Bibel Mambahen Denggan Ngolukku

“Ikkon Mulak do Au Muse tu Jahowa.”​—ELIE KHALIL

TUBU TAON: 1976

NEGERI ASAL: SIPRUS

RIWAYAT HIDUP: ANAK NA MAGO

NGOLUKKU NA UJU I: Tubu di Siprus do au alai magodang di Australia. Saksi Jahowa do natua-tuakku. Marsitutu do nasida mangajari au asa makkaholongi Jahowa dohot hatana, i ma Bibel. Alai dung remaja, mulai ma au mangalo. Sering do au sip-sip kaluar sian jabu tikki borngin lao pajuppang dohot akka remaja na asing. Hutakko hami do mobil jala godang do huulahon hami hajahaton.

Di mulana, sip-sip do au mangulahon i asa unang muruk natua-tuakku. Alai lam leleng dang mabiar be au. Mardongan do au tu akka halak na dao uttua sian au jala na so makkaholongi Jahowa jala mambahen pengaruh na so denggan do nasida tu au. Ujungna hupaboa ma tu natua-tuakku, dang olo be au mangihutton agama ni nasida. Marsitutu do nasida mangurupi au, alai tetap do dang olo au. Lungun hian ma roha ni nasida.

Dung dang di jabu be au, mulai ma au marnarkoba. Husuan do godang ganja jala hugadis do i. Huulahon do seks na so patut jala sering do au marpesta-pesta di diskotik. Mura-mura do tong au muruk. Molo adong na mandok manang na mangulahon na so huhalomohon, pittor muruk do au. Jala sering do au manonggaki dohot mambalbali halak. Boi didok, huulahon do sude na so boi diulahon halak Kristen.

SONGON DIA BIBEL PAUBAHON NGOLUKKU: Adong do sahabathu na tong mamakke narkoba. Nungnga mate bapakna tikki gelleng dope ibana. Sering do hami makkata-hatai sappe tonga borngin. Sipata dipaboa ibana ma tu au na masihol hian ibana tu bapakna i. Ala huboto do janji ni Debata taringot haheheon, hupaboa ma tu ibana boi do Jesus pahehehon halak na mate najolo jala marjanji do ibana lao mangulahon na songon i muse di ari na naeng ro. (Johannes 5:28, 29) Hudok ma tu ibana, “Bayangkon ma boi muse ho pajuppang dohot bapakmu jala boi ma hita sude mangolu saleleng ni lelengna di Paradeiso na di tano on.” Las hian do roha ni sahabathi mambege i.

Di tikki na asing diceritahon ibana ma tu au taringot ari parpudi dohot debata sitolusada. Jadi hubuat ma Bibelna jala hupatudu ma sian i akka ayat na patuduhon ajaran na sittong taringot Debata Jahowa, Jesus, dohot ari parpudi. (Johannes 14:28; 2 Timoteus 3:1-5) Lam sering au manceritahon taringot Jahowa tu ibana, lam sering ma au mamikkirhon Jahowa.

Palan-palan hiungot ma sude ajaran ni Bibel na diajarhon natua-tuakku tu au. Misalna, tikki marpesta-pesta au rap dohot akka dongan di diskotik, toppu ma huingot Jahowa. Godang do donganki na mangakku makkaholongi Debata alai dang hasea pangalaho ni nasida. Dang olo au gabe songon nasida. Gabe sadar ma au, ikkon mulak do au muse tu Jahowa.

Mura do mamboto aha na ikkon diulahon, alai maol do sipata mangulahon i. Adong do piga-piga na so maol hupaso, i ma marnarkoba jala maninggalhon akka donganku na leleng. Dung i mulai ma au marsiajar Bibel dohot sahalak sintua.

Alai adong do na maol hupaso. Misalna, maol do au mangarajai dirikku asa unang mura-mura muruk. Sipata boi do hurajai dirikku, alai sipata muruk-muruk muse au. Dukkon i, gabe merasa bersalah ma au jala merasa dang tolap be. Tikki metmet rohakku, hupaboa do i tu sintua na mangurupi au marsiajar Bibel. Burju do ibana jala sai sabar do ibana tu au. Sai dipatogu ibana do rohakku. Di sada tikki, disuru ibana ma asa hujaha sada artikel di Menara Pengawal taringot unang menyerah. * Dibahas hami ma sian artikel i aha na ikkon huulahon molo muruk-muruk muse au. Ala sai huingot artikel i jala sering au martangiang tu Jahowa, palan-palan boi ma hurajai dirikku asa dang mura-mura muruk. Ujungna di bulan April taon 2000 tardidi ma au. Las hian ma roha ni natua-tuakku.

