Fwenai Kudi Leza

“Tujokele’po Kodi”

Le wāingidile ne Yehova kyaba kimo? Lelo ulañanga monka kumwingidila, inoko ukiipangula shi ukakutambula monka? Shi uswile, tanga na katentekeji kino kishinte ne kikwabo kilonda’ko. I bakuteakenye’byo’tu enka abe.

MWANA-MUKAJI umo watombokele mu bwine Kidishitu mwaatamine, wanene amba, “nalombele Yehova amba shi uswile njokele’po kodi kadi mfwile’ko lusa pa kukusanshija.” Le ubamwivwanina lusa ku mutyima? Lelo wiipangulanga amba, ‘Leza wiivwananga namani pa boba bāmwingidile? Lelo wibavulukanga? Le wibasakilanga bajokele “kwadi”?’ Pa kulondolola ku bino bipangujo, tubandaulei bidi binenwa byāsonekele Yelemia. Malondololo keakabulwepo kukusangaja ku mutyima.—Tanga Yelemia 31:18-20.

Bandaula bidi buluji bwa binenwa bya Yelemia. Makumi a myaka kumeso kwa mafuku a Yelemia, mu mwaka wa 740 K.K.K., Yehova wālekele bulopwe bwa bisaka dikumi bya Isalela bikwatwe bu misungi na Bene Ashidia. * Leza wālekele kino kinzengele kikale bu mfuto mwanda bantu bandi bāponēne mu bubi bukatampe, basūla bidyumu byādi bibadyumuna bapolofeto bandi kitatyi ne kitatyi. (2 Balopwe 17:5-18) Lelo bantu bātyumukilwe mutyima pangala pa byamalwa byobēmwenine mu bu misungi, kitatyi kyobādi basansane na Leza wabo ne kwikala kulampe na yabo ntanda? Le Yehova wāidilwe myanda yabo yonso? Le kādipo wakwibatambula monka kwadi?

‘Neālakenye’

Bantu bādi mu bupika bāfikile pa kuyuka kilubo kyabo ne kwisāsa besāsa. Yehova wāmwene mutyima wabo wa kwisāsa. Ivwana mulombwela Yehova milangwe ne mwiivwanino wa Bene Isalela bamisungi, baita bonso mu kikonge bu Efelaimi.

Yehova unena’mba, “Naivwana i biyampe’tu Efelaimi widila madilo a ku mutyima.” (Vese 18) Wāivwene madilo a Bene Isalela obādi badila pa bintu byālupukile ku bubi bwabo. Mufundi umo unena’mba, musemwa wa amba, “widila madilo” ubwanya kushintulula “kwiyaya nansha kwialañanya koku ne koku.” Bādi pamo na mwana mujimine upuka mutwe na kwialakanya palangulukila pa malwa aeletele aye mwine ne pa vuluka būmi bwaadi nabo paadi ku njibo. (Luka 15:11-17) Lelo bantu bādi banena bika?

“Ubandingila . . . nka bwa mwana ñombe wampikwa kwibidila lupungu.” (Vese 18) Bantu bāyukile amba bādi bafwaninwe kulemununwa. Kupwa, bāikele pamo bwa mwanā ñombe wampikwa kwibidila. Dibuku dimo dinena’mba, kuno kukwatañanya kubwanya kushintulula’mba bāikele pamo bwa mwanā ñombe wādi kashā “kakalabele nansha kutomboka pa kusela lupungu.”

“Ngalamune bidi nabya nami nkālamunwa mwanda wi Yehova Leza wami.” (Vese 18) Bantu bāityile Leza na mutyima wabo wa kwityepeja’mba ebakwashe. Bājimine mu mwiendelejo wabo wa bubi, ino pano bālombele ebakwashe bajokele mu dishinda dya kumona buntu bwandi. Bwalamuni bumo bunena amba: “Wi wetu Leza—tujokele’po kodi.”—Contemporary English Version.

 ‘Nealakenye pa mutyima; . . . nafwijibwa bumvu, eyo, ke kuvutakanibwa kadi.’ (Vese 19) Bantu bēalakenye mwanda bālongele bubi. Bāitabije matope ne kilubo kyabo. Bādi na abo bepāpa pa mutyima, bafwijibwe bumvu kadi batyumukwe mu bidyoma.—Luka 15:18, 19, 21.

