Bibliat yatjjatasaw nayra jakäwinakapjja jaytawayapjje

¿KUNA religionantï jilsuwaykän ukar kuttʼjjañatakejj kunas mä chachar yanaptʼatayna? ukat ¿Kunjamatsa mä waynajj kuna kasta awkinïñtï munkän uk jikjjattatayna? Kamsapjjes jupanakajj uk uñjañäni.

“Jehová Diosar kutʼjjañ wal munayäta” (ELIE KHALIL)

NASÏWIP MARA: 1976

MARKA: CHIPRE

NAYRA JAKÄWIPA: DIOSAT JITHEQTJJATAYNA

NAYRA JAKÄWIJA: Chipre markan nasta, ukampis Australia markanwa jilsuwayta. Awk taykajajja, Jehová Diosan Qhanañchirinakapjjänwa. Jupanakajj Diosaru ukat arunakaparu munasiñäjatakejj wal chʼamachasipjje. Ukampis waynitojjayät ukhajja, munañäjarukiw sarnaqjjayäta. Arumanakajj utajat escapawayjjerïtwa, ukat masinakajampiw autonak lunthatapjjerïta ukat sapakutiw kunayman jan waltʼäwinakan uñjasirïta.

Qalltanjja, awk taykajar jan colerayañatakejj jamasatwa lurirïta, ukampis qhepatjja janiw ajjsarjjayätti. Masinakäjajj nayat wali jilïripjjänwa ukat janiw Jehová Diosarojj munasipkänti. Cheqas jan waliruw irpapjjetäna. Ukatwa mä urojj awk taykajar janiw jumanakamp Diosar yupaychañ munjjti sasin sista. Ukhampachas awk taykajajj pacienciampiw nayar yanaptʼañatakejj wal chʼamachasiwayapjje, ukampis janiw yanaptʼayasiñ munkayätti. Ukatwa jupanakajj wali llakit jikjjatasipjjäna.

Utatjja sarawayjjtwa ukat droganakwa apnaqjjayäta. Qhepatsti, marihuana yapuchasin ukanak alj-jjayäta. Jan walpun sarnaqjjayäta, jilapartejj discotecanakän ukat nuwasiwinakana jikjjatasjjayäta. Ukat nayjam jan lurañsa ni parlañs munapki ukanakatakejj wal colerirïta. Ukat arnaqjjawayirïtwa jan ukajj nuwjawayirït kunawa. Cheqpachansa, kunanaktï mä cristianojj jan lurañapäki ukanakwa lurjjayäta.

KUNJAMSA BIBLIAJJ YANAPTʼAWAYITU: Mä droga umirin amigopaw tukuwayta, jupan awkipajj jiskʼäkän ukhaw jiwjjatayna. Jupampejj arumkamaw parlapjjerïta. Awkijat walpun tumpasta sasaw walja kuti siritu. Jiwatanakajj jaktanipjjaniwa siski uka yatichäwjja jiskʼatpachwa yatiyäta, ukhamajj uka toqet parljjayirïta. Jesusajj jiwatanakar jaktayirïnwa ukat jutïrinjja, jiwatanakarojj jaktayäwa sistuwa (Juan 5:28, 29). Ukat “¡Papitumampejj jikisjjatawa! ukat taqeniw aka Oraqen mä suma paraison jakasjjañäni” sasaw jupar sirïta. Uka arunakajj chuymaparupuniw purtʼäna.

 Yaqhep pachajja, qhepa urunakata jan ukajj Diosajj kimsa diosanakat apthapitawa sasin yatichapkis uka toqenakatwa parlañ muniri. Ukat Bibliapatwa kunatï Jehová Diosatsa, Jesusatsa ukat aka qhepa urunakats cheqäki uk uñachtʼayirïta (Juan 14:28; 2 Timoteo 3:1-5). Amigojar Jehová Diosat parlasajja, jukʼampiw Diosat lupʼjjayäta.

