Uluk Ita serbí Maromak Jeová ka lae? Karik Ita hakarak serbí fali nia, maibé Ita hanoin nia sei la simu fali Ita. Se nuneʼe, ami fó laran-manas ba Ita atu lee didiʼak informasaun neʼe, tanba informasaun neʼe hakerek liuliu ba Ita.

FETO ida neʼebé uluk serbí Jeová maibé ikusmai husik lia-loos, hatete: “Haʼu halo orasaun ba Jeová atu husik haʼu fila fali ba nia, no fó perdua mai haʼu tanba haʼu halo nia laran kanek.” Ita sente hanoin feto neʼe ka lae? Karik Ita husu iha Ita-nia laran: ‘Jeová sente oinsá ho sira neʼebé uluk serbí nia maibé ikusmai husik lia-loos? Maromak hanoin nafatin sira ka lae? Nia hakarak sira atu “fila fali” ba nia ka lae?’ Atu hatán pergunta sira-neʼe, mai ita haree liafuan sira neʼebé Jeremias hakerek. Ami fiar katak resposta ba pergunta sira-neʼe sei book Ita-nia laran.—Lee Jeremias (Yeremia) 31:18-20.

Hanoin toʼok kona-ba situasaun iha tempu neʼebá. Iha tinan 740 molok Kristu, tinan barak antes Jeremias moris, Jeová husik rai-Asíria atu lori nasaun Israel nia suku sanulu ba sira-nia rai atu sai nuʼudar dadur. * Maromak husik ida-neʼe akontese hodi fó dixiplina ba ninia povu, tanba sira komesa halo sala boot no la rona ba avizu neʼebé Maromak nia profeta sira fó. (2 Reis [Raja-Raja] 17:5-18) Kuandu Maromak nia povu hela dook husi sira-nia rai no komesa hetan susar, ida-neʼe halo sira troka sira-nia hahalok ka lae? Jeová haluha ona sira ka lae? Nia sei husik sira fila fali ba sira-nia rai hodi bele serbí fali nia ka lae?

“Haʼu arrepende an”

Durante tempu neʼebé sira dadur, sira hanoin fali sira-nia hahalok sala no ida-neʼe book sira atu arrepende an. Tanba ho laran sira arrepende sira-nia sala, Jeová haree ida-neʼe. Haree toʼok oinsá Jeová esplika ema Israel sira-nia sentimentu. Nia uza naran Efraim atu koʼalia kona-ba sira.

Jeová hatete: “Haʼu rona duni Efraim nia halerik.” (Versíkulu 18) Jeová rona ema Israel sira-nia halerik tanba rezultadu husi sala neʼebé sira halo. Ema matenek ida esplika kona-ba liafuan “halerik”. Nia hatete katak liafuan neʼe bele iha arti “doko ulun”. Ema Israel sira hanesan oan-mane neʼebé kontra nia inan-aman no husik uma. Oan neʼe doko nia ulun nuʼudar nia hanoin kona-ba susar neʼebé nia hetan no hakarak fila fali ba ninia inan-aman. (Lucas 15:11-17) Povu Israel hatete saida?

Sira hatete: “Ita korrije haʼu . . . hanesan karau-oan neʼebé seidauk simu treinu.” (Versíkulu 18) Povu Israel rekoñese katak sira merese simu dixiplina. Sira hanesan karau-oan neʼebé seidauk hetan treinu. Livru ida esplika katak karau-oan sei la hetan moras husi buat kroʼat neʼebé ema uza atu fó treinu, se nia la uza ninia dikur hodi kontra hasoru ida-neʼe.

“Husik haʼu atu fila fali ba Ita, no haʼu sei fila hikas duni, tanba Ita mak Jeová haʼu-nia Maromak.” (Versíkulu 18) Ho haraik-an sira bolu Maromak. Tanba sira-nia sala, sira hanesan lakon dalan, maibé agora sira husu ba Maromak atu ajuda sira hetan fali dalan no simu fali sira. Neʼe hanesan sira hatete ba Maromak: “Ita mak ami-nia Maromak, favór ida husik ami atu fila fali ba uma.”

 “Haʼu arrepende an . . . haʼu sente moe, sin moe tebetebes.” (Versíkulu 19) Povu sente laran-tun tanba sira-nia sala, no rekoñese hahalok aat neʼebé sira halo. Sira moe tebetebes no laran-kraik.—Lucas 15:18, 19, 21.

