Ang Biblia Nagapabag-o sang Kabuhi

NGAA ginbalikan sang isa ka lalaki ang iya namat-an nga relihion? Paano naeksperiensiahan sang isa ka pamatan-on nga lalaki ang pagpalangga sang isa ka amay nga madugay na niya ginahandum? Basaha ang ila ginsiling.

“Dapat Ako Magbalik kay Jehova.”—ELIE KHALIL

NATAWO: 1976

PUNGSOD: CYPRUS

KABUHI SANG UNA: REBELDE NGA ANAK

ANG AKON NAGLIGAD: Natawo ako sa Cyprus pero nagdaku ako sa Australia. Mga Saksi ni Jehova ang akon mga ginikanan, kag gintinguhaan nila nga tudluan ako nga higugmaon si Jehova kag ang iya Pulong, ang Biblia. Pero sang tin-edyer ako, nagrebelde ako. Nagagua ako sa balay kon gab-i para makigkita sa akon mga barkada. Nagapangawat kami sing salakyan kag nadalahig pirme sa gamo.

Sang primero, ginasekreto ko ini kay nahadlok ako nga maakig ang akon mga ginikanan. Pero sang ulihi wala na ako nahadlok. Nakig-abyan ako sa mga tawo nga mas magulang sa akon kag wala nagahigugma kay Jehova. Malain sila nga impluwensia sa akon. Sang ulihi, ginsilingan ko ang akon mga ginikanan nga indi na ako magsunod sa ila relihion. Gintinguhaan nila nga buligan ako, pero ginbalewala ko ini. Daw malupok ang dughan sang akon mga ginikanan.

Sang naghalin ako sa balay, nagdroga ako. Nagtanom pa gani ako kag nagbaligya sang marijuana. Nangin imoral ako kag pirme nagakadto sa mga klab. Madali man ako maakig. Kon may ginsiling ukon ginhimo ang iban nga wala ko nanamian, nagainit gid ang akon dulunggan, amo nga nagapaninggit ako kag nagapanakit. Ginhimo ko ang tanan nga buhat nga indi dapat himuon sang isa ka Cristiano.

KON PAANO GINBAG-O SANG BIBLIA ANG AKON KABUHI: Nangin amigo ko ang isa man ka adik nga napatay ang iya amay sang bata pa sia. Pirme kami nagakaagahan sang istorya. Kon kaisa ginasugid niya nga nahidlaw na gid sia sa iya amay. Bangod nakahibalo ako parte sa pagkabanhaw, ginsugiran ko sia parte kay Jesus—nga nagbanhaw sang mga patay kag nagpromisa nga himuon niya ini liwat sa palaabuton. (Juan 5:28, 29) “Pensara bala, makita mo na si Tatay mo liwat,” siling ko. “Tanan kita mahimo mabuhi sing wala katapusan sa Paraiso sa duta.” Natandog gid sa sini ang akon amigo.

 Kon kaisa ginaistoryahan namon ang parte sa katapusan nga mga adlaw ukon ang doktrina nga Trinidad. Ginapakita ko sa iya Biblia ang mga bersikulo nga nagatudlo sang kamatuoran parte kay Jehova nga Dios, kay Jesus, kag sa katapusan nga mga adlaw. (Juan 14:28; 2 Timoteo 3:1-5) Samtang padayon ko nga ginasugid sa akon amigo ang parte kay Jehova, pirme ko na ginapamensar si Jehova.

Amat-amat nga nagtubo ang binhi sang kamatuoran sa Biblia nga gintanom sang akon mga ginikanan sa akon tagipusuon. Halimbawa, sang ara ako sa party kag nagadroga upod sa akon mga abyan, nahunahuna ko si Jehova. Madamo sa akon mga abyan ang nagsiling nga ginahigugma nila ang Dios, pero malain ang ila ginahimo. Indi ko gusto nga ilugon sila, gani narealisar ko nga dapat ako magbalik kay Jehova.

Siempre, mahapos ini ihambal pero mabudlay himuon. Ang iban ko nga ginahimo, pareho sang pagdroga, mahapos lang untaton. Ginbiyaan ko man ang akon mga barkada, kag nagtuon ako sa Biblia upod sa Cristiano nga manugdumala.

