ỊBayịbụụ Kaa Yẹ Ọhịhị Da

ỊYẸ à tị́ gu ọlẹng ọhẹ ọlẹ kị kpa nwà ẹ-ẹpwụ nya ẹla nya Ohe gbịla nyọka tịrẹkpẹ nyà wẹ ẹpwụ nya ịgba ọgbagba ọlẹ kọ hwahị bwu? Ányị ọnyị ọlẹng ọhẹ à tị́ yé adịda ọlẹ kọ kaa charịnya ẹ-ẹpwụ nya ọhịhị nyamwụ pyịyọọ? Wo ẹla ọlẹ ká angịwẹ ya lẹẹ wẹẹ.

“M̀ baba nyọka tịrẹkpẹ wẹ ẹga nya iJihova.”—ELIE KHALIL

ẸKA ỌLẸ KỊ MỌỌ: 1976

ẸPWỤMA: CYPRUS

EGO: ỌNYỊ OLUHWO

EGO NYAM: Ị mam ịị Cyprus, ma ị kpam nwà a-Australia. Adam bala ịnam ri Alibeenu nya iJihova, ị tị maga ịnyịnyị nyọka dam ụbwọ la ọháha ẹ-ẹga nya iJihova bala ịBayịbụụ. Ma ụka kam wẹẹ nwà okolobya, m̀ dọmwụ nyọka la egbeju ọngịrị. M̀ kaa bá kwii-kwii gbehe bwu ẹpwa lodu kaka tọ alịkpa nyam ịkịla. Ahị hu imoto yoyi bala ọ-kpụ ẹpwụ nya ala ịkịla.

Ụka nya ọgbanyẹ, m̀ kaa họ ang ịwẹ kpịbaa-kpịbaa chajị ká adam bala ịnam anyị ka wẹẹjẹ ka. Ma uhihi ọọwa myị́ dụmwọ-dụmwọ. Angịhyẹ juwa kam wu igu, kị ri ọgbahị nyam yẹẹyẹẹ bala ọ-la ọháha ẹ-ẹga nya iJihova ka. Igu oriri nyaa ọọwa bịrịm kpoye. Ụka ohyẹẹkpẹ, m̀ byi adam bala ịnam nyori ḿ tịtọ nyọka ri Olibeenu nya iJihova kaka. Ị dọhụ pịlẹ maga nyọka dam ụbwọ, ma ḿ myị ke ụrụ wo laa ka. Ẹla nyam ọwẹ kpaa ọkịlẹtụ enyi lụmẹ.

Ụka kam rụ bwu ẹpwa, m̀ dọmwụ nyọka mile eteji ịnyịịngịrị, m̀ dọmwụ kaa wu ẹrụ nya igbo bala ọ-kpa ra. M̀ la ọhịhị nya ụya ọhọhọ bala ọ-kaa ka ịpati nyịlẹhị-ịlẹhị. Ẹla ọ-pyịnyẹng à kaa jum agbama lẹ. Kori ká ọngịnyị á ya ẹla lee ọ-họ ẹla ọlẹ kọ hám ka, agbama nyam kaa wuru pwuu. Ụka lụmẹ-lụmẹ kori kọ lịnyị, m̀ kaa chị angịịwa aga lee ọ-waa abwọ. M̀ họ ang ịlẹ wuu kị mẹjẹ́m am nyị họ ka, chajị nyọlẹ kị pwoku angịnyị nya ịKịrayịsị ka.

