Xana u tshame u tirhela Yehovha? Xana u anakanya hi ku tlhela u n’wi tirhela kambe wa tivutisa loko a ta tlhela a ku amukela? Hi kombela u hlaya xihloko lexi ni lexi landzelaka hi vukheta. Swi lunghiseleriwe ku ri karhi ku anakanyiwa swinene hi wena.

“NDZI khongele eka Yehovha leswaku a ndzi pfumelela ku tlhela ndzi n’wi tirhela ni ku ndzi rivalela leswi ndzi n’wi twiseke ku vava.” Marito lawa ma vuriwe hi wansati un’wana loyi a tshikeke ku tirhela Xikwembu kutani a hanya hi ndlela leyi hambaneke ni milawu ya Vukreste leyi a dyondzisiweke yona loko a ha kula. Xana u n’wi twela vusiwana? Xana wa tivutisa leswaku: ‘Xikwembu xi titwisa ku yini hi vanhu lava tshameke va xi tirhela? Xana xa va tsundzuka? Xana xa swi lava leswaku “va tlhela va xi tirhela”?’ Leswaku hi hlamula swivutiso sweswo, a hi kambisiseni marito lama tsariweke hi Yeremiya. A swi kanakanisi leswaku tinhlamulo ta kona ti ta ku tsakisa.—Hlaya Yeremiya 31:18-20.

Xiya mongo wa marito ya Yeremiya. Hi 740 B.C.E., ku nga makume ya malembe emahlweni ka nkarhi wa Yeremiya, Yehovha u pfumelele tinyimba ta khume ta mfumo wa Israyele leswaku ti yisiwa evukhumbini hi Vaasiriya. * Xikwembu xi pfumelele makhombo lawa tanihi ku tshinya hikuva vanhu va xona a va sungule ku endla swidyoho leswikulu, va honisa switsundzuxo leswi a va nyikiwa swona hi ku phindha-phindha hi vaprofeta va xona. (2 Tihosi 17:5-18) Xana vanhu lava va cince langutelo ra vona hileswi va langutaneke ni maxangu evukhumbini, loko va hambanisiwe ni Xikwembu xa vona nileswi a va ri ekule ni tiko ra rikwavo? Xana Yehovha a a va rivale hi ku helela? Xana a a ta va amukela leswaku va tlhela va n’wi tirhela?

“Ndzi Tisorile”

Vanhu va tiehleketile loko va ri evukhumbini kutani va susumeteleka ku hundzuka. Yehovha u xiye ku hundzuka ka vona ka xiviri. Yingisa loko Yehovha a hlamusela langutelo ni mintlhaveko ya Vaisrayele lava a va ri evukhumbini, lava hinkwavo ka vona a va vuriwa Efrayimi.

Yehovha u ri: “Kunene ndzi twe Efrayimi a rila.” (Ndzimana 18) U twe Vaisrayele va ri karhi va rila hikwalaho ka vuyelo bya xidyoho xa vona. Xidyondzi xin’wana xi vula leswaku xivulwa lexi nge “a rila” xi nga ha vula “ku dzungudza.” A va fana ni n’wana wa jaha loyi a dyoheke loyi a dzungudzaka nhloko hikwalaho ka leswi a nga ni gome swinene kutani a navela vutomi lebyi a byi hanya ekaya. (Luka 15:11-17) Xana i yini leswi vanhu a va swi vula?

“U ndzi lulamisile . . . kukota rhole leri nga leteriwangiki.” (Ndzimana 18) Vanhu va pfumerile leswaku a va lulameriwe hi ku tshinyiwa. Phela, a va fana ni rhole leri nga leteriwangiki. Buku yin’wana ya tinhlamuselo ta Bibele yi vula leswaku xifananisi lexi xi nga ha vula leswaku a va fana ni rhole leri a ri nga ta pfuka ri “tlhaviwe hi risungunu loko a ri nga rhanganga hi ku panulula ejokweni.”

“Ndzi tlherise, ndzi ta tlhela, hikuva hi wena Yehovha Xikwembu xanga.” (Ndzimana 18) Vanhu lava titsongahataka va huwelele eka Xikwembu. A va wele exidyohweni, kambe sweswi a va kombela mpfuno  leswaku va ta tlhela va tsakeriwa hi xona. Vuhundzuluxeri byin’wana byi ri: “U Xikwembu xa hina—hi pfumelele leswaku hi tlhela hi ku tirhela.”—Contemporary English Version.

“Ndzi tisorile. . . . Ndzi khomiwe hi tingana, ndzi titwa ndzi tsongahatekile.” (Ndzimana 19) Vanhu va tisorile hikuva a va dyohile. Va amukele nandzu wa vona. Nakambe va titwe va tsongahatiwile ni ku lahleriwa ehansi, onge hiloko ku biwa swifuva swa vona.—Luka 15:18, 19, 21.

