Kundamenu Kwakwihi Nanzambi

“Twiteji Tufunti Kumukala Wetu”

Komana mwadiña nakumukalakela Yehova? Komana mwafwilaña kumukalakela cheñi ilaña mwajinokaña neyi watela kuyitambwila? Mwani tañenu nakanañachima chinu chibaaba nichinalondeluhu. Anayisoneki kulonda yiyikwashi chikupu.

M UMBANDA wumu walekeli kumukalakela Nzambi kwesekeja nanshimbi yawakwaKristu yamudizishiluwu kuwansi wahosheli nindi: “Nalombeli kudi Yehova nami yañiteji nifunti kulonda nimukalakeleña nikwikala nawulunda wawuwahi nindi.” Komana munamutiyili wushona? Mwadihulaña nenu: ‘Indi Nzambi watiyaña ñahi hadi antu adiña nakumukalakela? Komana wanukaña antu wenawa? Komana wakeñaña nindi ‘afunti kumukala’?’ Hakwila nawu twakuli awa malwihu, tushinshikenu mazu asonekeliyi Yeremiya. Chakadi nikujina ñakwilu yimukuwana yikuyizañalesha.—Tañenu Yeremiya 31:18-20.

Shinshikenu chuma chaletesheli Yeremiya yahoshi awa mazu. Mu 740 B.C.E., yaaka yayivulu henohu Yeremiya kanda yasemuki, Yehova wetejeli wanta wanyitaña ikumi wawaIsarela kuyitwala muwunkoli kudi Ashuri. * Nzambi wetejeli iku kukala kuyiholokeli antu jindi kulonda ayibabeshi muloña atachikili kuvulumuna chikupu, nakudiwula chayisoñamishileñawu atuprofwetu indi mpinji yejima. (2 Anyanta 17:5-18) Komana antu ahimpili yililu yawu muloña wamakabi amweneñawu muwunkoli, hampinji yayilekesheluwu kumuzatila Nzambi yawu nikufuma mumukala wawu? Komana Nzambi wayilalameneni chikupu? Komana nateli kuyiteja kufunta kumukala wawu nakutachika kumukalakela?

“Hinukubalumuka Mumuchima”

Hampinji yadiñawu muwunkoli antu elukili nawu avulumwini nawa abalumukili mumuchima. Yehova wamweni nindi anabalumuki chikupu mumuchima. Tiyenu Yehova chalumbulwiliyi chatiyileñawu aIsarela adiña muwunkoli niyililu yadiñawu nayu. Wayiteneni wejima wawu nindi Efweremi.

Yehova wahosheli nindi, ‘Chalala namutiyi Efweremi hakudishonashona.’ (Vasi 18) Watiyili aIsarela chadilileñawu hamuloña wanshidi yawu. Muntu wumu wadiza chikupu wahosheli nindi izu dakwila nawu “kudishonashona” dinateli kulumbulula “kuzaala hela kukanka.” Adiña neyi mwana wavulumwini wadiña nakuhuñisha mutu muloña wakuneña chikupu hampinji yinakutoñojokayi makabi anadileteliyi nikutoña chahandileñayi kumukala wawu. (Luka 15:11-17) Indi antu ahosheleña nawudi?

‘Wunañeti . . . neyi chetañawu mwana kañombi wuchidi kanda amudizishi.’ (Vasi 18) Antu etejeli nawu akeñekeleña kuyibabesha. Kafwampi adiña neyi mwana kañombi wuchidi kanda amudizishi. Mukanda wumu wahosha nawu kwesekeja muniyi njila kunateli kutalisha mukwila nawu adiña neyi ñombi wadi kubula “kubabeshawu neyi yabula kudikaña nampanda.”

 ‘Mbalumuni nibalumuki, muloña yeyi Yehova Nzambi yami.’ (Vasi 18) Adizozeli munyichima, amutambikili Nzambi. Ajimbeli muloña wanshidi, ilaña alombeleña wukwashu kulonda awani wuselewa windi. Bayibolu yimu yahosha nawu: “Yeyi Nzambi yetu, twiteji tufunti kumukala wetu.”—Contemporary English Version.

