¿Maykʼajllapis Diospa llajtanpi karqankichu? Jina kajtenqa, kayta, qhepan yachaqanatawan ukhuncharinaykita munayku, imaraykuchus kay yachaqanasqa Diosman kutirikuyta munajkunapaj wakichisqa kashan.

“UJ WARMI nerqa: “Sapa kuti Diosmanta mañakoj kani, llajtanman kutiykapojta saqenawanta, juchasniymanta perdonanawanta ima”, nispa. Payqa, Diospa llajtanpi uywasqa kaspapis, Diosmanta karunchakorqa. Karunchakusqanrayku mayta ñakʼarishasqanpi tʼukurispa sonqoyki nanasunkichá. Chayrayku ichá tapukunki: “¿Dios kay runasmanta khuyakunchu, munanchu payman watejmanta kutirikunankuta?”, nispa. Profeta Jeremiaspa qhelqasqanqa mayta sonqochasonqa (Jeremías 31:18-20 leey).

Jeremías, nisqasninta maykʼajchus qhelqasqanta qhawarina. Ashkha wata ñaupajta niraj nacekushajtin, Jehovaqa, 740 watapi asirios Israelpa chunka ayllunta maqanakupi atipanankuta, ashkha israelitastataj apakapunankuta ima saqerqa. * Israelitasqa, mayta juchachakorqanku, Diosman kutirikunankuta profetas kutin kutita nisqankutapis qhesacharqanku, chayraykutaj Dios jasutʼerqa (2 Reyes 17:5-18). Israelitas waj suyuman apasqa kajtinku, ¿ima paykunamanta karqa? ¿Sajra ruwayninkuta saqerqankuchu? ¿Dios paykunata qonqarqachu? Dios, payman kutirikunankuta, ¿saqenmanchu karqa?

“Qanman kutirikamuni”

Israelitasqa, waj suyupi kasparaj pesachikorqanku. Jehová Diostaj, chayta rikorqa. Bibliaqa, Jehová israelitaspa, ruwasqankumanta, llakikusqankumanta parlasqanta rikuchin, pikunatachus Efraín aylluta jina rejserqa, arí Diosqa, tukuy sonqo pesachikusqankuta rikorqa.

“Efraín ayllumanta kajkunata waqaspa willakojta uyarini.” (18 versículo.) Diosqa, israelitas sajra ruwayninkumanta, waqaspa willakusqankuta uyarerqa. Bibliamanta sutʼinchaj diccionario nisqanman jina “waqaspa willako[yqa]”, “umanta khiwiriy”, niyta munallantaj, imaynatachus uj kʼullu wawa mana allin risqanmanta pesachikuspa wasinman kutipuyta munaspa umanta khiwirinman ajinata (Lucas 15:11-17). ¿Imaynatá israelitas pesachikusqankuta rikuchej kanku?

“Noqa, mana amansasqa torillo jina karqani; jinapis qan kasukuyta yachachiwarqanki.” (18 versículo.) Israelitasqa, jasutʼinapaj jina kasqankuta nerqanku. Imaraykuchus paykunaqa, uj mana amansasqa torillo jina karqanku. Uj libro nisqanman jina, chay kikinchayqa, israelitas llankʼanapaj tʼojsinata necesitaj torillo jina kasqanta rikucherqa.

“Qanman kutirichiway, noqataj qanman kutirikamusqayki, imaraykuchus qanmin Señorniy Tata Dios kanki.” (18 versículo.) Israelitasqa, mayta pesachikusqankurayku, Diosmanta  mañakuyta qallarerqanku. Paykuna, Diosmanta karunchakorqanku, maytataj juchallikorqanku. Chaywanpis Dios perdonananta munasqankuraykutaj, yanapayninta mañakorqanku.

“Qanman kutirikamuni. Pechoyta takakuni, pʼenqasqataj kʼumuykachashani.” (19 versículo.) Israelitasqa, juchallikusqankumanta mayta pesachikorqanku, Diospa contranpi juchallikusqankutataj nerqanku. Chayraykutaj sinchʼita phutikorqanku, llakikorqanku ima (Lucas 15:18, 19, 21).

