Mu Sutelele Ku Mulimu

“Shangwe U lu Amuhele”

Kana ne mu sebelezanga Jehova ka nako ye ñwi kwamulaho? Kana mwa nahananga za ku kutela ku yena kono mwa kakanya haiba u ka mi amuhela? Shangwe mu bale taba ye ni ye tatama ka tokomelo. Litaba ze li ñolezwi mina.

“N E NI lapezi ku Jehova kuli a ni amuhele ni kuli a ni swalele kabakala kuli ne ni mu foselize.” Kona mwa naa bulelezi musali yo muñwi ya naa keluhile mwa nzila ya Sikreste. Kana mwa utwela musali yo makeke? Kana mwa ipuzanga kuli, ‘Mulimu u ikutwa cwañi ka za batu ba ba tuhezi ku mu sebeleza? Kana wa ba hupulanga? Kana wa tabela kuli ba kutele ku yena?’ Kuli lu alabe lipuzo zeo, ha lu nyakisiseñi manzwi a ñozwi ki Jeremia. Ku si na ku kakanya, likalabo ze mu ka fumana li ka mi susueza.—Mu bale Jeremia 31:18-20.

Mu nyakisise muinelo o no li teñi ka nako yeo Jeremia naa ñola manzwi ao. Ka silimo sa 740 B.C.E., ili lilimo-lilimo pili Jeremia a si ka pepwa kale, Jehova naa lumelelize mubuso wa Isilaele wa masika a lishumi ku hapiwa ki Maasirya. * Mulimu naa lumelelize muinelo wo ku ba teñi ilikuli a kalimele batu ba hae bakeñisa bufosi bo butuna bo ne ba eza, mane ni ku sa isa pilu kwa litemuso ze ne ba fiwa ki bapolofita ka ku kuta-kutela. (2 Malena 17:5-18) Kana batu ne ba cincize mubonelo wa bona hamulaho wa ku talimana ni manyando a mwa butanga, ha ne ba kauhanyizwe ku Mulimu wa bona ni ku isiwa kwa naha ya kwahule? Kana Jehova naa ba libezi? Kana naa ka ba amuhela ha ne ba ka kutela ku yena?

“Na Inyaza”

Batu ne ba ikupuzi ha ne ba li mwa butanga mi ba baka. Jehova naa lemuhile kuli ne ba bakile ha buniti luli. Ha mu teeleze mo Jehova a taluseza mubonelo ni maikuto a Maisilaele ba ba mwa butanga ili bao a biza ka sikwata kuli Efraimi.

Jehova u li: “Luli, ni utwile Efraimi ha itilelela.” (Timana 18) Naa utwile Maisilaele ha ba lila kabakala likezo za bona za buezalibi. Caziba yo muñwi u bonisa kuli pulelo ye tolokilwe kuli ku “itilelela” i kona ku talusa “ku nyunga toho” kabakala maswabi. Ne ba swana sina mwanana wa lingulunde ya nyunga toho ya hae kabakala maswabi a matuna ha nahana ka za butata bwa itahiselize ni ha ikumbuta ka za bupilo bwa naa ikola ha naa li kwa ndu ya bashemi ba hae. (Luka 15:11-17) Batu ne ba bulelañi?

“U ni natile . . . sina pulwana ye si ka tapiswa kale.” (Timana 18) Batu ne ba lemuhile kuli ne ba tokwa kalimelo. Muinelo wa bona ne u swana sina wa pulwana ye si ka tapiswa kale. Ka ku ya ka hatiso ye ñwi, swanisezo ye, i kona ku talusa kuli Maisilaele ne ba swana sina pulwana ye si ka tapiswa kale ili “ye si ka babulwa kale ka muwayo wo cisa kabakala kuli isamba ku ba i bute inze i li mwa coko.”

“U ni kutise, mi ni ka kuta, kakuli ki Wena Muñaa Bupilo Mulimu wa ka.” (Timana 18) Bakeñisa kuli batu ne ba ikokobelize, ne ba lapezi ku  Mulimu. Ne ba ikenyize mwa buezalibi kono cwale ne ba kupa ku Jehova kuli a ba amuhele. Toloko ya Bibele ye bizwa Contemporary English Version i bulela kuli: “Ki wena Mulimu wa luna—shangwe u lu amuhele.”