Vaisrayele va hundzukile. A va ri ni maxangu yo tala naswona va vule swidyoho swa vona eka Xikwembu kutani va hundzuka eka tindlela ta vona to biha. Xana ku hundzuka ka vona a swi ta tsakisa Xikwembu? Xana a xi ta va pfumelela leswaku va tlhela va xi tirhela?

“Kunene Ndzi Ta N’wi Twela Vusiwana”

Yehovha a a ri ni vuxaka byo hlawuleka ni Vaisrayele. U te: “Ndzi hundzuke Tatana eka Israyele; kasi loko ku ri Efrayimi, i mativula ya mina.” (Yeremiya 31:9) Tatana wa rirhandzu a nge n’wi fularheli n’wana loyi a tisolaka hi mbilu ya yena hinkwayo. Xiya ndlela leyi Yehovha a va kombisaka ha yona vanhu vakwe mintlhaveko yakwe yo va Tatana.

“Xana Efrayimi i jaha ra risima eka mina, kumbe i n’wana la khomiwaka hi rirhandzu? Hikuva ndlela leyi ndzi n’wi solaka ha yona, ndzi ta ya emahlweni ndzi n’wi tsundzuka ha yona.” (Ndzimana 20) Marito wolawo ma chavelela hakunene! Ku fana ni mutswari la tiyisaka voko la nga ni rirhandzu, Xikwembu a xi swi tsakela ku vulavula “ni” vana va xona hi ku phindha-phindha xi va tsundzuxa malunghana ni xidyoho xa vona. Loko va tiomisa tinhloko va ala ku xi yingisa, xi va tshike va ya evuhlongeni—leswi a swi ta endla leswaku va tshika ku xi tirhela. Kambe hambileswi a xi fanele xi va xupula, a xi va rivalanga. A xi nga ta swi endla sweswo. Tatana la nga ni rirhandzu a nga va rivali vana vakwe. Hambiswiritano, xana Yehovha u titwe njhani loko a vona vana vakwe va hundzuka hakunene?

“Marhumbu ya mina ma [tlhaveke] hikwalaho ka yena. * Kunene ndzi ta n’wi twela vusiwana.” (Ndzimana 20) Yehovha a a ri ni ku navela lokukulu eka vana vakwe. Ku hundzuka ka vona ka xiviri ku khumbe mbilu yakwe naswona a a swi navela swinene leswaku va tlhelela eka yena. Ku fana na tatana wa le xifanisweni xa Yesu xa n’wana wa vusopfa, Yehovha ‘u ve ni ntwela-vusiwana’ naswona a a tiyimisele ku amukela vana vakwe leswaku va tlhela va n’wi tirhela.—Luka 15:20.

“Yehovha Ndzi Pfumelele Leswaku Ndzi Tlhela Ndzi Ku Tirhela!”

Marito lama nga eka Yeremiya 31:18-20 ma endla leswaku hi twisisa ntwela-vusiwana ni tintswalo ta Yehovha. Xikwembu a xi va rivali vanhu lava tshameke va xi tirhela. Xana ku vuriwa yini loko vanhu vo tano va lava ku tlhelela eka xona? Xikwembu xi “lunghekele ku rivalela.” (Pisalema 86:5) A xi nge pfuki xi tlherise vanhu lava hundzukeke lava taka eka xona. (Pisalema 51:17) Hi hala tlhelo, xa tsaka loko xi va pfumelela leswaku va tlhela va xi tirhela.—Luka 15:22-24.

Wansati loyi a boxiweke eku sunguleni ka xihloko lexi u teke goza ro tlhelela eka Yehovha kutani a endzela vandlha ra laha a tshamaka kona ra Timbhoni ta Yehovha. Eku sunguleni a a fanele a hlula mavonelo yakwe lama hoxeke. U ri: “A ndzi titwa ndzi ri xikangalafula.” Kambe vakulu va vandlha va n’wi khutazile ni ku n’wi pfuna leswaku a tlhela a tiya hi tlhelo ra moya. Hi ntsako lowukulu, u ri: “Swa tsakisa leswi Yehovha a ndzi pfumeleleke leswaku ndzi tlhela ndzi n’wi tirhela!”

Loko u tshame u tirhela Yehovha naswona u anakanya hi ku tlhela u n’wi tirhela, ha ku rhamba leswaku u endzela vandlha ra laha u tshamaka kona ra Timbhoni ta Yehovha. Tsundzuka leswaku Yehovha u angula hi ntwela-vusiwana ni musa loko vanhu lava hundzukaka va huwelela eka yena va ku: “Hi pfumelele leswaku hi tlhela hi ku tirhela.”

Tindzimana ta Bibele leti u nga ti hlayaka hi April:

▪ Yeremiya 17-31

[Tinhlamuselo ta le hansi]