Biblia chi̱ndeétáʼan xíʼinna ña̱ na̱samana

¿NDÁAÑA chi̱ndeétáʼan xíʼin iin ta̱ ta̱a ña̱ ndi̱kóra religión ña̱ sa̱náʼa̱ na̱ yivára miíra? ¿Ndáa ki̱ʼva nda̱ni̱ʼí iin ta̱ loʼo iin ta̱ koo yivára? Miína ná natúʼun xíʼinyó xa̱ʼa̱ ña̱yóʼo.

“Xi̱xiniñúʼu ndikói̱ nu̱ú Jehová” (TA̱ ELIE KHALIL)

KU̱I̱YA̱ ÑA̱ KA̱KURA: 1976

PAÍS: CHIPRE

INKAKA ÑA̱ KÁʼA̱N XA̱ʼA̱RA: VA̱ÁSA NÍXINISO̱ʼORA NA̱ YIVÁRA

ÑA̱ NDO̱ʼI̱: Ka̱kui̱ chí ñuu Chipre, soo chí Australia xa̱ʼnui̱. Na̱ yivái̱ xi̱kuuna testigo Jehová ta sa̱náʼa̱na yi̱ʼi̱ ña̱ kuʼvi̱-inii̱ kunii̱ Ndióxi̱ ta saátu tu̱ʼunra ña̱ Biblia. Loʼonívai̱ tá ki̱xáʼíi̱ kéʼíi̱ ña̱ va̱ása va̱ʼa. Tá ñuú xi̱kita se̱ʼíi̱, ta xíʼin na̱ migoi̱ na̱ inkáchi ku̱i̱ya̱ xíʼi̱n xi̱ ixakuíʼnandi̱ carro, ta ku̱a̱ʼáníka ña̱ va̱ása va̱ʼa xi̱keʼíi̱.

Tá xa̱ʼa̱ xi̱keʼé se̱ʼévai̱ña xa̱ʼa̱ ña̱ xi̱yiʼvíi̱ sandákavai̱-ini na̱ yivái̱, soo loʼo tá loʼo va̱ása níxi̱yiʼvíkai̱. Na̱ xi̱kuu migoi̱ chéeka ni̱xi̱yona nu̱úi̱ ta va̱ása níxi̱kuʼvi̱-inina kunina Jehová. Su̱ví ña̱ va̱ʼa nísanáʼa̱na yi̱ʼi̱ keʼíi̱. Saáchi iin ki̱vi̱ ni̱ka̱ʼi̱n xíʼin na̱ yivái̱ ña̱ va̱ása kúni̱kai̱ kunda̱a̱-inii̱ xa̱ʼa̱ ña̱ kándíxana. Ni chi̱kaa̱nína ndee̱ ña̱ chindeétáʼanna xíʼi̱n soo va̱ása níxiin kuniso̱ʼi̱na, ta ña̱yóʼo sa̱kúsuchíníña-inina.

Va̱ása níxi̱yokai̱ ve̱ʼi̱ ta ki̱xáʼíi̱ xáʼmii̱ ña̱ droga. Nda̱a̱ ki̱xáʼíi̱ chíʼii̱ ta íxi̱kói̱ ku̱a̱ʼání marihuana. Ku̱a̱ʼání ña̱ʼa ña̱ kini xi̱keʼíi̱, nina discoteca nu̱ú tíxáʼanna ta xíʼinna xi̱xaʼi̱n. Ta kue̱ʼe̱ní ni̱xi̱yoi̱. Ta kamaní xi̱sa̱i̱ tá iinna xi̱keʼéna á xi̱ka̱ʼa̱nna iin ña̱ʼa ña̱ kǒo kútói̱. Á sava yichi̱ xi̱ndaʼyi̱ nu̱úna á nda̱a̱ xi̱kanii̱na. Ndiʼi ña̱ xi̱keʼíi̱ yóʼo xi̱kuuña ña̱ va̱ása xíniñúʼu keʼé iin na̱ ndásakáʼnu Ndióxi̱.

