Chʼexpaj kyanqʼibʼil tuʼn Tyol Dios

¿Tiʼ onin tiʼj jun xinaq tuʼn tmeltzʼaj toj okslabʼil jatumel in xiʼtoq tej kʼwalxtoq? ¿Alkye tten ok tqʼoʼn jun qʼa Jehová ik tzeʼn tman? Qqʼonx ambʼil kye tuʼn ttzaj kyqʼamaʼn.

«Wajtoqe tuʼn nmeltzʼaje tukʼil Jehová» (ELIE KHALIL)

AJU ABʼQʼI TEJ TUL ITZʼJ: 1976

TNAM: CHIPRE

JUNJUNTL TQANIL: AJU KʼWALBʼAJ EL TZPET

AJU IKʼ TOJ WANQʼIBʼILE: In nul itzʼje Chipre pero in jaw chʼiye atz Australia. Testigo de Jehová qe ntate ex ok tilil kyuʼn tuʼn tok nkʼujlaʼne Dios ex Tyol. Noqtzun tuʼnj, tej wokxe toj nkuxumale ya mintiʼ in nimane kye. In chin extoq oqe toj qonikʼen toj njaye junx kyukʼil junjuntl wamiwe. In qoʼxtoqe elqʼal kar ex okx nqʼoʼn wibʼe toj nim problem.

Tnejel, toj ewaj bʼant jlu wuʼne tuʼnju nyatoq waje tuʼn ttzaj kybʼis ntate aj tok kybʼiʼn. Pero chebʼe chebʼe el t-xobʼil wiʼje. Mastoq kyabʼqʼi wamiwe nwitze, nyatoq kʼujlaʼn Jehová kyuʼn ex el nkanoʼne nya bʼaʼn kymod. Chʼexpaj nximbʼetze tuʼnju in tene kyukʼil ex xi nqʼamaʼne kye ntate qa nyatoq waje tuʼn woke te testigo de Jehová. Maske ok tilil kyuʼn tuʼn kyonin wiʼje tukʼil pasens, mintiʼ ok nbʼiʼne kyyol ex tzaj kybʼis tuʼn jlu.

Ya mintiʼ in nanqʼine njaye ex xi tzyet tuʼn tajbʼen droga wuʼne. Ax ikx kux wawaʼne marihuana ex in kʼayine tiʼj. Mintiʼtoq ttxolil wanqʼibʼile, in chinxtoqe kyoj discoteca, chʼexpaj nmode ex jun rat tzaj nqʼoje tej tkubʼ tbʼinchaʼn jun xjal jun tiʼ moqa tej ttzaj tqʼamaʼn jun tiʼ nya bʼaʼn ela toj nwitze. Chʼixme tkyaqil maj e ok nyasoʼne ex e ok nkʼixbʼisaʼne. Toj chʼin yol, mintiʼ ok nqʼoʼne toklen aju tzaj kyxnaqʼtzaʼn ntate weye.

CHʼEXPAJ WANQʼIBʼILE TUʼN TYOL DIOS: Ok wamiwen wibʼe tukʼil jun xjal in kʼantoq tiʼj droga aju kyim ttat tej kʼwalxtoq. Nimku maj o yoline tej t-xi aqʼbʼil ex tzaj tqʼamaʼn weye qa in bʼisintoq tiʼj ttat. Tuʼnju tzaj xnaqʼtzaʼn weye tej kʼwalx qine qa oktoq che jawil anqʼin xjal, jun rat naj xi nqʼamaʼne te qa e jaw anqʼin kyimni tuʼn Jesús ex qa kbʼantel jlu tuʼn toj ambʼil tzul (Juan 5:​28, 29). Xi nqʼamaʼne te: «Ximana tiʼj, kʼokel tkeʼyina juntl maj tmana ex qo anqʼil toj jun tbʼanel najbʼil tzalu twitz Txʼotxʼ». Xi qʼuqbʼaʼn tkʼuʼj wamiwe kyuʼn yol lu.

