Binago Kan Biblia an Saindang Buhay

ANO an nagpahiro sa sarong lalaki na bumalik sa dinakulaan niang relihion na binayaan nia kaidto? Paano nanompongan nin sarong hoben na lalaki an garo man sana tunay niang ama na hinanap nia sa bilog na buhay? Basahon an estorya ninda.

“Kaipuhan Kong Bumalik ki Jehova.”—⁠ELIE KHALIL

TAON NIN PAGKAMUNDAG: 1976

GINIKANAN NA NASYON: CYPRUS

DATING NALAGALAG NA AKI

AN BUHAY KO KAIDTO: Namundag ako sa Cyprus pero sa Australia ako nagdakula. An mga magurang ko Mga Saksi ni Jehova, asin ginibo ninda an pinakamakakaya tanganing ikatadom sa sako an pagkamoot ki Jehova saka sa Tataramon nia, an Biblia. Pero, nagpoon akong magrebelde kan tin-edyer na ako. Patago akong minahale sa harong kun banggi tanganing makitagboan sa iba pang tin-edyer. Naghahabon kami nin mga kotse asin napapasubo sa dakol pang problema.

Kan primero, patago kong ginigibo an mga bagay na iyan huli sa takot na maanggot an mga magurang ko. Pero, luway-luway na nawara an takot kong iyan. Nakiamigo ako sa mga mas may edad nanggad sa sako na mayong pagkamoot ki Jehova, asin bakong magayon an nagin impluwensia sa sako. Pag-abot nin panahon, sinabi ko sa mga magurang ko na habo ko nang magkaigwa nin ano man na koneksion sa saindang relihion. Mapasensia sindang naghingoa na tabangan ako, pero sinayumahan ko iyan gabos. Grabe an saindang kamondoan.

Pagkatapos maghale sa harong, nagpoon na akong magdroga, asin nagtatanom saka nagpapabakal pa ngani nin dakol na marijuana. Namuhay ako nin imoral asin pirme akong nasa night club. Nagin aranggoton na man ako. Kun may sinabi o ginibo an saro na dai ko nagustohan, naaanggot ako nin grabe, na sa parate nambubulyaw asin nanununtok. Sa ibang pagtaram, ginibo ko an gabos na itinokdo sa sako na dai dapat gibohon nin sarong Kristiano.

KUN PAANO BINAGO KAN BIBLIA AN BUHAY KO: Nagin ugos kong kaamigo an saro na nagdodroga man, na nagadan an ama kan akion pa sia. Pirme kaming nag-eestoryahan sagkod sa matanga. Sa mga bangging iyan, may beses na sinasabi nia an nasa boot nia asin kun gurano sia kapungaw sa saiyang ama. Huling ako nagdakula na aram an paglaom na pagkabuhay liwat, dai ko namamangnohan na ipinapakipag-olay ko na palan sa saiya an dapit ki Jesus​—⁠na sia may binuhay liwat na mga gadan asin nanunuga na gigibohon nia giraray iyan sa maabot na panahon. (Juan 5:​28, 29) “Imahinara na sana na maheheling mo giraray an ama mo,” an sinasabi ko. “Gabos kita puedeng mabuhay sagkod lamang sa Paraiso digdi sa daga.” Napahiro kaiyan an puso kan amigo ko.

 May beses man na nasasambitan kan amigo ko an mga tema na arog baga kan huring mga aldaw o doktrinang Trinidad. Ginagamit ko an Biblia nia tanganing ipaheling an manlaenlaen na teksto na nagsasabi kan katotoohan manongod ki Jehova Dios, ki Jesus, asin sa huring mga aldaw. (Juan 14:28; 2 Timoteo 3:​1-5) Mientras na paorootro kong ipinapakipag-olay sa amigo ko an dapit ki Jehova, lalo ko man na naiisip si Jehova.

Luway-luway na nagtalubo an dating dai nagtutubong mga banhi nin katotoohan kan Biblia na nasa puso ko​—⁠mga banhi na pinagmaigotan kaidtong itanom kan mga magurang ko. Halimbawa, kun nagdodroga kami kan mga amigo ko mantang nasa parti, may beses na bigla kong naiisip si Jehova. Dakol sa mga amigo ko an nagsasabing namomotan man ninda an Dios, pero kabaliktaran kaiyan an gawe-gawe ninda. Huling habo kong magin arog kaiyan, narealisar ko kun ano an kaipuhan kong gibohon. Kaipuhan kong bumalik ki Jehova.

Siempre, magkalaen na bagay an pakaaram kun ano an gigibohon asin an aktuwal na paggibo kaiyan. Pasil gibohon an nagkapirang pagbabago; daing gayo ako nasakitan na ipondo an pagdroga. Binayaan ko man an dati kong mga amigo, asin nagpoon na akong makipag-adal sa Biblia sa sarong Kristianong elder.