ÑA̱ BIBLIA CHI̱NDEÉTÁʼANÑA XÍʼI̱N ÑA̱ NASA̱MAI̱: Va̱ʼaní xi̱kitáʼi̱n xíʼin iin ta̱ xi̱xaʼmi droga ta tá ni̱xi̱yo loʼo ta̱yóʼo ni̱xi̱ʼi̱ yivára. Sava yichi̱ ku̱a̱ʼání hora xi̱natúʼunndi̱ nda̱a̱ tá xi̱kuñuú. Ku̱a̱ʼání yichi̱ xi̱ka̱ʼa̱nra xíʼi̱n ña̱ kúsuchíní-inira xa̱ʼa̱ yivára. Tá loʼovíi̱ xi̱kunda̱a̱-inii̱ ña̱ kivi ndataku na̱ ni̱xi̱ʼi̱, ña̱kán ndi̱ku̱n ki̱xáʼíi̱ nátúʼi̱n xíʼinra xa̱ʼa̱ ña̱ ke̱ʼé ta̱ Jesús ña̱ sa̱ndátakura na̱ ni̱xi̱ʼi̱ ta saátu káʼa̱nra ña̱ keʼéra ña̱yóʼo chí nu̱únínu (Juan 5:​28, 29). Ta ni̱ka̱ʼi̱n xíʼinra ña̱yóʼo: “Ndakanixi̱ní ña̱ ndikó tukún kuniún na̱ yiváún ta ndiʼiyó kooyó nu̱ú ñuʼú livi”. Nda̱kanda̱ní-inira xíʼin ña̱yóʼo.

Sava yichi̱ ta migoi̱ xi̱kuni̱ra kunda̱a̱-inira xa̱ʼa̱ ki̱vi̱ so̱ndíʼi ta saátu ña̱ káʼa̱n na̱ yiví xa̱ʼa̱ ña̱ Trinidad. Ña̱ va̱ʼa chindeétáʼi̱n xíʼinra xi̱xiniñúʼíi̱ Biblia ña̱ xi̱kuumiíra ña̱ na̱ʼi̱ sava texto nu̱úra, ña̱ káʼa̱n xa̱ʼa̱ ña̱ nda̱a̱, xa̱ʼa̱ Jehová, ta̱ Jesús xíʼin xa̱ʼa̱ ki̱vi̱ so̱ndíʼi (Juan 14:28; 2 Timoteo 3:​1-5). Tá xi̱ka̱ʼi̱n xíʼin ta̱ migoi̱ xa̱ʼa̱ Jehová, ña̱yóʼo chi̱ndeétáʼanña xíʼi̱n ña̱ ndakanikaxi̱níi̱ xa̱ʼa̱ Jehová.

Ni̱ya̱ʼa loʼo tiempo, ndiʼi ña̱ nda̱a̱ ña̱ sa̱kúaʼi̱ ña̱ va̱xi nu̱ú Biblia, xíʼin ña̱ sa̱náʼa̱ na̱ yivái̱ yi̱ʼi̱, ki̱xáʼa tukui̱ ndákaʼíi̱n xa̱ʼa̱ña. Sava yichi̱ tá xi̱xaʼi̱n vikó xíʼi̱n na̱ migoi̱ ta xi̱xaʼmii̱, iin kama xi̱ndakaʼíi̱n xa̱ʼa̱ Jehová. Ku̱a̱ʼání na̱ migoi̱ xi̱ka̱ʼa̱nna ña̱ xi̱kuʼvi̱-inina xi̱xinina Ndióxi̱, soo xíʼin ña̱ xi̱keʼéna xi̱naʼa̱na ña̱ su̱ví ña̱ ndixa kúú ña̱yóʼo. Va̱ása níxi̱kuni̱i̱ keʼíi̱ táki̱ʼva xi̱keʼé na̱yóʼo, ña̱kán ku̱ndaa̱-inii̱ ña̱ xi̱niñúʼu ndikó tukui̱ nu̱ú Jehová.

Síín kúú ña̱ kuxini̱yó ndáaña xíniñúʼu keʼéyó ta síín kúú ña̱ keʼéyóña. Va̱ása ní ixayo̱ʼvi̱ña xíʼi̱n sandákoi̱ keʼíi̱ sava ña̱ʼa. Tá kúú, ña̱ xi̱xaʼmii̱ droga. Ta saátu ña̱ sandákoi̱ ña̱ kutáʼi̱n xíʼin na̱ kéʼé ña̱ va̱ása va̱ʼa ta ki̱xáʼíi̱ káʼvii̱ Biblia xíʼin iin ta̱ anciano.

