Mbivilia Nĩalyũlaa Andũ

NĨ KYAŨ kyatetheeisye mũndũũme ũmwe asyokea ngwatanĩo yake vamwe na Yeova? Nake mwanake ũmwe eekie ata kĩla kyamũtetheeisye kũkwata ĩthe ũla weethĩĩtwe aimũmantha kwa ĩvinda yĩasa? Soma wone ũndũ andũ asu maĩtye.

“Nĩnendie kũmũsyokea Yeova.”​—ELIE KHALIL

ASYAIWE MWAKA WA: 1976

NTHĨ ĨLA WUMĨTE: CYPRUS

ĨVINDA ĨVĨTU: AĨ MWANA MWAU

KWĨANA KWAKWA: Nasyaĩwe Cyprus ĩndĩ neanĩa Australia. Asyai makwa nĩ Ngũsĩ sya Yeova, na nĩmatatie vyũ ũndũ matonya kũndetheesya nĩmwende Yeova na Ndeto yake, Mbivilia. Ĩndĩ nĩ wa mũika, nĩnambĩĩie kũlea kũmew’a asyai makwa. Naĩ nĩtonya kumaalũka nza ũtukũ na ngevitha nĩ kana ngakomane na amũika ala angĩ. Nĩtwoyaa ngalĩ na tũyĩlikya mathĩnanĩ angĩ maingĩ.

Mbeenĩ, neekaa maũndũ asu nĩvithĩte nĩ kana ndikamathatye asyai makwa. Ĩndĩ o kavola kwa kavola, wia ũsu nĩwanthelile. Nĩnatumie ndũũ na andũ maĩ akũũ mũno kwĩ inyie ala matamwendete Yeova, na mayandetheeasya kwĩka ũla waĩle. Mũthya nĩnesie kũmaelesya asyai makwa kana ndyendeeaw’a o na vanini nĩ mũĩkĩĩo woo. Nĩmatatie kũndetheesya me na wũmĩĩsyo, ĩndĩ ndyaaendeew’a nĩ kĩthito kyoo o na vanini. Asyai makwa nĩmakwie ngoo mũno.

Ĩtina wa kũthama mũsyĩ, nĩneelikilye ndawanĩ sya kũmila, o na ĩngĩ nĩnaĩmaa na kũta marijuana mũno. Naĩ na mwĩkalĩle mũthũku na mavinda maingĩ naendaa ilavu sya ũtukũ. O na ĩngĩ nĩnakwatiwe nĩ kũthata mĩtũkĩ. Yĩla mũndũ waneena ka kwĩka ũndũ ũtambendeeasya, naĩ nĩtonya kũmũneeny’a na woo, na kaingĩ nĩnakũthũkĩaa andũ na ngamavũa. Kwa ũkuvĩ, no ta neekaa maũndũ onthe ala namanyĩĩtw’e kana Mũklĩsto ndaĩle kwĩka.

ŨNDŨ MBIVILIA YAALYŨLILE MWĨKALĨLE WAKWA: Nĩnatumie ndũũ na ũmwe wa ala twatũmĩaa ndawa sya kũmila ĩmwe na wakw’ĩĩwe nĩ ĩthe wake e o mwana mũnini. Mavinda maingĩ twaeaa ngewa nginya ũtukũ mũno. Mavindanĩ amwe ta asu nĩwangeleasya ate kũmbitha kĩndũ ũndũ ũkwĩw’a aikosa ĩthe wake mũno. Nũndũ neanie nĩsĩ ĩũlũ wa wĩkwatyo wa ũthayũũkyo, nesie kwĩthĩa ndimũelesya ĩũlũ Yesũ, kana nĩwathayũũkisye akw’ũ na nũtwathĩte kana akeeka ũu ĩngĩ ĩvindanĩ yũkĩte. (Yoana 5:28, 29) Namwĩaa, “Kwasũanĩa ũimwona ĩthe waku ĩngĩ. Ithyonthe nĩtũtonya kwĩkala tene na tene nthĩ yĩ nzaũ.” Ndeto isu nĩsyakiitie ngoo ya mũnyanyawa mũno.

