Biblu Nọ Diọ Gbẹzan Mẹtọn

ETẸWẸ whàn dawe de nado lẹkọwa nuplọnmẹ sinsẹ̀n tọn he mẹ e ko danbú sọn lọ kọ̀n? Nawẹ dẹpẹ de wá mọ otọ́ he nkọ e yí gbẹzan etọn lẹpo do dín lọ gbọn? Pọ́n nuhe omẹ ehelẹ dọ.

“N’dona lẹkọwa Jehovah dè.”—ELIE KHALIL

OWHE HE MẸ N’YIN JIJI: 1976

OTÒ HE MẸ N’WÁ SỌN: CHYPRE

OTÀN ṢIE: VISUNNU DUVANỌ

NUHE N’YIN DAI: N’yin jiji to Chypre, ṣigba n’whẹ́n to Australie. Kunnudetọ Jehovah tọn wẹ mẹjitọ ṣie lẹ yin, podọ yé wà nuhe go yé pé lẹpo nado do owanyi na Jehovah po Ohó etọn Biblu po do ahun ṣie mẹ. Ṣigba to whenue n’biọ owhe aflanmẹ tọn mẹ, n’jẹ atẹṣi ji. N’nọ họ̀n sọn whégbè to zánmẹ nado yì kọnawudopọ hẹ jọja aflanmẹ devo lẹ. Mí nọ fìn mọto lẹ podọ mí biọ nuhahun susu devo lẹ mẹ.

To bẹjẹeji, n’nọ wà onú ehelẹ to nuglọ na n’ma jlo na hẹn homẹgble mẹjitọ ṣie lẹ. Ṣigba vudevude, n’masọ nọ dibuna yé ba. N’jihọntọn hẹ mẹhe whẹ́n hú mi bo ma yiwanna Jehovah lẹ, podọ yé yinuwado ji e to aliho agọ̀ mẹ. To godo mẹ, n’dọna mẹjitọ ṣie lẹ dọ n’masọ jlo na kọnawudopọ hẹ yé to sinsẹ̀n yetọn mẹ ba. Yé yí homẹfa do wà nuhe go yé pé lẹpo nado gọalọna mi, ṣigba n’ma kẹalọyi. Mẹjitọ ṣie lẹ jẹflumẹ taun.

To whenue n’tọ́n sọn whégbè, n’jẹ amasin-adínọ lẹ zan ji, bo tlẹ nọ pọ̀ marijuana susu bosọ nọ sà ẹ. N’nọ zan gbẹzan fẹnnuwiwa tọn bo nọ yí whenu susu zan to wedutẹn zánmẹ tọn lẹ. N’sọ nọ yawu gblehomẹ. Eyin mẹde dọ kavi wà nude he ma jẹ ṣie ji, adi nọ do mi taun bọ n’nọ saba dawhá do gbẹtọ lẹ ji bo nọ linú yé. Do glido, nuhe n’ko plọn dọ Klistiani de ma dona wà lẹpo wẹ n’nọ wà.

LEHE BIBLU DIỌ GBẸZAN ṢIE DO: N’lẹzun họntọn vivẹ́ amasin-adínọ zan tọ́ hatọ de tọn, mẹhe otọ́ etọn kú to whenue e tin to ovu. Mí nọ saba to hodọ kakajẹ zánhomẹ. To whedelẹnu to ozán enẹlẹ mẹ, e nọ dọ numọtolanmẹ etọn lẹ na mi bo nọ dọ obá he mẹ e jẹdò otọ́ etọn tọn jẹ. Na n’ko plọnnu gando todido fọnsọnku tọn go wutu, n’nọ dọhona ẹn gando Jesu go—dọ e fọ́n oṣiọ lẹ podọ e dopagbe nado wàmọ whladopo dogọ to sọgodo. (Johanu 5:28, 29) “Yí nukun homẹ tọn do pọ́n dọ a mọ otọ́ towe whladopo dogọ,” wẹ n’nọ dọna ẹn. “Mímẹpo sọgan nọgbẹ̀ kakadoi to Paladisi mẹ to aigba ji.” Linlẹn enẹlẹ yinuwado họntọn ṣie ji taun.