Ta íyo sava ña̱ i̱xayo̱ʼvi̱ní xíʼi̱n ña̱ na̱samai̱, tá kúú ña̱ kue̱ʼe̱ní ni̱xi̱yoi̱. Sava yichi̱ va̱ása níxi̱saa̱kai̱ soo sava iin kama kuití xi̱saa̱níi̱ ta xi̱ndakavaní-inii̱. Tá ku̱u ña̱yóʼo, chi̱kaa̱-inii̱ ña̱ ka̱ʼi̱n xíʼin ta̱ testigo ta̱ xi̱kaʼvi Biblia xíʼi̱n. Xa̱ʼa̱ ña̱ va̱ʼaní-inira xíʼin ña̱ kúeení ni̱xi̱yo inira xíʼi̱n, ña̱yóʼo chi̱ndeétáʼan xíʼi̱n. Iin yichi̱ ni̱ka̱ʼa̱nra xíʼi̱n ña̱ ná kaʼvii̱ iin artículo ña̱ va̱xi nu̱ú tutu La Atalaya ña̱ káʼa̱n xa̱ʼa̱ ná kǒo sandákooyó keʼéyó iin ña̱ʼa. a Ni̱ka̱ʼa̱nndi̱ xa̱ʼa̱ ndáaña kivi keʼíi̱ tá xi̱saa̱níi̱. Xi̱keʼíi̱ ña̱ káʼa̱n artículo yóʼo ta ke̱ʼéníi̱ oración nu̱ú Jehová, ta loʼo tá loʼo sa̱ndákoi̱ ña̱ xi̱saa̱níi̱. Tá yo̱o̱ abril ña̱ ku̱i̱ya̱ 2000 nda̱kuchii̱ ta ni̱xa̱i̱ ku̱i̱ testigo Jehová. Ni̱kusi̱íní-ini na̱ yivái̱ xíʼin ña̱yóʼo.

ÑA̱ VA̱ʼA ÑA̱ NDA̱KIʼI̱N: Va̱ʼaní kúnii̱ ta ña̱ xínitúníi̱ va̱ása sándi̱ʼiña-inii̱, saáchi va̱ása íxayaku̱a̱kai̱ ku̱ñui̱ xíʼin droga ta ni va̱ása kéʼékai̱ ña̱ kini. Tá káchíñui̱ á tá xáʼi̱n reunión á nda̱a̱ ndáaka ña̱ kéʼíi̱, kúsi̱íní-inii̱.

Táxiníi̱ tíxa̱ʼvi ndaʼa̱ Jehová xa̱ʼa̱ ña̱ va̱ʼaní-ini na̱ yivái̱, saáchi na̱yóʼo va̱ása nísandákoondaʼa̱ná yi̱ʼi̱. Saátu ndákanixi̱níi̱ xa̱ʼa̱ tu̱ʼun ña̱ ni̱ka̱ʼa̱n ta̱ Jesús nu̱ú Juan 6:44 tá ka̱chira: “Ni iinna kǒo kivi kixi nu̱úi̱ tá su̱ví yivái̱ ta̱ chi̱ndaʼá yi̱ʼi̱ kúú ta̱ níkanana”. Kúsi̱íní-inii̱ tá ndákanixi̱níi̱ ña̱ ndi̱kó tukui̱ nu̱ú Jehová, saáchi miíra ka̱na yi̱ʼi̱.

“Xi̱kuni̱níi̱ koo iin yivái̱” (TA̱ MARCO ANTONIO ALVAREZ SOTO)

KU̱I̱YA̱ ÑA̱ KA̱KURA: 1977

PAÍS: CHILE

INKAKA ÑA̱ KÁʼA̱N XA̱ʼA̱RA: XI̱NDIKAA̱RA TI̱XIN IIN BANDA NA̱ XI̱XITA DEATH-METAL

ÑA̱ NDO̱ʼI̱: Xa̱ʼnui̱ xíʼin siʼíi̱ chí Punta Arenas, iin ñuu ña̱ táxi̱ní íyo, ña̱ ndíkaa̱ chí Magallanes, yatin sur ña̱ continente americano. Tá kúúmiíi̱ u̱ʼu̱n ku̱i̱ya̱, na̱ yivásiʼíi̱ sa̱ndákootáʼanna, ta ña̱yóʼo sa̱ndákavaníña-inii̱. Ta xi̱kuni̱níi̱ koo iin yivái̱.

Siʼíi̱ xi̱kaʼviñá Biblia xíʼin na̱ testigo Jehová ta xi̱xaʼi̱n xíʼinñá ti̱xin Salón ña̱ Reino. Ta va̱ása níxi̱kutói̱ ku̱ʼu̱nkai̱ nda̱a̱ ni iin yichi̱, ta va̱ása níxa̱ʼa̱nkai̱ tá xi̱kuumiíi̱ 13 ku̱i̱ya̱.

