Refo Fyadwer Kankenem

ROSAI ḇedif snon oso fa kyaḇer ḇe agama ḇyedi fafisu ibaḇa ya? Rariso snonkbor oso isrow kma imander fyoro kwar ya? Wawasya kada fawar suḇenane.

”Fandun fa Yakaḇer Ḇe Yahwe I.”​—ELIE KHALIL

ḆYEAḆEN: 1976

SUP RYAMA YA: SIPRUS

FARFYAR ḆYEJA: ROMAWA ḆEḆYOR

KENEM AYEDI RO RANDAKYA: Yaḇeaḇen ro Siprus mboi yaba ro Australia. Sinan ayesu Saksi Yahwe suirya, ma susewar pyum kaku fa sufarkor insama yaswar Yahwe ma Wos Ḇyena, Refo ya. Ḇape fafisu yaḇe romawa babo, yafasnai kenem ḇeḇye ḇa. Ro roḇ ido yakofenbair ḇe su ḇa bo yara yasrow kuker bati yesya ḇeḇeumur imnis ra aya. Nggokaraw oto ma nggakfrur roi ḇeḇarḇor ḇesena.

Randak ya, yafrur fasis roi annakam kukro yamgak sinan ayesu sumarisen ḇa. Imbape fawas mura, yamgak su wer ḇa. Yaḇebati kuker snonggaku ḇeba syadi ro aya ma ḇeswar Yahwe I ḇa sya, ma sawyae kaku aya fa yafrur roi ḇeḇye ḇa. Ramnai, yakofenḇair ḇe sinan ayesu snar yamewer yaso agama suḇedi wer ḇa. Sukaḇaḇaḇ fa sufnoḇek aya mboi yapapum kwar. Sinan ayesu susanekar kaku.

Yabur rum yedi raposa, yakḇepake narkoba. Irya monda ḇa, yaker ma yaḇoḇ ganja na nabore. Yakenem mnis ḇa kaku ma yaso ker festa sifrur ro bar. Yamsor fasawsaw kako. Oso ikofen ḇaido ifrur roi yamarisen ḇa ido, na yamsore, ma nono ido yafyak i ma yamun i. Yafawi kwar roi yafrur anna kam snonggaku Kristen sipok sifrur awer na.

RARISO REFOYA FYADWER KENEM YEDI: Yaḇebati fanam kuker snonggaku oso ḇepake narkoba, kmari imarbur i fafisu ibaḇa kaker. Nufarfyar ido nufarfyar rawo romfawru. Fyorno ido, ikofen roi ḇero sneri ḇe aya bo doḇe imander kaku kmari. Snar rofyor yabaḇa kaker anya yafawi saneraro kaḇakḇok ya, yafawar ḇekur Yesus​—ḇyawes snonggaku ḇemar kwar ma ḇyeasas nari ifrur na wer ro fafisu iyama. (Yohanes 5:​28, 29) Yakofen bo yoḇe, ”Kwarapan na wasrow kmami wer. Kokame na kokenem isof fyoro-fyoro ro Firdaus ro supswan.” Bati yedine imarisen kaku ryower na.

Ro swaf ḇese, bati yedine dawos ḇekuro ras-ras ḇepupes ma farkarkor sor ḇe Tritunggal. Yun beri Refo ḇyedi ma yafasnai mnuk-mnuk ḇekofenḇair kakaku ḇekur Allah, Yesus, ma ras-ras ḇepupes. (Yohanes 14:28; 2 Timotius 3:​1-5) Snar yafawar ker ḇe bati yedine ḇekur Yahwe I, nafrur fa yawasen ker Allah Yahwe.

Fawawas mura, kakaku ro Refo yakram ro sanerine​—sinan ayesu susewar fa sufarkor na ḇe aya anya​—nasure. Rupa ra, fafisu aya ma bati yesi nggofrur festa narkoba, fyor ya beri yaswarepen Yahwe I. Bati ayesi sibor soḇe siswar Allah, fama roi sifrur na nfasnai rarirya ḇa. Yamewer yamnis ra si, inja yafawi rosai fandun fa yafrur ya. Fandun fa yakaḇer ḇe Yahwe I.

Kaku ḇae, napyan fa kofawi rosai fandun fa kofrur ya, mboi imbe kofrur kaku na ido kofandun sasewar. Yaḇaḇir samswen fa yafrur fararwe ono, imnis raris yamnai yaḇepake narkoba. Yakḇebati kuker bati ḇekwar yesya wer ḇa, ma yafarkor Refo kuker penatua oso.