LABA NA HUDAPOT: Ala dang marnarkoba be au jala mangulahon seks na so patut, gabe dame ma rohakku dohot pikkiranku. Gabe las ma saonari rohakku mangulahon manang aha pe. Misalna karejo, marpungu, manang rekreasi. Gabe positif ma saonari pandanganku taringot parngoluon.

Mandok mauliate do au tu Jahowa ala dang hea natua-tuakku lupa tu au. Huingot do muse hata ni Jesus di Johannes 6:44 na mandok, “Dang adong manang ise na boi ro tu au, anggo so Ama na marsuru au i na manogu ibana.” Las hian do rohakku mamboto na ditarik Jahowa do au asa boi mulak muse tu Ibana.

“Masihol do Au Marbapa.”​—MARCO ANTONIO ALVAREZ SOTO

TUBU TAON: 1977

NEGERI ASAL: CILE

RIWAYAT HIDUP: ANGGOTA NI GRUP MUSIK DEATH-METAL

NGOLUKKU NA UJU I: Magodang di Punta Arenas do au, i ma kota na bagak di Selat Magalhaes di ujung selatan ni Amerika Selatan. Tikki marumur lima taon au, marsirang do natua-tuakku. Jadi holan omak do na pagodang-godangkon au. Sering do huhilala dang adong na mamparrohahon au. Masihol do au marbapa.

Marsiajar Bibel do omakku dohot Saksi Jahowa. Jala diajak ibana do au tu parpunguan ni nasida. Alai dang lomo rohakku tusi. Jala sering do au tangis tikki di pardalanan. Tikki marumur 13 taon au, dang dohot be au marpungu.

Tikki i, mulai ma lomo rohakku tu musik jala berbakat do au. Tikki marumur 15 taon, nungnga dohot au marmusik heavy-metal dohot death-metal di festival, bar, dohot akka acara. Ala mardongan au tu akka parmusik, gabe lomo ma muse rohakku tu musik klasik. Jadi marsiajar ma au di sikkola musik. Tikki marumur 20 taon, pinda ma au tu ibukota, i ma kota Santiago asa lam godang na huparsiajari taringot musik. Jala torus do au marmusik rap dohot grup heavy-metal dohot death-metal.

Alai nang pe songon i, sering do huhilala hira na so martujuan ngolukku. Asa boi mago perasaan na songon i, biasana minum-minum do au jala marnarkoba rap dohot akka dongan di grup musikku, na huanggap songon keluargakku sandiri. Kasar jala pangalo do au tikki i. Jala tarida do i sian penampilanku. Akka na birong do sude pakkeanku, hupaganjang do jangguttu, jala hupaganjang do obukku sahat tu gottingku.

Ala songon i sifattu, gabe sering ma au marbada jala ditakkup polisi. Sada tikki dung minum-minum au, hualo ma sakalompok pengedar narkoba na mangganggu au dohot akka donganku. Alai dipukkuli nasida do au sappe ponggol osang-osangku.

Alai na paling mambahen haccit roha, i ma akka donganku. Sada tikki, tarbotokku ma nungnga selingkuh do hape hallettu dohot donganku saleleng martaon-taon. Jala dohot do akka donganku na asing manggabusi au. Haccit hian do rohakku.

Jadi mulak ma au tu Punta Arenas. Gabe guru musik do au disi jala gabe pemain selo. Torus do au marmusik jala mambahen rekaman rap dohot grup heavy-metal dohot death-metal. Dung i pajuppang ma au dohot sahalak anak boru na bagak, i ma si Sussan, jala gabe sajabu ma hami. Di pudian ni ari, diboto si Sussan ma dang porsea au tu ajaran Tritunggal, hape porsea do omakna tu ajaran i. Disukkun ibana ma, “Jadi dia do na toho?” Hudok ma tu ibana huboto do sala ajaran Tritunggal i, alai dang boi hupatudu buktina sian Bibel. Alai huboto do Saksi Jahowa do na boi patuduhon buktina sian Bibel. Jadi martangiang ma au tu Debata mangido asa diurupi au. Nungnga martaon-taon au dang hea martangiang.

