Diosman asuykuychik

“Diosniy kasqaykiraykum kutirimusqayki”

Ichapas iskayrayachkanki llaqtanta saqesqaykirayku Dios huktawan chaskisunaykimanta. Chayna kaptinqa, kallpanchaykikum kay yachachikuykunata estudianaykipaq, kayqa qampaq hina qellqasqam kachkan.

TAKSACHANMANTA Diospa llaqtanpi uywasqa kaq huk warmim Diosmanta karunchakuruspan nirqa: “Sapa kuti mañakuspaymi Diosta ruegakuq kani kaqmanta payman asuykachiwananpaq hinaspa tukuy ima llakichisqaymanta pampachaykuwananpaq”, nispa. ¿Manachu llakikunchik kay warmipa imayna tarikusqanpi piensaspanchik? Ichapas tapukunki: “¿Imaynatataq Diosqa qawan kay warmi hina tarikuqkunataqa? ¿Yuyarinraqchu? ¿Munanmanchu kutirimunankuta?”, nispa. Jeremiaspa qellqasqankunam anchata yanapawasun kaykunamanta yachananchikpaq (leey Jeremias 31:18-20).

Puntataqa qawasun Jeremias chayta qellqaptin imakuna pasakusqantaraq. Chunkantin watakuna puntataraqmi, Jeremias manaraq nacechkaptin Diosqa saqerqa cristianokunapa tiemponmanta ñawpaqtaraq 740 kaq watapi Asiria nacionniyoq runakuna Israelpa chunka castankunata preso apanankupaq. * Israelitakunaqa hatun huchakunatam rurachkarqaku, profetakunata mana kasukusqankuraykutaqmi Jehová Diosqa correginanpaq tantearurqa (2 Reyes 17:5-18). ¿Imataq pasarqa Diosmantawan llaqtankumanta karupi tarikuptinku? ¿Cambiarqakuchu imayna piensayninkuta? ¿Qonqarurqachu Jehová Diosqa paykunata? ¿Icha munarqachu kaqllamanta kutirimunankuta?

“Wanakullanim”

Israelitakunaqa entienderqakum Jehová Diospa corregisqantaqa. Llaqtankumanta karupi kaspankuqa cuentata qokuruspankum wanakurqaku. Jehová Diosqa qawarqam sonqonkumanta wanakusqankutaqa. Chaytam qawachirqa Efrainpa otaq chunkantin ayllukunapa imayna kasqanmantawan sientesqanmanta llakikuywan rimaspan.

‘Efrain castapa [...] quejakusqantam uyariruni.’ (Versiculo 18.) Israelitakunapa mana allin rurasqankurayku quejakusqankuta otaq pesakusqankutam Dios uyarirurqa. Mana allin rurasqankunamanta pesakuspan wasinman kutimuyta munaq churi hinam, paykunaqa Diosman kutirimuyta munarqaku (Lucas 15:11-17). Chaynaqa, ¿imaynatataq israelitakunaqa qawachirqaku wanakusqankuta?

“Manaraq mansasqa torota hinam corregiwarqanki.” (Versiculo 18.) Israelitakunaqa cuentatam qokurqaku corregisqa kay necesitasqankumanta. Yaqapaschá mana allinta rurasqankurayku manaraq mansasqa torowanqa rikchanachikurqaku. Huk libropa nisqanman hinaqa chayna torokunaqa “puyawan correginatam necesitanku”.

“Qampuni kutirichillawaptikim kutirimusqayki. [...] Diosniy kasqaykiraykum kutirimusqayki.” (Versiculo 18.) Sonqomanta wanakuspankum Dios qayakuyta qallaykurqaku. Paykunaqa Diosmanta karunchakuspa achka huchakunata ruraruspapas  munarqakum Dios pampachaykunanta, chayraykum yanapakuyta mañakurqaku.

“Wanakullanim [...]. Penqakuspaymi kunan humillakuni.” (Versiculo 19.) Israelitakunaqa penqakurqakum huchankumanta hinaspam mana allin rurasqankuta reqsikurqaku. Paykunaqa ancha llakisqa hinaspa llumpay hukmanyasqam tarikurqaku (Lucas 15:18, 19, 21).