To ojlẹ devo lẹ mẹ, họntọn ṣie nọ fọ́n kanbiọ lẹ dote gando hosọ devo lẹ go taidi azán godo  tọn lẹ kavi sinsẹ̀n-nuplọnmẹ Atọ̀n-to-Dopomẹ tọn. N’nọ yí Biblu etọn zan nado do nugbo lọ hia ẹ gando Jehovah Jiwheyẹwhe, Jesu, po azán godo tọn lẹ po go. (Johanu 14:28; 2 Timoti 3:1-5) Lehe n’nọ dọhona họntọn ṣie gando Jehovah go do sọ, mọ wẹ n’nọ lẹnnupọn gando Jehovah go do niyẹn.

Vudevude, okún nugbo Biblu tọn he tin to ahun ṣie mẹ lẹ—enẹ wẹ okún he mẹjitọ ṣie lẹ ko dovivẹnu nado do lẹ—jẹ whinwhẹ́n ji. Di apajlẹ, eyin yẹn po họntọn ṣie lẹ po to amasin adínọ zan to nuwiwa delẹ whenu, n’nọ jẹ nulẹnpọn gando Jehovah go ji to mayọnẹn mẹ. Họntọn ṣie susu nọ sọalọakọ́n dọ emi yiwanna Jiwheyẹwhe, ṣigba nudevo pete wẹ walọ yetọn lẹ nọ dohia. Na n’ma jlo na taidi yewlẹ nkọ wutu, n’yọ́n nuhe n’dona wà. N’dona lẹkọwa Jehovah dè.

Na nugbo tọn, e bọawu nado dọ hugan nado wà. E bọawuna mi nado basi diọdo delẹ. Di apajlẹ, e ma vẹawuna mi sọmọ nado jo amasin-adínọ zinzan do. N’sọ sánkanna gbẹdido hẹ họntọn ṣie hoho lẹ, podọ Klistiani mẹho agun tọn de jẹ Biblu plọn hẹ mi ji.

Ṣigba, e vẹawuna mi nado basi diọdo devo lẹ. E nọ vẹawuna mi taun nado dava homẹgble ṣie. To whedelẹnu, n’nọ tẹnpọn ṣigba bo nọ wá gboawupo to godo mẹ. N’nọ dowhẹ dee, bo nọ lẹndọ n’yin nuvọ́nọ. Na n’gbọjọ wutu, n’dọnsẹpọ mẹho he to Biblu plọn hẹ mi lọ. E jọmẹ bo nọ fahomẹ hẹ mi to whepoponu, podọ e yin asisa tulinamẹ tọn de nugbonugbo. To gbèdopo, e dọna mi nado hia hosọ de to Atọ̀họ̀-Nuhihọ́ lọ Tọn mẹ gando nuhewutu e yin nujọnu ma nado gbọjọ go. a Mí gbadopọnna afọdide delẹ he n’sọgan nọ ze eyin n’gblehomẹ. Hosọ lọ hinhẹn do ayiha mẹ po odẹ̀ susu hihò hlan Jehovah po zọ́n bọ n’penugo vudevude bo duto homẹgble ṣie ji. To godo mẹ, n’yí baptẹm taidi dopo to Kunnudetọ Jehovah tọn lẹ mẹ to avril 2000. Homẹ mẹjitọ ṣie lẹ tọn hùn taun.

ALE HE N’MỌYI LẸ: Todin, n’tindo jijọho ahun mẹ tọn po ayihadawhẹnamẹnu wiwe de po, to yinyọnẹn mẹ dọ n’masọ nọ yí amasin-adínọ lẹ kavi fẹnnuwiwa do hẹn agbasa ṣie flu ba. N’nọ mọ ayajẹ to nuwiwa ṣie lẹ mẹ, vlavo n’to azọ́nmẹ, to opli Klistiani tọn lẹ ji kavi to ayidedai mẹ. N’tindo pọndohlan dagbe gando ogbẹ̀ go.

