كيەلى كىتاپ ادامنىڭ ٶمىرىن وزگەرتەدى
كيەلى كىتاپ ادامنىڭ ٶمىرىن وزگەرتەدى
ماسىحشىلەردىڭ وتباسىندا تاربيە العان ەر كىسىنى بالا كەزىندەگى دىنىنە قايتا ورالۋعا نە تالپىندىردى؟ اكەنىڭ سۇيىسپەنشىلىگىن اڭساپ وسكەن ٴبىر ەر ادام قامقور اكەنى قالاي تاپتى؟ بۇل كىسىلەردىڭ وزدەرى جايلى نە دەيتىنىنە نازار اۋدارايىق.
«مەن ەحوباعا قايتا ورالۋدى شەشتىم». ەلي حاليل
تۋعان جىلى: 1976
ەلى: كيپر
بۇرىندا: جاسوسپىرىم كەزىندە ۇيىنەن كەتىپ قالدى
ٶمىربايانىم: مەن كيپردە دۇنيەگە كەلدىم، ٴبىراق بالالىق شاعىم اۆستراليادا ٶتتى. ەحوبا كۋاگەرلەرى بولعاندىقتان اتا-انام ەحوباعا جانە ونىڭ ٴسوزى كيەلى كىتاپقا دەگەن سۇيىسپەنشىلىگىمدى وياتۋ ٷشىن بارلارىن سالدى. الايدا جاسوسپىرىم كەزىمدە مەن ولارعا قارسى شىعا باستادىم. تۇندە ۇيدەن جاسىرىن كەتىپ قالىپ، بۇزىق بالالارعا قوسىلىپ ٴجۇردىم. ٴبىز بىرەۋلەردىڭ كولىگىن ۇرلاپ، ٴتۇرلى قيىندىقتارعا تاپ بولىپ جاتاتىنبىز.
العاشىندا مەن اتا-انامنىڭ كوڭىلىن قالدىرامىن دەپ قورىققاندىقتان ٴبارىن جاسىرىن ىستەيتىنمىن. ٴبىراق كەيىننەن بۇلاي ەتۋدەن دە قالدىم. سودان، ەحوبانى جاقسى كورمەيتىن، وزىمنەن الدەقايدا ۇلكەن ادامدارمەن دوستاسىپ، ولاردىڭ جامان ىقپالىنا بەرىلىپ كەتتىم. اقىرىندا، اتا-اناما بۇدان بىلاي ولاردىڭ ٴدىني ۇستانىمدارى بويىنشا ٶمىر سۇرگىم كەلمەيتىنىمدى ايتتىم. ولار ماعان شىدامدىلىقپەن كومەكتەسۋگە تىرىستى، ٴبىراق مەن ولاردىڭ ىرقىنا كونبەدىم. بۇل اتا-اناما وتە اۋىر ٴتيدى.
سودان مەن ۇيدەن كەتىپ قالىپ، ازعىن ٶمىر سۇرە باستادىم جانە تۇنگى كلۋبتاردان شىقپايتىنمىن. ونىڭ ۇستىنە، ەسىرتكى قابىلدايتىن بولدىم. ٴتىپتى ٶزىم ماريحۋانا ٶسىرىپ، ونى ۇلكەن كولەمدە ساتىپ ٴجۇردىم. سونداي-اق مەن تىم اشۋشاڭ بولىپ كەتتىم. بىرەۋدىڭ ٴسوزى نە ٸسى ۇناماي قالسا، ايقايعا باسىپ، جۇدىرىعىمدى الا جۇگىرەتىنمىن. قىسقاسىن ايتقاندا، اتا-انامنىڭ ٴماسىحشى رەتىندە ىستەمە دەگەن نارسەسىنىڭ ٴبارىن ىستەيتىنمىن.
كيەلى كىتاپ ٶمىرىمدى وزگەرتتى: مەن ٴبىر ناشاقور جىگىتپەن دوستاسىپ كەتتىم. ول كىشكەنتاي كەزىندە اكەسىنەن ايىرىلعان بولاتىن. ٴبىز ٴجيى ٴتۇننىڭ ٴبىر ۋاعىنا دەيىن سويلەسەتىنبىز. ٴبىر كۇنى ول ىشىندەگىسىن اقتارىپ، اكەسىن قاتتى ساعىنىپ جۇرگەنىن ايتتى. قايتا ٴتىرىلۋ تۋرالى ٷمىتتى ٴبىلىپ وسكەن مەن يسا تۋرالى ايتا باستادىم. ونىڭ ولىلەردى قايتا تىرىلتكەنىن جانە بولاشاقتا جاقىندارىمىزدى قايتا ٴتىرىلتۋدى ۋادە ەتكەنىن ايتىپ بەردىم (جوحان 5:28، 29). مەن وعان: «اكەڭمەن قاۋىشاتىن كەزىڭدى ەلەستەتىپ كورشى. بارلىعىمىز جەردەگى جۇماقتا ماڭگى ٶمىر سۇرەتىن بولامىز»،— دەدىم. بۇل سوزدەر وعان قاتتى اسەر ەتتى.