Toj junjuntl maj, tajtoq wamiwe tuʼn tyolin kyiʼj mankbʼil moqa bʼajsbʼil tqʼijlalil ex tiʼj xnaqʼtzbʼil tiʼj Trinidad. Ajbʼen tbiblia wuʼne tuʼn t-xi nyekʼine nimku texto te aju in tzaj t-xnaqʼtzan axix tok tiʼj Jehová, tiʼj Jesús ex tiʼj mankbʼil tqʼijlalil (Juan 14:28; 2 Timoteo 3:​1-5). Tuʼnju kukx in yoline tiʼj Jehová tukʼil wamiwe, onin wiʼje tuʼn kukx nximane tiʼj Jehová.

Chebʼe chebʼe ok qeʼ nkʼuʼje juntl maj tiʼj axix tok otoq tzaj kyxnaqʼtzaʼn ntate weye. At maj, tej in chin kʼantoqe tiʼj droga kyukʼil wamiwe toj jun fiesta, noq minabʼen in nultoq Jehová toj nximbʼetze. Maske tzaj kyqʼamaʼn nimku wamiwe qa kʼujlaʼn Dios kyuʼn, pero tukʼilju in bʼanttoq kyuʼn, el nnikʼe tiʼj qa nya ax tok. Tuʼnju nyatoq waje tuʼn woke te xmeletzʼ, el nnikʼe tiʼj qa iltoq tiʼj tuʼn nmeltzʼaje tukʼil Jehová.

Noqtzun tuʼnj, junxitl aju qa ojtzqiʼn jun tiʼ quʼn twitzju tuʼn tkubʼ qbʼinchaʼn. Ateʼ junjun chʼixpubʼil nya kwest e bʼant wuʼne, ik tzeʼn tuʼn tkyaj ntzaqpiʼne droga, tuʼn tkyaj nqʼoʼne qe ojtxe wamiwe ex tuʼn t-xi tzyet tuʼn nxnaqʼtzane tiʼj Tyol Dios tukʼil jun ansyan.

Pero ateʼ junjuntl chʼixpubʼil kwest e bʼant wuʼne, ik tzeʼn tuʼn miʼn ttzaj naj nqʼoje. At maj mintiʼ tzaj nqʼoje toj jun ambʼil, pero ajtoq in tzaj nqʼoje in kubʼtoq nnaʼne nya bʼaʼn ex kubʼ nximane qa mlaytoq che bʼant chʼixpubʼil wuʼne. Tukʼil bʼis in yoline tukʼil erman in qʼontoq xnaqʼtzbʼil weye. Kubʼ tyekʼin tpasens, ten tbʼanel tmod ex kukx tzaj tqʼuqbʼaʼn nkʼuʼje. Toj jun maj tzaj tqʼamaʼn weye tuʼn tjaw wuʼjine jun xnaqʼtzbʼil toj uʼj Xqʼuqil aju in yolin tiʼj tuʼn kukx tok tilil quʼn tuʼn qex twitz nya bʼaʼn. * O yoline tiʼj tiʼtoq tuʼn tbʼant wuʼne qa matoq tzaj nqʼoje. Tuʼnju in naʼne Dios te Jehová ex tuʼn tonbʼil xnaqʼtzbʼil, chebʼe chebʼe ya mintiʼ tzaj nqʼoje. Ex toj abril te 2000, in bautisarine ik tzeʼn testigo de Jehová. Nimxix e jaw tzalaj ntate tuʼn jlu.

QE KʼIWLABʼIL O CHE TZAJ NKʼAMOʼNE: In kubʼ nnaʼne bʼaʼn ex mujbʼabʼil toj wanmiye, tuʼnju ya mintiʼ in bʼaj ntzʼilsaʼne nximlale tukʼil droga nix tukʼil yaẍbʼil. Noq tiʼxku in bʼant wuʼne, qa in chin aqʼunane, qa in chin saqchane jun rat moqa atine toj chmabʼil, in kubʼ nnaʼne tzalajbʼil ex in ten tbʼanel nximbʼetze tiʼj wanqʼibʼile.

