Amube Acilongwe A Leza

“Twalomba Kuti Utuzumizye Kupiluka Kuŋanda”

Sena kuli ciindi cimwi nimwakali kumubelekela Jehova? Sena kuli nomuyeeya kutalika kumubelekela alimwi, pele tamuzyi naa inga wamutambula alimwi? Twamulomba kuti mucibale cibalo eeci kabotu-kabotu alimwi acitobela. Zyakabambilwa ndinywe kuti zimugwasye.

“NDAKAPAILA kuli Jehova kutegwa andigwasye kutalika kumubelekela akuba acilongwe anguwe alimwi, akuti andilekelele kuzyintu zyakamucisya moyo nzindakacita.” Oobu mbwaakaamba mukaintu umwi iwakalekede kubelekela Leza akucita zyintu ziindene azyeelelo zya Bunakristo nzyaakayiisyigwa naakali kukomena. Sena ulamweetezya mukaintu ooyu? Sena mulalibuzya kuti, ‘Ino Jehova ulimvwa buti kujatikizya baabo bakali kumubelekela cimwi ciindi? Sena ulabayeeya? Sena ulayanda kuti “bapiluke kuŋanda”?’ Kutegwa twiingule mibuzyo eeyi, atubone majwi ngaakalemba Jeremiya. Cakutadooneka, bwiinguzi bulamukkomanisya.—Amubale Jeremiya 31:18-20.

Amulange-lange bukkale mbobwakabede ciindi Jeremiya naakali kulemba majwi aaya. Mumwaka wa 740 B.C.E., kakuceede myaka minji katanapona Jeremiya, Jehova wakazumizya misyobo iili kkumi mubwami bwa Israyeli kutolwa mubuzike abana Asuri. * Leza wakazumizya penzi eeli kubacitikila bantu bakwe kutegwa lube lulayo nkaambo bakatalika kucita micito mibi kapati, ikutaswiilila kucenjezya kwabasinsimi bakwe. (2 Bami 17:5-18) Sena bantu bakacinca micito yabo akaambo kamapenzi aakabacitikila mubuzike ciindi nibakalizandula kuli Leza wabo alimwi anibakali kule acisi cabo? Sena Jehova wakabalubila limwi? Sena wakali kuyoobatambula kuti batalike kumubelekela alimwi?

“Ndakeempwa”

Bantu bakali mubuzike bakaliyeeya, aboobo eeci cakabapa kuti beempwe. Kweempwa kwabo kuzwa ansi amoyo wakakubona Jehova. Amuswiilile Jehova mbwapandulula micito alimwi ambobakali kulimvwa bana Israyeli bakali mubuzike, ibaambwa boonse antoomwe kuti Efraimu.

“Ncobeni ndamvwa Efraimu mbwalila-lila,” mbwaamba Jehova. (Kapango 18) Wakabamvwa bana Israyeli nibakali kulilauka kujatikizya zyintu zyakabacitikila akaambo kakubisya kwabo. Sikwiiya Bbaibbele umwi wakaamba kuti majwi aakuti “mbwalila-lila” alakonzya kupandulula “kuzungaana.” Bakali mbuli mwana wakazanga uzungaanya mutwe wakwe akaambo kakuusa nayeeya mapenzi ngaaliletela akulombozya buumi mbwaakali kupona kuŋanda. (Luka 15:11-17) Ino bantu bakali kwaamba nzi?

“Wandikoma . . . mbuli moombe uutana kutambisigwa.” (Kapango 18) Bantu bakazumina kuti bakali kuyandika lulayo. Kayi bakali mbuli moombe uutanatambisigwa. Bbuku limwi lyakaamba kuti, kukozyanisya ooku inga kwapandulula kuti bantu bakali mbuli moombe watakali kukonzya “kumvwa macise kuti taabbulumuka kuzwa mujoko.”

“Kondipilusya, nkapiluke, nkaambo nduwe Jehova Leza wangu.” (Kapango 18) Bantu bakalibombya  mumyoyo yabo alimwi bakakwiilila Leza. Bakali basizinyonyoono kapati, pele lino bakali kulomba lugwasyo kutegwa abakkomanine alimwi. Busanduluzi bwa Bbaibbele bumwi bwaamba kuti: “Nduwe Leza wesu—twalomba kuti utuzumizye kupiluka kuŋanda.”—Contemporary English Version.