باسقا ٴبىر جولى ول ۇشتىك ٸلىمى مەن سوڭعى كۇندەر جايلى تاقىرىپتاردى قوزعادى. مەن ونىڭ كيەلى كىتابىن الىپ، ەحوبا قۇداي، يسا ٴماسىح جانە سوڭعى كۇندەر تۋرالى شىندىق جازىلعان تارماقتاردى كورسەتتىم (جوحان 14:28؛ تىموتەگە 2-حات 3:1—5). دوسىما ەحوبا جايلى كوبىرەك ايتقان سايىن، ٶزىم دە ول جايلى ٴجيى ويلاناتىن بولدىم.
اتا-انامنىڭ ماڭداي تەرىمەن ەككەن شىندىق تۇقىمى جۇرەگىمنىڭ تۇبىندە جاتقان ەدى. ول بىرتە-بىرتە ٶسىپ، بوي كورسەتە باستادى. مىسالى، كەيدە دوستارىممەن بىرگە ەسىرتكى قابىلداپ، كوڭىل كوتەرىپ جۇرگەنىمدە، كەنەتتەن ەحوبانى ەسىمە الاتىنمىن. دوستارىمنىڭ كوبىسى قۇدايدى جاقسى كورەمىز دەپ اۋىزدارىمەن ايتقانمەن، ىستەرى مۇلدەم باسقا نارسەنى كورسەتەتىن. مەن ولارعا ۇقساعىم كەلمەدى، سوندىقتان نە ىستەۋىم كەرەكتىگىن انىق ٴبىلدىم. مەن ەحوباعا قايتا ورالۋدى شەشتىم.
كوپ وزگەرىستەر جاساۋىم كەرەكتىگىن تۇسىنگەنمەن، ولاردىڭ كەيبىرىن ىستەۋ ماعان وڭايعا سوقپادى. مىسالى، قاۋىم اقساقالىمەن كيەلى كىتاپتى زەرتتەۋ ساباعىن باستاپ، ەسىرتكى مەن بۇرىنعى دوستارىمدى تاستاۋ مەن ٷشىن قيىن ەمەس ەدى. الايدا اشۋىمدى جۇگەندەۋ ٷشىن ٴبىراز كۇش سالۋىما تۋرا كەلدى. ۇستامدى بولۋعا قانشا تىرىسسام دا، اشۋعا بوي الدىرىپ، ارتىنان وكىنىپ جاتاتىنمىن. سودان، سالىم سۋعا كەتىپ، مەنىمەن كيەلى كىتاپتى زەرتتەيتىن اقساقالدان كومەك سۇرايتىنمىن. ول شىدامدىلىق پەن مەيىرىمدىلىك تانىتىپ، مەنى ۇنەمى جىگەرلەندىرىپ وتىراتىن. بىردە ول ماعان «كۇزەت مۇناراسى» جۋرنالىنداعى تاباندىلىقتىڭ ماڭىزدىلىعى جايلى ماقالانى وقۋعا كەڭەس بەردى a. ەكەۋىمىز وتىرىپ، اشۋلانعان كەزدەرى نە ىستەۋىمە بولاتىنىن قاراستىردىق. ماقالاداعى كەڭەستەردى ەستە ۇستاپ، ەحوباعا تالماي دۇعا ەتكەنىمنىڭ ارقاسىندا بىرتە-بىرتە اشۋىمدى جۇگەندەي باستادىم. ٴسۇيتىپ، 2000-جىلدىڭ ٴساۋىر ايىندا ەحوبا كۋاگەرى رەتىندە شومىلدىرۋ راسىمىنەن ٶتتىم. سوندا اتا-انام قالاي قۋاندى دەسەڭدەرشى!
