Ia Mafuta Atu i le Atua

“Faamolemole ia Talia Mai i Matou”

Pe sa iai se taimi na e auauna ai iā Ieova? Po o e manaʻo e toe auauna iā te ia, ae o loo e taumānatu pe e na te toe talia mai oe? Faamolemole, ia faitau lelei i lenei mataupu, ma le isi mataupu o loo sosoo mai, auā ua saunia faapitoa lava mo oe.

“NA OU tatalo iā Ieova, faamolemole ia talia mai aʻu, ma faamagalo aʻu ona o loʻu faatigā iā te ia.” O le faamatalaga lenā a se tamaʻitaʻi na tuua taʻiala faa-Kerisiano na aʻoaʻoina ai o ia a o laʻitiiti. Pe e te lagona le alofa mo ia? Pe e te taumānatu, ʻO ā faalogona o le Atua iā i latou na auauna muamua iā te ia? Pe e na te manatuaina i latou? Pe e finagalo o ia e toe “talia” i latou?’ Ina ia tali na fesili, seʻi o tatou iloiloina faamatalaga na faamauina e Ieremia. E mautinoa e faamāfanafanaina lou loto i tali.—Faitau le Ieremia 31:18-20.

Seʻi mātau mea na tutupu i le taimi na tusia ai faamatalaga a Ieremia. I le 740 T.L.M., i le faitau sefulu o tausaga a o lumanaʻi taimi o Ieremia, na faataga ai e Ieova Asuria e ave faapagota ituaiga e sefulu o le malo o Isaraelu. * Na faatagaina e le Atua le oo mai o lenei mala o se aʻoaʻiga ona ua faia e ona tagata ni agasala matuiā, ma lē ano i lapataʻiga na tuuina atu pea e ana perofeta. (2 Tupu 17:5-18) Pe na suia amioga a tagata ina ua feagai ma tulaga faigatā i le nofoaga na faaaunuua ai, ma ina ua vavaeeseina mai i lo latou Atua ma mamao ese mai i lo latou nuu moni? Pe na galo iā Ieova i latou uma? Po o le a ia toe taliaina ea i latou?

“Na Ou Lagona le Faanoanoa”

Na amata ona suia manatu o tagata ma salamō ai, a o ave faapagota i latou. Na silafia e Ieova lo latou salamō moni. Seʻi mātau le auala na faamatala ai e Ieova uiga ma faalogona o tagata Isaraelu na ave faapagota, lea e taʻua o Efaraima.

Na fetalai mai Ieova: “Ua ou lagona atu Efaraima o auē.” (Fuaiupu e 18) Na faafofogaina e Ieova le auēga a tagata Isaraelu ona o aafiaga o a latou agasala. Ua faapea mai se tagata atamai, o le upu “auē” e uiga atu i se “gaoioiga e pei o le gatete po o le lūlū o se mea.” Sa pei i latou o se atalii fouvale o loo lūlū lona ulu ona o le matuā faanoanoa, a o mafaufau i faigatā ua oo iai ona o ia lava, ma ua moomoo e toe fia foʻi i lona aiga. (Luka 15:11-17) O ā faamatalaga a tagata sa fai?

“Ua e aʻoaʻia aʻu . . . e pei o se tamaʻi povi poʻa ua lē aʻoaʻoina.” (Fuaiupu e 18) Na faailoa mai e tagata ua talafeagai le faasalaga mo i latou, auā ua pei i latou o se povi poʻa e leʻi aʻoaʻoina. Ua taʻua i se tasi o tusi, o lenei faatusatusaga e ono uiga atu i se povi poʻa ua “tui i le tui povi ona ua musu pe tetee i le amoina o le amo.”

“Ia e faaliliuina aʻu, ona ou nofosauni lea e toe liliu atu, auā o oe o Ieova loʻu Atua.” (Fuaiupu e 18) Na faamaulalo o latou loto ma valaau atu i le Atua. Na latou matuā lolo atu i agasala matuiā, a o lenei ua latou saʻili atu mo se fesoasoani ma taumafai e maua lona finagalo malie. Ua faapea  mai se tasi o faaliliuga: “O oe o lo matou Atua—faamolemole ia talia mai i matou.”—Contemporary English Version.

