Bibliakwe niaratre töi kwitani

¿DRE käkwe ni iti töi mikaninta kukwe mika nämene täte kwe ye denta ja käne? Monso bati tö namani ja rün tuai, ¿ñokänti rün ye erere kwani ie? Niaratre arabe tä mike gare.

“Ti törbaba näinta Jehová kokwäre” (ELIE KHALIL)

DÄREBARE: 1976

JUTA: CHIPRE

KUKWE MADA: KÄ MIKANINKÄ KWE RÜNBÄTÄ

TIKWE JA NGWANI KRÖRÖ: Ti därebare juta Chipre yekänti, akwa ti ririabare Australia. Ti rün aune ti meye nämene kukwe testiko Jehovakwe yebätä aune niaratre käkwe ja di ngwani ti töi mike Ngöbö aune Kukwe Bibliabätä ye tarere. Akwa, ti jataba ünä ye ngwane ti jataba ja dokwä mike ribi. Ti nämä ngitie deu aune ja ketamuko mada tikwe abokän bati ti erere, yebe ti nämene niken karo goire aune mantre jetebe ti nämä ja mike kukwe krite.

Kena, ti nämä kukwe ye nuainne ti rün aune ti meye okwä bäre mento, kä jürä nämene nemen tibätä nane rabadre rubun ti kräke yebätä, akwa ye bitikäre kä jürä ñan jataba tibätä. Nitre ja ketaka tibe ye nämene bäri umbre ti kräke aune ñaka nämene Jehová tarere. Niaratre käkwe ti töi mikani käme. Bati, tikwe nieba ti rün aune ti meye ie ti ñaka tö namani ja tuai mada kukwe mika nämene täte kwetre yebe. Ti dimikakäre niaratre käkwe ja töi mikaba ti ngübarebätä bätärekä, akwa tikwe ñaka niaratre kukwei mikaba täte. Niaratre rababa ulire krubäte.

Tikwe kä mikakaba gwi aune ti jataba droga duen. Ti nämene marihuana ye nökö aune rürübäine krubäte. Ti nämene nemen meritre kwati ben aune käre ti nämene niken discoteca yete. Arato, ti moto nämene rubun krubäte. Ni mada nämene kukwe niere o kukwe nuainne aune ñaka nämene mate kwin tibätä angwane, ti nämene nemen rubun krubäte. Ti nämene ngrente niaratre yebiti aune ti nämene mete. Ni kristiano käkwe ja ngwandre ño driebare tie ye erere ti ñaka nämene ja ngwen.

BIBLIAKWE TI TÖI KWITANI ÑO: Ni droka duaka abokän rün kwe krütani nämene chi ye ngwane, ni yebe ti nämene ja kete kwin. Nun nämene nemen blite jabe kä rairebiti deu. Bati bobu nämene niere tie tö nämene rün kwe tuaita. Ti nämene chi ye ngwane nitre krütani ye gaikröta ye driebare tie, yebätä jötrö ngwarbe tikwe nieba ie Jesús nitre krütani ganinkröta aune ye erere nuaindi kwe kä ja känenkäre yete (Juan 5:28, 29). Ti nämene niere ie: “Mäkwe mä rün tuaita aune ni jökrä rabai  nüne kä jutobiti kä bä nuäre te Kä tibienbätä ye bämike ja töite”. Kukwe ye rababa tuin kwin ie.

Ruäre ngwane ja ketamuko tikwe ye nämene blite kä krüte o Ngöbö abokän ni nimä Ngöböre itibe yebätä. Kukwe metre Jehovabätä, Jesubätä aune kä krüte yebätä ye ti nämä mike gare ie Biblia kwe yebiti (Juan 14:28; 2 Timoteo 3:1-5). Ti nämene käre blite ben Jehová yebätä angwane ti nämene töbiketa bäri Jehovabätä arato.

