Finama Nzambi

“Dodokolo Utuyambula Twavutuka Kusadila”

Nga wasadila kala Yave? Nga oyindulanga vutukila kunsadila, kansi lukatikisu una lwau kana vo okutambula diaka? Tulombele watoma tanga elongi diadi ye dina dilende. Malongi mama makubikilu mu kuma kiaku.

KENTO mosi wayambula sadila Nzambi yo vanga mana ke mena ngwizani ko ye nkanikinu mia Kikristu wavova vo: “Yasamba kwa Yave kansadisa yavutuka kunsadila yo kundoloka wau yankendeleka.” Nga okendalele mu kuma kiandi? Olenda kiyuvula: ‘Aweyi Nzambi kemonanga mu kuma ki’awana bayambula kunsadila? Nga okubasungamenanga? Nga ozolele vo “bavutuka kunsadila”?’ Muna vana e mvutu za yuvu yayi, yambula twafimpa e mvovo mia Yeremiya. Kalukatikisu ko vo e mvutu zazi ziyangidika ntim’aku.​—Tanga Yeremiya 31:​18-20.

Badika e kuma Yeremiya kavovela e mvovo miami. Muna mvu miavitila lumbu ya Yeremiya, muna mvu a 740 Vitila Tandu Kieto, Yave wayambula vo makanda kumi ma kintinu ma Isaele menda muna kinkole kuna Asuri. * Nzambi wayambula vo diadi diavangama muna longa nkangu andi wau vo bayantika vanga masumu mampwena yo veza tuludiku twa ngunza zandi. (2 Ntinu 17:​5-​18) Nga o nkangu wasoba e fu yau mu kuma kia mpasi bamona muna kinkole, vava bavambulwa yo Nzambi au yo sisa e nsi au? Nga Yave wabavilakana kikilu? Nga oyambula vo bavutuka kuna nsi au yo kunsadila?

“Yavilukw’o Ntima”

O nkangu muna kinkole wavunguka e ngindu yo vilukw’o ntima. Yave wamona luviluku lwau lwa ntima. Wá una Yave kayikila e fu ye ngindu za Aneyisaele bakala muna kinkole, ana bayikilwa vo Eferaime.

Yave wavova vo: “Ngwidi Eferaime wiyimwen’e nkenda.” (Tini kia 18) Wawá vava Aneyisaele banionganga mu kuma kia mpasi zatwasa masumu mau. Nkwa ngangu mosi wavova vo e mvovo “wiyimwen’e nkenda” milenda kala ye nsasa vo “zakama yovo zunga ntu.” Bakala nze mwana osumukini ozunganga o ntu ekolo kebadikanga e mpasi zintwasidi esumu diandi yo yindula e zingu kakala kiau ekolo kakala kuna nzo. (Luka 15:​11-​17) O nkangu adieyi wavova?

“Undongele . . . nze mwan’a ngombe kakùlukilu e vangu ko.” (Tini kia 18) O nkangu wazaya wo vo bafwana vewa elongi. Kadi, bakala nze mwan’a ngombe kakùlukilu nata vangu ko. Nkanda mosi usasilanga vo: E mfwanani yayi ilenda songa vo Aneyisaele bakala nze ngombe ina ke yadi “wandwa mpalu ko yovo luvambu kele vo ka kolamene vangu ko.”

“Umvilwila, yaviluka; kadi ngeye u Yave wa Nzambi ame.” (Tini kia 18) O nkangu waboka kwa Nzambi kuna lulembamu lwawonso lwa ntima. O nkangu wavila mu kuma kia masumu mau, owau balombele lusadisu mu solola e nzila kimana bavwa diaka edienga dia Nzambi. Nsekola mosi ivovanga vo: “Ngeye i Nzambi eto​—dodokolo utusadisa twavutuka kuna nzo.”​—Contemporary English Version.

