BIBLE-IN NUN A THLAK DANGLAM

ENGIN nge pa pakhat chu a chhuahsan tawh a seilenna sakhuaa kîr leh tûra chêttîr? Engtin nge ṭhalai pakhat chuan a lo suangtuah ṭhin a duhthusâm pa chu a hmuh? An thusawite hi chhiar ang che.

“Jehova Hnêna Ka Kîr Leh A Ngai.”—ELIE KHALIL-A

PIAN KUM: 1976

PIANNA RAM: CYPRUS

CHANCHIN: FAPA TLAN BO

KA TUN HMA NUN: Cyprus-ah ka piang a, Australia ramah ka seilian thung. Ka nu leh pate hi Jehova Thuhretute an ni a, Pathian Jehova hmangaihna leh a Thu, Bible ngainatna ka neih theih nân theih tâwp an chhuah ṭhîn a ni. Mahse, ka tleirâwl chhoh chuan thu ka awih lo ṭan a. Ka ṭhiante hmu tûrin zânah ka chhuak ru ṭhîn a. Motor-te ruin, buaina tam tak kan tâwk ṭhîn a ni.

A tîr chuan, ka nu leh pate thinrim ka hlauh avângin chûngte chu a rûkin ka ti ṭhîn a. Mahse, zawi zawiin chu hlauhna chu a reh chho va. Jehova hmangaihna nei lotu ka aia upate chu ka kâwm ṭhîn a, anni chuan a ṭha lo lamin min thunun hneh hle. A tâwpah, ka nu leh pate hnênah chuan Thuhretute zînga mi nih ka duh tawh loh thu ka hrilh a. Anni chuan dawhthei taka min ṭanpui tum mah se, theih tâwp an chhuahnate chu ka hnâwlsak vek a. Rilru na takin ka siam a ni.

In ka chhuahsan hnu chuan, damdawite ka khawih ṭan a, ganja-te chîngin ka zuar ṭhîn ni. Nungchang bawlhhlawh lamah inhmangin, ka hun tam tak chu hlimhlawp bâwlna hmun club-ah ka hmang ṭhîn a. Ka thin pawh a chhe sâwt hle. Miin ka duh loh zâwng thu an sawi emaw, an ti emaw a nih chuan ka thinrim êm êm nghâl zêl a; tichuan, anni chu ânkhumin kutte ka thlâk hial ṭhîn. Dik tak chuan, Kristiante tâna tih loh tûr thilte chu ka ti deuh vek a ni.

BIBLE-IN KA NUN A THLAK DANGLAM DAN: A naupan laia a pain a boralsan damdawi khawih ve tho ka ṭhian pakhat nên chuan kan inkâwm ngaih ta hle a. Zân rei tak tak thleng kan inkâwm ṭhîn a ni. A châng chuan, a pa a ngaihzia a sawi ṭhîn a. Thawhleh beiseina chungchâng zirtîrna dawnga seilian ka nih angin, Isua chanchin—mitthi a kaihtho tih leh nakinah pawh kaihthawh leh a tiam thute chu ka hrilh a. (Johana 5:28, 29) “I pa i hmu leh angah han inmitthla teh. Kan za hian lei Paradis-ah chatuanin kan nung thei tihna a nih chu,” tiin ka hrilh a. Chûng thute chuan ka ṭhianpa thinlung chu a khawih hle a ni.

Ṭum dang lehah chuan, ka ṭhianpa chuan ni hnuhnûng leh Trinity thurin chungchâng chu min zâwt a. Ama Bible aṭang ngeiin Pathian Jehova, Isua, leh ni hnuhnûng chungchânga thu dik tak chuanna Bible châng ṭhenkhat chu ka chhiarsak a. (Johana 14:28; 2 Timothea 3:1-5) Ka ṭhianpa hnêna Jehova chungchâng ka hrilh hnem poh leh, keimah ngei pawhin ka ngaihtuah nasa lehzual a ni.

