Nkand’a Nzambi Zingu kia Wantu Usobanga

ADIEYI diafila yakala dimosi mu vutuka muna dibundu dina kabembola? Aweyi toko dimosi kasololwela mpila ese kavavanga muna zingu kiandi kiawonso? Tanga dina wantu awaya bavova.

Mfwete vutuka kwa Yave.”​—ELIE KHALIL

MVU KAWUTUKA: 1976

NSI: CHIPRE

LUSANSU: MWAN’ANKOLAMI

ZINGU KIAME: Kuna Chipre yawutukila yo sansukila kuna Austrália. Mase mame Mbangi za Yave, bavanganga mawonso muna kundonga o zola Yave ye Nkand’a Nzambi una vo i Diambu diandi. Kansi, muna mvu mia kileke, yayantika kolama. Yavaikanga muna fuku yo kwenda wanana ye matoko ye ndumba zakaka. Twayiyanga makalu yo vanga mambu mayingi mambi.

Kuna lubantiku, kuna nsweki yavangilanga mambu mama mu kuma kia wonga wa kendeleka mase mame. Kansi malembe-malembe, wonga wau wafokoka. Yavanga kikundi ye wantu bansunda kimbuta ana ke bazolanga Yave ko yo kituka se mbandu ambi kwa mono. Kuna kwalanda, yavovesa mase mame vo kizolele diaka kala mu dibundu diau ko. Bavava kunsadisa kuna luzindalalu lwawonso, kansi kiawila malongi mau ko. Mase mame bakendalala kikilu.

Vava yasisa nzo a mase ma­me, yayantika nua diamba yo lwaka yamu tezo kia kuna yo teka diamba. Yakivana muna mavangu ma zumba yo viokesa ntangwa yayingi mu fulu ya nkembo muna fuku. Yayantika funga makasi mu nzaki. Avo muntu ovovele yovo vanga diambu dina kizolele ko, yafunganga kikilu makasi. Nkumbu miayingi yabaminanga wantu yovo kubawanda. Yavanganga mawonso mana yalongwa vo Nkristu kafwete mo vanga ko.

UNA NKAND’A NZAMBI WASOBELA ZINGU KIAME: Yakituka se nkundi a toko dimosi wanuanga diamba ona wafwilwa ese vava kakala kindende. Nkumbu miayingi twamokenanga yakuna dingi-dingi muna fuku. Lumbu kimosi, wayantika kunzayisa kinsona kemonanga mu kuma kia lufwa lwa se diandi. Wau vo yalongwa oma ma lufuluku muna kileke, yayantika kunzayisa lusansu lwa Yesu, ona wafula mafwa yo sia nsilu vo osinga fula diaka mafwa kuna sentu. (Yoane 5:​28, 29) Yamvovesa vo: “Yindula e lumbu osinga mona diaka o s’aku. Yeto awonso tulenda zinga yakwele mvu muna Paradiso ova ntoto.” E mvovo miami miasimba kikilu o ntim’a nkundi ame.

Ezak’e ntangwa, o nkundi ame wayuvulanga yuvu mu kuma kia lumbu yambaninu yovo Elongi dia Nzambi mu Ntatu. Yasadilanga Nkand’andi a Nzambi yo kunsonga sono yayingi yavovanga e ludi mu kuma kia Yave wa Nzambi, Yesu ye lumbu yambaninu. (Yoane 14:28; 2 Timoteo 3:​1-5) Konso ntangwa yamokenanga oma ma Yave yo nkundi ame, e ngindu zame mpe zavutukanga kwa Yave.

Malembe-malembe, e mbongo a ludi kia Nkand’a Nzambi yakala muna ntim’ame, ina mase mame bavavanga kuna, yayantika nungunuka. Kasikil’owu, ezak’e ntangwa vava twanuanga diamba ye akundi ame, vana vau yayantikanga yindula mu kuma kia Yave. Ayingi muna akundi ame bavovanga vo Nzambi bazolanga, kansi e mavangu mau masonganga vo ke bazolanga Nzambi ko. Wau vo kiazola kala nze yau ko, yabakula dina fwete vanga. Diavavanga vo yavukuta kwa Yave.

O zaya dina fwete vanga diambu diakaka, o vanga dio mpe diambu diakaka. Diasazu diakala mu soba eyaka fu, ke diakala kikilu diampasi ko mu yambula nua diamba. Yayambula mpe yikundi yakala yau, yo yantika longoka Nkand’a Nzambi yo nkuluntu mosi wa Nkristu.