Imbape rya samswen fa yafrur fararwe ḇese wer. Ḇesyadi ya iso yafarmku masasor ayena. Fyorno ido, bisa yafrur na mboi kero monda yamsor wer. Ramnai ido, na yafafko ma yakara jadi fa yafrur na ḇa. Ro fafisu yaḇesanekar ine, yara yafanam penatua ḇefnoḇek aya fa yafarkor Refo anya. Ḇyekaḇaḇaḇ ma ifrur pyum, ma syambraḇser kaku sne yedi. Ras oso, dor aya fa yawasya fawar oso ro syap Menara Pengawal ḇekuro fandun fa komkuepen. * Nuyawos rosai bisa yafrur na fafisu yamsore. Fawas mura, snar yaswarepen fawar ani ma yanadi ker ḇe Yahwe I, yapok fa yamku masasor yena. Ḇarpur ya, ro paik April 2000, yaḇebaptis ḇe Saksi Yahwe oso. Sinan ayesu sumarisen fafaya ḇa.

BARAKAS YASMAINA: Kirine yasmai kananon ro swaruser ma sne yedi kukro yafawi yafrur mamas baken yedi wer ḇa kuker narkoba ḇaido fararur ḇeḇye ḇa na. Roi risai monda yafrur na, yafararur ke, yaso fananjur ari ke, ḇaido yambran farma ke, yamarisen syadi. Yana kakara ḇemnis ḇekur kankenem ine.

Yakofen kasumasa kaku ḇe Yahwe snar sinan ayesu sufarander aya ḇa. Yaswarepen kako Yesus wos ḇyena ḇero Yohanes 6:44 ḇekofen, ”Snonkaku oso ḇaḇeri nari ryama faro aya, rofyor Mami ḇewan aya duni maro aya.” Wos nane nsun kaku ro sne yedi kukro yafawi bisa yakaḇer ḇe Yahwe I snar iso ḇeyun ayandi.

”Yamander Kaku Yakna Kma Ḇeswar Aya.”​—MARCO ANTONIO ALVAREZ SOTO

ḆYEAḆEN: 1977

SUP RYAMA YA: CILE

FARFYAR ḆYEJA: ANGGOTA GRUP MUSIK DEATH-METAL

KENEM AYEDI RO RANDAKYA: Awin fyarus aya isof yaba ro Punta Arenas, kota ḇepyum oso ḇero Selat Magalhaes ro Amerika Selatan bar wamires ya. Sinan ayesu suḇesisye rofyor yaḇeumur taun ri rim, nafnai ra yaḇaḇir sfandun aya ḇa. Yamander kaku yakna kma ḇeswar aya.

Awini dakfarkor Refo kuker Saksi Yahwe, mura dor aya fa yaso fananjur ari ro Balai Kerajaan. Imboi, yamewer kaku, numbran ḇe diwa ido na yasurem ker. Rofyor yaḇeumur 13, yaso fananjur ari wer ḇa.

Ro fyor anya, yamarisen yarower musik, ma rya yakna bakat ro musik ine. Rofyor yaḇeumur 15, yafnak musik heavy-metal ma death-metal ro festival ḇebor na, ro bar, ma munara na. Snar yaḇebati kuker ḇekir ro farfnak musik sya, nafrur fa yamarisen syadi musik klasik. Inja yakfarkor musik ro rumfarkor ḇero moḇ ya. Rofyor yaḇeumur 20, yara ḇe mnu ḇeba, Santiago, fa yafarkor syadi musik ine. Yafnak ker kuker grup band heavy-metal ma death-metal.

Fafisu anya, yaḇor famfnom ro kenem yedine. Insama yasmai kananon, na yamser ma yaḇepake narkoba warpu bati ro grup band yesya, yamam si ḇe kina ayedisya. Ayama yadawdower ḇa, ma nari smam na ro moḇ yasnai rai. Yasun ker sansun ḇepaisem, yakaruk wurbur yena ḇa, ma yarir snonburyam yena fa nakwan isof ro sifer yedi.

Snar kenem ayedine, rarwan riḇeso yamunmun ma sun aya ḇe polisi. Ras oso, rofyor yamser yaḇe yamunmun kuker raryur ḇeḇoḇ narkoba ḇekyaren aya ma bati yesya. Smun bos aya rawo urk yedi ikar.

Ḇape ḇefrur fa yaḇesneso syadi iso snonggaku ḇefanam aya i sya. Ras oso insape yafawi bin yedi imbran fasis kuker bati ḇefanam ayedi taun ḇe taun kwar, ma bati ayesi ḇesesya sikram na bur aya. Sne yedine fyafko fafaya ḇa.

