Bibele Ya Cincanga Bupilo Bwa Batu

KIÑI se ne si tahisize kuli muuna yo muñwi a kutele mwa lubasi lwa Sikreste mwa naa huliselizwe? Mutangana yo muñwi naa konile cwañi ku fumana ndatahe ili yo naa nyolezwi ku ba ni yena mwa bupilo? Mu ipalele ze ne ba bulezi batu ba.

“Ne ni tokwa ku kutela ku Jehova.”—ELIE KHALIL

SILIMO SE NE BA PEPILWE: 1976

NAHA KO NE BA PEPEZWI: CYPRUS

LITABA ZE EZAHEZI: MWANA WA LINGULUNDE

BUPILO BWA KA BWA KWAMULAHO: Ne ni pepezwi kwa Cyprus, kono ne ni hulezi kwa Australia. Bashemi ba ka ki Lipaki za Jehova, mi ne ba likile ka mo ne ba konela kaufela ku ni luta ku lata Jehova ni Linzwi la hae, yona Bibele. Kono ha ne ni nze ni hula na kala ku ba mukwenuheli. Ne ni tobanga mwa ndu busihu ku yo bonana ni balikani ba ka. Ne lu uzwanga limota ni ku eza lika ze ñwi ze maswe.

Kwa makalelo, ne ni ezezanga lika zeo kwa mukunda ka ku saba kuli ni ka nyemisa bashemi ba ka. Kono nako ha ne inze i ya, sabo yeo ya fela. Na ba ni balikani ba bahulu ku na ili ba ne ba sa lati Jehova mi ba ni yembulula. Kwa mafelelezo, naa bulelela bashemi ba ka kuli ha ni sa tabela ku swalisana ni bona mwa bulapeli bwa bona. Ne ba likile ka taata ku ni tusa kono ne ni hanile tuso ye ne ba ni file. Bashemi ba ka ne ba swabile hahulu.

Ha se ni zwile fa ndu ya bashemi ba ka, naa kalisa ku itusisa milyani ye kola, mi ne ni limanga ni ku lekisa matokwani a mañata. Na kalisa buitamaeli ni ku tandanga nako ye ñata hahulu mwa manwelo a bucwala. Hape naa ba wa kacima-cima. Haiba mutu yo muñwi a ni bulelela kamba ku eza nto ye ñwi ye ne ni sa tabeli, ne ni yemanga hahulu mi hañata ne ni mu yukaukelanga kamba mane ku mu titika. Ka bukuswani, ne ni ezanga lika kaufela za sa lukeli ku eza Mukreste.

MO NE I CINCELIZE BUPILO BWA KA BIBELE: Na ba mulikani yo mutuna wa mutu ya naa itusisanga milyani ye kola ili yo bo ndatahe ne ba timezi inze a sa li yo munyinyani hahulu. Hañata, ne lu tonanga ni yena ku fita fahalaa busihu. Ka linako ze ñwi naa ni bulelelanga kuli naa ikutwanga bulutu kabakala ku shwelwa ki bo ndatahe. Bakeñisa kuli ha ne ni sa li mwanana ne ni itutile ka za zuho ya bafu, na kala ku mu talusezanga ka za kuli Jesu naa zusize ba ba shwile mi u sepisa ku eza cwalo kwapili. (Joani 5:28, 29) Ne ni mu bulelelanga kuli: “U ka bona bo ndataho hape. Kaufela luna lwa kona ku pila ku ya ku ya ile fa lifasi mwa Paradaisi.” Manzwi ao naa fitile mulikanaa ka kwa pilu.

Ka linako ze ñwi, mulikanaa ka naa ni buzanga litaba ze cwale ka za mazazi a maungulelo ni tuto ya Silalu. Ne ni itusisanga Bibele ya hae ku mu  bonisa mañolo a shutana-shutana a patulula niti ka za Jehova Mulimu, ka za Jesu, ni ka za mazazi a maungulelo. (Joani 14:28; 2 Timotea 3:1-5) Ku bulelelanga mulikanaa ka niti ka za Jehova, ne ku ni tahisezanga kuli ni nahane hahulu ka za Jehova.