N’dopẹna Jehovah dọ mẹjitọ ṣie lẹ ma jo mi do mlẹnmlẹn. N’sọ flin hogbe Jesu tọn lẹ he tin to Johanu 6:44 mẹ dọmọ: “Mẹdepope ma sọgan wá dè e adavo Otọ́ he do mi hlan dọ̀n ẹn.” E vivi na mi taun dọ n’penugo nado lẹkọwa Jehovah dè na e dọ̀n mi wutu.

 “N’jẹdò otọ́ de tọn taun.”—MARCO ANTONIO ALVAREZ SOTO

OWHE HE MẸ N’YIN JIJI: 1977

OTÒ HE MẸ N’WÁ SỌN: CHILI

OTÀN ṢIE: DOPO TO NUHOTỌ DEATH-METAL TỌN LẸ MẸ

NUHE N’YIN DAI: Onọ̀ ṣie wẹ plọn mi whẹ́n to Punta Arenas, yèdọ tòdaho whanpẹnọ de to ogblọ́n Magellan tọn tó sẹpọ hùwaji petepete Amérique du Sud tọn. Mẹjitọ ṣie lẹ klan to whenue n’tindo owhe atọ́n, ehe hẹn mi tindo numọtolanmẹ lọ dọ n’yin gbigbẹdai. N’jẹdò otọ́ de tọn taun.

Kunnudetọ Jehovah tọn lẹ plọn Biblu hẹ onọ̀ ṣie, podọ ewọ nọ plan mi yì opli Klistiani tọn lẹ to Plitẹnhọ Ahọluduta tọn mẹ. Ṣigba, n’ma yiwanna opli yìyì, enẹwutu adi nọ saba do mi eyin mí to aliji jei opli lẹ. To whenue n’tindo owhe 13, n’doalọtena opli lẹ yìyì.

To ojlẹ enẹ mẹ, n’yiwanna nuhiho, podọ n’doayi e go dọ n’tindo nunina nuhiho tọn. To whenue n’tindo owhe 15, n’jẹ nuhiho heavy-metal po death-metal po tọn hò ji to hùnwhẹ lẹ whenu, to ahànnutẹn lẹ podọ to pipli delẹ whenu. Gbẹdido hẹ hànsinọ he tindo numimọ lẹ zọ́n bọ n’yiwanna ohàn dagbe lẹ. N’jẹ nuhiho plọn ji to wehọmẹ hànsinọ lẹ tọn de mẹ to lẹdo lọ mẹ. To whenue n’tindo owhe 20, n’sẹtẹn yì Santiago, yèdọ tatọ́-tẹnnọ otò lọ tọn nado zindonukọn to nupinplọn ṣie mẹ. N’sọ zindonukọn nado nọ honú to nuhogbẹ́ heavy-metal po death-metal po tọn lẹ mẹ.

To ojlẹ enẹ lẹpo mẹ, n’tindo numọtolanmẹ nuvọ́nọ-yinyin tọn. Nado de numọtolanmẹ enẹ pò, n’nọ saba nùahànmú bo nọ zan amasin-adínọ lẹ hẹ nuhotọ-gbẹ́ ṣie lẹ he n’nọ pọnhlan taidi hagbẹ whẹndo ṣie tọn lẹ. N’tindo gbigbọ atẹṣiṣi tọn, ehe nọ yin ayidego to awusọhia ṣie mẹ. N’nọ do onú yuu lẹ bo hlá atán bosọ jo oda ṣie do bọ e dite kakajẹ alinmẹ.