Pero, ang iban mabudlay gid bag-uhon. Nabudlayan ako magkontrol sa akon kaakig. Kon indi ko ini makontrol, ginaluyahan ako. Gani gin-istorya ko ang nagatudlo sa akon sa Biblia. Napabakod gid ako kay mapinasensiahon sia kag mabuot. Isa ka bes, ginpabasa niya sa akon ang artikulo sa Ang Lalantawan nga nagpabakod sa akon nga indi mag-untat. * Gin-istoryahan namon ang dapat ko himuon kon maakig ako. Sang ulihi, bangod ginsunod ko ang ginsiling sang artikulo kag pirme ako nagapangamuyo kay Jehova, nakontrol ko gid man ang akon kaakig. Sang Abril 2000, ginbawtismuhan ako bilang isa sa mga Saksi ni Jehova kag nalipay gid ang akon mga ginikanan.

MGA BENEPISYO: Matawhay na ang akon pensar kag wala na ako ginatublag sang akon konsiensia, bangod wala ko na ginahigkuan ang akon lawas sa droga ukon imoralidad. Mas malipayon na ako sa tanan ko nga ginahimo—sa pagtrabaho, pagtambong sa Cristiano nga pagtilipon, ukon paglingawlingaw. Positibo na ang akon pagtamod sa kabuhi.

Nagapasalamat ako kay Jehova bangod sa akon mga ginikanan, nga wala gid nag-untat sa pagbulig sa akon. Ginahunahuna ko man ang ginsiling ni Jesus sa Juan 6:44: “Wala sing tawo nga makakari sa akon kon indi sia pagbuyukon sang Amay nga nagpadala sa akon.” Nalipay gid ako kay nakabalik ako kay Jehova bangod ginbuyok niya ako.

 “Ginhandum Ko ang Pagpalangga sang Isa ka Amay.”—MARCO ANTONIO ALVAREZ SOTO

NATAWO: 1977

PUNGSOD: CHILE

KABUHI SANG UNA: MIEMBRO SANG BANDA NGA DEATH-METAL

ANG AKON NAGLIGAD: Ginpadaku ako sang akon iloy sa Punta Arenas, isa ka matahom nga siudad sa Strait of Magellan sa nabagatnan nga bahin sang Bagatnan nga Amerika. Sang lima pa lang ako ka tuig, nagbulagay ang akon mga ginikanan. Nagbatyag ako nga ginpabay-an amo nga ginhandum ko ang pagpalangga sang isa ka amay.

Nagtuon si Nanay sa Biblia sa mga Saksi ni Jehova, kag ginadala niya ako sa Cristiano nga mga pagtilipon sa Kingdom Hall. Pero natak-an ako magtambong, kag pirme ako nagabisyo kon magkadto kami didto. Sang 13 anyos ako, nag-untat na ako sa pagtambong.

Sina nga tion, nanamian gid ako sa musika, kag narealisar ko nga may abilidad ako sa sini. Sang 15 anyos ako, nagatokar na ako sing heavy-metal kag death-metal nga mga musika sa mga kapiestahan, bar, kag mga sinalusalo. Ang pag-upod ko sa maayo nga mga musikero nagpukaw sa akon interes sa klasikal nga mga musika. Nagtuon ako sing musika sa isa ka eskwelahan sa amon lugar. Sang 20 anyos ako, nagsaylo ako sa Santiago para padayunon ang akon pagtuon. Sige man ang akon pagtokar sa heavy-metal kag death-metal nga mga banda.

Sa pihak sini tanan, daw wala pulos ang akon kabuhi. Ginapaumpawan ko ang akon kaugalingon paagi sa pag-inom kag pagdroga upod sa akon mga kabanda, nga ginakabig ko na nga pamilya. Rebelyuso ako, kag makita ini sa akon hitsura. Itom pirme ang akon bayo, ginpalaba ko ang akon burangos, kag asta sa hawak ang akon buhok.

Pirme lang ako nakakita kontra kag nagabato sa pulis. Isa ka bes sang hubog ako, ginsapote ko ang mga nagabaligya sang droga nga nagapahog sa amon. Pero ginkastigo nila ako kag nagliw-as gid ang akon sag-ang.

Pero ang masakit gid kay isa ka adlaw natukiban ko nga madugay na ako ginatunto sang akon nobya kag sang akon best friend. May relasyon sila nga duha kag ginsekreto ini sa akon sang tanan ko nga abyan. Naglalain gid ako.