Kansi, diampasi diakala mu soba e fu yakaka. Ngolo kikilu diavavanga mu sunda e fu kia funga makasi. Ezak’e ntangwa yalendanga wo vanga, kansi ke vaviokanga kolo ko makasi mavutukanga diaka. Ediadi diantokanesanga kikilu, kadi yabanzanga vo kilenda soba ko. Kuna nkenda zawonso, yamokena ye nkuluntu ona walongokanga yame Nkand’a Nzambi. Kuna luzindalalu ye ngemba zawonso, watoma kunkasakesa kikilu. Lumbu kimosi, wampovesa vo yatanga elongi dimosi mun’Eyingidilu diasonganga o mfunu wa zindalala. * Twavovela mambu mfwete vanga kele vo mfungidi makasi. Malembe-malembe, muna sadilanga elongi yatanga yo zindalala samba kwa Yave, yalenda sunda e fu kiaki. I bosi, muna Abidi, 2000, yavubwa se Mbangi a Yave. Kieleka, mase mame batoma yangangalala.

MPILA YABAKILA E NLUTA: Owau ngina ye luvuvamu lwa ntima ye ntona zambote, mu zaya vo kifunzulanga diaka nitu ame ko mu kuma kia nua diamba yovo tá e zumba. Kiese kiayingi ikalanga kiau muna mawonso ivanganga, kiakala kuna salu, mu lukutakanu lw’Akristu, yovo kwenda sakana. Owau, ngindu zasikila ngina zau mu kuma kia zingu.

Itondanga Yave mu kuma kia mase mame, ana ke bayoya ko muna kunsadisa. Isungamenanga mpe mvovo mia Yesu muna Yoane 6:44: “Ke ven’on’olend’o kwiz’oku ngina ko, ovo o Se, ona wantuma, kekuntunta ko.” Kiese kiayingi ikalanga kiau mu zaya vo yavutuka kwa Yave wau vo wantunta.

 “Ese yavavanga.”​—MARCO ANTONIO ALVAREZ SOTO

MVU KAWUTUKA: 1977

NSI: CHILE

LUSANSU: MU BUKA KIA DEATH-METAL YAKALA

ZINGU KIAME: Ngudi ame wansansa kuna Punta Arenas, mbanza yambote ina muna nzila Estreito de Magalhães, lukufi ye América do Sul. Mase mame bavambana vava yakala ye mvu tanu, ediadi diantwasila kinsona kiayingi. Ese yavavanga.

Ngudi ame walongokanga Nkand’a Nzambi ye Mbangi za Yave, wandatanga muna tukutakanu tw’Akristu kun’Eseka dia Kintinu. Kansi, kiazolanga kwenda ku lukutakanu ko, nkumbu miayingi yafunganga makasi muna nzila. Vava yakala ye mvu 13, yayambula kwenda mu tukutakanu.

Kuna kwalanda, yayantika zola miziki yo bakula vo ngangu za yimbila yakala zau. Muna kimbuta kia mvu 15, yayantika yimbila miziki mia heavy-metal ye death-metal muna nkinzi, muna fulu ya tekela malavu ye mu fulu yakaka. Yakota muna buka ki’ayimbidi batoma zayakana ana bamfila mu yangalela música clássica. Yayantika longoka miziki mu sikola mosi ya mbanza. Vava yalungisa mvu 20, yayaluka yo kwenda zingila kuna mbanza Santiago, ina vo i mbanz’a kimfumu, mu kwamanana tanga sikola. Yakwamanana mpe muna buka kia miziki mia heavy-metal ye death-metal.

Muna kolo kiakina kiawonso, yatokananga kwayingi kadi yamonanga vo mawonso yavanganga ke makala mfunu ko. Muna vengomona ngindu zazi, yayantika nua malavu ma nkolwa ye diamba kumosi y’akundi ame, ana yabadikilanga vo yitu yame. Ngindu za ukolami yakala zau ezi zamonekanga muna mpw’ame. Mvwatu miandombe kaka yavwatanga, kiazenganga diaka nzevo ko, e nsuki zame zalwaka yamuna luketo.

Kuna kwalanda, yayantika nwana yo vavwa kwa mapolisi. Lumbu kimosi, vava yakala ku nsi a nkolwa, yanwana ye buka ki’ateki a diamba ana batutontanga kumosi y’akundi ame. Yabundwa kwa buka ki’ateki a diamba yo kumbosola ebundi.

Kansi, e diambu dialuta kunkendeleka kw’akundi ame diatuka. Lumbu kimosi, yabakula vo makangu mame wakituka diaka se nkento a nkundi ame se vioka mvu miayingi. Akundi ame akaka mbumba banswekelanga. Mpasi kikilu diampanga muna ntima.