“Ona ou salamō ai lea; . . . na ou māsiasi ma ou lagona le faalumaina.” (Fuaiupu e 19) Na lagona e tagata le faanoanoa ona ua agasala i latou. Na latou talia le faasalaga ma faailoa mai o latou faalogona nofosala. Na pei o loo tatuʻi o latou fatafata, ma na latou lagona foʻi le faalumaina ma le māsiasi.—Luka 15:18, 19, 21.

Na salamō tagata Isaraelu. Na faatumulia i latou i le faanoanoa, taʻutino a latou agasala i le Atua, ma liliu ese mai i o latou ala leaga. Po o le a mafai e lo latou salamō ona faamalieina ai le finagalo o le Atua? Po o le a ia toe talia i latou?

“Ou te Tigā Alofa Lava iā te Ia”

Na alofa faapitoa Ieova i tagata Isaraelu. Na faapea mai o ia: “Auā ua fai aʻu ma Tamā o Isaraelu; ma o Efaraima foʻi, o laʻu ulumatua.” (Ieremia 31:9) E faapefea i se tamā alofa ona musu e toe talia sona atalii, o lē ua matuā salamō moni lava? Mātau le auala na faaalia ai e Ieova ona faalogona o se Tamā, mo ona tagata.

“Po o Efaraima ea o se atalii e pele iā te aʻu, po o se tamaitiiti ou te tausi faapelepele i ai? Auā talu ona ou tautala atu iā te ia, ou te saga manatua pea o ia.” (Fuaiupu e 20) Maʻeu na upu faapelepele! I le pei o se matua e maumauaʻi ae alofa, na “tautala atu” pea ma le maumauaʻi le Atua i lana fanau, ma faaauau pea ona lapataʻia i latou e uiga i o latou ala agasala. Ina ua mumusu e faalogo i le Atua, ona ia tuua loa lea o i latou ina ia ave faapagota, ma iʻu ai ina ō ese mai i lo latou aiga. Peitaʻi, e ui na ia faasalaina i latou, ae e na te leʻi faagaloina. E lē mafai ona Ia faia lenā mea. E lē galo i se tamā alofa lana fanau. O ā la faalogona o Ieova ina ua silasila mai ua salamō moni lana fanau?

“Ua tagi lava loʻu loto ona o ia. * Ou te tigā alofa lava iā te ia.” (Fuaiupu e 20) E matuā naunau mai Ieova i lana fanau. Na matuā ootia lona loto ina ua latou salamō moni, ma na naunau o ia ina ia toe foʻi atu i latou. E pei o le tamā na taʻua i le talafaatusa a Iesu, na ʻmutimutivale le alofa’ o Ieova iā i latou, ma na naunau e toe talia lana fanau.—Luka 15:20.

“Ua Toe Talia Aʻu e Ieova!”

O upu o loo i le Ieremia 31:18-20, ua mafai ai ona tatou iloa le alofa ma le alofa mutimutivale o Ieova. E lē galo i le Atua i latou na auauna muamua iā te ia. E faapefea pe a toe fia foʻi atu iā te Ia i latou na? Ua “nofosauni [le Atua] e faamagalo.” (Salamo 86:5) E lē liliu ese o ia mai iā i latou e toe foʻi atu iā te ia ma le loto ua salamō. (Salamo 51:17) O le mea moni, e talia ma le fiafia e ia i latou na.—Luka 15:22-24.

O le tamaʻitaʻi lea na taʻua i le amataga o le mataupu, na tausolomua ona toe foʻi iā Ieova ma asiasi atu i se faapotopotoga a Molimau a Ieova i lona vaipanoa. I le taimi muamua, na taumafai e foʻia ona faalogona lē lelei. Na faapea mai o ia: “Na ou lagona le lē aogā.” Peitaʻi, na faalaeiauina o ia e toeaina ma fesoasoani iā te ia ina ia toe malosi faaleagaga. Na faapea mai o ia ma le loto talisapaia, “Maʻeu le matuā lelei ona ua toe talia aʻu e Ieova!”

Pe afai sa e auauna muamua iā Ieova ma ua mafaufau e te toe fia auauna iā te ia, e matou te valaaulia oe ina ia asiasi ane i se faapotopotoga a Molimau a Ieova i lou vaipanoa. Ia manatua e tali mai ma le alofa mutimutivale Ieova, pe a ōle atu tagata salamō e faapea, “Faamolemole ia talia mai i matou.”

Faitauga Tusi Paia mo Aperila:

▪ Ieremia 17-31

[Faaopoopoga i lalo]