Ka thinglunga awm ru reng Bible thutak chi—ka nu leh pate’n theih tâwp chhuaha ka thinlunga tuh an tum—chu zawi zawiin a rawn ṭhang chho ṭan a. Entîr nân, a châng chuan ka ṭhiante nêna party-naa damdawi kan khawih laite hian Jehova chungchâng ka ngaihtuah chhuak thut ṭhîn a. Ka ṭhiante zînga tam tak chuan Pathian an hmangaih thu an sawi ṭhîn a; mahse, an thiltihte nên erawh a inpersan hle. Anmahni ang nih chu ka duh lo, ka tih ngai chu ka hre ta. Jehova hnêna ka kîr leh a ngai a ni.

Thil tih tûr hriat leh a taka tih chu a inang lo khawp mai. Inthlâk danglamna ṭhenkhat siam chu a harsa hran lo; harsatna lutuk awm lovin damdawi khawih chu ka bânsan a. Ka ṭhiante kawm pawh bânsanin, kohhran upa pakhatin Bible min zirpui ṭan a ni.

Mahse, kawng ṭhenkhatah erawh inthlâk danglam chu a harsa hle. A bîk takin, ka thinchhiatna thunun chu harsa ka ti lehzual a ni. Hun eng emaw chen chu han inthunun thei ṭhîn mah ila, a hnuah ka inthunun zo lo leh ṭhîn a. Ka rilru a hrehawmin, mi hlawhchham nia inhriatna ka nei hial a. Ka lunghnual châng chuan, Bible min zirpuitu kohhran upa chu ka pan ṭhîn a. Ani chu eng lai pawhin a dawhtheiin ngil a nei êm êm reng a, min tichak tak zet a ni. Ṭum khat chu, beidawn loh a pawimawhzia târ lanna Vênnainsâng thuziak pakhat chu min chhiartîr a. a Ka thinrim huna ka tih theih thil ṭhenkhat chu min sawipui a. Chu thuziak chu rilrua vawng rengin leh nasa lehzuala Jehova hnêna ṭawngṭaiin, ka thinchhiatna chu zawi zawiin ka thunun thei ta a ni. A tâwpah, kum 2000 April thlaah Jehova Thuhretu pakhat niin baptisma ka chang ta a. Ka chhûngte chu an hlim tak zet a ni.

KA HLAWKPUI DAN: Damdawi leh nungchang bawlhhlawnate hmangin ka taksa ka tibawlhhlawh tawh lo tih hriatna chuan rilrua thlamuanna leh chhia leh ṭha hriatna thiang min neihtîr a. Hna ka thawk emaw, ka inkhâwm emaw, intihhlimnaah ka tel emaw pawh ni se, ka thiltihna rêng rêngah ka hlim lehzual tawh a ni. A êng zâwnga thlîrna ka nei bawk.

Min theihnghilh ngai lotu nu leh pa min pêk avângin Jehova chungah ka lâwm hle a. Johana 6:44-a kan hmuh Isua thusawi: “Pa mi tîrtuin a hîp loh chuan tu mah ka hnênah an lo kal thei lo vang,” tih hi ka ngaihtuah ṭhîn a. Pathian Jehova’n min hîp avângin a hnênah ka kîr leh thei tih ka ngaihtuah châng hian, chu chuan ka rilru a khawih tak zet a ni.

“Pa Neih Ka Châk Ngawih Ngawih.”—MARCO ANTONIO ALVAREZ SOTO-A

PIAN KUM: 1977

PIANNA RAM: CHILE

CHANCHIN: HEAVY-METAL BAND MEMBER

KA TUN HMA NUN: Ka nu chuan South America khawmual chhim tâwpa awm, Strait of Magellan awmna Chile ram khawpui nuam tak pakhat Punta Arenas-ah min enkawl seilian a. Ka nu leh pate chu kum nga mi ka nihin an inṭhen a, chu chuan thlahthlam nia inhriatna min neihtîr a ni. Pa neih hi ka châk ngawih ngawih ṭhîn.

Ka nu chuan Jehova Thuhretute nên Bible zirin, Kingdom Hall-a Kristian inkhâwmahte chuan min hruai ṭhîn a. Mahse, inkhâwm lai chuan ka sual thei êm êm a, thinrimin ka au vak vak ṭhîn. Tichuan, kum 13 mi ka nih chuan inkhâwm chu ka bânsan a ni.

