I tavini ana ainei koe ia Iehova i tetai taime i mua ana? Te manako ra ainei koe i te tavini akaou iaia, inara kare i papu ia koe me ka ariki akaou mai aia ia koe? Me ka tika e tatau meitaki i teia atikara e te atikara ka aru mai. Kua akapapa tikaiia teia noou.

“KUA pure au kia Iehova kia akatika mai iaku kia oki atu kiaia e kia akakore mai i taku ara no te tamamae anga iaia.” I akakite mai ei tetai vaine tei akaruke i te au turanga Kerititiano tei apiiia mai kiaia. Te tangi ra ainei koe iaia? Te manako ra ainei koe e: ‘Eaa to te Atua manako no runga i te aronga tei tavini ana iaia? Te maara ra ainei aia ia ratou? Te inangaro ra ainei aia ia ratou kia “oki mai kiaia”?’ Ei pau atu i taua au uianga ra, ka akara ana tatou i te au tuatua ta Ieremia i tata mai. Kare ekoko e ka akapumaana mai teia au pauanga ia koe.​—E tatau ia Ieremia 31:18-20.

Akamanako ana i te akanoonooanga o ta Ieremia au tuatua. I te mataiti 740 M.T.N., e au ngauru mataiti i mua ake i to Ieremia tuatau, kua akatika a Iehova i te patireia tino ngauru o Iseraela kia apainaia e Asura ei tuikaa. * Kua akatika te Atua i teia kia tupu, ei akoanga ia ratou no te rave anga tona iti tangata i te ara kino na te akarongo kore anga ki te au akamatakiteanga putuputu a tona au peroveta. (2 Ariki 17:5-18) Kua taui ainei te iti tangata i to ratou tu no te akatuikaaia anga, e to ratou akaateaia anga mei to ratou Atua e to ratou ipukarea? Kua akangaropoina ainei a Iehova ia ratou katoatoa? Ka akaoki ainei aia ia ratou ki to ratou ipukarea?

“Kua Tataraara Iora Au”

Kua kite mai te iti tangata i to ratou tarevake ia ratou e tuikaa ra e kua akakeuia kia tataraara. Kua kite mai a Iehova i to ratou tu tataraara ngakau tae. Akarongo ana ia Iehova e akataka maira i te tu e te au manako o te ngati Iseraela tuikaa, kapiti mai anga ia Epheraima.

“Kua akarongo oki au ia Epheraima i te aue anga iaia uaorai,” i tuatua ai a Iehova. (Irava 18) Kua akarongo aia i to Iseraela aue anga no ta ratou ara. Mei tetai tamaiti ara rai te takirikiri ra i tona upoko te akamanako anga i te au turanga kino tana i tuku ki runga iaia uaorai e te inangaro maata ra i te oraanga meitaki i te kainga. (Luka 15:11-17) Eaa ta te au tangata e tuatua ra?

“Kua ako mai koe iaku . . . mei te puakatoro kare i tamātauia ra.” (Irava 18) Kua ariki te iti tangata e kua tau rai ratou kia akoia. No te mea, mei tetai punua puakatoro rai ratou kare i tereniia ana. Te aiteanga o teia tuatua akatutuanga, koia oki kare te puakatoro e “mamae i te koko anga a te rakau naringa te reira e akarongo ra,” i akakite ei tetai tataanga.

“E akaariu koe iaku, e kua akaariuia ïa au i reira, ko koe oki toku Atua ko Iehova.” (Irava 18) Kua taakaakaia to ratou ngakau, e kua kapiki atu te iti tangata ki te Atua. Kua rave ratou i te ara, inara te pati akatenga ra ratou i teianei no tetai tauturu kia mareka akaou mai aia ia ratou. Te karanga ra tetai urianga e: “Ko koe to matou Atua​—akatika mai ana ia matou kia oki atu kia koe, ine.”​—Contemporary English Version.

 “Kua tataraara iora au . . . akama akera au, koia ïa, kua aringaringa oki.” (Irava 19) Kua tataraara te iti tangata no te mea kua ara ratou. Kua ariki ratou i te kino ta ratou i rave e kua akatika e kua apa ratou. Mei te mea rai e te motomoto ra i to ratou umauma, e kua kite mai i te akama e te tu akaaka.​—Luka 15:18, 19, 21.