Ukatjja, kuna cheqa yatichäwinakatï chuymajan utjkäna mä arunjja, kuntï awk taykajajj yatichañatak wal chʼamachasiwayapkän ukajj jukʼat jukʼatwa jiltjjäna. Awisajja, amigonakajamp fiestanakan droga umasipkirït ukhaw Jehová Diosat amtasjjerïta. Amigonakajajja, Diosar creytwa sasaw sapjjeri, ukampis sarnaqäwinakapajj mayj uñachtʼayri. Nayajj janiw kʼari chuymanïñ munjjayätti, ukhamajj Jehová Diosar kuttʼañäjaw wakisjjäna, uk amuyasiyäta.

Diosar kuttʼañatakejj kun lurañas wakisi uk yatiñampi ukat lurañampejj janiw pachpäkiti. Cheqas yaqhep jan wali luräwinak jaytañajj janiw chʼamakänti. Sañäni, droga qoll umaña, nayra amigonak jaytaña ukat mä irpir chuyman cristianomp Bibliat yatjjatañas janiw chʼamäkänti.

Ukampis qhoru jaqëyätwa uk jaytañaw nayatakejj wali chʼamäna. Mä qhawqha tiempojj armkasinjja wasitat ukhamäjjarakkïyätwa. Ukhamäsajj janis kunatak askïkirista ukham amuyasisin wal pisayasirakïyäta. Ukat wali llakit uñjasisajja, Bibliat yatichkitu uka irpir chuyman cristianomp parlañ amtta. Jupajj wali pacienciani ukat munasiri ukhamänwa, ukaw wal chʼamañchtʼitäna. Mä kutejja, kunatsa uka jan walinakar atipjañajj wali wakiskiri ukwa Yatiyañataki sat revistan liytʼayitu. * Ukat colerañjamäni ukhajj kuns lurirista uksa jupampejj yatjjatapjjaraktwa. Ukhamajj uka revistan yatichäwip lupʼisa ukat Jehová Diosar wal maytʼasisaw jukʼat jukʼat taqe ukanak armawayta. Ukatsti, abril 2000 maranwa Jehová Diosan Qhanañchiripjam bautisasiwayjjta. Uk uñjasajj awk taykajajj walkusisipjjäna.

WALJA BENDICIONANAKWA KATOQAWAYTA: Jichhajj janiw llakitäjjtti concienciäjas qʼomakejjewa, janiw cuerpojj droganakamp qʼañuchasjjti ni wachoq qʼañu luräwinakans sarnaqjjti. Irnaqäwinsa, cristianonakajj tantachasipki ukansa ukat kuna kusistʼäwinakansa wali kusisitapuniw jikjjatasta. Ukat jakäwijanjja janiw llakitäjjtti.

Awk taykajajj janiw jaytapkituti, nayar yanaptʼañatakejj wal chʼamachasiwayapjje ukat walpun Jehová Diosar yuspärta. Jesusajj “janiw khitis nayaru jutkaspati, janitejj khitankitu uka Awkejj apankaspa ukajja” sasaw Juan 6:44 jiskʼa tʼaqan qhanañchi. Ukajj cheqäskapuniwa, Jehová Diosaw Jupar kuttʼañajatakejj apanitu. Uk lupʼisajj wal chuym chʼalljjtayasta.

 “Mä awkinïñjja walpun munayätjja” (MARCO ANTONIO ALVAREZ SOTO)

NASÏWIP MARA: 1977

MARKA: CHILE

NAYRA JAKÄWIPA: HEAVY-METAL SAT MUSIC TUKIRÏNWA

NAYRA JAKÄWIJA: Mamitajampiw Punta Arenas sat cheqan jilsuwayta, ukajj Chile markat aynach toqenkiwa. Uka cheqajja, estrecho de Magallanes sas uñtʼatarakiwa. Awk taykajajj phesqha maranikayät ukhaw jaljtjjapjje, ukatwa apanukutäkiristsa ukham amuyasiyäta. Awkinïñjja, walpun munayäta.

