Biblia okinpatili innemilis

¿Tlen okipaleui se tlakatl mamokopa itech religión tlen okimachtijkej? ¿Ken okajsik se telpochtli itajtsin tlen nochipa okinekiaya kipias? Matikitakan tlen kijtouaj.

“Oniknekiaya oksepa nimokopas iuan Jehová” (ELIE KHALIL)

ONESKI ITECH XIUITL: 1976

UEYI ALTEPETL: CHIPRE

OKSEKI TLAMANTLI: TELPOCHTLI OKSEPA OMOKOPKI

TLEN ONIKCHIUAYA. Onineski ompa ueyi altepetl Chipre, pero onimoskalti Australia. Notatajuan okatkaj iTlaixpantijkauan Jehová, ik non, omochijchikajkej nechmachtiskej ika Biblia para maniktlasojtla toTajtsin Dios. Pero satepan ayakmo onikintlakamatiaya notatajuan. Ijkuak yiyouak san ichtaka oniaya inmiuan noyolikniuan, otikinmichtekiayaj carros uan otikchiuayaj okseki tlamantli tlen amo kuali.

Achto san ichtaka ijkon onikchiuaya para amo nikinyolkokos notatajuan pero satepan ayakmo onimomojtiaya manechitakan. Noyolikniuan amo okitlasojtlayaj Jehová, ik non, onechijtlakojkej porque opejki nikchiua ken yejuan. Se tonal hasta onikinmilui notatajuan ayakmo nikneki niktekichiuilis toTajtsin Dios. Amo onikintlakamatki maski okinekiayaj nechpaleuiskej. Sapanoua omoyolkokojkej.

Oksekan onichantito uan opejki nikmotlalilia drogas. Satepan hasta oniktokaya marihuana uan oniknemakaya. Sapanoua onikchiuaya tlen amo kuali uan oniaya discotecas. Noijki onikualaniaya ijkuak ikaj okijtouaya noso okichiuaya tlen amo onechpaktiaya. Onikajuaya uan ualeua onikteuiaya. Onikchiuaya tlen amo moneki kichiuas akin kichiua ken Cristo.

BIBLIA OKIPATLAK NONEMILIS. Opejki nimouika iuan se noyolikni tlen okimotlaliliaya drogas uan oixpoliuik itajtsin ijkuak okatka chokotsin. Nochipa otimotlapouiayaj hasta yiyouak. Ualeua onechiluiaya okilnamikiaya itajtsin. Ne onikmatiaya kinyolitiskej akinmej yoixpolikej, ik non, onikilui ken Jesús okinyoliti akinmej yoixpolikej uan satepan oksepa kinyolitis nochtin (Juan 5:28, 29). Onikiluiaya: “Te oksepa uelis tikitas motajtsin uan tinochtin tichantiskej itech xochitlali”. Ijkuak ijkon onikilui oyolpakik.

Ualeua noyolikni onechtlajtlaniaya itech itlamian tonalmej uan itech Trinidad. Itech iBiblia onikititiaya akin Jehová, Jesús uan tlen kijtosneki itlamian tonalmej (Juan 14:28; 2 Timoteo 3:1-5). Okachi onimokuayejyekouaya itech Jehová ijkuak oniktlapouiaya noyolikni.

Nochi tlen notatajuan onechmachtijkej opejki moskaltia itech noyolo. Ualeua ijkuak onikatka itech se iluitl uan onikmotlaliliaya drogas onimokuayejyekouaya itech Jehová. Maski sekimej noyolikniuan okijtouayaj okitlasojtlayaj toTajtsin Dios, yejuan okichiuayaj tlen amo kuali. Ne amo oniknekiaya nikchiuas ken yejuan, onikajsikamatki omonekiaya oksepa nimokopas iuan Jehová.

Onikmatiaya moneki nikchiuas tlen kuali pero oui okatka. Okseki tlamantli amo okachi oui onikpatlak. Opejki ayakmo onikmotlaliliaya drogas, ayakmo onimouikaya inmiuan noyolikniuan uan oksepa opejki nimomachtia Biblia iuan se tokni tlayekanki.