In xi nqʼoʼne chjonte te Jehová tuʼnju ateʼ tbʼanel ntate ex tuʼnju mintiʼ kubʼ kyximen qa mlayx chin meltzʼaje tukʼil Jehová. Ax ikx in chin ximane kyiʼj tyol Jesús ateʼkux toj Juan 6:44, aju in tzaj tqʼamaʼn: «Mlay tzul jun xjal wukʼile qa mya tuʼn Nmane sul qʼiʼn». Nimxix in chin tzalaje tuʼnju ma chin meltzʼaje tukʼil Jehová ex tuʼnju a saj qʼinte weye.

«Wajtoqe tuʼn tten jun nmane» (MARCO ANTONIO ALVAREZ SOTO)

AJU ABʼQʼI TEJ TUL ITZʼJ: 1977

TNAM: CHILE

JUNJUNTL TQANIL: TEN TOJ JUN BANDA DEATH-METAL

AJU IKʼ TOJ WANQʼIBʼILE: In jaw chʼiye tukʼil ntxuʼye atz Punta Arenas, jun tnam at toj jun lugar Magallanes tbʼi, aju tok nqayin tiʼj sur te América. Tej qʼiʼntoq jweʼ abʼqʼi wuʼne el tpaʼn tibʼ nmane tukʼil ntxuʼye, ex atxix toj ambʼil aju, kubʼ nnaʼne bʼis tuʼnju wajtoqe tuʼn tten jun ntate.

In xnaqʼtzantoq ntxuʼye tiʼj Tyol Dios kyukʼil testigos de Jehová ex in xi tiʼne kyoj chmabʼil. Pero nyatoq ngane tuʼn nxiʼye ex in chin ok tene oqʼel toj bʼe. Ya mintiʼ in xiʼye kyoj chmabʼil tej njapune toj 13 abʼqʼi.

Toj ambʼil lu ngantoqe música ex el nnikʼe tiʼj qa jaku bʼant mas wuʼne tiʼj música. Tej qʼiʼntoq 15 abʼqʼi wuʼne, in chinxe tocaril música heavy-metal ex death-metal kyoj ninqʼij, kyoj bar ex kyoj fiesta in che ok kyja xjal. In noktoq nmojbʼan wibʼe kyukʼil xjal tbʼanel che tocarin música, ex tuʼn jlu ten ngane tiʼj música clásica. Xi tzyet tuʼn nxnaqʼtzane toj tnam jatumel in chi anqʼine. Pero tej qʼiʼntoq 20 abʼqʼi wuʼne, in xiʼye anqʼil atz Santiago aju ttxuylal tnam tuʼntzun tetz mas nxnaqʼtzbʼile tiʼj música. Toj ax ambʼil lu, kukx in tocarine toj banda heavy-metal ex death-metal.

Noqtzun tuʼnj, kukxtoq in kubʼ nnaʼne bʼis. Tuʼn mintiʼ tbʼaj jlu wiʼje, in ok tene kʼal qʼeʼn ex droga kyukʼil wamiwe in che tocarin música, aʼyeju e ok nqʼoʼne ik tzeʼn toj njaye. Tukʼilju alkye tten bʼaj nbʼinchaʼne ntene, kubʼ nyekʼine qa mibʼan chin nimane, ok nqʼoʼne nxbʼalune color qʼeq, matij tzmal nwiʼye ex nim nxmatziye.

Tuʼn nya bʼaʼn nmode okx nqʼoʼn wibʼe toj qʼoj ex tzaj nya bʼaʼn wiʼje kyuʼn polisiy. Toj jun qʼij, attoq jun kʼloj xjal in che kʼayin tiʼj droga ex e ok ten molestaril qiʼje kyukʼil wamiwe. Tuʼnju otoq txi nkʼaʼne qʼeʼn in ok tzoqpaje kyiʼj ex in bʼaj bʼyoʼne kyuʼn, tuʼntzunju kubʼ toqj tjaqʼ ntziʼye.