Pero, mas depisil nanggad gibohon an iba pang pagbabago. An pagkaanggot an lalo nang nadedepisilan akong kontrolon. Kun beses, nakokontrol ko iyan sa halipot na panahon, dangan minabalik ako sa dati. Kada mangyari iyan, nakokonsensia ako huling iniisip ko na mayo na akong magigibo. Dahel sa pangluluya nin boot, dinolok ko an elder na nagtotokdo sa sako sa Biblia. Huli ta sia pirmeng maboot saka mapasensia, sia nagin tunay na pampakosog sa boot. Sarong beses, ipinabasa nia sa sako an sarong artikulo sa An Torrengbantayan dapit sa kahalagahan nin dai pagsuko. * Pinag-olayan mi an mga paagi na puede kong gibohon kun naaanggot ako. Paagi sa paggirumdom sa artikulong iyan asin dakol na pamibi ki Jehova, luway-luway kong nakontrol an pag-init kan sakong payo. Sa katapustapusi, kan Abril 2000, nabautismohan ako bilang Saksi ni Jehova. Siempre, ogmahon an mga magurang ko.

KUN PAANO AKO NAKINABANG: Igwa na ako ngonyan nin katoninongan nin isip asin malinig na konsensia, huling aram ko na dai ko na inaatian an sakong hawak paagi sa droga o imoralidad. Ano man an ginigibo ko​—⁠nagtatrabaho, nag-aatender sa Kristianong pagtiripon, o nag-aaling-aling​—⁠mas maogma nanggad ako. Positibo an pananaw ko sa buhay.

Nagpapasalamat ako ki Jehova huli sa mga magurang ko, na nungkang suminuko sa pagtabang sa sako. Naiisip ko man an mga tataramon ni Jesus sa Juan 6:44: ‘Dai nin makakadolok sa sako, kun dai sia dagkahon kan Ama na nagsugo sako.’ Nakakapukaw sa boot na isipon na nagibo kong bumalik ki Jehova huli ta inengganyar nia ako.

 “Gustong-Gusto Kong Magkaigwa nin Ama.”—⁠MARCO ANTONIO ALVAREZ SOTO

TAON NIN PAGKAMUNDAG: 1977

GINIKANAN NA NASYON: CHILE

DATING MIEMBRO NIN BANDANG DEATH METAL

AN BUHAY KO KAIDTO: Pinadakula ako kan ina ko sa Punta Arenas, sarong magayon na siudad sa Strait of Magellan na harani sa purong timog kan Amerika del Sur. Kan ako singko anyos na, nagsuwayan an mga magurang ko, kaya an pagmate ko inabandonar ako. Gustong-gusto kong magkaigwa nin ama.

An sakong ina nakipag-adal sa Biblia sa mga Saksi ni Jehova, asin iiniiba nia ako sa Kristianong mga pagtiripon sa Kingdom Hall. Pero, haboon kong mag-atender, kaya parate akong nag-aalburoto mantang paduman. Kan ako 13 anyos na, dai na talaga ako nag-aatender.

Kan panahon na iyan, nagkahilig ako sa musika, asin narealisar ko na may talento ako dian. Kan ako mag-15 anyos, nagtutugtog na ako nin musikang heavy metal asin death metal sa mga piesta, bar, asin pribadong pagtiripontipon. An pakiibaiba ko sa matitibay na musikero nakapukaw kan sakong interes sa musikang klasikal. Nagpoon akong mag-adal sa sarong eskuelahan nin musika. Sa edad na 20, nagbalyo ako sa kabisera, sa Santiago, tanganing idagos an pag-adal. Padagos man akong nagtutugtog sa mga bandang heavy metal asin death metal.

Sa bilog na panahon na iyan, an pagmate ko dai nang halaga an buhay. Sa paghihingoang mainaan an pagmateng iyan, nagbuburat asin nagdodroga ako kaiba an mga miembro kan banda, na ibinibilang kong kapamilya. Nagin rebelde an kaisipan ko, na risang-risa sa itsura ko. Itom na bado an isinusulot ko, pinapalaba ko an barabas ko, asin haros sagkod sa habayan an buhok ko.

Huli sa ugale ko, paorootro akong napapasubo sa iriwal asin nagigin problema nin mga pulis. Sarong beses, huling nasa impluwensia nin inomon na de alkohol, dinaguso ko an sarong grupo nin nagpapabakal nin droga, na nagpaparaistorbo sa samong mag-aramigo. Binugbog ninda ako, kaya napasa an panga ko.

Pero, an pinakamakolog na nangyari sa sako kagigibohan kan mga pinakadayupot sa sako. Sarong aldaw, naaraman ko na dakol nang taon na nakikipagrelasyon an kailusyon ko sa sakong pinakaugos na amigo, asin haloy na itinago iyan sa sako kan gabos kong amigo. Biyo akong nangruluya.

Nagbalik ako sa Punta Arenas, na duman nagpoon akong magtokdo nin musika asin magtrabaho bilang paratugtog nin selo. Padagos man akong nagtugtog asin nagrekord kaiba an mga bandang heavy metal asin death metal. May nakamidbid akong magayon na babae na an ngaran Sussan, asin nagpoon kaming mag-ibanan na bakong kasal. Paghaloyhaloy, naaraman nia na an saiyang ina nagtutubod sa doktrinang Trinidad mantang ako dai. “Kaya, ano an totoo?” an hapot nia sa sako. Sinabi ko na aram kong bakong totoo an Trinidad pero dai ko iyan kayang patunayan base sa Biblia. Pero, may aram akong makakagibo kaiyan. Sinabi ko sa saiya na kaya kan mga Saksi ni Jehova na ipaheling sa saiya an katotoohan base sa Biblia. Dangan, may ginibo ako na dai ko na ginigibo sa dakol na taon​—⁠namibi ako sa Dios asin hinagad an tabang nia.

