Ñee guyuuluʼ ndaaniʼ xquidxi Dios dxiqué la? Zándaca caníʼ íqueluʼ guibiguétaluʼ, peru rinabadiidxaluʼ laca lii pa zaná Jiobá guicaa lii sti biaje. Pa zacá nuuluʼ la? rinábadu lii gúʼndaluʼ tema riʼ ne stobi ca, purtiʼ gucuácani párapeʼ gacané cani lii.

SICARÍʼ guníʼ ti gunaa: «Runeʼ orar Dios guiráʼ ora ne rinabaʼ laabe gudiibe lugar guibiguetaʼ ra nuube ne gutiidiláʼdxibe stondaʼ pur bicheeniáʼ laabe». Gunaa riʼ biniisi ndaaniʼ xquidxi Dios, peru despué bixélebe de laa. Ñee qué riuubaʼ ladxidoʼloʼ ora guiníʼ íqueluʼ pabiáʼ naná modo nuu gunaa riʼ la? Zándaca rinabadiidxaluʼ xi runi sentir Dios pur ca binni riʼ, pa rietenaláʼdxibe laacaʼ ne pa zanabe guibiguétacaʼ ra nuube. Para guicábinu cani, guidúʼndanu ca diidxaʼ ni guníʼ Jeremías, ni riguixhená, purtiʼ zaguixhedxícani ladxidoʼloʼ (biindaʼ Jeremías 31:18-20).

Primeru guidúʼyanu padxí guníʼ Jeremías ca diidxaʼ ca. Stale iza ante gálebe, bidii Jiobá lugar gunitilú ca asiriu reinu ra nuu chii tribu stiʼ Israel —lu iza 740 ante de ca dxi stiʼ Jesús— ne chinecaʼ ca binni que de esclavu. * Laacabe bíʼnicabe stale cosa malu, ne cumu qué nucaadiágacabe ca hombre ni biseendaʼ Dios para quixhená laacabe la? guníʼ Dios zusabanáʼ laacabe (2 Reyes 17:5-18). Xi bizaaca dxi guyuucabe de esclavu xquidxi binni, zitu de Dios ne de xquídxicabe yaʼ. Ñee bichaa modo riníʼ íquecabe la? Ñee bisiaandaʼ Jiobá laacabe la? Ñee zanabe guicaabe laacaʼ sti biaje la?

«Gucaʼ arrepentir»

Biziidiʼ ca israelita xii ngue racalaʼdxiʼ Dios: dxi guyuucabe de esclavu guyuu xpiaanicabe ne guca arrepentírcabe. Bidii Jiobá cuenta dxandíʼ maʼ guca arrepentírcabe. Ne ora guidúʼndanu ni guníʼ Jiobá de modo riníʼ ique Efraín —ni zeeda gaca chii tribu stiʼ Israel— ne xi cayuni sentir, rudiʼnu cuenta dxandíʼ ni.

«Dxandipeʼ maʼ binadiaʼgaʼ nabé triste nuu Efraín pur ca cosa ni cadi jneza biʼniʼ.» (Versículo 18.) Racá ridúʼyanu binadiaga Dios ni caníʼcabe ora cayacanácabe pur ca cosa ni cadi jneza bíʼnicabe. Ti diccionariu hebreu cusiene laaca zanda guibiʼxhiʼ ca diidxaʼ «nabé triste nuu», casi «cuniibi ique», casi runi tuuxa ni qué ruzuubaʼ stiidxaʼ bixhoze ora gudii cuenta pabiáʼ naná ra cadiʼdiʼ, ne racalaʼdxiʼ guibiguetaʼ ralidxi purtiʼ maʼ guca arrepentir (Lucas 15:11-17). Yanna, ximodo bisihuinni ca israelita maʼ guca arrepentircaʼ yaʼ.

«Maʼ guluu jnézaluʼ naa [...] cásica rúnicabe ti yuzehuiiniʼ ni caʼruʼ guidóʼ.» (Versículo 18.) Ca israelita peʼ nga bidiicaʼ cuenta biaʼsi ngue modo bisabanáʼ Dios laacaʼ. Zándaca biquiiñecabe ejemplu ca purtiʼ bietenaláʼdxicabe guzácabe casi ti yuzehuiiniʼ ni caʼruʼ guidóʼ, ni «caquiiñeʼ gucuícabe ti puya» laa para guzuubaʼ diidxaʼ, casi na ti libru.

«Bidxiguetaʼ naa, ne nagueendaca zabiguetaʼ, purtiʼ lii nga Jiobá, Dios stinneʼ.» (Versículo 18.) Nabé guca arrepentírcabe dede bicaacabe ridxi  Dios. Dxandíʼ bixélecabe de laabe ne bíʼnicabe stale cosa malu. Peru racaláʼdxicabe gutiidilaʼdxiʼ Dios stóndacabe, ngue runi gunábacabe Dios gacané laacabe. Sicaríʼ bitiixhi sti Biblia oración bíʼnicabe: «Gucuaa naa stiʼ biaje, bidii lugar guibiguetaʼ; purtiʼ lii, YHWH, nga Dios stinneʼ» (Versión Israelita Nazarena).

«Gucaʼ arrepentir [...]. Bituiluáʼ, ne laaca bineʼ sentir cuxhaataʼ ñee binni naa.» (Versículo 19.) Nabé bituilú ca israelita pur ca pecadu sticaʼ ne bidiicaʼ cuenta nápacaʼ donda. Guyuucabe triste ne biuubaʼ ladxidóʼcabe (Lucas 15:18, 19, 21).