Hanyinyani-hanyinyani, litaba za niti ye mwa Bibele ze ne ba ni lutile bashemi ba ka za kala ku mela mwa pilu ya ka. Ka mutala, ka linako ze ñwi ha ne ni banga kwa mikiti ni balikani ba ka inze lu itusisa milyani ye kola, ne ni ipumananga inze ni nahana ka za Jehova. Buñata bwa balikani ba ka ne ba ipapatanga kuli ba lata Mulimu kono likezo za bona ne li sa bonisi cwalo. Kabakala kuli ne ni sa lati ku ba sina bona, naa lemuha ze ne ni tokwa ku eza. Ne ni tokwa ku kutela ku Jehova.

Ki niti kuli, ku bunolo ku ziba sa tokwa ku eza mutu kono ku taata ku si eza. Ne ku ni bezi bunolo ku eza licinceho ze ñwi ze cwale ka, ku tuhela ku itusisa milyani ye kola ni ku ambuka balikani ba ne ba itusisanga milyani ye kola. Na kalisa ku ituta Bibele ni muuna-muhulu yo muñwi wa Sikreste.

Nihakulicwalo, ku eza licinceho ze ñwi ne li ko ku taata hahulu. Ne ku ni bezi hahulu taata ku tuhela ku ba ni kacima-cima. Fokuñwi ne ni ezanga hande kono ne ni zwafiswanga hahulu ki ku eza nto ye ne ni tuhezi. Ne ni ikutwanga bumaswe ha ne ni kutelanga ku eza nto ye ne ni sa tabeli ku eza. Ka ku zwafa, na atumela muuna-muhulu ya naa ituta Bibele ni na ni ku mu bulelela butata bo. Muuna-muhulu yo, naa na ni sishemo ni pilu-telele mi kamita naa ni susuezanga. Ka lizazi le liñwi, muuna-muhulu yo a ni susueza ku bala taba ye ñwi ya mwa Tawala ya Mulibeleli * ye ne bulela ka za butokwa bwa ku sa zwafa. Ne lu ikambotile ka za mihato ye ne ni kona ku nga muta ni ikutwa bunyemi. Hanyinyani-hanyinyani, kabakala ku nahananga ka za taba ye mwa Tawala ya Mulibeleli yeo ni ku lapelanga ku Jehova, ne ni konile ku tuhela ku ba wa kacima-cima. Mi mwa April ka silimo sa 2000, na kolobezwa sina yo muñwi wa Lipaki za Jehova. Bashemi ba ka ne ba tabile hahulu.

MO NI TUSELIZWE: Cwale se ni na ni mwangalwa ni lizwalo le li kenile kakuli na ziba kuli ha ni sa isilafazanga ka milyani ye kola kamba ka buhule. Ku si na taba ni ze ni eza, ni banga ya tabile ibe kuli ni kwa musebezi, kwa mikopano ya Sikreste kamba kwa ku itabisa. Bupilo se ni bu bonela mu sili cwale.

Ni itumela ku Jehova kabakala kuli bashemi ba ka ne ba si ka tuhela ku ni tusa. Hape ni hupulanga manzwi a Jesu a fumaneha kwa Joani 6:44 a li: “Ha ku na mutu ya kona ku taha ku na, konji haiba Ndate, ya ni lumile, a mu hoha.” Ni ya tabile hahulu ku nahana kuli ni konile ku kutela ku Jehova kakuli u ni hohezi ku yena hape.

 “Ne ni lakaza hahulu ku ba ni bo ndate.”—MARCO ANTONIO ALVARE SOTO

SILIMO SE NE BA PEPILWE: 1977

NAHA KO NE BA PEPEZWI: CHILE

LITABA ZE EZAHEZI: NE LI YO MUÑWI WA BALIZI BA LIPINA ZE TIBANYA MAZEBE

BUPILO BWA KA BWA KWAMULAHO: Ne ni hulisizwe ki boma mwa tolopo ye nde ya Punta Arenas ye mwa Strait of Magellan bukaufi ni mboela wa South America. Bashemi ba ka ne ba kauhani inze ni na ni lilimo ze ketalizoho ili nto ye ne i ni tahiselize ku ikutwa ku yubekwa. Ne ni lakaza hahulu ku ba ni bo ndate.

Boma ne ba itutanga Bibele ni Lipaki za Jehova mi ne ba yanga ni na kwa mikopano ya Sikreste kwa Ndu ya Mubuso. Nihakulicwalo, ne ni sa latangi ku ya kwa mikopano mi ne ni lilanga nzila kaufela. Ha ni to banga wa lilimo ze 13, na tuhela ku yanga kwa mikopano yeo.