Nagbalik ako sa Punta Arenas. Nagtudlo ako didto sing musika kag nagtrabaho bilang cellist. Ginpadayon ko man ang pagtokar kag pagrekord upod sa heavy-metal kag death-metal nga mga banda. Nakilala ko ang matahom nga babayi nga si Sussan, kag nag-live-in kami. Sang ulihi, nahibaluan ni Sussan nga ang iya iloy nagapati sa Trinidad. Wala ako nagapati sa Trinidad, gani namangkot sia, “Ti, ano ang matuod?” Nagsabat ako nga nahibaluan ko nga sala ang doktrina nga Trinidad ugaling indi ko ini mapamatud-an sa Biblia. Pero nahibaluan ko kon sin-o ang makapaathag sini. Ginsilingan ko sia nga mapaathag sa iya sang mga Saksi ni Jehova ang kamatuoran sa Biblia. Dayon ginhimo ko ang madugay ko na nga wala nahimo—nangayo ako sing bulig sa Dios paagi sa pangamuyo.

Pagligad sang pila ka adlaw, may nakita ako nga tawo nga daw pamilyar sa akon, kag ginpamangkot ko kon Saksi sia ni Jehova. Bisan daw hinadlukan sia sa akon hitsura, ginsabat niya sing maayo ang akon mga pamangkot parte sa  mga pagtilipon sa Kingdom Hall. Nagapati ako nga ini na ang sabat sa akon pangamuyo. Nagkadto ako sa Kingdom Hall kag nagpungko sa likod para indi ako matalupangdan. Pero madamo ang nakakilala sa akon nga nagatambong ako sang una sang bata pa ako. Gin-abiabi nila ako kag ginhakos, kag kanami gid sang akon pamatyag. Sang nakita ko ang lalaki nga nagtudlo sa akon sa Biblia sang bata pa ako, ginpangabay ko sia nga tudluan ako liwat.

KON PAANO GINBAG-O SANG BIBLIA ANG AKON KABUHI: Isa ka adlaw, ginbasa ko ang Hulubaton 27:11, nga nagasiling: “Anak ko, magmaalam ka, kag pasadyaha ang akon tagiposoon.” Nalipay ako kay puede mapasadya sang kubos nga tawo ang Manunuga sang uniberso. Narealisar ko nga si Jehova amo ang Amay nga madugay ko na ginahandum!

Gusto ko pahamut-an ang akon Amay sa langit kag himuon ang iya kabubut-on, pero naadik na ako sa droga kag ilimnon. Naintiendihan ko ang panudlo ni Jesus sa Mateo 6:24 nga “wala sing makapaulipon sa duha ka agalon.” Samtang ginatinguhaan ko nga magbag-o, ang prinsipio sa 1 Corinto 15:33 nakabulig gid sa akon: “Ang malain nga pagpakig-upod nagapalain sang mapuslanon nga mga batasan.” Narealisar ko nga indi ko mauntat ang akon bisyo kon sigehon ko ang pag-upod sa akon mga abyan. Dapat ko sundon ang laygay sang Biblia nga biyaan ang mga butang nga makahalit sa akon.—Mateo 5:30.

Bangod nanamian ako sa musika, mabudlay gid biyaan ang heavy-metal nga mga musika. Pero sa bulig sang akon mga abyan sa kongregasyon, nahimo ko ini. Wala na ako nagadroga kag nagapatama inom. Nagpagunting man ako, nagpamarbas, kag indi na itom pirme ang akon ginasuksok. Sang ginsilingan ko si Sussan nga pautdan ko na ang akon buhok, natingala gid sia. Nagsiling sia, “Maupod ako sa imo para mahibaluan ko kon ano ang ginahimo ninyo sa Kingdom Hall!” Nanamian sia sa iya nakita didto, kag nagtuon man sia sa Biblia. Sang ulihi, nagpakasal kami ni Sussan. Sang 2008, ginbawtismuhan kami bilang mga Saksi ni Jehova. Malipayon kami nga nagaalagad kay Jehova upod sa akon iloy.

MGA BENEPISYO: Nahilway na ako sa kalibutan nga may umalagi nga kalipay kag indi masaligan nga mga abyan. Nanamian ako gihapon sa musika, pero ginapili ko na ang maayo. Ginaistorya ko ang akon eksperiensia sa akon pamilya kag sa iban, labi na sa mga pamatan-on, para may makuha man sila nga leksion. Gusto ko nga maintiendihan nila nga ang kalabanan nga ginatanyag sini nga kalibutan daw manami, pero “mga basura” lang gali.—Filipos 3:8.

May maayo ako nga mga abyan sa Cristianong kongregasyon, nga may matuod nga gugma kag kalinong. Labaw sa tanan, sang nagsuod ako kay Jehova, nakita ko na ang akon Amay.

[Nota]

[Blurb sa pahina 13]

“Nakabalik ako kay Jehova bangod ginbuyok niya ako”