Chutih lai chuan rimawi ka ngaina hle a, a hnuah phei chuan ka tuichilh ta hle. Kum 15 mi ka nih chuan kût nî khuaah te, zu dâwrah te, leh mi mal intihhlimna buatsaihna hmunahte chuan heavy-metal rimawi ka tum ṭhîn a. Rimawi tum thiam tak takte ka kawmna aṭangin classical music lam chuan ka lung a kuai ta hle a. Tichuan, rimawi chu tualchhûnga a zirna hmun pakhatah ka zir ta a ni. Kum 20 mi ka nih chuan, ka rimawi zir chhunzawm tûrin Chile ram khawpui ber Santiago-ah ka insawn a. Heavy-metal band hrang hrangte zâwmin, rimawi kan tum ṭhîn a ni.

Chutih hun chhûng zawng chuan, ka nun hi a ruak riau nia inhriatna ka nei a. Chumi chhâwk zângkhai nân, ka chhûngte anga ka ngaih ka band-puite tih angin zu ka in a, damdawi ka khawih bawk a ni. Mi thinchhe tak ka rawn ni chho va, chu chu ka lan dân aṭang pawhin a hriat thei a ni. Thawmhnaw dum lam hlîr ka inbel a, ka khabe hmul ka zuah bâkah, ka sam pawh ka kâwng thleng deuhthawin ka zuah bawk.

Ka mizia avângin vawi tam tak mi dangte nên kan insual a, police-te nên pawh kan intibuai ṭhîn. Ṭum khat chu, ka rui lung puam chuan ka ṭhiante nêna min tibuaitu a rûka damdawi zuar ṭhîn pâwl khat chu ka va bei thut a. Anni chuan ka khabe ruh khi khawpin min lo sawisa lêt hrep a ni.

Mahse, tawrh har ka tih ber zâwk chu ka mi ngainat takte’na ka chunga an thiltih hi a ni a. Ni khat chu, ka bialnu leh ka ṭhian ṭha ber chu a rûkin an lo inngaizâwng reng tih leh ka ṭhian dangte pawhin an hria a, ka lakah an lo thup reng a ni tih ka hre ta a. Chu chuan ka rilru a tina tak zet a ni.

Punta Arenas khawpuiah chuan ka kîr leh a, chutah chuan ei zawn nân rimawite zirtîrin, ṭingṭang hun chi (cellist) ka tum ṭhîn a. Heavy-metal band hrang hrangte chu zâwmin, rimawi tum leh recording tihte chu ka la chhunzawm zêl a ni. Nula duhawm tak Sussan-i nên intawngin kan chêng dûn a. A hnu deuhvah chuan a nuin a rin êm êm Trinity thurin chu ka ring ve lo tih a hria a. Ani chuan, “A nih leh, a khawi hi nge dik zâwk?” tiin min zâwt a. Trinity thurin chu a dik lo tih ka hriat thu leh a finfiahna erawh Bible hmanga ka hrilhfiah thiam loh thu hrilhin ka chhâng a ni. Mahse, hrilhfiah theitu tûr ka hria. Jehova Thuhretute’n Bible aṭanga a chhânna dik tak an pêk theih thu ka hrilh a. Tichuan, tûn hmaa ka tih ngai loh chu ka ti ta a ni—Pathian hnêna ṭawngṭai leh a ṭanpuina dîl chu.

A hnu ni rei vak lo vah, ka hmuh tawh ṭhîn nia ka hriat pa pakhat hi ka hmu a, Jehova Thuhretu a nih leh nih loh ka zâwt a. Ka lan dân chuan tizâm hle mah se, ngilnei taka ka zawhna chu chhângin Kingdom Hall-a inkhâwma tel ve tûrin min sâwm a. Chu chu ka ṭawngṭai chhânna a ni tih ka ring nghet tlat a ni. Tichuan, Kingdom Hall-a inkhâwmah chuan tel vein, mite’n min hriatthiam loh nân tlar hnung berah ka ṭhu a. Mahse, Ka naupan laia min hretute chuan min lo hre thiam ta tho va. Anni chuan min lo lâwmin, hmangaihna nei takin min lo kuah hlawm a, chu chuan ka rilru a tihahdam sawng sawng a ni. Mahni ina haw leh ang mai ni hian ka inhria. Ka naupan laia Bible min zirpui ṭhîntu chu ka hmu a, min zirpui leh tûrin ka ngên ta a ni.

