Muma Loko Kit Ngima Ji

ANG’O ma nomiyo dichwo moro ma nobayo yo oduogo e din ma ne oyudo opidhee? Ere kaka rawera moro mawuowi nochopo gombo ma nosebedogo e ngimane duto mar bedo gi ng’at ma doluong ni wuon mare? Som ane gima jogi wacho.

“Ne dwarore ni aduog ir Jehova.”​—ELIE KHALIL

HIGA MA NONYUOLEE: 1976

PINY MOAE: CYPRUS

CHON: WUOWI MA NE OLAL

NGIMANA MACHON: Ne onyuola e piny Cyprus, to ne adongo Australia. Jonyuolna gin Joneno mag Jehova, kendo ne gitimo duto ma ginyalo mondo gipuonja hero Jehova koda Wachne, ma en Muma. Kata kamano, kane abedo rawera ne achako ng’anjo. Ne apondo gotieno mondo adhi arom gi rowere mamoko. Ne wakwalo mtokni to mano nomiyo wadonjo e chandruoge mamoko mang’eny.

Kane eka achako, napando timbenago nikech ne aluoro chwanyo jonyuolna. Kata kamano, mosmos luorono ne olal. Ne achako mako osiep gi joma dongona ahinya maok ohero Jehova, kendo ne giketha. Gikone, nanyiso jonyuolna ni ok adwar bedo e din margi. Ne gitemo konya ka gihoyore mos, kata kamano, ne atamora rwako kony margi. Mano ne ohinyo chuny jonyuolna ahinya.

Bang’ dar wuok e dalawa, ne achako tiyo gi yedhe mamero, mochopo kama apidho kendo auso njaga mang’eny. Ne adak e ngima mar anjawo kendo ne atiyo gi seche mang’eny kuonde thum. Bende ne abedo ja mirima. Kane ng’ato owacho gimoro machwanya, ne wang’a lil gi mirima, kinde mang’eny ne arogo ne ji kendo agoyogi. E yo machuok, ne atimo gigo duto ma ne opuonja ni kik atim kaka Jakristo.

KAKA MUMA NOLOKO NGIMANA: Ne abedo osiep gi jal moro ma wuon mare ne otho kapod otin to jalno bende ne tiyo gi yedhe mamero. Ne wajobudho ahinya gotieno ka wagoyo mbaka. Seche moko e otieno ma kamago, nonyalo yawo chunye ma onyisa kaka ne ogombo wuon mare. Nikech ne adongo ka ang’eyo ni nitie geno mar chier, matin nono nayudo ka awuoyo kode e wi Yesu—ni ne ochiero jogo ma ne osetho, kendo ni ne osingo mar timo kamano kinde mabiro. (Johana 5:28, 29) Ne anyalo nyise niya: “Parie ni ibiro neno wuonu kendo. Waduto wanyalo dak nyaka chieng’ e Paradis e pinyka.” Wechegi ne omulo chuny osiepna.

 To kinde moko osiepna ne nyalo chako mbaka e wi weche kaka ndalo giko kata puonj mar Didek. Ne anyalo kawo Muma mare ma anyise ndiko mopogore opogore manyiso adiera e wi Jehova Nyasaye, e wi Yesu, koda e wi ndalo giko. (Johana 14:28; 2 Timotheo 3:1-5) Kaka ne amedo wuoyo gi osiepna e wi Jehova, e kaka ne ayudo ka amedo paro e wi Jehova.

Mos mos, kodhi mag adiera mag Muma ma ne oling’ aling’a ei chunya—kodhi ma jonyuolna notemo matek pidho—nochako twi. Kuom ranyisi, kinde moko kane watiyo gi yedhe mamero kaachiel gi osiepena e budho moro, ne apo mana ka achako paro e wi Jehova. Osiepena mathoth ne wacho ni gihero Nyasaye, to timbegi ne nyiso mopogore. Nikech ne ok adwar bedo kaka gin, ne ang’eyo gima ne dwarore ni atim. Ne dwarore ni aduog ir Jehova.

Onge kiawa ni nitie pogruok maduong’ e kind ng’eyo gima ng’ato onego otim koda timo gino. Lokruok moko ne yot timo; ne aweyo mayot tiyo gi yedhe mamero. Bende ne aweyora gi osiepena machon, kendo ne achako puonjora Muma gi jaduong’-kanyakla.