“Ndakeempwa. . . . Ndakafwa insoni, ndakafwa bweeme.” (Kapango 19) Bantu bakamvwa bubi nkaambo bakabisya. Bakaizumina milandu yabo. Alimwi bakafwa nsoni akulimvwa kukakwa.—Luka 15:18, 19, 21.

Bana Israyeli bakeempwa. Bakaluuside kapati, bakalyaambilila zibi zyabo kuli Leza, alimwi bakaileka micito yabo mibi. Sena kweempwa kwabo nikwakaubombya moyo wa Leza? Sena naakabazumizya kuti bapiluke kuŋanda?

“Ncobeni Njoomufwida Luzyalo”

Jehova wakajisi cilongwe cilibedelede abana Israyeli. Wakaamba kuti: “Ndime wisi Israyeli, a-Efraimu ngumwanaangu mutaanzi.” (Jeremiya 31:9) Ino usyi siluyando inga wakaka buti kutambula mwanaakwe watondezya kweempwa kuzwa ansi aamoyo? Amubone Jehova mbwatondezya kuti nguusyi siluyando kubantu bakwe.

“Ma! Sa Efraimu ngumwanaangu uuyandika? Sa ngumwana uubotezya? Kufumbwa ciindi niŋamba anguwe, ncobeni ncimuyeeya loko.” (Kapango 20) Eelo kaka majwi aaya alakkazyika moyo! Mbuli muzyali siluyando, pele uupa lulayo, Leza wakajisi mukuli “wakubanyemena” bana bakwe, kubacenjezya cakwiinduluka-induluka kujatikizya micito yabo mibi. Ciindi nibakakaka kuswiilila, wakabalekela kutolwa mubuzike—nkokuti, kubatanda aŋanda. Pele nokuba kuti wakabasubula, tanaakabaluba pe. Tanaakali kukonzya kucita oobo. Usyi siluyando takonzyi kubaluba bana bakwe. Pele, ino Jehova wakalimvwa buti naakabona bana bakwe bakeempwa ncobeni?

“Moyo wangu ulasukama loko. Ncobeni njoomufwida luzyalo.” (Kapango 20) Jehova wakali kubayanda kapati bana bakwe. Kweempwa kwabo kuzwa ansi aamoyo kwakamukkomanisya, alimwi wakali kuyandisisya kuti bapiluke kulinguwe. Mbuli usyi wamucikozyanyo ncaakaamba Jesu camwana mutaka, Jehova ‘wakabafwida luzyalo’ alimwi wakaliyandide kubatambula bana bakwe kuŋanda.—Luka 15:20.

“Jehova Kondizumizya Kupiluka Kuŋanda!”

Majwi aali mulugwalo lwa Jeremiya 31:18-20 atugwasya kuzyiba lubomba aluzyalo lwa Jehova. Leza tabalubi aabo bakali kumubelekela aciindi cimwi. Mbuti kuti bantu bali boobu bayanda kupiluka kulinguwe? Leza “ulafwamba kujatila.” (Intembauzyo 86:5) Takabatandi aabo beempwa camoyo woonse. (Intembauzyo 51:17) Muciindi caboobo, ulakkomana kubatambula kuŋanda.—Luka 15:22-24.

Mukaintu waambwa kumatalikilo aacibalo eeci wakabweza ntaamu yakupiluka kuli Jehova alimwi wakaswaya mbungano ya Bakamboni ba Jehova iili kubusena nkwakkala. Kumatalikilo wakeelede kuzunda kuyeeya kwakwe kutali kabotu. Wakaamba kuti: “Ndakalimvwa kubula mpindu.” Pele baalu bamumbungano bakamukulwaizya akumugwasya kuti ayume alimwi kumuuya. Kalumba kuzwa ansi aamoyo wakaamba kuti, “Eelo kaka cilakkomanisya kapati kuti Jehova wakandizumizya kupiluka kuŋanda!”

Kuti mwakalilekede kumubelekela Jehova pele mwayeeya kuti mutalike kumubelekela alimwi, twamulomba kuti mukasike ku Ŋanda ya Bwami ya Bakamboni ba Jehova iili kubusena nkomukkala. Kamuyeeya kuti Jehova ulabatambula calubomba alimwi aluzyalo ciindi bantu beempwa nobalomba kuti, “Twalomba kuti utuzumizye kupiluka kuŋanda.”

[Bupanduluzi buyungizidwe]