Kukwe metre Bibliabätä ye ti rün aune ti meye käkwe ja di ngwani krubäte nökö ti brukwäte, kukwe ye bätärekä bätärekä jatani nirienta. Ti nämene niken bietabätä droka duen ja ketamuko tikwe yebe ye ngwane batibe Jehová nämene kiteta törö tie. Ja ketamuko tikwe ye nämene niere Ngöbö nämene tare kwetre, akwa niaratre ñaka nämene ja ngwen Ngöbö töi ye erere. Ti abokän ñaka tö nämene nuain ye erere, ye medenbätä, tikwe Jehová känändre bobukäre ye rababa gare tie.

Kukwe rabadre gare nie aune ye erere nikwe nuaindre ye abokän ñaka nuäre. Jondron ruäre namani nuäre ti kräke tuanemetre. Ñodre, tikwe droka tuanimetre jötrö ngwarbe. Arato, nitre ben ti nämene ja kete käne yebe ti ñaka nämene ja kete mada, aune ti rababa ja tötike Bibliabätä ni umbre konkrekasionte yebe.

Akwa, tikwe ja moto mikadre jäme ye abokän ñaka namani nuäre ti kräke. Ruäre ngwane ti nämene nuainne kwin, akwa ruäre ngwane ti moto nämene nemen rubun ni mada kräke ye ngwane, ja nämene nemen ruin ngite tie bätä ti nämene nemen dinekä. Ti nämä ulire krubäte yebätä tikwe blitaba ni Testiko ti tötika Bibliabätä yebe. Niara nämä ti kukwe nuin bätärekä aune ti tarere ye nämä ti dimike krubäte. Bati, nieba kwe tie ñobätä ütiäte krubäte ñaka ja di ngwandre nekä, kukwe yebätä tikwe ñäkädre täräkwata La Atalaya yebätä. * Ti rabadre rubun ye ngwane tikwe dre nuaindre yebätä nunkwe ja kitaba ben. Kukwe ye rababa ti töite aune ti nämä orare krubäte Jehovai ye köböire bätärekä bätärekä ti ñaka jataba nemen rubun krubäte. Mrä mada, abril 2000 yete tikwe ja ngökaba ñöte ni testiko Jehovakwe erere. Ti rün aune ti meye yebätä kä rababa juto krubäte.

KUKWE KWIN NAMANI TIKWE: Ti töita jäme aune ja ruin kwin tie, ñobätä ñan aune ti ñaka niena droka duen aune nemen meritre kwati ben. Tita sribi nuainne, tita kwen gätäbätä o tita jondron den ja näkwitakäre ye ngwane kätä bäri juto tibätä aune kukwe kwin tä ti kräke yebätä ti töita.

Ti rün aune ti meye käkwe ñaka ti tuanimetre kaibe yebätä tita debe bien Jehovai. Arato, Jesukwe kukwe niebare Juan 6:44 yebätä tita nemen töbike: “Ti Rün käkwe ti juani, ye ñan jatadre ni ngwena tie angwane, ni ñan jatadre jire iti ja töi jenbti tie”. Jehovakwe ti töi mikaninta näin ja kokwäre ye tä kä mike juto tibätä.

“Ti tö nämene ja rün tuai” (MARCO ANTONIO ALVAREZ SOTO)

DÄREBARE: 1977

JUTA: CHILE

KUKWE MADA: NITRE MUSIKA DEATH-METAL TÄKÄKÄ YETE TI NÄMÄ SIBA

 TIKWE JA NGWANI KRÖRÖ: Kä Punta Arenas Magallanes nemenkä kä mötörikri, kä yekänti kä kwekebe aune yete ti meye ti ngübabare. Kä kwärike tibiti aune ti rün bätä ti meye käkwe ja tuanmetreba, yebätä ni mada töi ñaka nämene tibätä nämene ruin tie. Ti tö nämene ja rün tuai.

Ti meye nämene ja tötike Bibliabätä nitre testiko Jehovakwe yebe, aune nämene niken ti ngwena jabe gätäbätä Ju ja Ükarakrö yete. Akwa ti ñaka tö nämene näin siba ben yebätä ji ngrabare ti nämene nemen rüre ben. Kä 13 tibiti ye ngwane ti ñaka jatani niken mada gätäbätä.