تيگىزگەن پايداسى: ٴتانىمدى ەسىرتكى مەن ازعىندىقپەن ارامدامايتىنىمدى بىلگەندىكتەن قازىر جانىم تىنىش، ار-ۇجدانىم دا تازا. جۇمىس ىستەگەندە، قاۋىم كەزدەسۋىنە بارعاندا، كوڭىل كوتەرگەندە نە باسقا دا نارسەلەردى ىستەگەندە، ٶزىمدى الدەقايدا باقىتتى سەزىنەمىن. مەنىڭ ومىرگە دەگەن قىزىعۋشىلىعىم ارتتى.
اتا-انامنىڭ مەنەن ەشقاشان ٷمىت ۇزبەگەندەرى ٷشىن ەحوباعا مىڭ دا ٴبىر راقمەت ايتامىن. مەن يسا پايعامباردىڭ جوحان 6:44 گى: «مەنى جىبەرگەن اكەم جاقىنداتىپ تارتسا عانا، ادام ماعان كەلە الادى»،— دەگەن سوزدەرىن ٴجيى ەسكە الامىن. ٴيا، ەحوبانىڭ مەنى وزىنە قايتا جاقىنداتىپ تارتقانىنىڭ ارقاسىندا وعان ورالا الدىم. وسى جايىندا ويلانعاندا، ٴبىر ماساتتانىپ قالامىن.
«اكەمنىڭ بولعانىن اڭسادىم». ماركو انتونيو الۆارەس سوتو
تۋعان جىلى: 1977
ەلى: چيلي
بۇرىندا: حەۆي-مەتال توبىنىڭ مۇشەسى بولعان
ٶمىربايانىم: مەن وڭتۇستىك امەريكانىڭ قيىر وڭتۇستىگىندەگى ماگەللان بۇعازىندا ورنالاسقان پۋنتا-ارەناس دەگەن اسەم قالادا دۇنيەگە كەلدىم. انام مەنى جالعىز ٶزى تاربيەلەپ ٶسىردى. بەس جاسىمدا اتا-انام اجىراسىپ كەتكەندىكتەن، ٶزىمدى تاستاندى بالاداي سەزىنىپ، ٶمىر باقي اكەمنىڭ بولعانىن اڭسادىم.
انام ەحوبا كۋاگەرلەرىمەن كيەلى كىتاپتى زەرتتەيتىن جانە مەنى پاتشالىق سارايىندا وتەتىن قاۋىم كەزدەسۋلەرىنە الىپ باراتىن. الايدا مۇنداي كەزدەسۋلەردى سۋقانىم سۇيمەگەندىكتەن، ٴجيى بۇلقان-تالقانىم شىعىپ باراتىنمىن. ال 13 كە تولعاندا كەزدەسۋلەرگە مۇلدەم بارماي قويدىم.
سول ۋاقىتتارى مەنىڭ مۋزىكاعا دەگەن قۇشتارلىعىم ويانىپ، ٶزىمنىڭ بۇل سالادا دارىنىم بار ەكەنىن ٴتۇسىندىم. 15 جاسىمدا جەكە وتىرىستاردا، بارلاردا جانە مەيرام كۇندەرى حەۆي-مەتال باعىتىنداعى اندەردى ورىندايتىن بولدىم. كەيىننەن دارىندى مۋزىكانتتارمەن ارالاسىپ، كلاسسيكالىق مۋزىكاعا قىزىعا باستادىم. سودان، ٶزىم تۇراتىن جەردەگى كونسەرۆاتورياعا ٴتۇستىم. ال 20 عا كەلگەندە وقۋىمدى جالعاستىرۋ ٷشىن ەل استاناسى سانتياگوعا كوشىپ باردىم. سول ۋاقىتتارى حەۆي-مەتال توپتارىندا ٵلى دە ويناپ ٴجۇردىم.
ماعان ٶمىرىم قاشاندا ماعىناسىز بولىپ كورىنەتىن. سوندىقتان كوڭىلىمە الدانىش ىزدەپ، وتباسىم دەپ ساناعان توپتاعى جىگىتتەرمەن بىرگە ماس بولعانشا ىشەتىنمىن جانە ەسىرتكى قابىلدايتىنمىن. بويىمداعى بۇلىكشىل رۋح سىرت كەلبەتىمنەن انىق كورىنەتىن: ۇنەمى قارا ٴتۇستى كيىم كيىپ، ساقال قوياتىنمىن، ال شاشىم بەلىمە دەيىن ٴتۇسىپ تۇراتىن.