‘Hinukubalumuka mumuchima. . . . Natiyili nsonyi nawa nasawukili.’ (Vasi 19) Antu aneñeli chikupu muloña avulumwini. Etejeli muloña wawu. Aneñeli chikupu.—Luka 15:18, 19, 21.

A Isarela abalumukili munyichima. Aneñeli nankashi, etejeli nshidi jawu kumesu aNzambi nikuleka yililu yawu yatama. Komana Nzambi wukuyanakena muloña wakubalumuka munyichima? Komana wukuyiteja kufunta kumukala wawu?

“Chalala Nakamutiyila Wushona”

Yehova wayikeñeli chikupu aIsarela. Wahosheli nindi: ‘Ami naIsarela niTata yindi, niEfweremi hiwedi wami.’ (Yeremiya 31:9) Kwosi tata yawantu wunateli kukaana kutambwila mwanindi wunabalumuki chikupu mumuchima. Shinshikenu Yehova chamwekeshañayi yitoñojoka yindi yidi neyi yaTata yawantu hadi antu jindi.

‘Efweremi himwanami nakeña, tahindi? Himwana wakutiyisha kuwaha, tahindi? Muloña chonsu chinamutenaña chakumuzuwila namwanukaña nankashi nihanu.’ (Vasi 20) Chalala awa mazu akukeña. Kufwana nvwali wabulaña kuhita mumbadi nawa wukweti kukeña, Nzambi watela kuhosha ‘nakuzuwila’ anyanindi nakufuntila funtilahu hakuyibabesha anyana kutalisha hanshidi jawu. Chakaaninuwu kutiyilila, wayitejeli kuya muwunkoli, kafwampi afumini mumukala wawu. Hela chakwila wayibabesheli, hayivulamenenuku. Kwila yela chuma chamuchidiwu nehi. Tata yawantu wukweti kukeña havulamenaña anyaninduku. Hanu dinu Yehova watiyili ñahi chamweniyi anyanindi anabalumuki chikupu munyichima?

‘Kumutoñojoka yena muchima wami mwivumu hiwukwenda. Chalala nakamutiyila wushona.’ (Vasi 20) Yehova wayitoñojokeleña anyanindi chikupu. Chabalumukiluwu munyichima chikupu chamushikili hamuchima, nawa wafwilileña nankashi nindi afunti kudi yena. Kufwana tata yawantu wamuchishimu chaYesu chamwana wajimbeli, Yehova ‘watiyili wushona’ nawa wakeñeleña kuyitambwila anyanindi chafuntawu kumukala wawu.—Luka 15:20.

“Yehova Ñiteji Nifunti Kulonda nuKukalakeleña”

Mazu ekala haYeremiya 31:18-20 atukwashaña kwiluka wushona niluwi lwaYehova. Nzambi havulamenaña antu adiña nakumukalakelaku. Chumanyi chelañayi neyi antu wenawa anakukeña kufunta kudi yena? Nzambi ‘wayanakenaña.’ (Masamu 86:5) Hafutalelaña antu abalumukaña munyichima afuntaña kudi yenaku. (Masamu 51:17) Kwambukaku, watiyaña kuwaha kuyitambwila.—Luka 15:22-24.

Mumbanda atenawu kumatachikilu watondeluhu kufunta kudi Yehova nawa wayili kuchipompelu chawaYinsahu jaYehova chamwiluña dawu. Wasambilili kushinda yitoñojoka yindi yatama. Wanukaña nindi, “Nadimweneña neyi nashikilamu wanyi kumukalakela Yehova.” Ilaña aeluda muchipompelu amukolesheli hama nikumukwasha kwikala wakola cheñi kuspiritu. Wahosheli nakusakilila nindi, “Natiyaña kuwaha muloña Yehova wañitejeli kufunta kudi yena.”

Neyi mwadiña nakumukalakela Yehova nawa munakufwila kumukalakela cheñi, tunayikoleshi kuya kuchipompelu chawaYinsahu jaYehova chamwiluña denu. Anukenu nenu Yehova watiyaña wushona niluwi neyi antu abalumuka munyichima nakumwila nawu, “Twiteji tufunti kumukala wetu.”

Nsona Yimwatela Kutaña muApril:

◼ Yeremiya 17-31

[Tumazu twaheshina]