Kä ye ngwane ti nämene musika tarere aune ti nämene musika täke kwin nämene gare tie. Kä 15 tibiti ye ngwane ti nämene musika heavy-metal bätä death-metal täke bieta keta kabre nuain nämene yete. Nitre musika täkäkä kwin yebe ti nämene ja kete, ye käkwe ti töi mikaba musika mada mada yebätä. Ti nämene nüne yekänti nitre tötika nämene musika täke, yete ti rikaba ja tötike. Kä 20 tibiti ye ngwane ti rikaba juta Santiago yete ja tötike bäri. Nitre nämene musika heavy-metal bätä death-metal täke, yebe ti nämene musika täke jankunu.

Akwa yebiti ta ja ñaka nämene nemen ruin kwin tie. Kukwe ye käi kwitakakäre jabiti, ti nämene niken dö ñain aune droka duen nitre musika täkäkä yebe, nitre ye abokän ti nämene bien ja mräkäre. Ti nämene ja olo mike ribi ye abokän ti nämene bämike ja ngwäkita yebiti, ti nämene ja ngwä kite krörö: ti nämene dän drüne kite jabätä, ti klo aune ti dokwä druen nämene nga krubäte.

Ti nämene ja ngwen kore yebätä käre ti nämene ja mike kukwe krite, aune guardia nämene näin ti jiebiti. Bati, nitre droka rürübäinkä nämä ti aune ja ketamuko tikwe nike. Ti nämä dröbare ye ngwane tikwe niaratre metaba aune niaratre käkwe ti metaba aune ti krärä ötabätäba kwetre.

Akwa, ja ketamuko bäri kwin tikwe käkwe kukwe nuainbare tibätä ye rababa tare tie. Bati, rababa gare tie ti kukwe muko nämene nemen ja ketamuko bäri kwin tikwe yebe, aune ja ketamuko mada abokän ie kukwe ye nämene gare ye ñaka niebare kwetre tie. Ja rababa ruin ngwarbe tie.

Ti rikabata Punta Arenas aune ti rababa sribire musika aune violonchelo täkädre ño ye driere. Arato, nitre musika heavy-metal bätä death-metal täkäkä yebe ti nämä musika grabare. Ye ngwane Sussan rababa gare tie, meri bä nuäre yebe ti rababa nüne mada. Sussan meye nämene nütüre Ngöbö abokän ni nimä Ngöböre itibe, akwa ti abokän ñaka nämä kukwe ye mike era jai ye rababa gare ie, yebätä ngwantariba kwe tie: “¿Kukwe meden metre?” Biblia yebiti tikwe kukwe mikadre gare ie ye ñan rababa gare tie, akwa nire abokän raba kukwe ye mike gare ie ye nämä gare tie tikwe nieba ie. Nitre testiko Jehovakwe abokän raba kukwe ye mike gare metre ie Bibliabiti tikwe nieba ie. Kä nikani kwati krubäte ta yete tikwe ñaka orabare Ngöböi, akwa kukwe ngwantariba kwe tie ye ngwane tikwe oraba Ngöböi ja di käräkäre ie.

Köbö rikaba ta ye bitikäre, ni gare tie erere jutuaba tie aune niara abokän testiko Jehovakwe ye tikwe ngwantariba ie. Ti bä ye käkwe niara ngwanba nikenkä, akwa ja brukwä kwinbiti ti kukwei ka ngäbitiba kwe, aune kukwe mikaba gare kwe tie gätä nuainta Ju ja Ükarakrö yebätä. Rababa  gare metre tie tikwe orasion nuainba ye köböire ti gätäbä ni yebe. Ti rikaba Ju ja Ükarakrö ye ngwane ti rababa täkäni täkärä mikani mrä yete, ne kwe nitre mada ñaka okwä rabadre tibätä. Akwa, ti nämene monsore ye ngwane ti nämene nemen gätäbätä yebätä nitre kwati ie ti rükabata gare. Ti ka ngäbitiba kwin kwetre aune kise kitaba kwetre ti ngärä ja tarebiti ye ngwane ja rababa ruin jäme tie. Ni rabata ja gwirete ye kwrere ja rababa ruin tie. Ti nämene monsore ye ngwane ni Testiko nämene ti tötike Bibliabätä ye tuaba tikwe aune tikwe nieba ie niara rabadre ti tötike bobukäreta.