Mavinda angĩ, mũnyanyawa nĩwakũlasya makũlyo makonanĩtye na mĩthenya ya mũminũkĩlyo kana ũmanyĩsyo wa Ũtatũ. Nĩnatũmĩaa Mbivilia yake kũmwony’a maandĩko me kĩvathũkany’o ala moonanĩtye ũw’o ĩũlũ wa Yeova Ngai, Yesũ, na mĩthenya ya mũminũkĩlyo. (Yoana 14:28; 2 Timotheo 3:1-5) O ũndũ naendeeaa kũelesya mũnyanyawa ĩũlũ wa Yeova, now’o naendeeie kwĩthĩa ndisũanĩa mũno ĩũlũ wa Yeova.

O kavola kwa kavola, mbeũ ya ũla w’o ĩla asyai makwa matatĩte mũno kũvanda ngoonĩ yakwa nĩyambĩĩie kũmea. Kwa ngelekany’o, mavinda amwe nĩ vatĩnĩ na anyanyawa tũitũmĩa ndawa sya kũmila, neyĩthĩaa ndisũanĩa ĩũlũ wa Yeova. Aingĩ moo nĩmasyaa kana nĩmamwendete Ngai, ĩndĩ mwĩkalĩle woo waĩ kĩvathũkany’o mũno. Nũndũ ndyendaa kwĩthĩwa nĩilye ũu, nĩnamanyie kĩla naaĩle kwĩka. Naaĩlĩte kũmũsyokea Yeova.

Kwa w’o, kũmanya kĩla waĩle kwĩka na kũkĩka nĩ maũndũ elĩ me kĩvathũkany’o. Yaĩ o laisi kwĩka moalyũku amwe. Kwa ngelekany’o nĩnaekie kũtũmĩa ndawa sya kũmila ndeũng’ang’ana mũno. O na ĩngĩ, nĩnatilile kĩtindo kĩla naĩ nakyo mbeenĩ, na nambĩĩa kwĩmanyĩsya Mbivilia na mũtumĩa wa kĩkundi.

Ĩndĩ mwa, vayaĩ laisi kwĩka moalyũku amwe. Waĩ ũndũ wĩ vinya mũno kũsiĩĩa ũthilĩku wakwa. Mavinda amwe nĩneekaa nesa o kwa kavinda, ĩndĩ ndyĩsa kwĩthĩa nĩsyokie o va kũũ. Ũndũ ũsu wanũmĩasya mũno, na ndyambĩĩa kwĩyona nĩ vathei. Nĩnatwie kũneena na mũtumĩa ũla wamanyĩasya Mbivilia nũndũ natũlĩkĩte ngoo mũno. Mavinda onthe mũtumĩa ũsu eethĩawa na ũmĩĩsyo na tei, kwoou neew’aa aimbĩkĩa vinya mũno. Ĩvinda yĩmwe, ambĩie nĩsome kĩlungu kĩna ĩkasetinĩ ya Mũsyaĩĩsya kĩla kyaneeneete ĩũlũ wa vata wa kũlea kwĩyĩtũka. * Nĩtwaneeneie matambya ala naaĩle kwosa yĩla nathata. O kavola kwa kavola, nĩlilikene ũla ũvoo nasomete yĩla ĩkasetinĩ o vamwe na kũmũvoya Yeova mũno, nĩneethĩiwe ndonya kwĩsiĩĩa ndikathatae na mĩtũkĩ. Mũthya, Mwei wa 4, Mwaka wa 2000, nĩnavatisiwe neethĩwa nĩ ũmwe wa Ngũsĩ sya Yeova. Kũneena ũla w’o, asyai makwa matanie mũno.

MOATHIMO ALA NĨKWATĨTE: Yu nĩw’aa nĩ na mũuo wa kĩlĩko na wasya mũtheu wa ngoo, nĩsĩ vyũ kana ndivukasya mwĩĩ wakwa ĩngĩ na ndawa sya kũmila kana mwĩkalĩle ũte mũtheu. Maũndũ onthe ala ngwĩka, yĩthĩwe nĩ kũthũkũma, kũthi maũmbano ma kĩkundi, kana kwĩtanĩthya, nĩw’aa nĩ mũtanu mũnango. Yu nĩthĩawa na woni mũseo ĩũlũ wa thayũ.