BIBLE-IN KA NUN A THLAK DANGLAM DAN: Ni khat chu, Thufingte 27:11-naa: “Ka fapa, fing la, ka thinlung tilâwm rawh,” tih thu hi ka chhiar fuh a. Thi thei mihring ve mai hian lei leh vân Siamtu kan tilâwm thei tih ka hriat chuan ka rilru a khawih hle. Chu chuan Jehova chu neih ka châk êm êm ṭhin ka duhthusâm Pa ngei chu a ni tih min hriatthiamtîr a ni.

Ka Pa vâna mi tihlâwm leh a duh zâwng tih chu duh hle mah ila, kum tam tak chhûng damdawi leh zu bawiha ka lo awm tawh avângin harsa ka ti hle. Matthaia 6:24-a: “Tu man hotu pahnih rawng an bâwl kawp thei lo,” tih Isua zirtîrna thu hi ka hre thiam ta a. Inthlâk danglam harsa ka tih lai chuan 1 Korinth 15:33-a: “Ṭhian sualte chuan nungchang ṭha an tikhawlo ṭhîn,” tih thu hian ka chungah nghawng nasa tak a nei a. Tûn hmaa ka kal ṭhinna hmuna ka la kal fo va, ka ṭhian hluite ka la kâwm zawm zêl a nih chuan ka thil chîn ṭha lote hi ka bânsan thei ngai lo vang tih ka hre thiam ta. Bible fuihna hi a chiang hle: Min titlutu chîn dân ṭha lote bânsan tûr chuan inthlâk danglamna lian tak ka siam a ngai a ni.—Matthaia 5:30.

Rimawi ka ngainat êm avângin, ka thu tlûkna siam azawnga harsa ka tih ber chu heavy-metal rimawi ngaihthlâk tawh loh leh band chhuahsan hi a ni a. Mahse, a tâwpa tâwpah kohhran chhûnga ka ṭhiante ṭanpuina zârah chutiang chuan ka tithei ta a ni. A lutuka zu in leh damdawi khawih pawh ka bânsan a. Ka lu mêtin, ka khabe hmul ka ziat fai a, thawmhnaw dum ringawt inbel pawh ka bânsan bawk. Sussan-i hnêna ka lu meh ka duh thu ka han hrilh chuan, Kingdom Hall-a ka thiltih ṭhinte chu hriat a châk ta hle a. “Kingdom Hall-a i kal leh hunah ka zui ve dâwn che, chutah chuan eng thil chiah nge thleng hriat ka duh!” tiin min hrilh a. Chuta a thil hmuhte chu a duh hle a, a hnu lawkah Bible a zir ve ṭan ve nghâl a ni. A tâwpah, Sussan-i nên kan innei a. Kum 2008-ah Jehova Thuhretute zînga mi niin baptisma kan chang a. Ka nu ruala Jehova rawng kan bâwl ve ta chu kan hlim hle.

KA HLAWKPUI DAN: Hlimna der leh ṭhian rinawm lote chu ka hnuchhawn tawh a. Rimawi erawh la ngaina hle mah ila, ka ngaihthlâk tûrah ka fîmkhur tawh a ni. Ka thiltawnte chu ka chhûngte leh ṭhiante, a bîk takin ṭhalaite ṭanpui nân ka hmang a. He khawvêlin a pêk theih thilte chu duhawm tak angin lang mah se, a nihna takah chuan ‘hnâwmhne’ mai a ni tih hmu thiam tûra ṭanpui chu ka duh a ni.—Philippi 3:8.

Hmangaihna leh remnaa khat Kristian kohhran chhûnga mi ṭhiante ka nei tawh a. Chu mai chu ni lovin, Jehova ka hnaihna azârah, a tâwpah ka Pa chu ka zawng hmu ta a ni.

[Footnote-te]

[Thu tâwi]

“Pathian Jehova’n min hîp avângin a hnênah ka kîr leh thei”