BIBLIAKWE TI TÖI KWITANI ÑO: Bati, tikwe ñäkäba Proverbios 27:11 yebätä, texto ye tä niere: “Mäkwe ja ngwan töbätä monso tikwe, bätä kä ngwan juto ti brukwäbätä”. Ni ngwarbe kä nebätä raba kä ngwen juto Ni jondron jökrä Sribekä yebätä ye käkwe ti mikaba töbike krubäte. Ye ngwane rababa gare tie Jehová abokän ti rün meden känä nämä tikwe.

Ti tö rababa kukwe kwin nuain ti Rün kä kwinbiti ye okwäbiti aune mikai täte, akwa ti abokän nämene klabore kä kwati krubäte te droka aune dö ye kisete. Jesukwe kukwe niebare Mateo 6:24 ye rükaba gare kwin tie, texto ye tä niere: “Ni ñakare jire abko rabadre sribire bkänkä nibu kräke”. Ti nämä ja di ngwen ja töi ükete ye ngwane kukwe nieta 1 Corintios 15:33 ye mataba ti brukwäte: “Ni kukwe muko diän diän ben ni töi kuin metre tä ja gete angwane, ni töi kuin metre abko tä neme diän arato”. Rababa gare tie ti rikadre kä känti jondron käme nuainta bätä tikwe ja ketadre jankunu nitre kukwe käme nuainkä yebe angwane, ti ñaka rabai jondron blo ye tuenmetre. Biblia tä kukwe niere ye metre: kukwe meden nämä ti ngoto ngwen ritete ye abokän tikwe ja töi mikadre jötrö ngwarbe tuenmetre jökrä (Mateo 5:30).

Musika ye nämene nemen tuin kwin tie yebätä musika heavy-metal ye tikwe tuanemetre ye ñaka rababa nuäre ti kräke. Akwa, ja ketamuko konkrekasionte ye käkwe ti dimikaba ye köböire tikwe musika ye tuanmetreba. Tikwe dö aune droka ye tuanmetreba, tikwe ja dokwä druen tikakaba, tikwe ja klo sökaba aune ti jataba ja ngwä kite kwin mada. Tikwe nieba Sussan ie ti törbaba ja dokwä druen tikaikä ye ngwane niara rababa töbike aune nieba kwe tie: “Ti näin siba mäbe Ju ja Ükarakrö yete. Dre nuainta yete ye ti tö mikai gare jai”. Ja rababa ruin kwin ie, aune jataba ja tötike Bibliabätä arato. Ye bitikäre, nunkwe ja mäkäteba aune kä 2008 yete nukwe ja ngökaba gwaire ñöte ni testiko Jehovakwe erere. Kä nengwane nunta sribire kä jutobiti Jehová kräke gwairebe ti meyebe.

KUKWE KWIN NAMANI TIKWE: Jondron kä nebätä ñaka kä mike juto tibätä aune ja ketamuko nämene ti ngökö yete ti ñaka niena. Ti täbe musika tarere akwa tita musika kwin aibe den jai. Dre dre namani bare tibätä yebiti tita ti mräkätre aune nitre mada dimike, metrere tita niere monsotre bati ie. Ti tö mikai gare ietre jondron kä nebätä ye raba nemen tuin kwin nie, akwa metrere “jondron ne [...] tä [...] jondron kwata ju bäre kwrere” (Filipenses 3:8, NGT).

Ti rökrabare Ngöbö ken ye köböire ja ketamuko kwin konkrekasionte kwani tie, kä yekänti ni tareta aune ni töita jäme. Akwa, bäri biti ta ti tö nämene ja rün tuai ye kwani tie: ye abokän Jehová namani ti rün erere.

[Nota]

[Kukwe nieta página 13]

“Jehovakwe ti töi mikani näinta ja kokwäre yebätä tita niara ken”