JAABWỌ KÁ ỊBAYỊBỤỤ YẸ ỌHỊHỊ NYAM DA: Am bala ọlẹng ọhẹ ọlẹ kọ kaa mile eteji ịnyịịngịrị ịnyịnyị wu awụlẹ igu. Adamwụ gbu ụka ko ri onjwo ochiche-ochiche. Ụka lụmẹ-lụmẹ ahị kaa joja juka alepwodu jijiji. Ẹnụmwụ ọhẹ lẹ, o ya ẹla lụmẹ-lụmẹ ịlẹ kọ kpa ọ-ọkịlẹtụ jum lẹlẹ, o ya jaabwọ ká iwoo nya adamwụ woo kaka ba. Ị mẹ ẹla nya owuleji bwula igu jẹ́m bwu eji-eji, lẹ m̀ dọmwụ nyọka ya ẹla jwoo u-uhye nya iJisọsị, nyori o wule egu eji lụka ọkẹkpẹ bala o-ri o chehe nyọka họ ịnyị myịmyị ị-ịlahị. (ỊJọn 5:28, 29) M̀ kaa byoo, “O chịkpẹẹ ká ka jẹ́-ẹ yẹ adang myịmyị wẹẹ. Ahị wuu ka jẹ́-ẹ hịhị gboyi myị́ oyi odehe onyeewe.” Ẹla ọwẹ kaa kpụ́ oligu nyam ẹjẹ.

Ụka ịkịla ji ká oligu nyam kaa kpa ẹla ịkịla kpehe, lala ẹla nya ahyẹẹnụ ihyẹẹkpẹ bala ẹla nya Ohe ịta ẹ-ẹpwụ nya ookpokpo. M̀ kaa kpa ịBayịbụụ nyamwụ mẹ ụpa nya ụpwụ ịgọgọ lụmẹ-lụmẹ jọ́ọ ịlẹ kị ya ẹlịlẹhị u-uhye nya iJihova, iJisọsị, bala ahyẹẹnụ ihyẹẹkpẹ. (ỊJọn 14:28; 2 iTimoti 3:1-5) Jaabwọ kam wẹẹ ya ẹla je oligu nyam u-uhye nya iJihova, ịnyị m kaa kụ irya nya iJihova lẹ.

Dụmwọ-dụmwọ lẹ, ẹjẹ nya ẹlịlẹhị ọlẹ ká adam bala ịnam anyị ya tọ ẹ-ẹpwụ ọkịlẹtụ nyam, à dọmwụ nyọka bwu kpehe lẹlẹ. Ọ-chụ pwokwita, ụka ọhẹ kori kam juwa ị-ịpati juwa kpa eteji ịnyịịngịrị mile, m̀ kaa kpịtịya nya iJihova. Iru nya aligu nyam ya nyori Ohe nyị há ịwa, ma abwẹla nyaa tị kaa mẹjẹ nyori Ohe-é háa kpong-kpong ka. Ḿ tịtọ ká ịnyam ka lịnyị ka lẹ, m̀ cheje nyọka tịrẹkpẹ ka ẹga nya iJihova.

Ọ tị kaa chịkpẹẹ nyọka jẹ́ ẹla ọlẹ á ka họ gụ ọ-ka họ ẹla ọọwa. Ọ chịm kpẹẹ nyọka yẹ ang ịhyẹ da ọ-ọhịhị nyam; m̀ hwabwọ la eteji ịnyịịngịrị omilee-mile la ọ-bịrị ụka ka. M̀ pẹhi aligu nyam inyogo ịnyịnyị bala ọ-dọmwụ nya ịBayịbụụ ọjẹ́jẹ bala ọngọgbahị nya ọjịra-jịra ọhẹ.

Ọ tị lam ujwo gụ nyọka yẹ ang ịkịla da. Ọ kaa lam ujwo kaka kpoye nyọka wu agbama nyam kpa. Ụka ọhẹ, kori kam maga pwụ́ ẹgẹhẹ, m̀ kaa chị mileji myịmyị. Ọkịlẹtụ kaa lam eje ụka myị́ ụka kam chị mileji, m̀ me kam ri enyi gu obyi lẹ. Chajị nyọlẹ ká ọkịlẹtụ kpụm enyi, m̀ ka ẹga nya ọngọgbahị nya ọjịra-jịra ọlẹ kọ kaa jẹ́ ịBayịbụụ balam. Ọ kaa dọhụ pịlẹ tam, kpam dụmwọ, bala ọ-kaa jum ọhụ yẹẹyẹẹ. Ụka ọhẹ, o byim am nyị wa egbeju ẹla ọhẹ bwu Ẹpwang ọ-Kụ Gbeji u-uhye nya ang odudu ká abwọ ka chịm pyẹpyẹ ka. a Ahị ya ẹla u-uhye nya ang ịlẹ kam ka jẹ́-ẹ họ ụka kam ju agbama. Dụmwọ-dụmwọ, bwula ẹla ọlẹ kam jẹ́ bwu egbeju nya ẹla ọọwa bala abwọ ọrịrị ha iJihova, m̀ jẹ́ kaa wu agbama nyam kpa. Ụka ohyẹẹkpẹ, m̀ jẹ́ hu enyi Ohe la Ọya Ohene nya 2000. Ọ kpụ adam bala ịnam ịpyọ yẹẹyẹẹ.