Whlasusu wẹ atẹṣiṣi zọ́n bọ n’hoavùn bo biọ nuhahun mẹ hẹ ponọ lẹ. To gbèdopo, n’to nuyiwadomẹji ahàn sinsinyẹn tọn glọ bo tọ́navùn amasin-adínọ sàtọ delẹ he to tuklado yẹn po họntọn ṣie lẹ po. Amasin-adínọ sàtọ lọ lẹ ṣì mi hò sọmọ bọ aglànká ṣie wẹ́n.

Ṣigba, họntọn ṣie lẹ wẹ hẹn awufiẹsa wá na mi hugan. To gbèdopo, n’wá mọdọ họntọn vivẹ́ ṣie tindo haṣinṣan owanyi tọn hẹ họntọn ṣie yọnnu na owhe susu bọ họntọn ṣie he pò lẹpo whlá ẹ do mi. N’jẹflumẹ pete.

N’lẹkọyi Punta Arenas bo jẹ nuhiho plọnmẹ ji bosọ nọ wazọ́n taidi ginta-hòtọ. N’sọ zindonukọn nado nọ honú hẹ nuhogbẹ́ heavy-metal po death-metal po tọn lẹ bọ mí nọ de ohàn tọ́n. N’dukosọ hẹ awhli whanpẹnọ de he nọ yin Sussan, podọ mí jẹpọ. To nukọn mẹ, Sussan doayi e go dọ onọ̀ emitọn yise to sinsẹ̀n-nuplọnmẹ Atọ̀n-to-Dopomẹ tọn mẹ bọ yẹn ma yise to nuplọnmẹ enẹ mẹ. “Bọ etẹwẹ yin nugbo lọ lo?” wẹ e kanse mi. N’dọna ẹn dọ n’yọnẹn dọ lalo wẹ sinsẹ̀n-nuplọnmẹ Atọ̀n-to-Dopomẹ tọn yin, ṣigba n’ma sọgan do kunnudenu lẹ hia ẹ sọn Biblu mẹ gba. Amọ́ n’yọ́n mẹhe sọgan wàmọ lẹ. N’dọna ẹn dọ Kunnudetọ Jehovah tọn lẹ sọgan do nugbo lọ hia ẹ to Biblu mẹ. Whenẹnu wẹ n’wà nuhe n’masọ wà gbede—n’hodẹ̀ hlan Jiwheyẹwhe bo biọ alọgọ etọn.

To azán vude godo, n’mọ dawe de he taidi mẹyinyọnẹn, podọ n’kanse e eyin ewọ yin dopo to Kunnudetọ Jehovah tọn lẹ mẹ. Dile etlẹ yindọ awusọhia ṣie zọ́n bọ e ma voawu, e yí  homẹdagbe do na gblọndo kanbiọ he n’kanse e gando opli he nọ yin bibasi to Plitẹnhọ Ahọluduta tọn mẹ go lẹ tọn. N’mọdọ hodọdopọ ehe wẹ yin gblọndo odẹ̀ ṣie tọn. N’yì Plitẹnhọ Ahọluduta tọn mẹ bo sinai do oján godo tọn ji na mẹdepope nikaa doayi go e. Etomọṣo, mẹsusu wẹ flin mi bo yọnẹn dọ n’nọ wá opli lẹ to whenue n’tin to ovu. Yé yí mi bo yawu do mi po zohunhun po sọmọ bọ n’tindo numọtolanmẹ jijọho mayọnjlẹ de tọn. E taidi dọ n’lẹkọwa whégbè wẹ nkọ. To whenue n’mọ dawe he plọn Biblu hẹ mi to whenue n’pò to ovu, n’biọ to e si nado plọnnu hẹ mi whladopo dogọ.

LEHE BIBLU DIỌ GBẸZAN ṢIE DO: To gbèdopo, n’hia Howhinwhẹn lẹ 27:11 he dọmọ: “Ovi ṣie, yin nuyọnẹntọ, bosọ hẹn homẹ ṣie hùn.” Linlẹn lọ dọ gbẹtọ tata de sọgan hẹn homẹ Didatọ wẹkẹ lọ tọn hùn yinuwado ji e taun. N’mọdọ Jehovah wẹ Otọ́ he nkọ n’yí gbẹzan ṣie lẹpo do dín lọ!