Ka nako ye swana yeo na kalisa ku lata hahulu lipina mi na lemuha kuli ne ni na ni mpo ya ku liza lipina. Ha ni to kwanisanga lilimo ze 15 ne se ni lizanga lipina ze tibanya mazebe kwa mikiti ye mituna ya lipumulo, kwa mikiti-nyana, mane cwalo ni kwa manwelo a bucwala. Ku eza siango ni balizi ba bañwi ba ba cuukile ne ku tahisize kuli ni tabele lipina ze nde. Na kalisa ku ituta lipina kwa sikolo sa lipina se ne si li mwa silalanda sa luna. Ha ne ni li wa lilimo ze 20 na tutela kwa muleneñi o mutuna wa Santiago ilikuli ni yo zwelapili ni lituto za ka zeo. Hape ne ni zwezipili ku ba mwa likwata za balizi ba lipina ze tibanya mazebe.

Nako yeo kaufela, ne ni katalizwe hahulu ki bulutu. Ka mulelo wa ku bata ku feza bulutu bo, ne ni nwanga hahulu bucwala ni ku itusisa milyani ye kola ni balikani ba ka ba ne se ni nga kuli ki bahabo na. Ne ni na ni moya wa buipanguli, mi moya wo ne u bonahazwa ki ponahalo ya ka. Ne ni tinanga liapalo ze nsu, ku uta milelu, ni ku tuhelela milili ya ka ku hula kuli mane esi ku fita mwa teka.

Kamita ne ni li mutu wa lindwa bakeñisa mikwa ya ka yeo ili nto ye ne i tahisanga kuli ni swaliwe ki mapokola ka nako ni nako. Nako ye ñwi ha ne ni kozwi bucwala, na lwanisa sikwata sa balekisi ba milyani ye kola kabakala kuli ne ba sweli ku lu shemaeta. Balekisi ba milyani ye kola bao ba ni titika maswe kuli mane mutahali wa ka wa kweta.

Kono balikani ba ka ki bona ba ne ba ni utwisize hahulu butuku kwa pilu. Zazi le liñwi na utwa kuli mulikanaa ka yo mutuna u zamaya ni nyazi ya ka, mi ne se ba ezize cwalo ka lilimo-limo kono balikani ba ka ne ba ni patezi ka za teñi. Taba yeo ne i ni utwisize hahulu butuku kwa pilu.

Na kutela kwa tolopo ya Punta Arenas ili ko ne ni yo lutanga batu lipina ni ku beleka sina mulizi wa mufuta o muñwi wa banjo. Hape na yo zwelapili ku ba mwa likwata za balizi ba lipina ze tibanya mazebe mi ne lu beyanga lipina za luna fa matapa. Na kopana ni musizana ya buheha wa libizo la Sussan mi lwa kalisa ku pila hamoho ni yena. Hasamulaho wa nako, Sussan a ziba kuli bo mahe ne ba lumela mwa tuto ya Silalu ili tuto ye ne ni sa lumeli. Sussan a ni buza kuli: “Kanti ki ifi niti ka za tuto ye?” Na mu alaba kuli ne ni ziba kuli tuto ya Silalu ki ya buhata, kono ne ni sa koni ku mu kolwisa ka ku itusisa Bibele. Nihakulicwalo ne ni ziba ya naa ka kona ku mu tusa. Na mu bulelela kuli Lipaki za Jehova ne ba ka mu bulelela niti ka ku itusisa Bibele. Na lapela ku Mulimu ni ku mu kupa kuli a ni tuse ili nto ye ne se ni ezize kale.

Mazazinyana ku zwa fo, na bona muuna ya naa bonahala inge Paki ya Jehova, mi na mu buza haiba ne li yo muñwi wa Lipaki za Jehova. Nihaike  kuli naa sabisizwe ki ponahalo ya ka, naa alabile hande lipuzo za ka kaufela ka za mikopano ye belanga kwa Ndu ya Mubuso. Ne ni ikolwisize kuli tapelo ya ka ne i alabilwe kabakala ku kopana ni muuna yo. Ha ne ni ile kwa Ndu ya Mubuso, na yo inela kwa lipula za kwamulaho ilikuli batu ba si ke ba ni ziba. Kono batu ba bañata ba ni ziba mi ba hupula kuli, ne ni tahanga kwa mikopano inze ni sa li mwanana. Ba ni amuhela ni ku ni kumbata ka lilato mane ki na ya ikutwa ku yoyelwa. Ne ku swana feela inge kuli ni kutezi kwahae. Ha ne ni kopani ni muuna ya naa ni lutanga Bibele inze ni sa li mwanana, na mu kupa kuli a zwelepili ku ituta ni na hape.