Tiempo saá xi̱kutóokavíi̱ yaa ta va̱ʼaní xi̱xini̱ sakáʼi̱. Tá xi̱kuumiíi̱ 15 ku̱i̱ya̱, xisakáʼi̱ ña̱ heavy-metal xíʼin ña̱ death-metal tá xi̱xiyo vikó, tá kúú bar xíʼin inkaka vikó. Xi̱kitáʼi̱n xíʼin na̱ xíni̱ va̱ʼa sákaʼa, ta xa̱ʼa̱ ña̱kán xi̱kutóoníi̱ yaa ña̱ xi̱xini̱níkana. Ta ki̱xáʼíi̱ káʼvii̱ escuela ña̱ música ñuu nu̱ú ni̱xi̱yoi̱. Tá xi̱kuumiíi̱ 20 ku̱i̱ya̱, ni̱xa̱ʼi̱n chí ñuu Santiago ña̱ va̱ʼa kaʼvi va̱ʼakai̱. Ta saátu xi̱ndakundeéi̱ xi̱sakáʼi̱ ña̱ heavy-metal xíʼin ña̱ death-metal.

Ni ke̱ʼíi̱ ndiʼi ña̱yóʼo, va̱ása va̱ʼa níxi̱kuni̱i̱. Ta xa̱ʼa̱ ña̱ xi̱ndoi̱ ña̱yóʼo, xi̱xiʼi̱ ta saátu xi̱ xiniñúʼíi̱ droga xíʼin na̱ xi̱kitáʼi̱n xíʼin ta xi̱ndakanixi̱níi̱ ña̱ na̱ veʼi̱ xi̱kuu na̱yóʼo. Ta xíʼin ki̱ʼva ña̱ xi̱ndixíi̱ xi̱naʼa̱ ña̱ kue̱ʼe̱ní ni̱xi̱yoi̱: kotói̱ color tu̱ún xi̱xiyoña, sa̱kúaʼnui̱ yixí yuʼíi̱ ta yixí xi̱níi̱ nda̱a̱ tokói̱ xi̱xaa̱ña.

Xa̱ʼa̱ ña̱ kue̱ʼe̱ní ni̱xi̱yoi̱, xi̱kanitáʼi̱n xíʼin inkana, ta saátu xi̱kiʼviníi̱ tu̱ndóʼo xíʼin na̱ policía. Iin ki̱vi̱, iin tiʼvi na̱ íxi̱kó ña̱ droga ki̱xáʼana kéʼéna yi̱ʼi̱ ta saátu na̱ migoi̱. Soo ña̱ xíʼii̱, ki̱xáʼíi̱ kánitáʼi̱n xíʼinna, soo na̱yóʼo ndeéní ka̱nina yi̱ʼi̱ ta nda̱a̱ ni̱ta̱ʼnu̱ leke yuʼíi̱.

Soo ni̱xo̱ʼvi̱níkai̱ xíʼin ña̱ ke̱ʼé iin na̱ va̱ʼaní kítáʼi̱n xíʼin. Iin ki̱vi̱ ku̱ndaa̱-inii̱, ñá xíka xíʼi̱n sa̱ndáʼviñá yi̱ʼi̱ xíʼin iin ta̱ va̱ʼaní kítáʼi̱n xíʼi̱n ta ku̱a̱ʼání ku̱i̱ya̱ keʼéna ña̱yóʼo ta na̱ migoi̱ xi̱kunda̱a̱-inina xa̱ʼa̱ ña̱yóʼo ta va̱ása nínatúʼunna xíʼi̱n. Ta ku̱suchíní-inii̱ xíʼin ña̱yóʼo.

