Katalakatsuwini Dios

«Kakimakglhtinampara, kakimaxki talakaskin naktaspitpara»

¿Makgasa na xmakgtapakgsiya kxkachikin Dios? Max taspitputumparaya, pero ni liwana katsiya komo Jehová tlan namakglhtinamparayan. Komo chuna, kkawaniyan pi kalikgalhtawakga uma artículo chu atanu, nema tlawakanit xlakata namakgtayayan.

CHATUM puskat wa: «Putum kilhtamaku xaktlawani oración Dios, xakskini kakimaxkilh talakaskin naktalakatsuwinipara chu xkintapatilh tuku nitlan xaktlawanit». Kstaknit kxkachikin Dios, pero alistalh makgxtakgli. ¿Nitlan limakgkatsiya akxni lakpuwana la xlilhuwa patinama uma puskat? Max kgalhskinkana la makgkatsi Dios xpalakata umakgolh latamanin, komo xla kalakapastaka, o lakaskin nalakgtaspitparakgo. Lu tlan nalimakgkatsiya tuku tsokgwililh palakachuwina Jeremías (kalikgalhtawakga Jeremías 31:18-20).

Pulana kaʼakxilhwi tukuya kilhtamaku wanka umakgolh tachuwin. Xtsankga lhuwa kata akxni xlakachilh Jeremías, Jehová xmastanit talakaskin pi asirios xʼakgchipakgolh akgkaw tribus xalak Israel kkata 740 akxni nina xmin Cristo chu kachilinka. a Xlakata xtlawakgonit laklanka talakgalhin chu ni kuenta xtlawakgonit maski palakachuwinanin makglhuwa xkawanikgonit nialh chuna xlikatsikgolh, Dios lakkaxwililh nakamalakgaxokge (2 Reyes 17:5-18). ¿Tuku lalh akxni xkachilinkanit, ni xtalalinkgo Dios chu makgat xwilakgolh? ¿Lakgpalikgolh xtayatkan? ¿Jehová nialh xkalakapastaka? ¿Xkamakglhtinampa amakgtum?

«Nitlan klimakgkatsilh»

Israelitas akgatekgskgolh pi nitlan tuku xtlawamakgolh: akxni xkalinkanit kʼatanu kachikin tlan lakapastakparakgolh chu makgxtakgkgolh tuku nitlan xtlawamakgolh. Jehová akxilhli pi xlikana nitlan xlimakgkatsikgo. Akxni akxilhaw la Jehová xlichuwinan pi xlikatsikgo chu xmakgkatsikgo Efraín, chuna la xlilakgapaskan akgkaw tribus xalak Israel, katsiyaw tuku xmakgkatsikgo.

«Xlikana kkgaxmatnit Efraín pi lilipuwan xlakata la wi.» (Versículo 18.) Dios xkgaxmata la israelitas xlilipuwankgo o xlilakgaputsakgo xlakata tuku nitlan xtlawakgonit. Maktum diccionario hebreo, wan pi uma tachuwin wamputun «nalilipuwana xlakata tuku nitlan laniman» na wamputun «namatsuwiya mi akgxakga», chuna la xtlawalh chatum kgawasa tiku ni kgalhakgaxmatnan akxni akxilha pi nitlan tuku akgspula, nitlan limakgkatsi chu taspitputumpara kxchik (Lucas 15:11-17). Pero ¿la xlimasiyakgo israelitas pi nitlan xmakgkatsikgo?

«Kistakyawanita [...] la tantum becerro nema nitu mamansujlikanit.» (Versículo 18.) Israelitas xkatsikgo pi xtalakaskin nakamalakgaxokgekan. Max chuna katamalakxtumika xlakata likatsikgolh la tantum becerro nema nina mamansujlikan, chu chuna la wan makgtum libro «lakaskinkgo nakamaklhtukukan».

«Katlawa naktaspita chu tunkun naktaspitpara xlakata wix Jehová kiDios.» (Versículo 18.) Lu nitlan xlimakgkatsikgo xtalakgalhinkan wa xlakata tsukukgolh tasaskinikgo Dios. Xmakgxtakgkgonit Dios chu xtlawakgonit lhuwa talakgalhin. Pero xlakaskinkgo pi xkatapatika chu wa xlakata skinikgolh xtamakgtay Dios. Atanu Biblia chuna matitaxti uma tuku tasaskinkgolh israelitas: «Kakimakglhtinampara, kakimaxki talakaskin  naktaspitpara, xlakata wix, oh YHWH, wix ki[Dios]» (Versión Israelita Nazarena).