“Na inyaza. . . . Na iswabela, mane na mbemuka.” (Timana 19) Batu ne ba inyazize kabakala sibi se ne ba ezize. Ne ba itumelezi mafosisa a bona. Ba ikutwa maswabi mi ba inyongamena.—Luka 15:18, 19, 21.

Maisilaele ne ba bakile. Ne ba li mwa maswabi, ba ipulela libi za bona ku Mulimu, mi ba tuhela ze maswe ze ne ba eza. Kana ku baka kwa bona ne ku ka tahisa kuli Mulimu a ba swalele? Kana naa ka ba amuhela?

“Luli ni ka mu Utwela Butuku”

Jehova naa lata hahulu Maisilaele. Naa bulezi kuli: “Ni mushemi ku Isilaele, mi Efraimi ki mwanaa ka wa mweli.” (Jeremia 31:9) Ndate ya lilato u kona ku hana cwañi ku amuhela mwanaa hae ya bakile ha buniti? Mu lemuhe mo Jehova a boniseza maikuto a swana sina a mushemi kwa batu ba hae.

“Efraimi kana ki mwana ya latiwa? Kana ki mwana ya tabisa? Kakuli kamita ha ni mu nyaza ni nze ni mu hupula kuli ki yena yo.” (Timana 20) Ki manzwi kwa bunde! Sina mushemi ya lilato ili ya sa hulisi bana ba hae ka ku ba lemaza, Mulimu naa na ni swanelo ya ku “nyaza” bana ba hae ka ku kuta-kutela ku ba lemusa ka za mupilelo wa bona wa sibi. Ha ne ba hanile ka bomu ku teeleza ku yena, naa ba tuhelezi ku iswa mwa butanga ili nto ye swana sina ku zwa fa lapa. Nihaike kuli naa ba file koto, naa si ka ba libala. Mi naa si ke a eza cwalo ni kamuta. Ndate ya lilato ha libalangi bana ba hae. Kono Jehova naa ikutwile cwañi ha naa boni kuli bana ba hae ne ba bakile ha buniti?

“Mala a ka a nyungana kabakala hae. * Luli ni ka mu utwela butuku.” (Timana 20) Jehova naa nyolezwi hahulu ku swalela bana ba hae. Naa tabisizwe hahulu ki ku baka kwa bona ko ne ku zwelela kwa pilu, mi naa nyolezwi hahulu ku ba amuhela. Ka ku swana ni ndate ya naa talusizwe mwa nguli ya Jesu ya mwana wa lingulunde, Jehova naa ba ‘shwezi makeke’ mi naa nyolezwi hahulu ku amuhela bana ba hae.—Luka 15:20.

“Jehova Naa ni Amuhezi!”

Manzwi a ñozwi kwa Jeremia 31:18-20 a lu tusa ku utwisisa mufelañeke ni musa wa Jehova. Mulimu ha libalangi batu ba ba kile ba mu sebeleza. Ku cwañi haiba batu ba ba cwalo ba bata ku kutela ku yena? Mulimu wa “lata ku swalela.” (Samu 86:5) U ka amuhela batu ba ba kutela ku yena inze ba bakile ha buniti. (Samu 51:17) Wa tabela ku ba amuhela.—Luka 15:22-24.

Musali ya bulezwi kwa makalelo a taba ye, naa ngile muhato wa ku kutela ku Jehova mi a ya kwa puteho ya Lipaki za Jehova ye ne li mwa silalanda sa naa pila ku sona. Kwa makalelo naa tokwa ku lwanisa maikuto a ku zwafa. Musali yo u hupula kuli: “Ne ni ikutwanga ku ba mutu ya si na tuso.” Kono baana-bahulu ba puteho ne ba mu tiisize ni ku mu tusa ku kutisa sinca silikani sa hae ni Jehova. Ka buitebuho bo bu zwelela kwa pilu u li: “Ki nto ye tabisa kuli Jehova naa ni amuhezi!”

Haiba ne mu sebelezanga Jehova ka nako ye ñwi kwamulaho mi mu nahana za ku kutela ku yena, lu mi mema kuli mu potele puteho ya Lipaki za Jehova ye mwa silalanda se mu pila ku sona. Mu hupule kuli Jehova u amuhelanga ka musa ni ka mufelañeke batu ba ba bakile ili ba ba mu kupa kuli, “Shangwe u lu amuhele.”

[Litaluso za kwatasi]