Mamitajajj Jehová Diosan qhanañchiripampiw Bibliat yateqañ qalltäna ukat tantachäwinakaparus irpitäna. Nayajj janiw sarañ munirïkti sapa kutiw thakhinjj qʼellisjjerïta. Ukat 13 maranïkayät ukhajja, janiw tantachäwinakar sarjjayätti.

Ukhanakajja, music tocañ walpun munjjayäta ukat yateqañas janiw chʼamäkänti. Ukat 15 maranirojj heavy-metal sat musicjja fiestanakana, umañ utanakana ukat yaqhawjanakansa tocarakiyätwa. Ukat wali sum music tocañ yatipki ukanakamp chikachasisajja, taqenin uñtʼat musicanak tocañwa munjjayäta. Ukhamïpansti, music tocañ yatichapkis ukaruw sum yateqañatakejj sarayäta. Ukatjja, 20 maranïkayät ukhajj Santiago jachʼa markaruw jukʼamp sum yatjjataskakiñatakejj sarjjta. Ukat yateqkasajja, heavy-metal ukat yaqha music tocañanakansa, tocaskakiyätwa.

Ukhamäkchi ukasa, janipuniw kusisitäkayätti. Ukat jan llakimp aynachtʼañatakejja, masinakajampiw droga qollanak umirïta, jupanakarojj familiajäkaspas ukham uñjayäta. Jan istʼiri ukhamayätwa, ukat ukham jaqetajajj qhanaw amuyasïna. Chʼiyarat isthapisirïta, jachʼa sunkhani ukat ñikʼutäjsa niya cinturkamaw jilayasiyäta.

Jan wali jaqetäj laykojj sapakutiw jaqenakamp nuwasirïta, ukat policiampis apayasirïta. Mä kutejja, droga apnaqerinakaw amigonakajampir wal colerayapjjetu. Ukat alcohol umantataw jupanaqar qallasta, jupanakajj may nuwjasaw laka chʼakha pʼakintapjjetu.

Ukampisa, mayaw walpun chuym ustʼayitu. Noviajaw wali munat amigojamp walja maranak sarnaqaskatayna, ukat amigonakajajj uk sum yatisipkatayna, ukampis imtʼapjjataynawa, ukwa mä urojj yatista. Uk yatisajj walpun chuym ustʼayasta.

Punta Arenas sat cheqaruw kuttʼawayjjta, ukat ukanwa music tocaña yatichas irnaqta. Ukat violonchelsa tocarakiyätwa. Ukhamarakiw heavy-metal ukat yaqha musiconakampis grabaskakiyätwa. Ukat ukhanakaw Sussan sat suma uñnaqtʼan tawaqor uñtʼta ukat jupampiw jakasjjapjjarakta. Mamitapajja, Diosajj kimsa diosanakat mayar apthapitawa sasin yatichapkis ukaruw atinisïna, ukampis nayajj janiw uka yatichäwir creykayätti, ukatwa Sussanajj ¿kawkïripunis cheqajja? sasin mä urojj jisktʼitu. Mamitama creyki uka yatichäwejj janiw cheqäkiti. Ukat kawkhans Biblian ukham qhanañchi uk janis yatkchiyätjja, Jehová Diosan Qhanañchirinakapaw Bibliampi qhanañchiristamjja sasaw jupar sista. Ukatsti, Diosaruw yanaptʼa mayista, ukhamjja jaya maranakaw jan mayisjjayätti.

Mä qhawqha urunakatjja, mä chacharuw wali uñtʼatjam uñkatta, ¿janit jumajj Jehová Diosan Qhanañchiripäkta? sasaw jisktʼta. Ukat nayar uñkatasajj mä jukʼs sutjaskchïnjja, munasiñampiw  kunürus tantachasipjje uk yatiyitu. Cheqansa, Diosajj oracionajar istʼatapwa qhan ukhajj amuyasta. Ukat tantachäwirojj sartwa, jan uñtʼayasiñatakejj qheparukiw qontʼasta. Ukampis waljaniw uñtʼapjjetu, kunattejj jiskʼäkasaw sarayätjja. Ukat munasiñampipuniw katoqtʼapjjetu, qhomanttʼapjjetu. Ukhamïpansti wali kusisitaw jikjjatasiyäta. Utarus kutʼkirista ukhamänwa. Ukat jiskʼäkayat ukhajja, mä cristian jilataw Bibliat yatichitäna, jupampiw jikisipta, ukat wasitamp Bibliat yatichita sasaw jupar sista.