Yakaḇer ḇe Punta Arenas, ma ro diwa yafarkor musik, ma yafararur ḇe ḇefnak selo. Yafnak musik kaker kuker grup band heavy-metal ma death-metal ma nggofrur rekaman. Mura yasrow kuker insos ḇedoser oso snori Sussan, ramnai ido nuḇarek kayame. Ḇarpur mura, Sussan ifawi snari ikyar faro farkarkor Tritunggal fama ayama roḇa. Inja ifuken ḇe aya, ”Minsai ḇekaku ya?” Yakofen ḇe i farkarkor Tritunggal ima syasar mboi yafawi moḇsa yafasnai na ro Refo ya ḇa. Imbape, yafawi mansei nari ḇekofenḇair ḇe i na. Yoḇo Saksi-Saksi Yahwe na sfasnaiḇair kakaku ro Refo ya. Ramnai, yafrur roi oso fyoro kwar yafrur na ḇa​—yaḇenadi yor ḇe Mansren Allah fa ifnoḇek aya.

Ras riḇeso mura, yasrow kuker snon oso rya yafawi i kwar, ma yafuken i ima Saksi Yahwe dirya ke. Ikandor fyor myam moḇ yasnai raya, mboi fyasnai frur pyum kuker kyarem asuser fakfuken yena ḇekur fananjur ro Balai Kerajaan. Yakyar kaku Allah kyarem nadi yena kuker ḇye fa yasrow i. Yara ḇe Balai Kerajaan ma yakain ro ḇarpur kaku insama smam aya ḇa. Imbape sibor sifawi aya kwar ma siswarepen rofyor yabaḇa anya yarama ḇe fananjur. Sisaser pyum aya ma sforepen aya kuker saswar. Yasmai sneprei ma kananon kaku, imnis ra yakaḇer ḇe rum manggun yedi kwar. Fafisu yamam snon oso ro fyor iwara byuk farkarkor Refo ḇe ayanya, yor i fa fyarkor kaḇer aya.

RARISO REFOYA FYADWER KENEM YEDI: Ras oso yawasya Amsal 27:11 ḇekofen, ”Roma yedi, wafawinanem ma wafrur fa sne yedi imarisen.” Yamanen kaku kukro yakara snonggaku monda mboi bisa kofrur Manḇedaw farsyos ḇeba ine fa imarisen. Yaḇaḇir kaku Yahwe iso Kma oso yasewar kaku fyoro kwar ani!

Yaḇe yafrur Kma yedi ro nanggi sneri imarisen ma yafrur marisen Ḇyena, mboi yaḇe women faro narkoba ma farandinem swan ya fyoro kwar. Insape yafawi Yesus farkarkor ḇyena ro Matius 6:​24 ḇekofen, ”snonkaku oser ipok duf farmyan tuan risuruḇa”. Fafisu yasewar fa yafrur fararwe ro kenem yedi, wos farkin ro 1 Korintus 15:33 nafnoḇek kaku aya, ”Rofyor naek bemaniḇoḇ kuker ḇaḇeḇarḇorya, nari rari ḇeḇye bedi dakḇarḇor kako.” Yafawi kaku yara ker ḇe moḇ anya ma yaḇebati kaker bati ḇekwar ayesya ido, na yapok yamnai ro roi ḇepyum ḇa yafrur anna ḇa. Wos anun ro Refo nasnai bos kaku: Fandun fa yafrur kaku na insama yamkei ro roi ḇedenem aya.​—Matius 5:​30.

Yamarisen kaku yafnak musik, inja imbe yabur musik heavy-metal ine rya myarḇak syadi ḇe aya. Imbape, snar fafnoḇek ro bati ro sidang sya, bisa yafrur na. Yakapnik snonburyam yena, wurbur yena, ma yasun sansun ḇepaisem ker wer ḇa. Rofyor yakofen ḇe Sussan yabe yakapnik snonburyam yena, imbe ifawi rosai ḇefrur fa yafrur radiri. Doḇe, ”Imbe yaso bo yamam sai sifrur kaku ro Balai Kerajaan ya?” Imarisen faro roi myam ro diwa na, ma fyoro ḇa mura dakfarkor Refo ya. Ramnai ido, aya ma Sussan nufasepen fakawin nuḇena. Ro taun 2008, nuḇebaptis ḇe Saksi Yahwe. Numarisen kaku bisa nufarmyan ḇe Yahwe fnoḇek awin yedi.

BARAKAS YASMAINA: Yamkei kwar ro dunya ḇebuk marisen ḇekaku ḇa ya ma bati ḇeanggarkar sya. Yamarisen kaker musik, mboi kirine yakinfir pyum na. Yafnoḇek kina yesi ma snonggaku ḇese, ḇesyadi romawa babo sya, fa sun farkarkor ro fawar yena. Yamarisen insama sifawi roi ḇebor dunya ine byuk na rya napyum, mboi ḇekaku ya nakam ’papus’ monda nairi.​—Filipi 3:8.

Yasrow bati ḇekaku ro sidang Kristen ḇefasnai saswar ma aski. Ḇepon kaku ya, snar yafanam kuker Yahwe I, yakna Kma ḇeswar aya, yamander fyoro kwar.

[Footnote]

[Blurb]

”Yafawi bisa yakaḇer ḇe Yahwe I snar iso ḇeyun ayandi.”