Bene Isalela bēsāshile. Bēalakenye bininge, besāsa bubi bwabo kudi Leza ne kujoka ku mashinda abo mabi. Le kwisāsa kwabo kwātaleje mutyima wa Leza? Le wāitabije bajokele kwadi?

“I Binebine Nkamufwila Lusa”

Yehova wādi ulamete Bene Isalela mu muswelo wa pa bula. Wānene amba: “Ne shabantu mu Isalela kabidi Efelaimi e umbedi wami.” (Yelemia 31:9) Lelo shabana wa buswe ukokeja namani kupela kutundaila mwana udi na mutyima wa kwisāsa kwa binebine? Tala muswelo ulombola Yehova milangwe ya bu Mbutwile ku bantu bandi.

“Efalaimi i wami mwana mwana-mulume musanshibwe bikata, i wami mwana o nswele mpata. Kyaba kyonso kyo mfwaninwe kumuponeja, nkemulanga’nka kumulanga.” (Vese 20, Dibuku Dijila) Bine bino shabyo i binenwa bya kanye! Pamo bwa mbutwile wa lupusa aye’ko wa buswe, Leza wādi unenwe’nka kunena binenwa bya ‘kuponeja’ bandi bana ne kwibadyumuna kitatyi ne kitatyi pangala pa mashinda abo a bubi. Kitatyi kyobāpelele pelē kumwivwana, wēbalekele baselwe bu misungi—pamo’nka na aye webapangile ku njibo. Nansha byaādi unenwe kwibapa mfuto, inoko kēbedilwepo. Kādipo wa kwibelwa nansha dimo. Shabana wa buswe kelwangapo bandi bana. Ino, le Yehova wēivwene namani paāmwene kwisāsa kwa binebine kwa bandi bana?

“Mutyima wami unsansa pa mwanda wandi kadi mukwatyilwa kanye kakatakata.” (Vese 20, DD) Yehova wāivwanine bandi bana lusa lukatampe. Kwisāsa kwabo kwambulwa budimbidimbi kwātengele mutyima wandi, kadi wādi wabila bininge kwibajokeleja kwadi. Pamo bwa mbutwile wa mu lukindi lwa Yesu lwa mwana mujimine, Yehova nandi ‘wāfwidile bandi bana lusa’ ne kwibatundaila kwadi.—Luka 15:20.

“Yehova Wantambula Monka!”

Binenwa bidi mu Yelemia 31:18-20 bitupa bujinguludi pa kinyenye ne lusa lwa Yehova. Leza kelwangapo boba bāmwingidile. Lelo bikekala namani shi bano bantu basaka kujokela kwadi? Leza udi na “mutyima wa lubilo wa kulekela.” (Mitōto 86:5) Kakapangapo nansha dimo boba bonso bāya kwadi na mutyima wa kwisāsa. (Mitōto 51:17) Ino, usangelanga kwibatambula ku njibo.—Luka 15:22-24.

Mwana-mukaji utelelwe kūlu’ku waboile mulangwe wa kujokela kudi Yehova ne kukatanwa ku kipwilo kya Batumoni ba Yehova kya mu kyabo kibundi. Dibajinji wadi ufwaninwe kukomena milangwe yandi mibi. Uvuluka amba, “Nadi netyepelwa.” Ino bakulumpe ba pa kipwilo bamukankamikile ne ku mukwasha aluje monka bukomo bwa ku mushipiditu. Unena na mutyima wa kufwija’ko amba, “I kya kutendelwa’po kashā Yehova pa nkudeka njokele kwadi!”

Shi nobe wāingidile Yehova ne pano udi na mulangwe wa kumwingidila monka, tubakwite wende ku kipwilo kya Batumoni ba Yehova kya mu kyenu kibundi. Vuluka’mba Yehova ulondololanga na kinyenye ne lusa kitatyi kimwita bantu ba mutyima wa kwisāsa amba, “Tujokele’po kodi.”

[Kunshi kwa dyani]