KUNJAMSA BIBLIAJJ YANAPTʼAWAYITU: Mä urojja, Proverbios 27:11 qellqatwa liytʼta, ukanjja akham siwa: “Munat wawäjay, yatiñanimaya, nayarojj kusisiyitatawa” sasa. Uk liytʼasajja, wal muspharta, kunjamarak taqe kun lurir Diosar mä jiwir jaqejj kusisiyaspasti sasa. Cheqansa, kuna kast awkinïñtï munkayät ukjja jikjjatwa, jupasti Jehová Diosawa.

Nayajj alajjpachankir Awkin chuymapar kusisiyañ ukat munañap lurañwa munayäta. Ukampis drogan ukat alcoholanpikiw walja maranak sarnaqawayta.Ukat kuntï Jesusajj Mateo 6:24 qellqatanjj yatichañ munäna ukjja sum amuyta, ukanjja akham siwa: “Janiw khitis pä patronarojj sirvkaspati” sasa. Ukat jan wali luräwinak apanukuñatak chʼamachaskasajja, 1 Corintios 15:33 jiskʼa tʼaqaw chuymajar purtʼitäna, ukanjja akham siwa: “Jan wali jaqenakampi sarnaqañajj suma luräwinaka chhaqhayañawa” sasa. Ukhamajj jan wali luräwinak apanukuñäjatakejja, jan wali amigonaksa ukat kunatï jan waltʼaykitaspa ukanaksa apanukuñäjanwa. Cheqas Biblian ewjjtʼapajj wali qhanawa, kunatï jan wali lurañar apkitäna ukanakjja chʼamäkchi ukhasa apanukuñäjanwa (Mateo 5:30).

Niyakejjay music tocañajj nayatakejj wal munañjamächïnjja, heavy-metal music jaytañajj wali chʼamänwa. Ukampis tamankir amigonakajan yanaptʼapampejj taqe ukanakjja jaytawaytwa. Janiw alcohol umjjti, sunkhajsa khuchhurasjjtwa ukat janiw chʼiyar isimpis isisjjti. Ukat Sussanar ñikʼut khuchhurayasiñ munta sist ukhajja, kunatsa ukham lurañ munt ukjja wal yatiñ munäna ukat akham situwa: “Jumampiw Tantachäwir sarañ munta. Kunpins ukan lurapjje uk uñjañataki” sasa. Uñjasinsti wal kusisïna ukat Bibliat yatjjatañjja qalltjjarakïnwa. Ukat tiempompejj casarasjjaptwa ukat  2008 maranjja, Jehová Diosan Qhanañchiripjamaw bautisasjjapta. Jichhasti, wali kusisitaw Jehová Diosar mamitajampi loqtasipkta.

WALJA BENDICIONANAKWA KATOQAWAYTA: Aka ñanqha kʼari pachasa ukat kʼari amigonaksa jaytawayjjtwa. Music istʼañjja munaskaktwa, ukampis sum ajlltʼasaw ischʼukta. Aka sarnaqäwij-jja familiajar ukat wayn tawaqonakar yanaptʼañatakejj parltʼapuntwa. Kuntï aka ñanqha pachajj uñachayki ukajj munañjamäkaspas ukhamawa, ukampis qheparojj “mä jan kunatak servir tʼunäkaspas” ukhamakïjjewa (Filipenses 3:8).

Diosar jakʼachasjjasajja, cristian tamanjj walja suma amigonakwa jikjjatta, ukanjja munasiña ukat sumanakaw utji. Ukanwa mä suma awki jikjjatta: Jupasti Jehová satawa.

[Qhanañchäwi]

[13 janan qhanañchäwipa]

“Jehová Diosaw Jupar kuttʼañäjatakejj apanitu”