APYOBWUNA ỌLẸ KAM YẸ́: M̀ la okpunyi nya ọkịlẹtụ bala irya oleje ocheri-cheri lẹẹlẹẹ lẹ, chajị m̀ jẹ́ nyori ḿ kaa kpa eteji ịnyịịngịrị bala ụya ọhọhọ chị ịnyịrọ nyam ịrị kaka. Ang myị́ ang kam juwa kpa họ, kori kọ ri ụkụrwọ ọhọhọ, ọjịra-jịra ọkaka, lee ụya ọyaya riri, m̀ kaa chị ọkẹkẹnị gụ olene lẹẹlẹẹ lẹ. M̀ la irya ọnyịịla u-uhye nya ọhịhị ugbẹnyị lẹ.

M̀ ji iJihova obe chajị nyọlẹ ká ẹla nyam á jụ adam bala ịnam anyị a-abwọ ka. M̀ kaa kụ irya nya ẹla ọlẹ ká iJisọsị ya ụ-ụpwụ nya ịJọn 6:44 ịnyịnyị: “Ọngọngọhẹ-ẹ́ ka jẹ́-ẹ warị wẹ ẹga nyam myị́ ka, kẹnẹ-kẹnẹ ó-ri ká Adịda ọlẹ kọ dum ẹrụ warị, á kpa ọngịrị nyamwụ mwụ ọngọọwa chịm ọgụ ene lẹ mẹ ịnyị!” Ọ kaa kpụm ịpyọ yẹẹyẹẹ ụka kam kpịtịya nyori m̀ jẹ́ tịrẹkpẹ wẹ ẹga nya iJihova chajị ọwa lịlọmwụ à wụrụm chị ịlọmwụ ọgụ lẹ.

“M̀ tịtọ nya adịda ọlala.”—MARCO ANTONIO ALVAREZ SOTO

ẸKA ỌLẸ KỊ MỌỌ: 1977

ẸPWỤMA: CHILE

EGO: EJE NYA ABWẸGA

EGO NYAM: Ịnam kpam nwà ịị Punta Arenas, ko ri epweji ọhẹ ọ-ọnụ enyi ọlẹ kị wụrụ nya Strait of Magellan, o-oye edii nya South America. Adam bala ịnam chebwo ụka kam gu ẹka ịrụ. Ọọwa du kọ lam lala o-ri am nyị́ la ọngọngọhẹ kaka. M̀ mama nya adịda ọlala.

Ịnam kaa jẹ́ ịBayịbụụ bala Alibeenu nya iJihova, ọ tị kaa kpam ka ọjịra-jịra nyaa u-Ube nya Ịpyị-Adịrahụ. Ọjịra-jịra ọkaka-á kaa hám ka, lee m̀ kaa jida ụka myị́ ụka kahị juwa ka ọjịra-jịra. Ụka kam gu ẹka 13, m̀ ba la ọkaka gbang-gbang.