“Yavilukw’o ntima. . . . Yafusukw’e nsoni, yavunga.” (Tini kia 19) O nkangu wakendalala mu kuma kia masumu mau. Batambulwila lusembo ye mbi au. Bafusukwa kikilu e nsoni yo kuyikulula.​—Luka 15:​18, 19, 21.

Aneyisaele bavilukw’o ntima. Bamona e ntantu, bafunguna masumu mau kwa Nzambi, yo yambula nzila zau zambi. Nga Nzambi wabatambula diaka wau baviluka o ntima? Nga wayambula vo bavutuka diaka kunsadila?

“Ikumfwil’e Nkenda”

Yave wazolanga kikilu Aneyisaele. Wavova vo: “Omono i’se kwa Isaele, o Eferaime i mwan’ame antete.” (Yeremiya 31:9) Aweyi o se dianzodi kadi bembolwela mwan’andi una yo lukendalalu lwa ntima? Tala e mpila Yave kasongela una kamona mu kuma kia nkangu andi.

“O Eferaime nga i mwan’ame anzolw’e? nga i mwan’eyangi? kadi konso ntangwa inyikidi, ikunyindulang’aka.” (Tini kia 20) E mvovo miami miangemba kikilu. Nze se dianzodi kansi ozolanga singika, Nzambi ‘wayikanga’ wan’andi muna kubalukisa ntangwa ke ntangwa mu kuma kia nzila zau zambi. Vava balembi kunwila, wayambula vo basisa e nsi au yo kwenda muna kinkole. Kansi, kanele vo wabatumba, kabavilakana ko. Kalendi wo vanga ko. O se dianzodi ke vilakananga wan’andi ko. Aweyi Yave kamona vava wan’andi baviluka kikilu e ntima?

“E vumu kiame kikumbidi muna kuma kia yandi; * ikumfwil’e nkenda.” (Tini kia 20) Yave ozolanga kikilu wan’andi. O luviluku lwau lwa ntima lwayangidika ntim’andi, wavingilanga vo bavutuka kwa yandi. Nze se kayika o Yesu muna kingana kia mwan’a nkolami, Yave ‘wabafwa nkenda’ ye wazola tambula diaka wan’andi.​—Luka 15:20.

“Yave Unsadisa Yavutuka Kusadila!”

E mvovo mina muna Yeremiya 31:​18-20 mikutusadisanga mu bakula o walakazi ye nkenda za Yave. Nzambi ke vilakananga awana bateka kunsadila ko. Adieyi tuvova avo wantu awaya bazolele vutukila kunsadila? Nzambi ‘oyambulwilanga.’ (Nkunga 86:5) Ke bembolanga ko awana bevilukanga o ntima yo kwiza kwa yandi. (Nkunga 51:​17) Kansi, okubatambulanga ye kiese kiawonso.​—Luka 15:​22-24.

O nkento oyikilu kuna lubantiku, diambu kavanga mu vutuka kwa Yave, wayantika kwenda muna tukutakanu twa Mbangi za Yave. Kuna lubantiku, diavava vo kasunda e ngindu zalembi songa kakala zau. Wavova vo: “Yakimwenanga vo kina mfunu ko.” Kansi, akuluntu muna nkutakani bankasakesa yo kunsadisa mu siamisa diaka kimwanda kiandi. Wavova ye kiese kiawonso vo: “Ivutulanga matondo wau Yave kangyambula vo yavutuka kwa yandi.”

Avo wasadila kala Yave yo zola kunsadila diaka, tulombele vava e nkutakani ya Mbangi za Yave muna zunga kiaku. Sungamena vo Yave osonganga ntim’ankenda yo loloka awana bebokanga kwa yandi vo, “Dodokolo utuyambula twavutuka kusadila.”

Ntangilu a Nkand’a Nzambi mu Ngonde ya Abidi:

▪ Yeremiya 17-​31

[Mvovo Vana Yand’a]