Bible No Sesa Nyimpa N’abrabɔ

EBƐNADZE na ɔmaa ɔbarimba bi sanee kɔr ɔsom a wɔtsetsee no wɔ mu no mu? Ɔyɛɛ dɛn na ɔbarimba bi dze n’asetsena nyina hwehwɛɛ egya bi a ɔbɔdɔ no na onyaa egya a ɔtse dɛm? Hom mma yentsie hɔn anomu asɛm.

“Nna Ɔwɔ Dɛ Mesan Ba Jehovah Nkyɛn.”​—ELIE KHALIL

AFE A WƆWOO NO: 1976

ƆMAN A OFI MU: CYPRUS

DZA NNA ƆYƐ: ƆBA DZESƐƐFO

ME NKAN ABRABƆ: Wɔwoo me wɔ Cyprus naaso wɔtsetsee me wɔ Australia. M’awofo yɛ Jehovah Adasefo, na wɔyɛɛ dza wobotum biara dɛ wɔdze Jehovah noho dɔ nye n’Asɛm Bible no bodua m’akoma mu. Naaso, m’enyi firii no, mehyɛɛ ase bɔɔ bra bɔn. Nna moguan fi fie anadwe kehyia m’anyɛnkofo ma yepue kedzi nsɛmbɔn. Nna yewia kaar na yɛyɛɛ ndzɛmba bɔn ahorow pii so kaa ho.

Ahyɛse no, nna memmpɛ dɛ m’awofo hɔn werɛ bɔhow, ntsi medze ɔbra a mobɔ no sumaa hɔn. Naaso, ekyir yi dze nna ɔnnhaw me bio. Medze moho kɔbɔɔ anyɛnkofo a hɔn enyi efir sen me. Nna wɔnndɔ Jehovah, ntsi hɔn abrabɔ bɔn no nyaa mo do tum. Ekyir yi mekãa kyerɛ m’awofo dɛ m’enyi nngye ɔsom a wɔwɔ mu no ho bio. Wonyaa moho abotar paa, na wɔyɛɛ ara dɛ nkyɛ ɔbɛyɛ yie a, nkyɛ mensesa m’adwen. Naaso menntsie hɔn koraa. Iyi haaw m’awofo papaapa.

Mutui fii fie no, mehyɛɛ ase noom ndubɔn. Meyɛɛ wii haban kɛse bi. Nna mutwa haban no tɔn ma nkorɔfo. Mobɔɔ ndwamanbra na mesɛɛ ber pii dze gyee m’enyi wɔ aponto ase. Ekyir yi dze nna ɔnnkyɛr na mo bo efuw. Sɛ obi kã asɛm anaa ɔyɛ biribi a m’enyi nngye ho a, nna m’akoma ayɛ dɛ ɔdan. Nna dza metaa yɛ nye dɛ, mekeka mu gu nkorɔfo do, na mobor hɔn. Nokwasɛm nye dɛ, dza wɔkyerɛkyerɛɛ me dɛ mma Christiannyi nnyɛ no, nna ɔnoara na meyɛ.

MBRƐ BIBLE NO SESAA M’ABRABƆ: Menye aberantsɛ bi a ɔno so nom ndubɔn nyaa anyɛnkofa a no mu yɛ dzen. Ne papa wui aber a nna ɔyɛ abofra. Nna yɛtaa bɔ nkɔmbɔ araa ma adze sa koraa. Ɔtɔ da a, sɛ nkɔmbɔ a ɔtse dɛm rokɔ do a, nna ɔtaa kã mbrɛ oesi afe ne papa ho asɛm kyerɛ me. Meyɛ obi a m’awofo akyerɛkyerɛ me dza Bible no kã fa owusoɛr ho. Ntsi, m’enyi baa moho do no, nna merekã Jesus noho asɛm kyerɛ no. Mekãa kyerɛɛ no dɛ Jesus nyaan ewufo, na ɔabɔ anohoba dɛ daakye obenyan ewufo. (John 5:​28, 29) Nna ɔyɛ a mekã kyerɛ no dɛ: “Ɔwodze fa no dɛ ehu wo papa bio. Hwɛ mbrɛ w’enyi besi agye afa! Hɛn nyina botum atsena ase daa wɔ Paradise wɔ asaase do.” Dɛm nsɛm yi kaa me nyɛnko no n’akoma papaapa.

Ɔtɔ da bi so a, nna ɔakɛfa wiadze ewiei mber anaa Baasakor nkyerɛkyerɛ ho asɛm aba. Sɛ ɔba no dɛm a, nna magye nankasa ne Bible na menye no akenkan kyerɛwsɛm ahorow a ɔma yehu nokwasɛm a ɔfa Jehovah Nyankopɔn, Jesus, nye wiadze ewiei mber ho. (John 14:28; 2 Timothy 3:​1-5) Mpɛn dodow a mekãa Jehovah ho asɛm kyerɛɛ me nyɛnko no maa mokɔr do dwendween Jehovah ho.