Sin, ema Israel arrepende sira-nia sala. Sira fó-hatene sira-nia sala ba Maromak, no husik sira-nia hahalok aat. Ida-neʼe halo Jeová nia laran sai mamar ka lae? Nia sei husik sira atu fila fali ba nia ka lae?

“Haʼu sente hanoin loos nia”

Jeová hadomi tebes ema Israel. Nia hatete: “Haʼu sai Aman ba Israel, no kona-ba Efraim, nia mak haʼu-nia oan-boot.” (Jeremias 31:9) Aman ida neʼebé hadomi tebes nia oan, sei simu fali duni nia oan neʼebé ho laran arrepende ona ninia sala, loos ka lae? Haree toʼok oinsá Jeová hatudu ninia domin nuʼudar Aman ba ninia povu.

Jeová hatete: “Efraim mak oan ida neʼebé folin-boot mai haʼu ka lae? Ka oan neʼebé haʼu tau matan ho domin? Maski haʼu koʼalia hasoru nia, maibé haʼu nafatin hanoin nia.” (Versíkulu 20) Liafuan sira-neʼe furak tebes, loos ka lae? Hanesan aman neʼebé hadomi ninia oan no metin ba ninia lei sira, Maromak sente katak nia presiza “koʼalia hasoru” ba ninia oan sira. Nia halo ida-neʼe hodi fó avizu beibeik ba sira kona-ba sira-nia hahalok neʼebé sala. Kuandu oan sira-neʼe deside atu la rona ninia avizu sira, nia husik sira atu sai dadur, ida-neʼe hanesan nia husik sira sai husi uma. Maski nia presiza fó kastigu ba sira, maibé nia la haluha sira. Sin, aman neʼebé hadomi nia oan sei nunka halo ida-neʼe. Entaun, Jeová sente oinsá kuandu nia haree ninia oan sira arrepende duni sira-nia sala?

“Haʼu-nia tee-oan sai estrondu tan deʼit nia. * Haʼu sente hanoin loos nia.” (Versíkulu 20) Jeová hanoin tebetebes ninia oan sira. Tanba sira arrepende an ho laran, ida-neʼe book duni Maromak nia laran, no hakarak tebes atu sira fila fali ba nia. Hanesan aman ida iha Jesus nia ai-knanoik kona-ba oan-mane neʼebé husik hela uma, Jeová mós “hanoin tebetebes” nia oan sira no hakarak tebes atu simu fali sira.—Lucas 15:20.

‘Jeová husik haʼu atu fila fali ba Ita’

Klaru katak liafuan sira iha Jeremias 31:18-20 ajuda ita atu haree Jeová nia laran-sadiʼa, no katak nia hanoin tebes ninia povu sira. Maromak nunka haluha sira neʼebé uluk serbí nia. Oinsá se ema sira-neʼe hakarak fila fali ba nia? Maromak “prontu atu fó perdua” ba sira. (Salmo [Mazmur] 86:5) Nia sei simu duni sira neʼebé ho laran arrepende sira-nia sala. (Salmo 51:17) Sin, nia sei kontente tebes atu simu fali sira.—Lucas 15:22-24.

Feto neʼebé ita temi uluk, deside atu fila fali ba Jeová no vizita kongregasaun husi Testemuña ba Jeová neʼebé besik iha ninia área. Foufoun, nia tenke tahan hasoru ninia sentimentu laran-tun. Nia hatete: “Haʼu sente haʼu la iha folin.” Maibé katuas sira husi kongregasaun fó laran-manas ba nia no ajuda nia atu haburas fali ninia relasaun diʼak ho Maromak. Nia agradese tebes ho ida-neʼe, nia hatete: “Haʼu kontente tebes tanba Jeová husik haʼu atu fila fali ba nia.”

Se uluk Ita serbí Jeová no hanoin katak Ita hakarak atu serbí fali nia, ami fó laran-manas ba Ita atu vizita kongregasaun husi Testemuña ba Jeová. La haluha katak Jeová sei hatudu domin no laran-sadiʼa ba sira neʼebé ho laran arrepende sira-nia sala, no husu nia ho laran: “Husik haʼu atu fila fali ba Ita.”

[Nota–rodapé]