Dxandíʼ guca arrepentírcabe. Nabé bituilúcabe dede gúdxicabe Dios paraa bicheecabe ne bixélecabe de neza malu zécabe. Yanna, ñee ngue si nga caquiiñeʼ para gutiidilaʼdxiʼ Dios stóndacabe ne gudii lugar guibiguétacabe xquídxicabe la?

«Dxandipeʼ ziaʼyaʼ laabe»

Nabé gunnaxhii Jiobá ca israelita. Sicaríʼ cusiene Jeremías 31:9: «Beeda gacaʼ casi Bixhoze Israel; ne Efraín nga baʼduʼ lugola stinneʼ». Yanna, ximodo ndiʼ guiníʼ ti binni qué zacaa xiiñiʼ ni nabé nadxii pa dxandíʼ maʼ guca arrepentir yaʼ. Xcaadxi diidxaʼ guníʼ Jiobá rusihuinni pabiáʼ nadxiibe xquídxibe, casi runi tuuxa né xiiñiʼ.

«Ñee cadi Efraín nga ti xiiñeʼ ni jma sicarú la? Ñee cadi laabe nga ti baʼduhuiiniʼ ni nabé nadxieeʼ la? Purtiʼ neca gudindeniáʼ laabe, qué rusaanaʼ de guietenalaʼdxeʼ laabe.» (Versículo 20.) ¡Nabé sicarú ca diidxaʼ riʼ! Rusihuínnicani nabé nadxii Dios binni. Neca zaqué gudindenebe ca xiiñibe, o gudixhenabe laacaʼ ximodo zalúxecaʼ pa qué guzuubacaʼ diidxaʼ. Ngue runi, dxi maʼ qué nucaadiaga ca israelita stiidxabe, bisabanabe laacaʼ ora bidiibe lugar checaʼ de esclavu. Peru qué nusiaandabe laacaʼ, cásica qué rusiaandaʼ binni xiiñiʼ ni nadxii. Ximodo biʼniʼ sentirbe ora bíʼyabe dxandíʼ maʼ guca arrepentir xquídxibe yaʼ.

«Dede biuu yuubaʼ ndaaneʼ pur laabe. Dxandipeʼ ziaʼyaʼ laabe.» (Versículo 20.) Nabé racalaʼdxiʼ Jiobá guibiguetaʼ ca xiiñiʼ ra nuu. Cumu dxandíʼ guca arrepentírcabe la? biá Jiobá laacabe, ngue runi racalaʼdxiʼ guibiguétacabe ra nuu. Cásica biá hombre bizeeteʼ Jesús lu ejemplu stiʼ que xiiñiʼ neca gudxite xpueltu bixhoze la? zaqueca biá Jiobá laacabe (Lucas 15:20). Nabé rápabe gana guibiguetaʼ ca xiiñibe ra nuube sti biaje.

«Bidii Jiobá lugar guibiguetaʼ»

Ca diidxaʼ ni cá lu Jeremías 31:18-20 racanécani laanu guidúʼyanu pabiáʼ riá Dios binni ne rilaseláʼdxibe laacaʼ. Qué rusiaandabe cani biʼniʼ adorar laabe dxiqué. Ne pa rápacabe gana guibiguétacabe ra nuube la? «nuube listu para gutidiláʼdxibe donda» (Salmo 86:5). Qué ziuu dxi gudxiidéchebe cani dxandíʼ maʼ guca arrepentir (Salmo 51:17). Dede zuxaleʼ ndaga nabe para guicaabe laacaʼ ne riéchebe ora guibiguétacaʼ ra nuube (Lucas 15:22-24).

Rietenalaʼdxuʼ gunaa bizéʼtenu ra bizulú tema riʼ la? Laabe gudixhe íquebe guibiguétabe ra nuu Dios, ne bizulú bidagulisaanebe ca testigu stiʼ Jiobá ni nuu ra nabézabe. Guca nagana para laabe guiníʼ íquebe zutiidilaʼdxiʼ Jiobá stóndabe. Sicaríʼ guniʼbe: «Guníʼ iqueʼ qué ziuu dxi gutiidilaʼdxiʼ Dios ca donda stinneʼ, purtiʼ nabé feu modo bicheeniáʼ laa». Peru guluu ca binnigola gana laabe ne gucanecaʼ laabe chuʼbe gaxha de Dios sti biaje. Xi bizaaca despué yaʼ. Laabe guniʼbe: «Bidii Jiobá lugar guibiguetaʼ, ne rudieeʼ xquíxepeʼ laabe».

Pa bixéleluʼ de Dios, peru yanna maʼ racaláʼdxiluʼ guibiguétaluʼ ra nuube la? rinábadu lii guyúbiluʼ tu gacané lii lade ca binni ridagulisaa stiʼ ca testigu stiʼ Jiobá ni nuu gaxha de ralídxiluʼ. Bietenalaʼdxiʼ, riá Dios binni ne rilaseláʼdxibe cani maʼ guca arrepentir, cani cayabi laabe: «Gucuaa naa sti biaje, bidii lugar guibiguetaʼ».

Biaʼ nexheʼ guiuundaʼ biblia lu beeu riʼ:

Jeremías 17 dede 31

[Nota]