Nkakrankakra no, Bible mu nokwar a m’awofo bɔɔ mbɔdzen dɛ wɔdze bodua mo mu no, hyɛɛ ase dɛ ɔregye ndwow wɔ m’akoma mu. Dɛ nhwɛdo no, ɔtɔ da bi na menye m’anyɛnkofo wɔ aponto ase na yɛronom ndubɔn a, nna Jehovah ho asɛm ebesi me tsirmu. M’anyɛnkofo pii kã dɛ wɔdɔ Nyankopɔn, naaso hɔn ndzeyɛɛ nnkyerɛ dɛm. Nna memmpɛ dɛ mebɛyɛ m’adze dɛm, ntsi muhun anamɔn a ɔwɔ dɛ mutu. Nna ɔwɔ dɛ mesan ba Jehovah nkyɛn.

Ɔnnyɛ dzen dɛ ibohu adze papa a ɔwɔ dɛ eyɛ, naaso ne yɛ nnda famu koraa. Nna ɔnnyɛ dzen dɛ mebɛyɛ nsesa ahorow bi. Annyɛ dzen amma me pii dɛ mebegyaa ndubɔn nom. Motwee moho fii m’anyɛnkofo no hɔnho, na memaa Jehovah Dasefo asafo mu panyin bi nye me sũaa Bible no.

Ne nyina ekyir no, nsesa ahorow bi wɔ hɔ a, nna ɔnnda famu dɛ mebɛyɛ. Nna ɔyɛ dzen ma me papaapa dɛ mebɛhyɛ m’ebufuw do. Ɔdur mber bi a nna ɔayɛ yie. Odur mber bi so a nna agye egu. Ɔba no dɛm a, nna mo werɛ ahow. Adwen a ɔba me tsirmu ara nye dɛ murunntum nndzi m’ebufuw do. Ntsi, mokɔr asafo mu panyin a ɔnye me sũa adze no nkyɛn. Ɔwɔ abotar na ne yamu ye so dɛ! Ɔkyekyee mo werɛ na ɔkaa m’akoma too me yamu. Da kor bi, ɔmaa mekenkaan asɛm bi wɔ Ɔweɔn-Aban mu. Nna ɔfa siantsir a onnyi dɛ mepa abaw ho. * Ɔnye me susuu dza mubotum ayɛ ho aber a mo bo efuw no. Nkakrankakra no, mutumii dzii m’ebufuw do. Dza ɔboaa me nye mpaabɔ nye Ɔweɔn-Aban no mu nsɛm a modwendween ho no. Ekyir yi, wɔ April 2000 mu no, wonumaa me ma mebɛyɛɛ Jehovah Adasefo no mu kor. M’awofo hɔn enyi gyee mbordo.

MBRƐ MENYA DO MFASO: Ndɛ, monnom ndubɔn na mommbɔ ɔbra bɔn mmfa nngu me nyimpadua ho fĩ. Dɛm ntsi, m’asowa mu adwe me na mowɔ tsibowa pa. Ɔmmfa ho dza meyɛ biara no, dɛ mereyɛ edwuma o, morokɔ asafo nhyiamu o, anaa mereyɛ biribi dze agye m’enyi no, muhu dɛ mowɔ enyigye mapa. Minyim dɛ daakye papa bi da hɔ rotweɔn me.

Meda Jehovah ase dɛ m’awofo ammpa abaw wɔ moho, na wɔkɔr do boaa me. Afei so, ɔyɛ a mususu asɛm a Jesus kãe wɔ John 6:​44 no ho. Hɔ kã dɛ: “Obiara nntum mmba mo hɔ, gyedɛ Egya no a ɔsomaa me no twe no.” Ɔyɛ me dɛw papaapa dɛ Jehovah asan dze me aba ne nkyɛn.

“Nna Morohwehwɛ Obi A Ɔbɛyɛ M’egya”​—MARCO ANTONIO ALVAREZ SOTO

AFE A WƆWOO NO: 1977

ƆMAN A OFI MU: CHILE

DZA NNA ƆYƐ: NNA MOBƆ NDWOM A ƆBRAKYEW NYE EWUDZISƐM WƆ MU

ME NKAN ABRABƆ: Me maame tsetsee me wɔ Punta Arenas. Ɔyɛ kurow fɛɛfɛw a ɔwɔ Strait of Magellan a ɔbɛn South America anaafo afamu. Ber a midzii mfe enum no, m’awofo tsetseew hɔn awar mu. Iyi maa metsee nka dɛ woeyi me tokyen. Dɛm ntsi, nna morohwehwɛ egya.