Nĩmũtũngĩaa Yeova mũvea mũno nũndũ wa kũnenga asyai aseo ala mataambĩkĩsya ngoo. O na ĩngĩ nĩlilikanaa ndeto sya Yesũ ila syĩ nthĩnĩ wa Yoana 6:44 ila syaĩtye atĩĩ: “Vaiĩ mũndũ ũtonya kũka kwakwa atakusĩtw’e nĩ Asa wakwa ũla wandũmie.” Nĩw’aa nakiitwa mũno nasũanĩa kana neethĩiwe ndonya kũmũsyokea Yeova nĩkwĩthĩwa nĩwangusisye kwake ĩngĩ.

“Nĩnendaa Mũno Kwĩthĩwa na Mũndũ Nĩta Tata.”​—MARCO ANTONIO ALVAREZ SOTO

ASYAIWE MWAKA WA: 1977

NTHĨ ĨLA WUMĨTE: CHILE

ĨVINDA ĨVĨTU: AĨ MŨKŨNI WA MBATHI SYĨTAWA DEATH-METAL

KWĨANA KWAKWA: Naeiwe nĩ inyia-akwa taoninĩ mbanake mũno yĩtawa Punta Arenas, taoni ĩsu yĩ ũtee wa ũkanga kĩsionĩ kĩtawa Strait of Magellan kĩla kĩ ngalĩko ya ĩtheo vyũ ya South America. Asyai makwa mataanĩisye nĩ na myaka ĩtano, na ũndũ ũsu watumaa nĩw’a nĩ weka. Nĩnew’aa ndyenda kwĩthĩwa na mũndũ nĩta tata.

Inyia-akwa eemanyĩasya Mbivilia na Ngũsĩ sya Yeova, na nĩwaendanasya nakwa maũmbanonĩ ma Kĩklĩsto Nyũmbanĩ ya Ũsumbĩ. Ĩndĩ o na ũu wĩ o vo, ndyendete kũthi maũmbanonĩ, na mavinda maingĩ twĩ nzĩanĩ nekimanganasya nthĩ na ndiĩa nĩkĩtye nthele. Yĩla navikisye myaka 13, nĩnaekie vyũ kũendaa maũmbanonĩ.

Ĩvindanĩ yĩu, naĩ nĩnambĩĩa kwendeew’a nĩ wathi, na nĩvo namanyie kana naĩ na kĩnengo kyaw’o. Nĩ na myaka 15, nakũnaa mbathi sya heavy-metal na death-metal kũndũ ta mbokanĩ, mbaa, na kũndũ o kũngĩ kũla andũ mombanĩe. Nũndũ wa kũtindany’a na aini me na ũtũĩka wa wathi, nĩnambĩĩie kwendeew’a nĩ mbathi sya classical. Nĩnambĩĩie kũsomea wathi yunivasitĩnĩ yaĩ o vau vakuvĩ. Navikya myaka 20, nĩnathamĩĩie taoninĩ ya Santiago, nĩ kana nongelange masomo makwa. O na ĩngĩ nĩnaendeeie kũkũna mbathi sya heavy-metal na death-metal mbandinĩ syĩ kĩvathũkany’o.

Ĩvindanĩ yĩu yonthe, neew’aa nĩemeewe mũno nĩ mesilya ma kwĩyĩw’aa nĩ vathei. Nĩ kana nĩvetange mosũanĩo asu, nanyusaa mũno, na kũtũmĩa ndawa sya kũmila nĩ na ala twakũnaa wathi ĩmwe, ala namonaa ta mo andũ ma mũsyĩ wakwa. Naĩ na mũtuo wa ũlei, ũla o ũnzyaĩtye waĩ ũtonya kũwona ũtheinĩ. Neekĩaa ngũa nziũ, nĩnaeete kĩng’ee, na ngaeka nzw’ĩĩ syakwa ikeana mũno ikew’a kũvika kĩnyunyunĩ.

Mavinda kwa mavinda nũndũ wa mũtuo ũsu wakwa, nĩneelikasya kaũnĩ na ndikwatwa nĩ asikalĩ. Ĩvinda yĩmwe, nĩnyw’ĩte ũkĩ mũno, nĩnavithũkĩie aũme ta atatũ ala mathooasya ndawa sya kũmila ala matũaa manthĩnasya nĩ na anyanyawa. Aũme asu mambũie naĩ mũno nginya mandũla ũkambu.