Noqtzun tuʼnj, mas tzaj nbʼise kyuʼn xjal kʼujlaʼn wuʼne. Toj jun qʼij, ok nbʼiʼne qa otoq tzikʼ nim ambʼil in yolin aju mas tbʼanel wamiwe tukʼil nnoviaye ex mintiʼ tzaj kyqʼamaʼn txqantl wamiwe jlu weye. Tzaj nimxix nbʼise tuʼn jlu.

In meltzʼaje juntl maj atz Punta Arenas, in nok tene aqʼunal te qʼol xnaqʼtzbʼil tiʼj música ex te tocaril tiʼj violín. Ax ikx, kukx in grabarine kyukʼil banda te heavy-metal ex death-metal. Toj ambʼil aju, ok wojtzqiʼne jun tbʼanel txin aju Sussan tbʼi ex in anqʼine junx tukʼil. Tej tbʼet ambʼil, ok tbʼiʼn Sussan qa in xi tnimen ttxuʼ aju xnaqʼtzbʼil tiʼj Trinidad atzun weye mintiʼ. Tuʼntzunju tzaj tqanin weye: «¿Alkyetzun axix tok?». Xi nqʼamaʼne te qa nya ax tok xnaqʼtzbʼil tiʼj Trinidad. Ax ikx, xi nqʼamaʼne te qa mlaytoq bʼant tuʼn t-xi nchikʼbʼaʼne te tukʼil Biblia toj ambʼil aju, pero ojtzqiʼntoq wuʼne alkye jaku txi qʼonte tzaqʼwebʼil te. Ex xi nqʼamaʼne te qa jakutoq txi kychikʼbʼaʼn testigos de Jehová te tukʼil Biblia. Toj ambʼil aju, in nok tene naʼl Dios juntl maj ex xi nqanine onbʼil te Jehová.

Tej tikʼ junjun qʼij, kanet jun xjal wuʼne ex xi nqanine te qa testigo de Jehová te. Tuʼnju alkye tten bʼaj nxbʼalumin wibʼe, tzaj xobʼ weye, pero tzaj ttzaqʼweʼn qe nxjele tiʼj chmabʼil. El nnikʼe tiʼj qa atzun jlu tzaqʼwebʼil tiʼj nnaʼj Diose. In xiʼye toj chmabʼil ex in kubʼ qeye kyoj mankbʼil qʼuqbʼil tuʼntzun miʼn ttzaj kyqʼoʼn txqantl kywitz wiʼje. Noqtzun tuʼnj, el kynikʼ nim erman wiʼje tuʼnju in chinxtoqe kyoj chmabʼil tej kʼwal qine. Nim e jaw tzalaj tej npone, in tzaj chleʼne kyuʼn tukʼil kʼujlabʼil ex kubʼ nnaʼne nim tzalajbʼil tuʼn jlu. Ok jlu ik tzeʼn otoq chin meltzʼaje njaye. Tej tok nqʼoʼne nwitze tiʼj erman tzaj qʼonte xnaqʼtzbʼil weye tej kʼwal qiʼne, xi nqʼamaʼne te tuʼn ttzaj tqʼoʼn juntl maj nxnaqʼtzbʼile.

CHʼEXPAJ WANQʼIBʼILE TUʼN TYOL DIOS: Jun qʼij, jaw wuʼjine Proverbios 27:​11, aju in tzaj tqʼamaʼn jlu: «Nkʼwaʼl, toka at tnabʼla, tuʼntzun ntzalaje tiʼja». Nim in jaw labʼine tej tel nnikʼe tiʼj qa jaku jaw tzalaj Jehová tuʼn jun xjal. Toj ambʼil aju, el nnikʼe tiʼj qa a Jehová aju mambʼaj otoq chin jyone tiʼj toj tkyaqil wanqʼibʼile.