Nna me maame nye Jehovah Adasefo sũa adze. Ntsi, nna ɔnye me kɔ asafo nhyiamu wɔ Ahendzi Asa do. Naaso, nna m’enyi nngye ho koraa dɛ mobɔkɔ. Ntsi, sɛ yɛnam kwan do rokɔ a, nna mobɔ mo hwen araa ma yekodu hɔ. Aber a midzii mfe 13 no, migyaa asafo nhyiamu kɔ koraa.

Dɛm aber no, nna m’enyi abɛgye ndwontow ho paa, na muhun dɛ ɔyɛ m’adom akyɛdze. Midzii mfe 15 no, nna mobɔ ndwom a ɔbrakyew nye ewudzisɛm wɔ mu wɔ afahyɛ ase, bar, nye aponto ahorow ase. Moho a medze bɔɔ ndwontofo a hɔnho awea wɔ ndwontow mu no maa m’enyi bɛgyee sankudwom ho. Mokosũaa ndwontow wɔ ndwontow skuul bi mu wɔ beebi a metse no. Midzii mfe 20 no, mutui kɔr ɔman no n’ahenkurow Santiago mu kɔtoaa m’adzesua do wɔ ndwontow mu. Mokɔr do bɔɔ ndwom a ɔbrakyew nye ewudzisɛm wɔ mu.

Dɛm aber yi nyina no, nna metse nka wɔ mo mu dɛ minnyi enyigye. Mbrɛ ɔbɛyɛ a merenntse nka dɛm no, nna menye m’anyɛnkofo a yɛbɔ ndwom no we nsã na ndubɔn. Nna mafa hɔn dɛ m’ebusua. Sɛ ihu me a, ɔnnyɛ obi na ɔbɛkã akyerɛ wo dɛ meyɛ otuatsewfo. Nna mehyɛ ntar tuntum, migya m’abɔdwesa huhaa, na me tsir nhwi gu me sisiw ekyir.

Dabaa, mo suban bɔn ntsi, menye nkorɔfo rokõ no nna aporisifo so taa mo do. Da kor bi, monoom nsã araa ma motowee hyɛɛ nkorɔfo bi a wɔtɔn ndubɔn a wɔretseetsee emi nye m’anyɛnkofo no do. Wɔboor me araa ma m’adadaw kyeae.

Adze a otwaa mo nson mu kɛse paa nye dza m’anyɛnkofo a wɔbɛn me paa yɛe no. Da kor bi, mubohun dɛ me girlfriend nye me nyɛnko berɛbo ahyehyɛ hɔ mfe pii. Nna m’anyɛnkofo no nyina nyim dɛm asɛm yi, naaso hɔn mu kor mpo enntsi ho annkyerɛ me. Iyi maa m’akoma bubui.

Mesanee kɔr Punta Arenas na mekɛkyerɛɛ ndwom wɔ hɔ. Afei so mobɔɔ sanku. Iyi da nkyɛn a, mokɔr do nye ndwontofo bɔɔ ndwom a ɔbrakyew na ewudzisɛm wɔ mu na yɛkyeree guu apaawa do. Mihyiaa ɔbaa bi a noho yɛ fɛw a wɔfrɛ no Sussan, na yɛtsenae bɔɔ mu. Mber kakraabi ekyir no, Sussan hun dɛ ne maame gye Baasakor nkyerɛkyerɛ dzi, naaso emidze menngye nndzi. Obisaa me dɛ, “No mu hendze na ɔyɛ nokwar?” Mekãa kyerɛɛ no dɛ minyim dɛ Baasakor nkyerɛkyerɛ no nnyɛ nokwar naaso menntum ammfa Bible no annkyerɛkyerɛ no mu. Naaso, nna minyim obi a obotum aboa. Mekãa kyerɛɛ no dɛ Jehovah Adasefo botum akyerɛkyerɛ no nokwar a ɔfa dɛm asɛm yi ho. Mobɔɔ mpaa serɛɛ Jehovah Nyankopɔn dɛ ɔmboa me. Iyi yɛ adze a mfe pii abɛsen kɔ no, mennyɛɛ bi da.

Ndafua kakraabi ekyir no, mihyiaa ɔbarimba bi a ɔsɛ obi a minyim no. Mibisaa no dɛ ɔyɛ Jehovah Dasefo anaa. Ohun me no, m’ahosiesie maa ne yamu hyee no. Mibisaa no asafo nhyiamu a wɔyɛ wɔ Ahendzi Asa do no ho asɛm, na ofii ayamuyie mu yii me ano. Ɔbarimba a mihyiaa no yi nye nkɔmbɔ a ɔkɔr do no maa megyee dzii dɛ ɔyɛ me mpaabɔ no ho mbuae. Iyi ekyir no, mokɔr Ahendzi Asa do, na memmpɛ dɛ obiara bohu me ntsi, metsenaa ekyir koraa. Naaso, enuanom no mu pii hyɛɛ me nsew, na wohun dɛ meyɛ abofra no, nna meba asafo nhyiamu. Wɔmaa me akɔaba na wofii ɔdɔ mu yɛɛ me etuu. Iyi maa metsee nka dɛ m’akoma atɔ me yamu. Metsee nka dɛ afei dze maba fie. Aber a muhun papa no a ɔnye me sũaa adze ber a nna meyɛ abofra no, mekãa kyerɛ no dɛ ɔnye me nsũa adze bio.