Ĩndĩ o na vailye ũu, ũndũ ũla wanũmĩisye mũno waumanie na ala maĩ anyanyawa ma vakuvĩ. Mũthenya ũmwe, nĩnamanyie kana mwĩĩtu ũmwe twaĩ ndũũ angengete kwa myaka mingĩ nũndũ akomaa na mũndũũme ũmwe waĩ mũnyanyawa wa vakuvĩ vyũ, na anyanyawa onthe nĩmeesĩ ũndũ ũsu ĩndĩ makambitha. Mwa neewie ũndũ ũsu wamina vinya vyũ.

Nĩnasyokie Punta Arenas vala nambĩĩisye kũmanyĩsya wathi na kũthũkũmaa nĩ mũkũni wa wathi. O na ĩngĩ nĩnaendeeie kũkũna na kũlekoti mbathi sya heavy-metal na death-metal mbandinĩ syĩ kĩvathũkany’o. Nĩnakomanie na kelĩtu kanake keetawa Sussan na twambĩĩa kwĩkala ĩmwe. Ĩtina wa ĩvinda, Sussan nĩwamanyie kana nyinyia wake nĩwaĩkĩĩaa ũmanyĩsyo wa Ũtatũ ĩndĩ nyie ndyaũĩkĩĩaa. Kwoou angũlilye, “Ũw’o nĩw’o wĩva?” Namũsũngĩie namwĩa kana nĩnĩsĩ ũmanyĩsyo wa Ũtatũ nĩ wa ũvũngũ ĩndĩ ndyaĩ nĩtonya kũmũĩkĩĩthya nĩtũmĩĩte Mbivilia. Ĩndĩ o na vailye ũu, nĩnamanyie ala matonya kwĩka ũu. Namwĩie kana Ngũsĩ sya Yeova no imwony’e ũw’o itũmĩĩte Mbivilia. Na ĩndĩ neeka ũndũ ndawĩkĩte kwa myaka mingĩ, nĩnamũvoyie Ngai nĩmũkũlĩtye andetheesye.

Ĩtina wa mĩthenya mĩvũthũ, nĩnoonie mũndũũme nonaa o nĩmwĩsĩ, na namũkũlya ethĩwa nĩ ũmwe wa Ngũsĩ sya Yeova. O na kau oonekaa e mũtelemu nĩ ũndũ wambonie nĩilye, nĩwanzũngĩie e mũuu makũlyo ala namũkũlilye ĩũlũ wa kũthi maũmbano Nyũmbanĩ ya Ũsumbĩ. Ndyaĩ na nzika kana ũsu waĩ ũsũngĩo wa mboya ĩla navoyete. Nĩnaendie Nyũmbanĩ ya Ũsumbĩ na nekala kĩvĩlanĩ kya ĩtina vyũ nĩ kana andũ maikamanye. Ĩndĩ o na vailye ũu, aingĩ nĩmambĩĩie kũmanya nũndũ nĩmambonaa tene yĩla naendaa maũmbanonĩ nĩ mũnini. Nĩmanthokisye na mangumbatĩa me na wendo mwingĩ mũno nginya neew’a nĩ na mũuo mwingĩ. Mwa neew’aa ta nasyoka mũsyĩ. Yĩla noonie ũla mũndũũme wamanyĩasya Mbivilia nĩ mũnini, namwĩie no nende kwĩmanyĩsya nake ĩngĩ.

ŨNDŨ MBIVILIA YAALYŨLILE MWĨKALĨLE WAKWA: Mũthenya ũmwe, nĩnasomie ĩandĩko ya Nthimo 27:11, yĩla yaĩtye: “Mwana wakwa, ĩthĩwa mũĩ, noitanĩthya ngoo yakwa.” Ndeto isu syangiitie mũno nginya naambĩĩa kwĩkũlya vatonyeka ata mũndũ takwa akatanĩthya Mũmbi wa matu na nthĩ? Nĩnamanyie kana Yeova nĩwe tata ũla natwĩe nĩmanthaa thayũnĩ wakwa w’onthe!