Kua tataraara te ngati Iseraela. Kua mii e kua akakite i ta ratou au ara ki te Atua e kua uri ke ratou mei te kino. Ka akamaru ainei to ratou tu tataraara i to te Atua ngakau? Ka akatika ainei aia ia ratou kia oki mai kiaia?

“Kua Tangi Toku Ngakau Iaia”

E pirianga vaitata tikai to Iehova ki te ngati Iseraela. Kua tuatua aia e: “Kua riro oki au ei metua no Iseraela, e ko Epheraima, ko taku ïa tama mua.” (Ieremia 31:9) Akapeea tetai metua aroa e kore ei e ariki i tana tamaiti tei tataraara ngakau tae? Akara ana e akapeea a Iehova te akakite anga i tona manako ei Metua ki tona iti tangata.

“E tamaiti akaperepere ainei a Epheraima naku? e tamaiti inangaroia ainei aia? mei taku oki tuatua anga atu iaia, kua manako tamou atu rai au iaia.” (Irava 20) E pumaana tikai taua au tuatua ra! Mei te metua pakari rai e te aroa, kua akakeuia te Atua kia ‘tuatua atu’ ki tana tamariki, te akamatakite putuputu anga ia ratou no to ratou tu ara. Te marokiakia anga ratou i te akarongo kore, kua tuku aia ia ratou kia akatuikaaia​—te mea anga ia ratou kia akaruke i te kainga. Noatu e kua akautunga aia ia ratou, kare aia i akangaropoina ana ia ratou. Kare rava aia e rave i te reira. Kare rava tetai metua aroa e akangaropoina i tana tamariki. Eaa ra to Iehova manako te kite anga i te ngakau tataraara o tana au tamariki?

“Kua manako tamou atu rai au iaia: e teianei, kua tangi toku ngakau iaia.” (Irava 20) E inangaro maata to Iehova i tana au tamariki. Kua tukia tona ngakau no to ratou ngakau tataraara, e te inangaro maata ra aia ia ratou kia oki mai kiaia. Mei te tamaiti kaimoumou apinga rai i roto i ta Iesu parapore, kua “aroa maira” a Iehova ia ratou e te inangaro maata ra i te ariki mai i tana au tamariki.​—Luka 15:20.

“E Iehova e Akatika Mai Iaku Kia Oki Atu Kia Koe!”

Te akamarama maira te au tuatua a Ieremia 31:18-20 i te tu ngakau tangi e te tu akaaroa o Iehova. Kare te Atua e akangaropoina i te aronga tei tavini ana iaia. Akapeea me te inangaro ra taua aronga ra i te oki mai kiaia? Kua “tika ia koe [te Atua] i te akakore mai i te ara nei.” (Salamo 86:5) Kare rava aia e uri ke mei te aronga e oki maira kiaia ma te ngakau tataraara. (Salamo 51:17) Mataora tikai aia i te ariki mai ia ratou.​—Luka 15:22-24.

Kua rave te vaine i taikuia i mua ana i te takainga mua i te oki atu kia Iehova e kua aere atu ki te putuputuanga o te Au Kite o Iehova i tona ngai. Te akamataanga, kua anoanoia aia kia autu i tona au manako puapinga kore. “Manako tikai au e kare oku puapinga,” i akakite mai ei aia. Inara kua oronga mai te aronga pakari o te putuputuanga i te akamaroiroianga e kua tauturu iaia kia maroiroi akaou i te pae vaerua. Ma te ngakau ariki rekareka, kua tuatua aia e, “E mea mataora tikai e kua akatika mai a Iehova iaku kia oki atu kiaia!”

Me i tavini ana koe ia Iehova i mua ana e te manako ra i te tavini akaou iaia, te pati atu nei matou ia koe kia aere atu ki te putuputuanga o te Au Kite o Iehova i toou ngai. Kia maara e te ariu maira a Iehova ma te ngakau tangi e te akaaroa me kapiki atu te aronga tataraara kiaia e, “E akatika mai ia matou kia oki atu kia koe, ine.”

[Tataanga Rikiriki i Raro]