Wajtoqe tuʼn ttzalaj Jehová wiʼje ex tuʼn tkubʼ nbʼinchaʼne tajbʼil, pero toj nimku ambʼil otoq chin oke ik tzeʼn jun majen te qʼeʼn ex droga. El nnikʼe tiʼjju tajtoq Jesús tuʼn ttzaj t-xnaqʼtzaʼn toj Mateo 6:24, jatumel tqʼama jlu: «Mi jun xjal jaku bʼant tuʼn tajbʼen te kabʼe patrón». Tej tok tilil wuʼne tuʼn kybʼant chʼixpubʼil, nim onin wiʼje aju nabʼil tkuʼx toj 1 Corintios 15:33, jatumel in tzaj tqʼamaʼn: «Qa ma txi kyukʼin kyibʼe kyukʼil xjal mya bʼaʼn, ok ktzakjel kynabʼle». El nnikʼe tiʼj qa mlaytoq bʼant chʼixpubʼil wuʼne qa kukxtoq in nok nmojbʼan wibʼe kyukʼil nya bʼaʼn amiw ex qa kukxtoq in chinxe kyoj nya bʼaʼn lugar. Clarxix taʼ consej in tzaj tqʼamaʼn Biblia, iltoq tiʼj tuʼn tel npan wibʼe kyiʼj tiʼchaq in che ok te jun tolsabʼil weye (Mateo 5:30).

Tuʼnju ngantoqe música, kwest ela toj nwitze tuʼn tkyaj ntzaqpiʼne banda te heavy-metal. Pero kyaj ntzaqpiʼne noq tuʼn onbʼil tzaj kyqʼoʼn erman weye. Ax ikx, ya mintiʼ in kʼane tiʼj qʼeʼn ex tiʼj droga, el wiʼne tzmal nwiʼye, el wiʼne nxmatziye ex ya nya oʼkx ok nqʼoʼne nxbʼalune color qʼeq. Tej t-xi nqʼamaʼne te Sussan tuʼn tel wiʼne tzmal nwiʼye, tzaj tqʼamaʼntl weye: «Ok chin xeʼle tukʼila toj Ja te Chmabʼil. Waje tuʼn tok nqʼoʼne nwitze tiʼjju in bʼant kyuʼn». Tbʼanel ela toj twitz ex jun rat naj ok ten xnaqʼtzal tiʼj Tyol Dios. Tej tbʼet ambʼil o casarine ex toj 2008, o bautisarine ik tzeʼn testigos de Jehová. Toj ambʼil jaʼlo, in qo tzalaje tuʼnju in qo ajbʼene te Jehová junx tukʼil ntxuʼye.

QE KʼIWLABʼIL O CHE TZAJ NKʼAMOʼNE: O chin tzaqpaje tiʼj nya ax tok tzalajbʼil ex kyiʼj nya ax tok amiw. Kukx ngane música pero in xi njyoʼne alkye kʼokel nbʼiʼne. Aju o tzikʼ wiʼje in najbʼen wuʼne tuʼn wonine kyiʼj toj njaye ex kyiʼj junjuntl xjal, pero mas in chin onine kyiʼj kuʼxun. Waje tuʼn tel kynikʼ tiʼj qa ik kyten achbʼil te twitz txʼotxʼ «ik tzaʼn tzʼis» (Filipenses 3:8).

Tuʼnju o chin ok laqʼeʼye ttxlaj Jehová, o che kanet tbʼanel wamiwe toj Ja te Chmabʼil jatumel at mas kʼujlabʼil ex tzalajbʼil. Pero aju mas nim toklen, o tzʼok Jehová te ntate.

[Tqanil]

[Yol]

«Ma chin meltzʼaje tukʼil Jehová tuʼnju a saj qʼinte weye»