Kata kamano, lokruok moko to ne tek timo. Ne tekna ahinya loyo mirimba. Ne anyalo loyo mirimba kuom kinde to bang’e apo mana ka mirima oloya. Kane mano otimorena, chunya ne chandore ka aneno ni ok abi nyalo ngang’ loyo nyawono. Kinde ma chunya onyosore kamano ne awuoyo gi jaduong’-kanyakla ma ne puonja Muma. Nikech ne en ng’at masiko hore mos kendo mang’won, ne ojiwa gadier. Kinde moro ne onyisa ni asom sula moro e Ohinga mar Jarito ma ne wuoyo kuom gimomiyo onego wadhi nyime timo kinda. * Ne wawuoyo e wi okenge monego akaw sama mirima omaka. Mos mos, ka atiyo gi puonj ma ne yudore e sulano, kendo ka alamo Jehova gi kinda mang’eny, ne okonya dwoko mirimba chien. Gikone, e dwe mar April 2000, ne obatisa kaka achiel kuom Joneno mag Jehova. Jonyuolna ne omor matamre gi nono.

KAKA MUMA OSEKONYA: Gie sani, pacha okuwe, chunya bende ok chandre nikech ang’eyo ni ok achid denda gi yedhe mamero kata timbe mag anjawo. E gimoro amora ma atimo, bedni an e tij andika, an e chokruok, kata ayueyo e yo moro, awinjo ka amor moloyo. Aneno ngima e yo mowinjore.

Aduoko ne Jehova erokamano kuom miya jonyuol ma ne ok ojok koda ngang’. Ajaparo bende weche mag Yesu mayudore e bug Johana 6:44: “Onge ng’ama nyalo biro ira, ma ok Wuoro ma noora e moywaye.” Amor ng’eyo ni aduogo ir Jehova nikech en ema oywaya ire kendo.

 “Ne agombo ahinya bedo gi ng’at ma aluongo ni wuora”​—MARCO ANTONIO ALVAREZ SOTO

HIGA MA NONYUOLEE: 1977

PINY MOAE: CHILE

CHON: JA BAND MAGOYO THUMBE KOKO

GIMANA MACHON: Ne opidha gi minwa e dala miluongo ni Punta Arenas, dala majaber manie aora mar Magellan machiegni gi Amerka ma Milambo. Jonyuolna ne opogo dak ka an jahigini abich, to mano nomiyo awinjo ni ojwang’a. Ne agombo ahinya bedo gi ng’at ma aluongo ni wuora.

Minwa ne puonjore Muma gi Joneno mag Jehova, kendo ne ojatera e chokruoge mag Jokristo e Od Romo. Kata kamano, chokruogego ne osina ahinya, kendo kinde mang’eny ne aywak matek sama ne wadhi kuno. Kane abedo jahigini 13, ne aweyo dhi e chokruogego chuth.

Gie kindeno, ne asechako hero thum, kendo ne afwenyo ni anyalo goyo thum maber. Kane ajahigini 15, ne ajagoyo thum mag koko e nyasi mopogore opogore, koda kuonde ma imadhoe kong’o. Tudruokna gi jothum mang’ula ne omiyo abedo gi gombo mar puonjora goyo thum mokuwe. Ne achako puonjora thum e skul moro mar thum ma ne nie alworawa. Kane ajahigini 20, ne adar adhi e dala maduong’ miluongo ni Santiago, mondo adhi nyime gi somba. Bende ne adhi nyime goyo thum e band mag thumbe koko.

Kindegi duto chunya ne chandore ahinya nikech ne aneno ni ngimana onge tiende. Mondo atem duoko paro ma kamago chien, ne amer kendo ne atiyo gi yedhe mamero kaachiel gi joband wetena ma ne koro aneno ni gin e joodwa. Ne an gi chuny mar ng’anjo, to mano ne nenore e kita maoko. Ne arwako lewni marotenge, ne apidho tika, kendo ne aweyo yie wiya odongo ma ne gichiegni chopo e nungona.

Kinde ka kinde chuny mar ng’anjo ma ne an-go ne miyo agoyora gi ji kendo aketho chike sirkal. Chieng’ moro kane amer, ne amonjo grup moro mar joma loko yedhe mamero nikech ne gichanda kaachiel gi osiepena. Jogo nogoya marach ahinya ma gituro chok lemba.

Kata kamano, joma ne ohinya malit ahinya ne gin osiepena ma ne ageno moloyo. Chieng’ moro ne afwenyo ni osiepna ma nyako ne osebedo ka nindo gi osiepna ma ngita gi del kuom higini, to osiepena duto nong’eyo wachno to ne gipanda. Wachno ne otieka chuth.