Nĩnendaa kũmwendeesya Ĩthe wakwa wa Ĩtunĩ na ndyĩka kwenda kwake, ĩndĩ neethĩĩtwe nĩ ngombo ya ũkĩ na ndawa sya kũmila kwa myaka mingĩ. Nĩnesie kũelewa nesa ndeto sya Yesũ ila syĩ nthĩnĩ wa Mathayo 6:24, ila syaĩtye atĩĩ: “Vaiĩ mũndũ ũtonya kũthũkũma mavwana elĩ.” O nĩendeee kũng’ang’ana nĩ kana nĩke moalyũku, mwolooto ũla wĩ nthĩnĩ wa 1 Akolintho 15:33 nĩwangiitie mũno. Waĩtye atĩĩ: “Itindo nthũku nĩsyanangaa mwĩkalĩle mũseo.” Nĩnamanyie kana ndyaĩ nĩsa kũtia imanyĩo nthũku ila naĩ nasyo naendeea kũtindany’a na ala natindanasya namo, na kũendaa o kũndũ kũla twaendaa namo. Ũtao wa Mbivilia waĩ ũtheinĩ vyũ. Nĩnaaĩlĩte kwosa matambya ala maĩlĩte ndekwananga ĩvinda nĩ kana nĩvathane na maũndũ ala manziĩaa kwĩka maendeeo.—Mathayo 5:30.

O na kau nĩnendete wathi mũno, kũeka kũkũna mbathi sya heavy-metal nĩw’o ũtwi ũla waĩ vinya vyũ naaĩle kwĩka. Ĩndĩ anyanyawa kĩkundinĩ nĩmandetheeisye, na mũthya neeka ũtwi ũsu. Nĩnaekie kũnyw’a ũkĩ mũno na kũtũmĩaa ndawa sya kũmila. O na ĩngĩ nĩneenzie ila nzw’ĩĩ syakwa, kĩng’ee, na naeka kwĩkĩaa o ngũa nziũ syoka. Yĩla natavisye Sussan kana nĩenda kwenza nzw’ĩĩ syakwa, ũndũ ũsu nĩwatumie ethĩwa na mea maingĩ ma kwenda kũmanya kĩla naendeeasya Nyũmbanĩ ya Ũsumbĩ. Ambĩie atĩĩ: “Nĩ ngũthi naku ngeyonee kĩla kĩendeea kũu Nyũmbanĩ ya Ũsumbĩ!” Nĩwendeeiw’e mũno nĩ kĩla weeyoneie, na atekwananga ĩvinda o nake ambĩĩa kwĩmanyĩsya Mbivilia. Mũthya, nĩ na Sussan nĩtwatwaanie. Na ĩndĩ Mwaka wa 2008 twavatiswa, tweethĩwa twĩ amwe ma Ngũsĩ sya Yeova. Nĩtũtanĩaa mũno kũmũthũkũma Yeova twĩ vamwe na inyia wakwa.

MOATHIMO ALA NĨKWATĨTE: Nĩnavonokie kuma nthĩ ĩte na ũtanu wa w’o, na kĩtindo kya anyanya mate aseo. O na ũmũnthĩ nĩ vata na wathi, ĩndĩ nĩnĩnyuvaa ũla ngwĩthukĩĩsya. Ndũmĩaa maũndũ ala nĩyoneete kũtetheesya andũ makwa ma mũsyĩ na andũ angĩ, na mũno mũno andũ ma mũika. Nĩmatetheeasya mone kana maũndũ maingĩ ala nthĩ ĩno ĩtũnengae monekaa me ma kwendeesya mũno, ĩndĩ mũthya mũndũ esaa kwĩthĩa no “ta mavuti.”—Avilivi 3:8.

Nĩngwatĩte anyanya ma w’o kĩkundinĩ kya Kĩklĩsto, vala ve wendo na mũuo mwingĩ. O vamwe na maũndũ asu onthe, nĩw’aa nĩ vakuvĩ mũno na Yeova, na mũthya, nĩnakwatie Tata ũla natwĩe nĩmanthaa.

[Maelesyo ma Kwongeleela]

 [Maelesyo]

“Neethĩiwe ndonya kũmũsyokea Yeova nũndũ nĩwangusisye kwake ĩngĩ.”