Ndi̱kó tukui̱ chí Punta Arenas ta ki̱xáʼi̱ sanáʼi̱ na̱ yiví ña̱ sakáʼana tú violonchelo. Ta saátu nda̱kundeíi̱ távái̱ yaa xíʼin na̱ banda na̱ heavy-metal ta saátu xíʼin na̱ death-metal. Tiempo saá xi̱nii̱ ñá Sussan, iin ñá loʼo liviní ta saá ki̱xáʼandi̱ íyo xíʼin táʼanndi̱. Tá ni̱ya̱ʼa loʼo, ñá Sussan ku̱ndaa̱-iniñá si̱ʼíñá xi̱kandíxañá ña̱ Trinidad ta yi̱ʼi̱ va̱ása níxikandíxai̱ña, ta saá ni̱nda̱ka̱tu̱ʼunñá miíi̱: “¿Ndáaña kúú ña̱ nda̱a̱?”. Ta ni̱ka̱ʼi̱n xíʼinñá ña̱ sanáʼa̱ na̱kán ña̱ vatáva kúúña, ni kǒo níkivi sanáʼi̱ña nu̱úñá xíʼin Biblia, ta xi̱xini̱ ndáana kivi ka̱ʼa̱n ña̱yóʼo xíʼinñá. Ni̱ka̱ʼi̱n xíʼinñá na̱ testigo Jehová kúú na̱ kivi ndakaniña nu̱úña xíʼin ña̱ Biblia. ­Ta saá ke̱ʼíi̱ iin ña̱ʼa ña̱ ku̱a̱ʼání ku̱i̱ya̱ ta̱ʼán keʼíi̱: Ni̱ka̱ʼi̱n xíʼin Ndióxi̱ ña̱ ná chindeétáʼanra xíʼi̱n.

Tá ni̱ya̱ʼa loʼo ki̱vi̱ xi̱nii̱ iin ta̱a ta̱ xi̱xini̱ ta ni̱nda̱ka̱tu̱ʼíi̱nra á kúúra testigo Jehová. Soo ki̱ʼva xi̱naʼi̱ sa̱yíʼvii̱ miíra, ta viíva nda̱kuiinra yuʼíi̱ tá ni̱ka̱ʼi̱n xíʼinra xa̱ʼa̱ reunión. Ta ku̱ndaa̱-inii̱ Ndióxi̱ kúú ta̱ nda̱kuiin yuʼíi̱ ña̱ ni̱ka̱ʼi̱n xíʼinra. Ta ni̱xa̱ʼi̱n reunión ta xi̱ndúʼi̱ nda̱a̱ chí sa̱tá ña̱ ná kǒo koto inkana miíi̱. Soo, ku̱a̱ʼánína nda̱kuni yi̱ʼi̱ chi xi̱xaʼi̱n tá ni̱xi̱yo loʼi̱. Ta viíní nda̱kiʼinna miíi̱ ta nu̱mina yi̱ʼi̱ ta xa̱ʼa̱ ña̱yóʼo va̱ʼaní ku̱nii̱. Nda̱a̱ tá ki̱ʼva íyo ña̱ ndikói̱ veʼi̱ saá ndo̱ʼi̱. Tá xi̱nii̱ ta testigo ta̱ sa̱náʼa̱ yi̱ʼi̱ tá ni̱xi̱yo loʼi̱ ni̱ka̱ʼa̱n tukui̱ xíʼinra ña̱ ná sanáʼa̱ tukura miíi̱.

ÑA̱ BIBLIA CHI̱NDEÉTÁʼANÑA XÍʼI̱N ÑA̱ NA̱SAMAI̱: Iin ki̱vi̱ ka̱ʼvii̱ Proverbios 27:​11, nu̱ú káʼa̱nña: “Se̱ʼe miíi̱, vií va̱ʼa ndakanixi̱níún, ta sakusi̱íún-inii̱”. Nda̱kanda̱ní-inii̱ ña̱ miíyó na̱ yiví kivi sakúsi̱íyó-ini ta̱ i̱xava̱ʼa ndiʼi ña̱ʼa. Ta saá ku̱ndaa̱-inii̱ ña̱ ná ndukúi̱ Jehová ña̱ koora yivái̱ ndiʼi tiempo.

Xi̱kuni̱ sakúsi̱í-ini yivái̱ ta̱ íyo chí ndiví ta keʼíi̱ ña̱ kúni̱ra, soo ku̱a̱ʼání ku̱i̱ya̱ xi̱xiniñúʼíi̱ droga ta xi̱xiʼi̱. Xi̱kunda̱a̱-inii̱ ndáaña xi̱kuni̱ ta̱ Jesús sanáʼa̱ra ña̱ va̱xi nu̱ú Mateo 6:​24, nu̱ú káʼa̱nña “Kǒo ni iinna kivi kachíñu nu̱ú u̱vi̱na”. Nani xi̱chika̱i̱ ndee̱ ña̱ nasamai̱ ña̱ xi̱keʼíi̱, ña̱ káʼa̱n 1 Corintios 15:33 ni̱xa̱a̱ña nda̱a̱ níma̱i̱ nu̱ú káʼa̱nña: “Chi tá kítáʼanndó xíʼin na̱ yiví na̱ kéʼé ña̱ va̱ása va̱ʼa, nandósóndó keʼéndó ña̱ va̱ʼa”. Xi̱kundaa-inii̱ ña̱ tá ndákutáʼi̱n xíʼin na̱ yiví na̱ kéʼé ña̱ va̱ása va̱ʼa ta xáʼi̱n lugar nu̱ú xi̱xa̱ʼa̱n na̱yóʼo va̱ása kivi nasamai̱. Consejo ña̱ va̱xi nu̱ú Biblia káxiní káʼa̱nña: xi̱niñúʼu va̱ása kutáʼi̱n xíʼin na̱ yiví yóʼo ta saá kǒo kéʼékai̱ ña̱ va̱ása va̱ʼa (Mateo 5:30).