Ne adar adok Punta Arenas, kama ne achako puonjoe thum kendo tiyo tij goyo gir thum machalo gi gita. Bende ne adhi nyime goyo thum kendo loso rekod gi band mag thumbe koko. Ne amako osiep gi nyako majaber miluongo ni Sussan, kendo ne wachako dak kanyachiel. Kinde matin bang’e, Sussan ne ofwenyo ni min mare ne oyie gi puonj mar Didek, puonj ma an ne ok ayiego. Ne openja niya: “To koro adiera en mane?” Ne aduoke ni ang’eyo ni puonj mar Didek ok en adier, en mana ni ne ok anyal siro wachno e Muma. Kata kamano, ne ang’eyo joma ne nyalo timo kamano. Ne anyise ni Joneno mag Jehova ne nyalo nyise adiera mar wachno e Muma. Kae to ne atimo gima ne pok atimo kuom higini mang’eny—ne akwayo Nyasaye e lamo ni mondo okonya.

Ndalo matin bang’e, ne aneno jal moro mane chalna ka ng’at ma ang’eyo, kendo ne apenje ka en achiel kuom Joneno mag Jehova. Kata obedo  ni ne nenore maler ni ne obwok gi chalna maoko, ne odwoka e yo mang’won kane apenje wach chokruoge mitimo e Od Romo. Ne an gadier ni Nyasaye ne odwoko lamo mara kuom miyo arom gi jalno. Ne adhi e Od Romo kendo ne abet chien mogik mondo ng’ato kik nena. Kata kamano, ji mang’eny nofwenya nikech diere moko ne ajabiro e chokruoge kane pod an nyathi. Ne girwaka kendo ne gikwaka gi hera mang’eny kendo mano nomiyo awinjo ka chunya okuwe ahinya. Ne chalo ka gima ne aduogo pacho kendo. Kane aneno jal mane opuonja Muma ka pod atin, ne akwaye ni mondo opuonjre koda kendo.

KAKA MUMA NOLOKO NGIMANA: Chieng’ moro ne asomo Ngeche 27:11, mawacho niya: “Wuoda, bedi mariek, kendo mi chunya mor.” Ne ahum ahinya ng’eyo ni dhano adhana nyalo moro chuny Jachwech mar piny gi polo. Ne afwenyo ni kare Jehova e Wuoro ma ne asebedo ka adwaro e ngimana duto!

Ne adwaro ni amor Wuora me polo kendo atim dwache, kata kamano, ne asebedo misumba mar yedhe mamero koda kong’o kuom higini mang’eny. Ne apuonjora tiend puonj mar Yesu mayudore e bug Mathayo 6:24, mawacho ni “onge ng’ato ma nyalo tiyo ni ruodhi ariyo.” Kaka ne adhi nyime nyagora mondo atim lokruoge e ngimana, puonj mayudore e bug 1 Jo Korintho 15:33 ne omulo chunya ahinya, ma en ndiko mawacho niya: “Osiepe maricho ketho timbe mabeyo.” Ne afwenyo ni ne ok anyal weyo timbena maricho ka adhi nyime dhiyo kuonde ma ne ajadhiye chon kendo dhi nyime gi osiepena machon. Puonj mar Muma ne nenore maler: nyaka ne atim lokruoge madongo mondo awera chuth gi gik ma ne duoda.—Mathayo 5:30.

Nikech ne ahero thum ahinya, gima ne tekna mogik ne en weyo thumbe koko. Kata kamano, kuom tiyo gi kony mawuok kuom osiepena manie kanyakla, ne aweyora chuth gi thumbego. Ne aweyo mer kod tiyo gi yedhe mamero. Bende ne alielo wiya, ne alielo tika, kendo ne aweyo rwakora mana gi lewni marotenge. Kane anyiso Sussan ni adwaro lielo wiya, wachno ne omiyo ogombo ng’eyo gima ne atimo e Od Romo. Nowacho niya, “Abiro dhi kodi mondo ane gima timore e Od Romo!” Ne omor kod gik ma ne oneno kuno kendo matin bang’e ne ochako puonjore Muma en bende. Gikone ne wakendore gi Sussan. E higa mar 2008, ne obatiswa kaka Joneno mag Jehova. Wamor tiyo ne Jehova kanyachiel gi minwa.

KAKA MUMA OSEKONYA: Asetony mawuok e piny ma ji wuondoree ni gimor kendo asetony mawuok kuom osiepe mandhogore. Pod ahero thum ahinya, kata kamano, gie sani to ayierogi. Atiyo gi gigo maseneno e ngimana mondo akony joma nie ngima joot koda jomamoko, to moloyo, rowere. Adwaro konyogi neno ni thoth gik mayudore e pinyni nyalo nenore ni ber, kata kamano, gikone gin mana “gik miwito oko.”—Jo Filipi 3:8.

Aseyudo osiepe madier ei kanyakla mar Jokristo, kama hera gi kuwe ogundhoe. To moloyo duto, kuom sudo machiegni gi Jehova, aseyudo Wuora.

[Weche Moler Piny]

[Weche manie ite mar 13]

“Aduogo ir Jehova nikech en ema oywaya ire kendo”