N’jlo na hẹn homẹ Otọ́ ṣie olọn mẹ tọn hùn bosọ wà ojlo etọn, ṣigba n’ko yin afanumẹ amasin-adínọ lẹ po ahàn sinsinyẹn po tọn na owhe susu. N’wá mọnukunnujẹ nuplọnmẹ Jesu tọn he tin to Matiu 6:24 mẹ he dọ dọ “mẹdepope ma sọgan yin afanumẹ na ogán awe.” Dile n’to vivẹnudo nado basi diọdo lẹ, nunọwhinnusẹ́n he tin to 1 Kọlintinu lẹ 15:33 mẹ yinuwado ji e taun. E dọmọ: “Gbẹdido ylankan lẹ nọ hẹn walọ dagbe lẹ gble.” E họnwun na mi dọ n’ma sọgan jo walọyizan ylankan ṣie lẹ do eyin n’gbẹ́ nọ yì họntọn ṣie lẹ dè bo nọ dogbẹ́ hẹ yé. Ayinamẹ Biblu tọn họnwun: N’dona ze afọdide sinsinyẹn lẹ nado sánkanna nuhe nọ hẹn mi dahli lẹ.—Matiu 5:30.

Na owanyi zogbe he n’tindo na nuhiho wutu, nuhiho heavy-metal tọn jijodo wẹ yin nudide he vẹawuna mi hugan nado basi. Ṣigba, po alọgọ họntọn ṣie he tin to agun lọ mẹ lẹ tọn po, n’penugo nado jo e do. N’jo ahànnunu zẹjlẹgo po amasin-adínọ lẹ zinzan po do. N’sọ pà oda ṣie, bo whlẹ́ atán podọ n’masọ nọ do onú yuu lẹ kẹdẹ ba. To whenue n’dọna Sussan dọ n’jlo na pà oda ṣie, e paṣa ẹ sọmọ bọ e jlo na yọ́n nuhe n’nọ yì wà to Plitẹnhọ Ahọluduta tọn mẹ. E dọmọ: “N’na hodo we nado yì pọ́n nuhe nọ yin wiwà to Plitẹnhọ Ahọluduta tọn mẹ!” E yiwanna nuhe e mọ to finẹ lẹ, podọ tlolo wẹ ewọ lọsu jẹ Biblu plọn ji. To godo mẹ, yẹn po Sussan po wlealọ. To 2008, mí yí baptẹm bo lẹzun Kunnudetọ Jehovah tọn. Homẹ mítọn hùn dọ mí kọnawudopọ hẹ onọ̀ ṣie to Jehovah sinsẹ̀n mẹ.

ALE HE N’MỌYI LẸ: N’gán sọn ayajẹ oklọ tọn aihọn tọn po họntọn mẹklọtọ lẹ po si. N’gbẹ́ yiwanna nuhiho, ṣigba e ma yin popolẹpo. N’nọ yí numimọ ṣie zan nado gọalọna hagbẹ whẹndo tọn po mẹdevo lẹ po, titengbe jọja lẹ. N’jlo na gọalọna yé nado mọnukunnujẹemẹ dọ susu nuhe aihọn ehe nọ zedonukọnnamẹ lẹ tọn sọgan taidi nuhe dọnmẹ, ṣigba “ogbó” tata wẹ yé nọ yin to godo mẹ.—Filippinu lẹ 3:8.

N’tindo họntọn nugbonọ lẹ to agun Klistiani tọn mẹ, fie owanyi po jijọho po sù te. Hú popolẹpo, n’wá mọ Otọ́ he n’jẹdò etọn lọ gbọn Jehovah dindọnsẹpọ dali.

[Nudọnamẹ odò tọn]

[Nudọnamẹ tangan lẹ to weda 13]

“N’penugo nado lẹkọwa Jehovah dè na e dọ̀n mi wutu”