Ụka ọwẹ lẹ, ang odudu bala eje omwumwu dọmwụ nyọka hám lẹ, m̀ tị jẹ́ ịnyịnyị nyori m̀ la āhị nya ọọwa lẹ. Ụka kam gu ẹka 15, m̀ kaa du eje nya abwẹga ọ-ọhụhụ, ẹga ọ-nwà ere, bala ọtụguru ichiche ịkịla. Imyi nya eje odudu ụma ọdatị ọhẹ dọmwụ nyọka nwụm gụ ọọwa chajị nyọlẹ kam kaa yẹjula angị jẹ́-ẹ du eje yẹẹyẹẹ. Lẹ m̀ ka ube-ụpwụ ọgbẹgbịlẹ kaka jẹ́ eje odudu. Ụka kam gu ẹka 20, m̀ rụ ka egbeju ẹpwa nya ẹpwụma nyahị ka chụma u-ube-ụpwụ. Ịnyịnyị, m̀ dọmwụ nyọka du eje nya abwẹga bala ebwo nya angịhyẹ.

Ụka ọwẹ wuu, ọhịhị nyam da uhwo-uhwo. Chajị kọ ka lam ịnyị ka lẹ, m̀ kaa nwà ere kpoye-kpoye bala o-mile etiji ịnyịịngịrị bala aliko nyam ịlẹ kam kaa yẹ lala ugbiyegu. M̀ ri ọngọ la egbeju ọngịrị, kori ká yẹm bwaa à tị ka jẹ́ ịnyịnyị. M̀ kaa kụrụ ịwụrụ inyibiri, kpa ịchwọ, bala ọ-kpa inyi ịtụka-ịtụka hi pyịnyẹng kị ka pwụ ọhị nyam.

Ụka lụmẹ-lụmẹ abwẹla nyam kaa kpam ju ka ẹpwụ nya uya ọmama, dudu kam kaa kpụ ẹpwụ nya ẹla nya angị chị ugbọhụ ịnyịnyịịnyị. Ụka ọhẹ kam nwà ere la ahị kpụ agbụ kpá, m̀ kele kaka ma uya ta ebwo nya angị kpa etiji ịnyịịngịrị ra ịhyẹ ịlẹ kị wẹẹ ba aligu nyam ẹnẹla. Angịịwa dọọ bam la enyiri, ị dọmwụ bem ụbaa ene.

Ang ọlẹ kọ tị jụm gụgụ wuu bwu ẹga nya angị bam i-iyo. Ẹnụmwụ ọhẹ, m̀ jẹ́ nyori ọnyang nyam bala oligu nyam ọlẹ kahị ju awụlẹ chwẹẹ gụgụ wuu, kaa kpa awụlẹ nọ ta ẹ-ẹpwụ nya ẹka ịmanyị tị́ lẹ. Aligu nyam ịkịla jẹ́ ẹla ọọwa, ma ị tị tọọ kpịbaa him. Ẹlẹwẹ bịrịm ọkịlẹtụ lụmẹ.

M̀ rụ tịrẹkpẹ ka Punta Arenas. Ụ-ụwa m̀ dọmwụ nyọka mẹ ang odudu jẹ bala ọ-họ ụkụrwọ nya ang odudu ịnyịnyị. M̀ kịnyaa la ọ-ka mwu eje nya abwẹga bala ebwo ọhẹ ịnyịnyị. M̀ tọ ọnyang ọhụ́hị-hụ́hị ọhẹ ká ẹnyị nyamwụ ri Sussan, ọọwa ahị dọmwụ nyọka kụ ẹpwa lawụlẹ lẹlẹ. Nyọlẹ kọ nọ chẹẹ, Sussan wẹ ka jẹ́ nyori ịnamwụ nyị myị la Ohe ịta ẹ-ẹpwụ nya ookpokpo bala o-ri am nyị́ myị ọnụ nya ọọwa ka. Lẹ ọ tọm wo nya ọlẹ ko ri ẹlịlẹhị bwu ẹpwụ nya ẹlẹwẹ. M̀ wọọ nyori am lẹ m̀ jẹ́ nyori ọmẹjẹ ọwẹ ri ọnọọkịla lẹ, ma ḿ ka jẹ́-ẹ dọọ wụlẹ bwu ịBayịbụụ ka. M̀ tị jẹ́ angịlẹ kị ka jẹ́-ẹ họ ịnyị. M̀ byoo nyori Alibeenu nya iJihova nyị ka jẹ́-ẹ mẹ ẹlịlẹhị jọ́ọ bwu ịBayịbụụ. Ọọwa lẹ, m họ ịngịhyẹ ọlẹ kam họ lẹka ẹ-ẹpwụ nya ẹka ịmanyị tị́ lẹlẹ. M̀ raabwọ bịlẹ Ohe kọ ka dam ụbwọ.