MO NE I CINCELIZE BUPILO BWA KA BIBELE: Zazi le li ñwi na bala liñolo la Liproverbia 27:11, le li bulela kuli: “Mwanaa ka u talife, mi u tabise pilu ya ka.” Ne ni tabile hahulu ku ziba kuli mutu wa kona ku tabisa Mubupi wa pupo kaufela. Na lemuha kuli Jehova ki yena Ndate ye ne ni bata mwa bupilo bwa ka kaufela!

Ne ni bata ku tabisa Ndate ya kwa lihalimu ni ku eza tato ya hae, kono ne ni ngongwezwi ki milyani ye kola ni bucwala ka lilimo ze ñata. Na fita fa ku utwisisa manzwi a Jesu a ñozwi kwa Mateu 6:24 a li: “Ha ku na mutu ya kona ku sebeleza malena ba babeli.” Ha ne ni nze ni ikataza ku eza licinceho mwa bupilo bwa ka, ne ni fitilwe kwa pilu ki sikuka se si ñozwi kwa 1 Makorinte 15:33 se si li: “Liango ze maswe li sinya mikwa ye minde.” Na lemuha kuli ne ni si ke na kona ku tuhela mikwa ya ka ye maswe ha ne ni ka zwelapili ku yanga kwa libaka ze maswe ni ku ba ni liango ze maswe. Likuka za mwa Bibele ne li utwahala, ne ni swanela ku eza licinceho ze tuna kuli ni kone ku tuhela lika ze ne ni sitatalisa.—Mateu 5:30.

Bakeñisa kuli ne ni lata hahulu lipina, ne ku ni bezi taata ku tuhela ku liza ni ku telelezanga kwa lipina ze tibanya mazebe. Kono ka ku tusiwa ki balikani ba ka mwa puteho, ne ni konile ku tuhela ku lata lipina ze tibanya mazebe. Na tuhela ku nwa hahulu bucwala ni ku itusisa milyani ye kola. Hape na kuta milili ni milelu ya ka, mi na tuhela ku tinanga feela liapalo ze nsu. Ha ne ni taluselize Sussan kuli ne ni bata ku kuta milili ya ka, a bata ku ziba ze ne ni yo ezanga kwa Ndu ya Mubuso. A ni bulelela kuli: “Na ya ni mina kuli ni yo iponela ze ezahalanga kwa Ndu ya Mubuso!” Za naa boni kwa Ndu ya Mubuso ne li mu tabisize hahulu kuli mane a kala ku ituta Bibele hamulahonyana wa fo. Kwa mafelelezo, lwa nyalana ni Sussan. Mwa silimo sa 2008, lwa kolobezwa sina Lipaki za Jehova. Lu ba ba tabile ku swalisana ni boma mwa ku sebeleza Jehova.

MO NI TUSELIZWE: Ni konile ku ambuka liango ze maswe mi cwale se ni na ni tabo sakata. Ni sa ikolanga lipina, nihaike kuli cwale se ni ketanga lipina ze nde. Ni tusanga lubasi lwa ka ni batu ba bañwi, sihulu mikulwani, ka ku ba taluseza ze ezahezi mwa bupilo bwa ka. Ni bata ku ba tusa ku ziba kuli buñata bwa lika ze mwa lifasi niha li bonahala ku ba ze nde, ha li tusi se siñwi kakuli li swana feela sina “matakala.”—Mafilipi 3:8.

Ni fumani balikani ba ba sepahala mwa puteho ya Sikreste mo ku na ni kozo ni lilato la niti. Kwanda zeo feela, ka ku sutelela ku Jehova, ni ikutwa kuli ni fumani Ndate ye ne ni nyolezwi ku ba ni yena.

[Litaluso za kwatasi]

[Manzwi a fa likepe 13]

“Ni konile ku kutela ku Jehova kakuli u ni hohezi ku yena hape”