Nag-aalagad ka ba hadto kan Jehova? Karuyag mo ba mag-alagad utro ha iya kondi nagruruhaduha kon kakarawaton ka pa niya? Kon ito an imo sitwasyon, alayon basaha ini ngan an kasunod nga artikulo kay ginsurat ini para gud ha imo.

“NAG-AMPO ako kan Jehova nga tugotan unta niya ako nga makabalik ngan mapasaylo kay nasakitan ko hiya,” siring han usa nga babaye nga binaya ha pag-alagad ha Dios. Sugad ba liwat hito an imo inaabat? Iginpakiana mo na ba kon ano an gin-aabat ni Jehova ha mga nag-alagad hadto ha iya? Nahihinumdoman pa ba niya hira? Karuyag ba niya nga ‘bumalik’ hira? Basi hibaroan an baton, aton usisahon an mga pulong nga ginsurat ni Jeremias. Sigurado nga mababantad hito an imo kasingkasing.—Basaha an Jeremias 31:18-20.

Ano an kahimtang han igsurat ni Jeremias ito nga mga pulong? Han 740 A.K.P., mga dekada antes han panahon ni Jeremias, gintugotan ni Jehova an Asirya nga sakupon an napulo-ka-tribo nga ginhadian han Israel. * Pinaagi hini, gindisiplina han Dios an iya katawohan tungod han ira seryoso nga mga sala ha pauroutro nga pagbalewaray ha mga pahamangno han iya mga propeta. (2 Hadi 17:5-18) Nagbasol ba hira han makurian hira, mahibulag ha ira Dios, ngan madistyero ha iba nga nasud? Hinngalimtan na gud ba hira ni Jehova? Kakarawaton pa ba niya hira utro?

“Ako Nagbasol”

Samtang bihag an mga Israelita, nagbasol hira ngan nakita ni Jehova nga sinsero ito. Tagda kon paonan-o iginhulagway ni Jehova an disposisyon ngan an gin-abat han mga Israelita nga ha kabug-osan gintawag nga Epraim.

‘Ha pagkamatuod hinbatian ko hi Epraim nga nagmiminatay [“nagnguyngoy,” NW],’ nasiring hi Jehova. (Bersikulo 18) Hinbatian niya an pangaraba han mga Israelita tungod ha pagbasol han ira sala. An pulong nga ‘pagnguyngoy’ mahimo mangahulogan hin “pangurog,” siring han usa nga eskolar. Pariho hira hin matinalapason nga anak nga nasusubo nga nagpipilingpiling han iya ulo samtang nahuhunahuna an kakurian nga iya gindara ha iya kalugaringon, ngan naghihingyap nga makabalik ha iya pagkinabuhi hadto. (Lukas 15:11-17) Ano an ira siring?

“Imo ako ginbadlong . . . sugad hin nati nga baka nga diri hiara hin yugo.” (Bersikulo 18) Ginkarawat nira nga takos hira disiplinahon kay sugad hira hin baka nga waray mamanso. Ini nga pagtanding mahimo mangahulogan nga pariho hira hin nati nga baka nga diri unta ‘malalatigo kon nasunod ito,’ siring han usa nga reperensya.

“Birikon mo ako, ngan ako mabibirik; kay ikaw hi Jehova an akon Dios.” (Bersikulo 18) Nagpaubos an mga Israelita ngan nanginyupo ha Dios.  Sumimang hira kondi yana, nanginginyupo hin bulig basi makabalik ha iya.

‘Ako nagbasol, naalo, oo, nagupong.’ (Bersikulo 19) Nagbasol an mga Israelita kay nakasala hira. Inabat nira an duro nga kaawod.—Lukas 15:18, 19, 21.

Nagbasol hira, nasubo, nagpahayag han ira mga sala ha Dios, ngan binaya tikang han ira magraot nga buhat. Kondi mapapalukmay ba nira an kasingkasing han Dios? Tutugotan ba niya hira nga makabalik?

“Ha Pagkamatuod Ako Mamamay-ada Kalooy ha Iya”

May-ada espesyal nga relasyon hi Jehova ha mga Israelita. Hiya nagsiring: “Ako an amay han Israel, ngan hi Epraim amo an akon suhag.” (Jeremias 31:9) Puydi ba diri karawaton han mahigugmaon nga amay an iya nabalik nga anak nga tinuod nga nagbabasol? Kitaa kon paonan-o iginpahayag ni Jehova an iya kinag-anak nga gugma ha iya katawohan.

“Anak ko ba nga minahal hi Epraim? Amo ba hiya an inugayan nga bata? Kay kada ko pagyayakan patok ha iya, ako ha mainiton nanunumdom ha iya gihapon.” (Bersikulo 20) Makapabantad ito nga mga pulong! Pariho hin marig-on kondi mahigugmaon nga kag-anak, pauroutro nga ginpahamangnoan han Dios an iya mga anak “patok” han ira magraot nga binuhatan. Kondi han magdumiri hira pamati, ginpabay-an niya hira nga madistyero—nga sugad hin ginpabay-an niya hira nga bumaya. Pero bisan kon ginsirotan niya hira, waray hiya mahingalimot ha ira. Diri gud niya ito mabubuhat, sugad hin mahigugmaon nga amay nga diri mahingangalimot han iya mga anak. Ano daw la an gin-abat ni Jehova han hikit-an niya nga tinuod nga nagbabasol an iya mga anak?

“An akon kasingkasing naungara ha iya; ha pagkamatuod ako mamamay-ada kalooy ha iya.” (Bersikulo 20) Daku an pag-ungara ni Jehova ha iya mga anak. An ira sinsero nga pagbasol nakabantad ha iya, ngan ginhingyap niya an ira pagbalik. Pariho han amay ha parabola ni Jesus ha makaragon nga anak, “nalooy” hi Jehova ngan andam pagkarawat utro ha ira.—Lukas 15:20.

‘Jehova Tuguti Ako nga Makabalik ha Imo!’

Ha mga pulong han Jeremias 31:18-20 hinsabtan naton nga mapinairon ngan maloloy-on hi Jehova. Diri niya hinngangalimtan an mga nag-alagad hadto ha iya. Kumusta man kon karuyag nira bumalik? An Dios “andam ha pagpasaylo.” (Salmo 86:5) Diri niya tatalikdan adton sinsero nga nagbabasol nga nabalik ha iya. (Salmo 51:17) Ha kabaliktaran, nalilipay hiya ha pagkarawat utro ha ira.—Lukas 15:22-24.

An babaye nga gin-unabi ha tinikangan naghimo han siyahan nga pitad ha pagbalik ha Dios. Bumisita hiya ha usa nga kongregasyon han mga Saksi ni Jehova ha ira lugar. Ha tinikangan, kinahanglan niya atohan an iya negatibo nga mga pagbati. “Inabat ko nga waray ako pulos,” siring niya. Kondi gindasig hiya han mga tigurang han kongregasyon, ngan ginbuligan nga makabalik. Hiya nagsiring, “Nagpapasalamat gud ako nga gintugotan ako ni Jehova nga makabalik ha iya!”

Kon nag-aalagad ka kan Jehova hadto ngan naruruyag bumalik ha iya, ginhahangyo ka namon nga bumisita ha kongregasyon han mga Saksi ni Jehova ha iyo lugar. Hinumdumi nga napaid ngan nalolooy hi Jehova ha mga nagbabasol nga nanginginyupo ha iya, “Alayon tuguti gad ako nga makabalik ha imo.”

[Footnote]