Ahyẹẹnụ ịmanyị-ịmanyị ẹ-ẹkpẹ nya ọọwa, m̀ yẹ ọlẹng ọhẹ ọlẹ kọ mem ọngọlẹ kam jẹ́, m̀ kele kaka tọọ wo kori kọ ri ọngọhẹ nya Alibeenu nya iJihova. Ọ la gbagbịla nyori m̀ lọọ uhihi chajị nya abwọlẹ kam la, ma ọ wẹ ịtọ ẹla nyam wuu kpẹnẹẹ u-uhye nya ọjịra-jịra ịla Ube nya Ịpyị-Adịrahụ. M̀ jẹ́ nyori ọwẹwẹ nya abwọ ọrịrị nyam à wẹ nyọlẹ kam tọ ọlẹng ọwẹ lẹ. M̀ ka ọjịra-jịra kaka hụhụ o-okoji ọla ọbaba chajị ká ọngọngọhẹ ka yẹm ka. Ma, angịnyị lụmẹ-lụmẹ jẹ́m chajị ị kpịtịya nya ụka kam ri onjwo kam kaa wẹ ọjịra-jịra. Ị dam ọwụraba bala o-wum bajẹ yẹẹyẹẹ, ọọwa dudu kam la okpunyi ọtụka-ọtụka. Ọ lam lala o-ri m̀ nyà wẹ ẹpwa lẹ. Ụka kam yẹ ọlẹng ọlẹ kọ mẹ ịBayịbụụ jẹ́m ụka kam ri onjwo, m̀ byoo nyị mẹ ịBayịbụụ jẹ́m myịmyị.

JAABWỌ KÁ ỊBAYỊBỤỤ YẸ ỌHỊHỊ NYAM DA: Ẹnụmwụ ọhẹ, m̀ wa ụpwụ nya Etu 27:11, ko yẹkẹẹ: “Ọnyị nyam ee, aa jẹ ẹla mẹ, chajị kam chị ọkẹkẹnị.” Ọ kpụm ịpyọ nyori am ọngịnyị ehe amamadiroko ka jẹ́-ẹ họ ká Ọngọ họ odehe bala epwoohe wuu ka chị ọkẹkẹnị myị́. M̀ wẹ ka yẹ nyori iJihova à ri Adịda ọlẹ kam lẹẹ tịtọ ọ-ọhịhị nyam gbale-gbale lẹ!

M̀ tịtọ nyọka họ ẹla kpụ Adam olepwoohe ịpyọ bala ọ-họ irya nyamwụ, ma m̀ ri ọnyọhị nya eteji ịnyịịngịrị bala ere ọnwànwa ẹ-ẹpwụ nya ẹka lụmẹ-lụmẹ lẹ. M̀ wẹ ka wo etu nya ẹla ọmẹjẹ nya iJisọsị ọlụpwụ nya ịMatiyu 6:24, ọlẹ ko yẹkẹẹ, “Ọnchẹ ookpokpo á ka jẹ́-ẹ juwa myị ẹrụ ha ayịbaba imiiye lụka ookpokpo myị́ kpong-kpong ka.” Jaabwọ kam wẹẹ maga nyọka yẹ ọhịhị nyam da, ẹla ọlẹ ká ụpwụ nya 1 Ala ịKọrịntị 15:33 ya, gum yẹẹyẹẹ: “Ogu nya angịnyị inyibyi ojuju a kaa bịrị abwẹla ọnyịịla ọhọhọ nya ọngịnyị ehe lẹ!” M̀ yẹ nyori ọ́ ka chịkpẹẹ myị́ ẹnẹnẹhẹ nyọka pẹhi abwẹla ịtịpyọ nyam ka, kẹnẹ-kẹnẹ kori kam hwabwọ la ọ-ka ẹga ịlẹ kị kaa họ ang ịịwa bala ọ-yẹjula angịnyị ịlẹ kị la abwẹla ịlịnyịịnyị mẹ ịnyị. Ẹla ọmẹjẹ ọlẹpwụ nya ịBayịbụụ ọwẹ la gbagbịla: M̀ baba nyọka họ ụkụrwọ la ọngịrị-ọngịrị nyọka kụrụ ang ịlẹ kị wẹẹ chịm mileji lẹ.—ỊMatiyu 5:30.

