Bo a yega di sirbi Jehova un tempo? Bo tin gana di sirbie atrobe pero ta duda cu e ta acepta bo bek? Si ta asina, no keda sin lesa e articulo aki. El a ser prepara specialmente cu bo na mente.

UN SEÑORA a bisa: “Mi a pidi Jehova den oracion pa por fabor permiti mi bini cas bek y pordona mi pa e dolor cu mi a caus’e.” Maske e señora aki a lanta den e berdad, cu tempo, el a stop di sirbi Jehova y a hiba un bida contrario na e normanan di Dios. Bo ta sinti duele di dje? Kisas bo ta puntra bo mes: ‘Kico Dios ta pensa di e personanan cu un tempo tabata sirbie? E ta corda riba nan? E kier pa nan “bini cas bek”?’ Pa contesta e preguntanan aki, laga nos analisa un relato for di e buki biblico di Jeremias. Sin duda e contestanan lo alegra bo curason.​—Lesa Jeremias 31:18-20.

Dicon Jehova a inspira Jeremias pa expresa e palabranan ey? Wel, na aña 740 prome cu nos era, decadanan prome cu Jeremias a nace, Jehova a permiti e reino di dies tribu di Israel cay den man di e Asirionan. * Dicon Jehova no a preveni esaki? Wel, e kier a disciplina su pueblo, pasobra nan tabata comete pica serio y no tabata haci caso di e spiertamentonan di e profetanan cu el a manda. (2 Reynan 17:5-18) Awor, e echo cu e Israelitanan a pasa den dificultad tempo cu nan tabata den exilio, leu di nan pais y separa di Dios, a pone nan cambia nan actitud? Jehova a lubida riba nan? Of el a permiti e Israelitanan regresa Israel y sirbie atrobe?

“Mi A Arepenti”

Ora e Israelitanan tabata den cautiverio, nan a recobra nan sano huicio y a arepenti. Jehova sigur a mira nan arepentimento sincero. Wak con el a describi nan actitud y sintimento.

Jehova a bisa: “Siguramente mi a tende Efraim su kehamento.” (Versiculo 18) Si, Jehova a tende con Efraim, esta, e Israelitanan cu tabata den exilio, tabata suspira y lamenta pa motibo di e consecuencianan di nan mal conducta. Segun un comentarista di Bijbel, e expresion “su kehamento” por nifica tambe “sacudimento.” Pues, ta comosifuera e Israelitanan tabata sacudi nan cabes manera un yiu rebelde cu tabatin duele di loke el a haci y cu tabata desea di bay cas bek unda e tabatin un mihor bida. (Lucas 15:11-17) Kico e Israelitanan a bisa anto ora nan tabata den cautiverio?

“Bo a castiga mi . . . manera un bishe cu nan no a haci manso.” (Versiculo 18) E Israelitanan a reconoce cu e disciplina tabata na su luga. Al fin y al cabo, nan tabata comporta nan mes manera bishe cu no a ser entrena. Segun un buki di consulta, bo por compronde e comparacion ey di e manera aki: E Israelitanan tabata manera un bishe cu nunca lo a “sinti e puy di e bara di coreccion si e no a purba di sali for di bou di e yugo.”

Pesey, awor cu un curason humilde, e Israelitanan a sclama na Dios: “Trece mi bek pa mi por  wordo restaura, pasobra abo ta SEÑOR mi Dios.” (Versiculo 18) Nan a hiba un bida aleha for di Dios, pero awor nan a roga Jehova pa yuda nan cultiva un bon relacion cu ne atrobe. Un otro traduccion di Bijbel ta bisa: “Abo ta nos Dios—por fabor, permiti nos bini cas bek.”—Contemporary English Version.

“Mi a arepenti. . . . Mi a keda brongosa y tambe humilia.” (Versiculo 19) E pueblo a sinti duele cu nan a peca. Nan a admiti nan eror. Nan tabatin berguensa di loke nan a haci, y nan tabata sinti nan masha desanima; ta comosifuera nan tabata bati nan pecho di tristeza.​—Lucas 15:18, 19, 21.

Si, e Israelitanan a arepenti di curason, a confesa nan pica na Dios y a bira for di nan mal caminda. Nan a demostra cu nan tabatin duele di loke nan a haci. Awor, Jehova a pordona nan? El a permiti nan bay cas bek?

“Siguramente Lo Mi Tin Misericordia di Dje”

Jehova tabatin un relacion masha special cu e Israelitanan. El a bisa: “Mi ta un tata pa Israel, y Efraim ta mi primogenito.” (Jeremias 31:9) Awor, un tata cu ta stima su yiu lo nenga di tum’e bek na cas siendo cu e yiu a arepenti sinceramente? Wak con Jehova a expresa su sintimentonan di Tata pa su pueblo.

El a bisa: “Ta Efraim ta mi yiu homber stima? E ta mi yiu faborito? Maske mi papia hopi biaha contra dje, toch mi ta corda riba dje.” (Versiculo 20) Bunita, no ta berdad? Mescos cu un tata firme y a la bes amoroso, Dios a hay’e ta ‘papia contra’ su yiunan bisando nan bes tras bes pa stop cu nan mal echonan. Ma debi cu nan no kier a tende, el a permiti nan bay den exilio, na moda di papia, bay for di cas. Pero maske el a castiga nan, e no a lubida riba nan. Nunca lo e haci esey. Un tata cu ta stima su yiunan no ta lubida riba nan. Pero con Jehova a sinti ora el a mira cu di berdad su yiunan a arepenti?

Jehova a bisa: “Mi curason ta anhela na dje; siguramente lo mi tin misericordia di dje.” (Versiculo 20) Jehova a sinti falta di su yiunan. Nan arepentimento sincero a conmove su curason y e tabatin masha gana pa nan bolbe cerca dje. Si, mescos cu e tata den e parabola di e yiu perdi, Jehova “a haya duele” di su yiunan y a anhela pa nan bini cas bek.​—Lucas 15:20.

“Jehova A Permiti Mi Bini Cas Bek!”

E palabranan na Jeremias 31:18-20 ta yuda nos mira bon cla cu Jehova ta un Dios sumamente compasivo y misericordioso. E no ta lubida esnan cu un tempo a sirbie. Pesey, si un persona kier bolbe sirbie, Dios ta ‘cla pa pordon’e.’ (Salmo 86:5) Hamas e lo rechasa hende cu arepenti di curason y cu kier tin un bon relacion cu ne atrobe. (Salmo 51:17) Al contrario, lo e acepta nan brasa habri.—Lucas 15:22-24.

E señora cu nos a menciona na comienso di e articulo aki a tuma iniciativa pa bolbe cerca Jehova y a cuminsa asisti na e reunionnan di congregacion. Na prome instante, e mester a lucha contra sintimentonan negativo. E ta corda: “Mi a sinti mi masha malo mes.” Pero e ancianonan di congregacion a anim’e y a yud’e bira spiritualmente fuerte atrobe. Cu un curason yen di aprecio, el a bisa: “Mi ta masha contento cu Jehova a permiti mi bini cas bek!”

Si bo tabata sirbi Jehova un tempo y tin deseo di cuminsa sirbie atrobe, nos ta anima bo pa bishita e congregacion di Testigonan di Jehova den bo area. Corda cu Jehova ta un Dios compasivo y misericordioso, y e ta cla pa acepta un persona arepenti cu sclama na dje: ‘Por fabor, permiti mi bini cas bek.’

Den april nos ta recomenda bo lesa

▪ Jeremias 17-31

[Nota]