سودان، توبەلەستەن كوز اشپاي، ٴتارتىپ ساقشىلارىنىڭ قولىنا ٴجيى ٴتۇسىپ ٴجۇردىم. بىردە ٸشىپ العان كەزىمدە ەسىرتكى ساتاتىن ٴبىر توپ ادامعا بىزگە تيىسكەندەرى ٷشىن تاپ بەردىم. ولار مەنى سوققىعا جىعىپ، جاعىمدى سىندىردى.
الايدا ماعان ەڭ اۋىر تيگەنى جاقىن ادامدارىمنىڭ ساتقىندىعى ەدى. بىردە ٴجۇرىپ جۇرگەن قىزىمنىڭ ەڭ جاقىن دوسىممەن كوڭىلدەس ەكەنىن ٴبىلىپ قويدىم. مۇنى دوستارىمنىڭ ٴبارى بىلسە دە، مەنەن جاسىرىپ جۇرگەن ەكەن. بۇل ماعان توبەمە جاي تۇسكەندەي اسەر ەتتى.
سودان، پۋنتا-ارەناسقا قايتا ورالىپ، سول جەردە ٵن-كۇي ساباعىنان ٴدارىس بەرىپ ٴجۇردىم ٵرى ۆيولونچەلدە ويناپ جۇمىس ىستەدىم. بۇعان قوسا، حەۆي-مەتال توپتارىمەن بىرگە كونسەرت بەرىپ، ستۋديادا ٵن جازىپ جۇردىك. مەن سيۋزان دەگەن ٴبىر سۇيكىمدى قىزبەن تانىستىم، سودان ەكەۋىمىز بىرگە تۇرا باستادىق. ۋاقىت وتە كەلە سيۋزان اناسىنىڭ ۇشتىك قۇدايعا سەنەتىنىن، ال مەنىڭ وعان سەنبەيتىنىمدى بايقادى. سوندا ول: «قايسىڭدىكى دۇرىس؟»— دەپ سۇرادى. مەن وعان ۇشتىك ٸلىمنىڭ وتىرىك ەكەنىن، ٴبىراق مۇنى كيەلى كىتاپ بويىنشا دالەلدەپ بەرە المايتىنىمدى ايتتىم. الايدا ەحوبا كۋاگەرلەرىنىڭ كيەلى كىتاپتاعى شىندىقتى كورسەتىپ بەرە الاتىندارىن ٴتۇسىندىردىم. سوسىن كوپ جىلدار بويى ىستەمەگەن نارسەنى ىستەدىم: قۇدايعا دۇعا ەتىپ، ماعان كومەك بەرۋىن سۇرادىم.
سودان، بىرەر كۇننەن كەيىن ٴجۇزى تانىس ٴبىر ەر كىسىنى كەزدەستىرىپ قالدىم. ونىڭ ەحوبا كۋاگەرى ەكەنىن بىلگەن سوڭ، پاتشالىق سارايىندا وتەتىن قاۋىم كەزدەسۋلەرى جايلى سۇراستىرا باستادىم. ول مەنىڭ سىرت كەلبەتىمنەن ايتارلىقتاي سەسكەنىپ قالدى، دەسە دە سۇراقتارىما ىلتيپاتپەن جاۋاپ بەردى. قۇدايدىڭ دۇعاما وسىلاي جاۋاپ بەرگەنىنە سەنىمدى بولعان مەن پاتشالىق سارايىنا بارىپ، ەشكىم بايقاماس ٷشىن ەڭ سوڭعى قاتارعا بارىپ وتىردىم. الايدا كوبىسى مەنى بالا كەزىمدە كورگەندىكتەن، بىردەن تانىپ قويدى. ولار مەنىمەن امانداسىپ، ىستىق قۇشاقتارىنا العاندا، جۇرەگىم جىلىپ، جانىم جاي تاپقانداي بولدى. مەن ٶزىمدى ۇيگە ورالعانداي سەزىندىم. سودان كىشكەنتاي كەزىمدە مەنىمەن كيەلى كىتاپتى زەرتتەگەن باۋىرلاستان زەرتتەۋ ساباعىن قايتا باستاۋدى ٶتىندىم.
كيەلى كىتاپ ٶمىرىمدى وزگەرتتى: بىردە ناقىل سوزدەر 27:11 گى «بالام، پاراساتتى بول — مەنى قۋانتاسىڭ» دەگەن سوزدەردى وقىدىم. جۇمىر باستى پەندەنىڭ عالامنىڭ جاراتۋشىسىن قۋانتا الاتىنى مەنى قاتتى تاڭعالدىردى. سوندا ٶمىر بويى ىزدەگەن اكەمنىڭ ەحوبا قۇداي ەكەنىن ٴتۇسىندىم!