Chajị nya ọháha ọlẹ kam la ẹ-ẹga nya ang odudu, ọ-yụbwọ beji la ẹla nya eje nya abwẹga à ri eje ọchịchị ọlẹ kọ lam ujwo gụgụ wuu lẹlẹ. Ma m̀ jẹ́ kụrụ myị́ bwula ụbwọ ọdada nya aligu nyam ịla ọjịra-jịra. M̀ jẹ́ ba la ere ọ-nwà kpoye bala eteji ịnyịịngịrị omilee-mile. M̀ pwọ inyi bala ịchwọ nyam, bala o-hwabwọ la ọ-kaa kụrụ ang inyibiri-inyibiri kem. Ụka kam ya je Sussan nyori m̀ tịtọ nyọka pwọ inyi nyam, ọ tịtọ nyọka jẹ́ ang ọlẹ kam kaa họ u-Ube nya Ịpyị-Adịrahụ. O byim yẹkẹẹ: “M̀ ja bang wẹ Ube nya Ịpyị-Adịrahụ ọwẹ kam ka jẹ́ ang ọlẹ ká kaa họ ụ-ụwa!” Ang ọlẹ kọ yẹ ụ-ụwa kpọọ ịpyọ, lẹ ọ dọmwụ nyọka jẹ́ ịBayịbụụ ịnyịnyị. Ụka ohyẹẹkpẹ, m̀ ye Sussan. Am bala ọwa hu enyi Ohe la ẹka nya 2008. Ahị chị ọkẹkẹnị nyọlẹ kahị jẹ́ yẹjula ịnam ẹ-ẹpwụ nya ịgba ọgbagba nya iJihova.

APYOBWUNA ỌLẸ KAM YÉ: M̀ jẹ́ bé bwu ẹpwụ nya ọkẹkẹnị nya ọnọọkịla bala aligu ịnịịkịla ịnyịnyị. Eje omwumwu bala ang odudu hám wẹẹ, ma ụ-ụma ọnyị myị́ ọnyị m kaa du kaka. M̀ kaa kpa oja nyam da alugbiyegu nyam bala angịkịla ụbwọ, ọgụgụụgụ ri anjwo ichiche. M̀ tịtọ nyọka daa ụbwọ kị ka jẹ́ nyori iru nya ang ịlẹ ká odehe ọlẹ kaa tịtọ nyọka ya hahị, há nya ọhọ olida kem ịnyị, ẹlịlẹhị ri “ang i-hi deeji ịlọtẹwụụ” ị ri lẹ.—Ala iFilipayị 3:8.

M̀ yé aligu ịnyịịla ọọjịra-jịra, okpunyi bala ọháha tị ji ẹpwarịrị nyahị yẹẹyẹẹ. Ọlẹ kọ tị gụgụ wuu ri, m̀ yé Adịda nyọlẹ kam tụ́ ju iJihova chwẹẹ lẹ.

[Ẹla Ọdawụlẹ ọla Eji]

[Ụpwụ Ọdada ọ-kpọyị]

“M̀ jẹ́ tịrẹkpẹ wẹ ẹga nya iJihova chajị ọwa lịlọmwụ à wụrụm chị ịlọmwụ ọgụ lẹ”