Piga-piga ari dukkon i, huida ma sahalak bawa na rapi penampilanna. Jala husukkun ma, Saksi Jahowa do ibana manang na dang. Tarsonggot do ibana mangida au. Nang pe songon i, burju do ibana mangalusi sukkun-sukkunku taringot andigan marpungu di Bale Harajaon. Pos do rohakku, on do alus ni tangiakki. Jadi lao ma au marpungu tu Bale Harajaon, jala di pudi hian ma au hundul asa unang adong na mamereng au. Alai godang do na mananda au, jala diingot nasida do hea do au marpungu tikki gelleng. Dijalang jala dihaol nasida do au. Gabe dame ma pakkilalaanku, hira na di jabukku sandiri do huhilala. Tikki huida bawa na mangurupi au marsiajar Bibel najolo, hudapotton ma ibana asa diurupi ibana muse au marsiajar Bibel.

SONGON DIA BIBEL PAUBAHON NGOLUKKU: Sada tikki, hujaha ma Poda 27:11 na mandok, “Ale anakku, marbisuk ma ho jala bahen ma las rohakku.” Las hian do rohakku manjaha ayat i. Alana boi do hape jolma mambahen las roha ni Debata na manoppa ibana. Gabe sadar ma au, Bapak na songon Jahowa do na hulului saleleng on!

Lomo do rohakku naeng mambahen las roha ni Jahowa jala mangulahon lomo ni rohana. Alai nungnga martaon-taon au diparhatoban narkoba dohot minuman beralkohol. Dung i, huattusi ma ajaran ni Jesus di Mateus 6:24 na mandok, “Dang tarbahen ni sahalak hatoban mangoloi dua tuan.” Jadi berusaha ma au asa boi muba. Jala godang do manfaatna ala huingot prinsip di 1 Korint 15:33 na mandok, “Molo mardongan hamu tu halak na so denggan, sega do pangalahomuna na denggan i.” Gabe sadar ma au, dang boi hupaso hasomalanku molo torus au mardongan tu akka donganku najolo. Takkas do nasehat na dipaboa di Bibel. Ikkon hubahen do perubahan na balga jala ikkon tegas do au asa boi au malua sian akka hasomalan na so denggan.—Mateus 5:30.

Ala lomo hian rohakku tu musik, maol hian do huhilala maninggalhon musik heavy-metal. Alai ala diurupi akka dongan di huria au, gabe boi ma au maninggalhon hasomalan na so denggan. Dang olo be au minum-minum jala marnarkoba. Hupangkas ma obukku, hucukkur ma jangguttu, jala dang akka na birong be pakkeanku. Tikki hupaboa tu si Sussan naeng hupangkas obukku, gabe penasaran ma ibana. Didok ibana ma, “Dohot ma jo au bah marpungu, asa hubereng aha do sebenarna disi!” Las do rohana tikki na marpungu i. Jala dang leleng dukkon i, dohot ma ibana marsiajar Bibel. Di pudian ni ari, menikah ma au tu si Sussan. Di taon 2008, tardidi ma hami na dua. Las hian do rohanami ala boi manomba Jahowa rap dohot omakku.

LABA NA HUDAPOT: Nungnga malua be au sian hasonangan di portibi on na holan parsatokkinan. Jala nungnga malua be au sian akka donganku najolo i, na mambahen haccit rohakku. Lomo dope rohakku tu musik sahat tu saonari, alai akka musik na denggan ma na hubege. Huurupi do keluargakku dohot akka halak na asing, tarlumobi akka na poso, asa boi nasida marsiajar sian pengalamanku. Hira hasonangan do sude na ditawarhon portibi on, alai sebenarna “songon sampah” do i sude.—Pilippi 3:8.

Dapottu ma akka dongan di huria na setia, na makkaholongi au, jala na marroha na dame. Alai na paling penting, ala nungnga jonok be hubungakku tu Jahowa, gabe hira na marbapa do au saonari.

[Surat na di Toru]