Sutillamá qawakun wanakusqankuqa. Penqakuspankum huchankumanta Diosman willakurqaku hinaspankum mana allin rurasqankuta saqerqaku. ¿Chaykuna rurasqankunallawanchu Diosqa huchankumanta pampachaykuspan llaqtankuman kutirimunankupaq saqerqa?

“Anchallatañam llakikuni paymantaqa”

Israelitakunataqa ancha-anchatam Jehová Dios kuyarqa, Jeremias 31:9 nin: “Ñoqaqa kani Israel casta runakunapa taytanmi. Ñoqaqa kani piwiy Efrain castapa taytanmi”, nispa. ¿Manachu huk taytaqa kuyasqan churin sonqomanta wanakuspan kaqllamanta kutimuptin chaskiykunman? Kay qatiqninpim qawasun huk tayta hina Jehová Dios llaqtan nanachikusqanmanta.

“Kuyayllapaq churiy hinam Efrain castaqa. Kuyasqay warmay hinam Efrain castaqa. Qaqcharuspaypas manam qonqanichu paytaqa.” (Versiculo 20.) ¡Mayna sumaqmá kay nisqankunaqa! Diosqariki kuyakuqllaña taytam. Chaywanpas churinkunataqa ‘qaqcharqam’ otaq rurasqanku mana allinpi tukunanmantam nirqa. Chayraykum profetankunawan sapa kuti willachisqanta mana kasukuptinku llaqtankumanta qarqosqa kanankuta saqerqa. Chaywanpas, imaynam ancha kuyakuq taytaqa churinta mana haykapipas qonqanchu chaynam paykunatapas mana qonqarurqachu. Hinaptinqa, ¿imaynataq Jehová Diosqa tarikurqa sonqomanta wanakuptinku?

“Sonqoypas anchatam waqan paymantaqa. Anchallatañam llakikuni paymantaqa.” (Versiculo 20.) Churinkuna kaqllamanta kutirimunankutam Jehová Diosqa munarqa. Tukuy sonqonkuwan wanakusqankuta llakipayarispanmi kaqllamanta payman kutirimunankuta munarqa. Chinkasqa churimanta Jesuspa rikchanachisqanpi llakipayarikuq tayta hinam Jehová Diosqa paykunatapas ‘llakipayarirqa’ (Lucas 15:20). Ancha ganasniyoqmi karqa churinkunata kaqllamanta chaskiykunanpaqqa.

“Jehová Diosmi kaqllamanta chaskiykuwarqa”

Jeremias 31:18-20 nisqanmi qawachiwanchik ancha llakipayakuq chaynataq pampachakuq Dios kasqanta. Payqa manam qonqanchu llaqtanmanta karunchasqa kaqkunataqa. Pipas payman kaqlla kutirimuyta munaptinqa ‘huchankunata pampachaykunanpaqqa listom kachkan’ (Salmo 86:5). Manataqmi sonqomanta wanakuqkunataqa haykapipas qepanchanmanchu (Salmo 51:17). Aswanmi paykunataqa kuyakuywan chaskiykun (Lucas 15:22-24).

¿Yuyachkankichu qallariypi rimamusqanchik warmimanta? Payqa Diosman kutimunanpaq tanteakuruspanmi yachasqan lawpi Jehová Diospa testigonkunawan yanapachikurqa. Paymi nirqa: “Piensarqanim manaña pampachawananta”, nispa. Qallariypiqa sasachakurqam chayna piensasqanta atipananpaqqa. Chaywanpas ancianokunam kallpancharqaku hinaspam yanaparqaku iñiyninpi ñawparinanpaq. ¿Imapim tukurqa? Kikinmi kaynata nin: “Jehová Diosmi kaqllamanta chaskiykuwarqa chayraykum ancha agradecesqa kachkani”, nispa.

Sichu Diospa llaqtanmanta karunchakuruspa kaqllamanta kutirimuyta munaptikiqa, kallpanchaykikum Jehová Diospa testigonkunapa congregacionninkupi yanapakuyta mañakunaykipaq. Amayá qonqaychu: Jehová Diosqa kuyakuywanmi chaskiykun pipas wanakuspan ‘kaqllamanta chaskiykullaway’ niqkunataqa.

[Willakuy]