Na luyantiku, yo lombaka nde yandi nunga mawi na yandi ya mbi. Yandi keyibuka nde: “Mono kudiwaka bonso nde mono mefwana ve.” Kansi, bankuluntu ya dibundu syamisaka mpi sadisaka yandi na kukuma dyaka ngolo na kimpeve. Sambu ntima na yandi fulukaka na ntonda, yandi ketuba nde: “Yo kele mbote mpenza mutindu Yehowa mebika nde mono vutukila yandi!”

Kana nge mesadilaka Yehowa mpi keyindula nde nge lenda sadila yandi dyaka, beto kelomba nge na kukwenda na dibundu ya Bambangi ya Yehowa. Yibuka nde Yehowa kesalaka mambu na mawa mpi na bumbote ntangu bantu yina kebalulaka ntima ketubaka nde: “Bika Beto Vutukila Nzambi.”

[Banoti na nsi ya lutiti]