مەن كوكتەگى اكەمنىڭ ەركىن ورىنداپ، كوڭىلىنەن شىققىم كەلدى، الايدا ەسىرتكى مەن ىشىمدىكتىڭ قۇلدىعىنان بوساي الماي ٴجۇردىم. بىردە يسانىڭ ماتاي 6:24 گى «ەشكىم ەكى قوجايىنعا بىردەي قۇل بولا المايدى» دەگەن سوزدەرى ساناما جەتتى. وسى كەڭەستى ورىنداۋعا قورىنتتىقتارعا 1-حات 15:33 گى «جامان ورتا جاقسى ادەتتەن ايىرادى» دەگەن پرينسيپ كوپ كومەكتەستى. مەن بۇرىنعى ورتادا، بۇرىنعى دوستارىممەن بىرگە ۋاقىت وتكىزۋدى دوعارماسام، جامان ادەتتەرىمنەن ارىلا المايتىنىمدى ٴتۇسىندىم. كيەلى كىتاپتاعى كەڭەس مەن ٷشىن ايدان انىق ەدى: كەدەرگى بولاتىن نارسەلەردەن ارىلۋ ٷشىن باتىل قادامدار جاساۋىم كەرەك-ٴتىن (ماتاي 5:30).
مۋزىكاعا تىم اۋەس بولعاندىقتان حەۆي-مەتالدى تاستاۋ مەن ٷشىن قيىننىڭ قيىنى بولدى. الايدا قاۋىمداعى دوستارىمنىڭ ارقاسىندا ودان ٴبىرجولا باس تارتتىم. سونداي-اق ىشىمدىك پەن ەسىرتكىنى دە تاستادىم، شاشىمدى قيىپ، ساقالىمدى الدىم جانە قارا كيىم كييۋدى قويدىم. سيۋزانعا شاشىمدى قيعالى جاتقانىمدى ايتقاندا، ول تاڭعالىپ: «مەن دە پاتشالىق سارايىنا بارىپ، وندا نە ىستەيتىندەرىڭدى كورەيىنشى!»— دەدى. سودان، وعان قاۋىم كەزدەسۋى ۇناپ، كوپ ۇزاماي ول كيەلى كىتاپ زەرتتەۋ ساباعىن باستادى. سيۋزان ەكەۋىمىز زاڭدى نەكەگە تۇردىق، ال 2008-جىلى ەحوبا كۋاگەرلەرى رەتىندە شومىلدىرۋ راسىمىنەن وتتىك. ەحوباعا اناممەن بىرگە قىزمەت ەتكەنىمىز — ٴبىز ٷشىن زور قۋانىش.
تيگىزگەن پايداسى: مەن وسى دۇنيەنىڭ الدامشى قىزىعى مەن دوسسىماقتارىنان قۇتىلدىم. مۋزىكانى قازىر دە ۇناتامىن، الايدا بۇل رەتتە تالعامپاز بولۋعا تىرىسامىن. باسىمنان تالاي نارسەنى وتكەرگەندىكتەن جاقىندارىما جانە باسقا دا ادامدارعا، اسىرەسە قاۋىم جاستارىنا كوپ كومەكتەسە الامىن. مەن ولارعا وسى دۇنيەدەگى نارسەلەر كوز تارتارلىق بولىپ كورىنگەنمەن، اقىر سوڭىندا نەبارى «قوقىس» بولىپ شىعاتىنىن ايتىپ تۇسىندىرەمىن (فىلىپىلىكتەرگە 3:8).
مەن سۇيىسپەنشىلىك پەن تىنىشتىق ورناعان قاۋىمنان ادال دوستار تاپتىم. ال ەڭ باستىسى — ەحوبا قۇدايعا جاقىنداپ، ٶزىم اڭساعان اكەنى تاپتىم.
[سىلتەمە]
a «تاباندىلىق ارقىلى تابىسقا جەتۋ» (حانزۇشا) دەپ اتالاتىن بۇل ماقالا «كۇزەت مۇناراسىنىڭ» 2000-جىلدىڭ 1-اقپانىنداعى سانىنىڭ 4—6 بەتتەرىندە ورنالاسقان.
[13-بەتتەگى سوزدەر]
«ەحوبانىڭ مەنى وزىنە قايتا جاقىنداتىپ تارتقانىنىڭ ارقاسىندا وعان ورالا الدىم»