«Nitlan klimakgkatsilh [...]. Klimaxanalh, chu nachuna ktamamaxanilh.» (Versículo 19.) Lu nitlan xlimakgkatsikgo xtalakgalhinkan chu xkatsikgo pi nitlan tuku xtlawakgonit. Lu xlipuwamakgolh chu xlilakgaputsakgo (Lucas 15:18, 19, 21).

Xtasiya pi nitlan xlimakgkatsikgo tuku xtlawakgonit. Lu xlimaxanankgo wa xlakata wanikgolh Jehová tuku nitlan xtlawakgonit chu makgxtakgkgolh nitlan xtijikan. Pero ¿kaj wa uma xtalakaskin xlakata Jehová xkatapatilh chu xkamaxkilh talakaskin xtaspitparakgolh kxkachikinkan?

«Lu xlikana naklakgalhaman»

Jehová tlakg xkapaxki israelitas. Anta kJeremías 31:9 wan: «Xtlat Israel klitaxtu; chu xlakata Efraín, wa xapuxku kinkgawasa». Wa xlakata, ¿la tlan chatum tlat ni xmakgamakglhtinalh xkgawasa tiku lu paxki chu xlikana nitlan limakgkatsi talakgalhin nema tlawalh? Tuku aku nalichuwinanaw limasiya pi Jehová kapaxki xkachikin la chatum tlat.

«¿Efraín kliʼakxilha la stlan kgawasa, o la kgawasa tiku lu tlan klikatsini? Xlakata chuna la nitlan tuku klichuwinalh, xlikana tlakg naklakapastaka.» (Versículo 20.) ¡Lu stlan tachuwin! Dios chatum tlat xapaxkina. Pero maski chuna likatsi, kastakyawalh xkamanan, kawanilh pi nitlan tuku xtlawamakgolh chu xʼamakgolh lakgaxokgokgo. Wa xlakata akxni israelitas ni kgalhakgaxmatputunkgolh maski makglhuwa kawanilh, xla kamalakgaxokgelh chu mastalh talakaskin nakachilinkan kʼatanu kachikin. Pero Dios chuntiyaku kalakapastakli, chuna la chatum tlat xapaxkina putum kilhtamaku kalakapastaka xkamanan. ¿La makgkatsilh akxni akxilhli pi xkachikin xlikana nitlan xlimakgkatsi tuku nitlan xtlawanit?

«Kimpaluwa tatsuwima xpalakata xla. Xlikana naklakgalhman.» b (Versículo 20.) Jehová xlakaskin pi xtaspitparakgolh xkamanan. Xlakata xlikana nitlan xlimakgkatsikgo tuku nitlan xtlawakgonit chalh asta kxnaku chu xlakaskin pi xlakgtaspitparakgolh. Chuna la tlat xla parábola nema lichuwinalh Jesús xlakata kgawasa tiku xtsankganit, Jehová «kgayaj katsanilh» (Lucas 15:20). Xlakaskin pi xkamanan xlakgtaspitparakgolh.

Jehová «kakimaxki talakaskin naktaspitpara»

Tuku tatsokgtawilakgonit kJeremías 31:18-20 likatsiyaw la xlilhuwa lakgalhamanan chu tlan likatsi Dios. Xla kalakapastakaku tiku pulana skujnanikgo. Chu komo lakgtaspitputumparakgo, xla “matsankgenan” (Salmo 86:5). Nikxni kalakgmakgan tiku makgxtakgkgo tuku nitlan xtlawamakgolh (Salmo 51:17). Wata, lipaxuw kamakgamakglhtinan (Lucas 15:22-24).

¿Lakapastakaku puskat nema pulana lichuwinaw? Xla xlakgtaspitputumpara Dios, putsalh xtamakgtay akgtum congregación xla xtatayananin Jehová nema xwi kxkachikin. Pulana tuwa xmakgkatsi nalakgmakgan nitlan talakapastakni. Xla wan: «Xaklakpuwan pi ni xlilat nakintapati Dios». Pero lakgkgolotsin xalak congregación matliwakglhkgolh chu makgtayakgolh xlakata xtatliwakglhli xtakanajla. ¿Tuku kitaxtulh? Xla wan: «Jehová kimaxkilh talakaskin naktaspitpara chu lu kpaxtikatsini».

Komo wix na makgxtakgnita Dios chu la uku lakgtaspitputumparaya, kaskinti tamakgtay kcongregación xla xtatayananin Jehová xalak minkachikin. Kalakapastakti pi Jehová kalakgalhaman chu katapati tiku xlikana makgxtakgkgo tuku nitlan xtlawamakgolh chu skinikgo: «Kakimakglhtinampara, kakimaxki talakaskin naktaspitpara».

[Notas nema wilakgo kpágina]