Xa̱ʼa̱ ña̱ xi̱kutóoní yaa i̱xayo̱ʼvi̱níña xíʼi̱n sandákoi̱ ña̱ heavy-metal ña̱yóʼo kúú ña̱ i̱xayo̱ʼvi̱ní xíʼi̱n. Soo na̱ migoi̱ na̱ congregación chi̱ndeétáʼanna xíʼi̱n. Sa̱ndákoi̱ ña̱ xi̱xiʼi̱, ña̱ xi̱xiniñúʼi̱ droga, xa̱ʼndai̱ yixí xi̱níi̱, xa̱ʼndai̱ yixí yuʼíi̱ ta va̱ása níxi̱ndixikai̱ nina ti̱ko̱to̱ tu̱ún. Tá ni̱ka̱ʼi̱n xíʼin ñá Sussan ña̱ kúnii̱ kaʼndai̱ yixí xi̱níi̱, ñáyóʼo nda̱kanda̱ní-iniñá ta ni̱ka̱ʼa̱nña xíʼi̱n: “Kúnii̱ ku̱ʼi̱n xíʼún reunión. Kúnii̱ kotoi̱ ndáaña kéʼéna kán”. Xa̱ʼa̱ ña̱ ku̱si̱íní-iniñá xi̱toñá ña̱yóʼo, ki̱xáʼañá káʼviñá Biblia. Tá ni̱ya̱ʼa tiempo ti̱ndaʼa̱ndi̱, ta ku̱i̱ya̱ 2008, u̱vi̱ saándi̱ nda̱kuchindi̱ ta ndu̱undi̱ testigo Jehová. Kúsi̱íní-inindi̱ káchíñundi̱ nu̱ú Jehová ta saátu xíʼin siʼíi̱ tiempo vitin.

ÑA̱ VA̱ʼA ÑA̱ NDA̱KIʼI̱N: Va̱ása kutáʼankai̱ xíʼin na̱ ñuyǐví yóʼo chi na̱ sandáʼvi miíyó kúúna ta ni xíʼin na̱ xi̱ndakanixi̱ní na̱ xi̱kuu migoi̱. Kútóokavai̱ yaa, soo kǒo kutóokai̱ táʼa̱n ña̱ xi̱kutóoi̱ tá ya̱chi̱. Chíndeétáʼi̱n xíʼin na̱ veʼi̱ xa̱ʼa̱ ña̱ xínii̱ ta saátu xíʼin inkaka na̱ yiví, soo na̱ chíndeétáʼankai̱ xíʼin kúú na̱ va̱lí kúa̱an. Kúni̱ chindeétáʼi̱n xíʼinna ña̱ kunda̱a̱-inina ña̱ ndiʼi ña̱ táxi na̱ ñuyǐví yóʼo su̱ví ña̱ va̱ʼa kúúña ni livi náʼa̱ña, saáchi “íyoña táki̱ʼva mi̱ʼí” (Filipenses 3:​8).

Xa̱ʼa̱ ña̱ íyo yati̱n xíʼin Ndióxi̱, nda̱ni̱ʼíi̱ na̱ migoi̱ na̱ nda̱kú íyo ini ti̱xin ña̱ congregación, ta na̱yóʼo ndixa náʼa̱na ña̱ kúʼvi̱-inina xínitáʼanna. Soo míí ña̱ va̱ʼaka nda̱kiʼi̱n, nda̱ni̱ʼíi̱ ta̱ xi̱kuni̱níi̱ koo yivái̱: Jehová.

[Nota]

[Ña̱ káʼa̱n xa̱ʼa na̱ʼná]

“Ndi̱kó tukui̱ xi̱nii̱ Jehová saáchi miíra sa̱ndíko tuku miíi̱ nu̱úra”