Yavutuka diaka kuna Punta Arenas, yayantika longa e miziki yo sala nze nsiki a viola. Yakwamanana mpe yimbila muna buka kia heavy-metal ye death-metal. Yazayana ye mwan’a ndumba mosi una ye nkumbu Sussan, twayantika zingila nzo mosi. I bosi, Sussan wabakula vo ngudi andi Elongi dia Nzambi mu Ntatu kakwikilanga, kansi mono kiakwikilanga dio ko. Sussan wangyuvula vo: “Akieyi i ludi?” Yamvutula vo yazaya wo vo Elongi dia Nzambi mu Ntatu dialuvunu kansi kiakala ye ziku kia Nkand’a Nzambi ko. Kansi, yazaya aki nani balenda kunsadisa. Yamvovesa vo Mbangi za Yave balenda kunsonga e ludi kia diambu diadi muna Nkand’a Nzambi. I bosi yavanga diambu dina kiavavanga ko mu mvu miayingi​—yasamba kwa Nzambi yo lomba lusadisu lwandi.

Ke vavioka lumbu yayingi ko, yamona muntu ona yateka zaya, yanyuvula kana vo Mbangi a Yave. Kana una vo wonga kakala wau mu kuma kia mpw’ame, kuna ngemba zawonso wavana e mvutu za yuvu yame mu kuma kia tukutakanu kun’Eseka dia Kintinu. Yabakula vo e moko kiaki i mvutu za sambu kiame. Yayenda kun’Eseka dia Kintinu yo vwandila kuna nima kimana wantu balembi kunzayidila. Kansi, ndonga bayantika kunsungamena kadi yakwendanga muna tukutakanu vava yakala kindende. Bankayisa yo kumbimba kuna zola kwawonso, yamona luvuvamu lwa ntima. Diakala nze mono yavutuka ku nzo. Vava yamona muntu ona walongokanga yame Nkand’a Nzambi vava yakala kindende, yanyuvula kana vo tulenda vutuka diaka longoka.

UNA NKAND’A NZAMBI WASOBELA ZINGU KIAME: Lumbu kimosi yatanga sono kia Ngana 27:11 kivovanga vo: “Lungalala, e mwan’ame, wamwesa ntim’ame e kiese.” Yasivika mu zaya vo mpasi muntu olenda yangidika Mvangi a lekwa yawonso. Yabakula vo Yave i Se ona yavavanga muna zingu kiame.

Yazola yangidika S’ame ezulu yo vanga luzolo lwandi, kansi mbundu a nua diamba ye malavu yakala mu mvu miayingi. Yabakula elongi dia Yesu diasonama muna Matai 6:24 divovanga vo: “Ke ven’on’olenda sadila mfumu zole ko.” Ekolo yasianga e ngolo za soba e zingu kiame, o nkanikinu una muna 1 Korinto 15:33 uvovanga vo “e yikundi yambi ifwasa fu yambote” wansadisa kikilu. Yabakula vo diampasi mu yambula fu yambi avo nkwamanene kwenda mu fulu yakulukilwa yo kangala yo wantu yakangalanga yau. Luludiku lwa Nkand’a Nzambi lwatoma kiá: Diavavanga vo yavanga mawonso mu yambula mambu mawonso mantesanga esakuba.​—Matai 5:30.

E nzengo zisundidi e mpasi yabaka i yambula e miziki mia heavy-metal mina yatoma zolanga. Kansi, muna lusadisu lw’akundi ame muna nkutakani, yalenda kuyivevola. Yayambula kolwa malavu yo nua diamba. Yazenga mpe e nsuki ye nzevo zame yo yambula vwata kaka nlele miandombe. Vava yazayisa Sussan vo nzolele zenga e nsuki zame, wavava zaya kana nki yayenda salanga kun’Eseka dia Kintinu. Wavova vo: “Ntwadi tukwenda yamona mana mevangamanga kun’eseka dia Kintinu.” Wayangalela mana kamona, muna kuma kiaki oyandi mpe wayantika longoka Nkand’a Nzambi. Kuna kwalanda mono yo Sussan twakazala. Muna mvu wa 2008, twavubwa se Mbangi za Yave. Tuna ye kiese kia sadila Yave kumosi yo ngudi ame.

MPILA YABAKILA E NLUTA: Yayambula landa e mambu ma nza yayi ke metwasanga kiese kiasikila ko yo bembola yikundi yambi. Yakinu zola miziki, kansi owau sola isolanga. Isadilanga mbandu ya mana mambwila mu sadisa yitu yame ye akaka, musungula aleke. Nzolele kubasadisa bazaya vo mambu mayingi ma nza yayi malenda moneka vo mambote, kansi kuna mfoko mekitukanga se “mbole” yovo má yakondwa o mfunu.​—Filipi 3:8.

Yasolola akundi ambote muna nkutakani y’Akristu muna tulenda wana zola ye luvuvamu. Vana ntandu, muna vanga kikundi ye Yave, yasolola Ese ona yavavanga.

[Mvovo Vana Yand’a]

 [Mvovo mia Sina muna lukaya lwa 13]

“Yavutuka kwa Yave wau vo wantunta”