Israelitas pesachikusqankoqa sutʼi karqa. Juchallikusqankumanta pʼenqakusqankuraykutaj, juchasninkumanta Diosman willakorqanku, sajra ruwayninkutataj saqerqanku. ¿Pesachikusqanku, Diospa sonqonman chayarqachu? ¿Jehová, llajtankuman kutiripunankuta saqerqachu?

“Sonqoy wawayawajtin, mayta paymanta khuyakuni”

Jehovaqa, llajtanta mayta munakorqa. Jeremías 31:9 versiculopi nerqa: “Noqamin Israelpa Tatan kani, Efraíntaj kuraj kaj waway”, nispa. Chayrayku, ¿imayna tatataj munasqa wawan tukuy sonqo pesachikojtin, watejmanta mana japʼikapunmanchurí? Imaynatachus Dios, uj tata jina llajtanta mayta munakusqanta qhawarina.

“Efraínqa noqapaj munasqa waway jina, aswan munasqa kaj churiy jina. Payta kutin kutinta kʼamini chaypis, manapuni paymantaqa qonqapunichu.” (20 versículo.) Cheqamanta nisunman, Jehová may munakuyniyoj tata kasqanta. Chaywanpis Payqa, israelitasman sajra ruwaykunasta ruwallajtinkupuni mana allinpi tukunankuta “kutin kutita” nerqa. Mana kasukusqankuraykutaj, waj suyuman apachikunankuta saqerqa. Chaywanpis Diosqa, uj munakuyniyoj tata jina llajtanmanta mana qonqakaporqachu. ¿Imayná Dios, llajtan pesachikojtin sientekorqa?

“Sonqoy wawayawajtin, mayta paymanta khuyakuni.” (20 versículo.) Diosqa, wawasnin payman kutirikunankuta munasharqa. Tukuy sonqo pesachikusqankoqa, sonqonman chayarqa, payman kutirikunankutataj munarqa. Jesuspa, rijchʼanachinanmanta herencianta usuchej waynaj tatanpata jina, Jehovaj “sonqon wawayarqa” (Lucas 15:20). Jehovaqa, wawasnin payman kutirikunankuta mayta suyasharqa.

“¡Jehová payman kutirinayta saqewarqa!”

Jeremías 31:18-20 nisqanqa, Diospa kʼacha kayninta, khuyakuyninta astawan jatunpaj qhawanapaj yanapawanchej. Payqa, uj tiempopi payta yupaychajkunata mana qonqanchu. Payman kutiriyta munajtinkutaj ‘perdonananpaj wakichisqa kashan’ (Salmo 86:5). Ni jaykʼajtaj pesachikojkunata qhesachanchu (Salmo 51:17). Astawanqa, chunka makiwan payman kutirejkunata japʼikapun (Lucas 15:22-24).

Kay yachaqanaj qallariyninpi, uj warmimanta parlarqanchej. Payqa, Diospa llajtanman kutiykapuytapuni munasqanrayku, Jehovamanta sutʼinchajkunaj qotuchakuyninkupi yanapata maskʼarqa. Pay nerqa: “Qallariypeqa, Dios mana perdonanawanta yuyarqani”, nispa. Chaywanpis, qotuchakuymanta ancianos espiritualmente yanaparqanku. Chantá nillantaj: Jehová, llajtanman kutiykapunayta saqewasqanmanta may agradecesqa kashani”, nispa.

Diosmanta karunchakorqanki chayqa, watejmanta payman kutiriyta munaspaqa, Jehovamanta sutʼinchajkunaj qotuchakuyninkupi yanapata maskʼay. Jehová, “qanman kutirichiway”, nispa mañakojkunaman, khuyakuyninta rikuchisqanta ama qonqaychu.

[Sutʼinchaynin]