MBRƐ BIBLE NO SESAA M’ABRABƆ: Da kor bi, mekenkaan Mbɛbusɛm 27:11, hɔ kã dɛ: “Me ba, hu nyansa, ma m’akoma ntɔ me yamu.” Kyerɛwsɛm yi maa muhun dɛ nyimpa botum ama amansan Bɔfo no n’akoma aatɔ ne yamu. Iyi kaa m’akoma papaapa. Mubohun dɛ Jehovah nye Egya a morohwehwɛ wɔ m’asetsena nyina mu no!

Nna mepɛ dɛ meyɛ dza mo sor Egya no pɛ na mosɔ n’enyi. Naaso, nna matɔ nsãnom nye ndubɔn mu ntentan mfe pii. Mebɛtsee asɛm a Jesus kãe wɔ Matthew 6:​24 no ase. Hɔ kã dɛ ‘obiara runntum nnsom ewuranom beenu.’ Aber a nna morobɔ mbɔdzen dɛ mebeyɛ nsesa ahorow no, asɛm a ɔwɔ 1 Corinthfo 15:33 no kaa me papaapa. Hɔ kã dɛ: “Fɛkuw bɔn sɛɛ bra pa.” Mubohun dɛ sɛ mokɔ mbea ahorow bi na menye m’anyɛnkofo no kɔ do nantsew a, murunntum nngyaa mo suban bɔn no. Afotu a Bible no dze ma no mu da hɔ. Ɔwɔ dɛ meyɛ dza mubotum biara dɛ mobɔtwe moho efi ndzɛmba a osiw me kwan no ho.​—Matthew 5:​30.

Mbrɛ nna m’enyi si gye ndwom ho no maa ɔyɛɛ dzen papaapa maa me dɛ mibegyaa ndwom a ɔbrakyew nye ewudzisɛm wɔ mu no bɔ. Naaso, m’anyɛnkofo a wɔwɔ asafo no mu no boaa me ma motwee moho fii iyinom nyina ho. Migyaa nsãwe nye ndubɔn nom. Afei so, mutwaa me tsinhwi, yii m’abɔdwesa. Afei so nna ɔnnyɛ ntar tuntum nkotsee na da biara mehyɛ. Ber a mekãa kyerɛɛ Sussan dɛ mepɛ dɛ mutwa me tsinhwi no, ɔyɛɛ no nwanwa araa ma nna ɔpɛ dɛ ohu dza ɔkɔ do wɔ Ahendzi Asa do hɔ. Ɔkãa dɛ, “Menye wo bɔkɔ Ahendzi Asa do na makɔhwɛ dza ɔkɔ do wɔ hɔ!” N’enyi gyee dza ohunii wɔ hɔ no, na annkyɛr koraa na nankasa hyɛɛ ase dɛ orusũa Bible no. Ekyir yi, yɛwaree, na afe 2008 mu no, wonumaa hɛn ma yɛbɛyɛɛ Jehovah Adasefo. Hɛn enyi agye dɛ yɛkã me maame ho ma yɛrosom Jehovah.

MBRƐ MENYA DO MFASO: Matwe moho efi wiadze a asomdwee biara nnyi mu nye anyɛnkofo a ndaadaa ahyɛ hɔn mã no ho. M’enyi da ho ara gye ndwontow ho, naaso ɔnnyɛ ndwom biara na mitsie. Medze suahu a m’enya no boa m’ebusua nye nkorɔfo, nkanka mberantsɛ na nkataasia. Mepɛ dɛ moboa hɔn ma wohu dɛ ndzɛmba pii a wiadze no kamfo kyerɛ no yɛ fɛw dze, naaso ne nyina yɛ ‘ahwerdze.’​—Philippifo 3:8.

Menya anyɛnkofo anokwafo wɔ Christianfo asafo no mu. Hɔ yɛ bea a ɔdɔ na asomdwee ebu do. Dza ɔkyɛn ne nyina no, Jehovah a matwe abɛn no no ama menya Egya a nna morohwehwɛ no.

[Ase Hɔ Asɛm]

[Asɛm a wɔafa akã]

“Metum asan aba Jehovah nkyɛn, osiandɛ nankasa na ɔtwee me”