Pakalihis nin pirang aldaw, naheling ko an sarong lalaki na garo pamilyar sa sako, asin hinapot ko sia kun saro sia sa Mga Saksi ni Jehova. Dawa ngani risang-risa na ninenerbios huli sa itsura ko, maboot niang sinimbag an mga hapot ko mapadapit sa pagtiripon sa Kingdom Hall. Kombensido ako na an pagtagboan na ini an simbag sa pamibi ko. Nagduman ako sa Kingdom Hall asin nagtukaw  sa pinakahurihan tanganing mayong makamangno sa sako. Pero, dakol an nakamidbid sa sako huli sa pag-atender ko kan ako aki pa. Maogma ninda akong inako asin may kapadangatan nanggad na kinugos kaya nakamate ako nin labi-labing katoninongan. Garo man sana ako nagpuli sa harong mi. Kan maheling ko an lalaking nagtokdo sa sako sa Biblia kan ako aki pa, nagsabi ako sa saiya na tokdoan giraray ako.

KUN PAANO BINAGO KAN BIBLIA AN BUHAY KO: Sarong aldaw, binasa ko an Talinhaga 27:​11, na nagsasabi: ‘Magmadonong ka aki ko, asin paogmaha an sakuyang puso.’ Nakakapukaw sa boot na isip-isipon na puedeng paogmahon nin hamak na tawo an Kaglalang kan uniberso. Narealisar ko na si Jehova garo man sana an tunay kong ama na hinanap ko sa bilog na buhay!

Gusto kong paogmahon an sakong Ama sa langit asin gibohon an kabotan nia, pero dakol nang taon akong adikto sa droga asin inomon na de alkohol. Alagad, nasabotan ko an itinokdo ni Jesus na nasa Mateo 6:​24, na nagsasabing ‘dai nin siisay man na makakapaglingkod sa duwang kagurangnan.’ Mantang nagmamaigot akong gumibo nin pagbabago, nagkaigwa nin dakulang epekto sa sako an prinsipyo sa 1 Corinto 15:33: ‘An maraot na pag-iriba nakakaraot kan marahay na mga ugale.’ Narealisar ko na dai ko mapopondo an sakong mga bisyo kun padagos akong maduman sa mga dati kong dinudumanan asin makikiiba sa dati kong kairiba. Malinaw an konseho kan Biblia: Kaipuhan kong gumibo nin dakulaon na pagbabago tanganing makabutas sa mga bagay na nakakapasingkog sa sako.​—⁠Mateo 5:⁠30.

Huli sa pagkawili sa musika, an pinakadepisil na desisyon na kaipuhan kong gibohon kaidto iyo an magpondo sa pagtugtog nin heavy metal. Pero, sa tabang kan mga amigo ko sa kongregasyon, nakabutas ako sa katapustapusi. Ipinondo ko an sobrang pag-inom asin pagdroga. Nagpaputol man ako nin buhok, nag-ahit nin barabas, asin dai na nagsusulot nin pirme na sanang itom na bado. Kan sinabi ko ki Sussan na gusto kong magpaputol nin buhok, dai sia makapaniwala kaya nag-usisa sia. Sinabi nia, “Maiba ako saimo tanganing maheling ko kun ano man nanggad an ginigibo sa Kingdom Hall!” Nagustohan nia an naheling nia duman, asin dai nahaloy nag-adal na man sia sa Biblia. Pag-abot nin panahon, nagpakasal kami. Kan 2008, nabautismohan kami bilang Mga Saksi ni Jehova. Naoogma kami na magin kasaro an sakong ina sa paglilingkod ki Jehova.

KUN PAANO AKO NAKINABANG: Nakahale ako sa sarong kinaban na mayo nin tunay na kaogmahan asin madaya an mga kaibaiba. Mahilig pa man giraray ako sa musika, pero mapamili na ako. Ginagamit ko an sakong mga eksperyensia tanganing tabangan an mga kapamilya ko asin an iba pa, lalo na an mga hoben. Gusto kong tabangan sindang maheling na an dakol sa inaalok kan kinaban na ini garo baga kaakit-akit, pero sa huri “tapok” sana iyan.​—⁠Filipos 3:⁠8.

Nakakua ako nin mapagtitiwalaan na mga amigo sa laog kan Kristianong kongregasyon, na dian igwa nin pagkamoot asin katoninongan. Orog sa gabos, paagi sa pagrani ki Jehova, nahanap ko sa katapustapusi an sakuyang “Ama.”

[Nota sa Ibaba]

[Blurb sa pahina 13]

“Nagibo kong bumalik ki Jehova huli ta inengganyar nia ako”