Onikitaya oui ayakmo nikualanis. Ualeua amo okachi onikualaniaya pero satepan oksepa onikualaniaya, ik non, onimoyolkokouaya uan onimokuayejyekouaya amo keman nikkauaskia tlen onikchiuaya. Onimoyolkokouaya, ik non, onimotlapoui iuan tokni tlen onechmachtiaya Biblia. Ye kuali onechkak uan onechyolchika. Se tonal onechilui maniktlajtolti se tlamachtil itech revista Akin Tetlapouijtok kanin kijtoua amo manimosotlaua. a San sekan otimomachtijkej tlen uelis nikchiuaskia ijkuak sapanoua onikualaniaya. Sapanoua onechpaleui tlen kijtoua tlamachtil uan noijki oniktlatlaujtiaya Jehová, ijkon onechpaleui ayakmo sapanoua manikualani. Itech metstli abril, xiuitl 2000 onimoapolakti ken iTlaixpantijka Jehová. Notatajuan sapanoua oyolpakej.

TLATEOCHIUALISTLI TLEN YONIKSELI. Axkan nimoyolseuijtok uan kuali nimomachilia porque ayakmo niksokiotia nocuerpo ika drogas uan ayakmo niauilnemi. Okachi niyolpaki uan amo nimosotlaua maski san kanin maniyeto, ijkuak nitekipanoua, nimonechikoua inmiuan tokniuan noso ijkuak nimoyolpaktia.

Niktlasojkamatilia Jehová porque notatajuan nechtlasojtlaj, noijki nikilnamiki tlen okijto Jesús itech Juan 6:44: “Amaka weletis wits nonawak, tla amo kinotsa Notajtsi Akin onechaltítlanki”. Niyolpaki porque Jehová onechyoltilanki oksepa manimokopa.

“Oniknekiaya nikpias notajtsin” (MARCO ANTONIO ALVAREZ SOTO)

ONESKI ITECH XIUITL: 1977

UEYI ALTEPETL: CHILE

OKSEKI TLAMANTLI: ONITLATSOTSONAYA ITECH GRUPO HEAVY-METAL

TLEN ONIKCHIUAYA. Onimoskalti iuan nonantsin ompa Punta Arenas tlen poui itech altepetl Magallanes, ik sur kanin mokaua continente americano. Notatajuan omoxelojkej ijkuak onikpiaya makuili xiuitl, sapanoua onimoyolkokouaya porque oniknekiaya nikpias notajtsin.

Nonantsin okimachtiayaj iTlaixpantijkauan Jehová uan ye onechuikaya inmiuan matimonechikokan pero ne amo oniknekiaya nias uan itech ojtli sapanoua onikualaniaya. Ijkuak onikpiaya 13 xiuitl ayakmo onimonechiko.

Ijkuakon yonechpaktiaya tlatsotsonali uan yonikmatiaya nitlatsotsonas. Ijkuak yonikpiaya 15 xiuitl onitlatsotsonaya itech grupo heavy-metal, onitlatsotsonaya kanin okichiuayaj iluitl uan kanin otlauanayaj. Onimouikaya inmiuan akinmej kuali tlatsotsonaj, ik non, onechpaktiaya nitlatsotsonas inmiuan uan opejki nimomachtia itech escuela. Ijkuak onikpiaya 20 xiuitl onia altepetl Santiago para okachi nimomachtiskia uan noijki onitlatsotsonaya itech grupo heavy-metal.

Maski ijkon onikchiuaya amo oniyolpakiaya. Para amo nimomachiliskia noselti onikmotlaliliaya drogas uan onitlauanaya inmiuan akinmej onitlatsotsonaya porque yetoskiaj ken nofamilia. Ken onimotaya okiteititiaya amo onitetlakaitaya, nochi tliliuik onimotlakentiaya, onikpiaya nobarba uan notsonkal okatka ueyak.

Nochipa onimokualaniaya inmiuan oksekimej, ik non, onechteluiayaj. Se tonal otechkualanijtokaj tlen okinemakayaj drogas, ne oniknekiaya nikinteuis uan yejuan onechkojkojkej uan onechkamatlapankej.

Pero okachi onechyolkoko tlen sekimej onechchiuilijkej. Se tonal onikmatki nonovia onechkajkayajtoka iuan noyolikni uan oksekimej noyolikniuan amitlaj onechiluiayaj. Sapanoua onimoyolkoko.

Onimokopki altepetl Punta Arenas, ompa onitlamachtiaya matlatsotsonakan uan oniktsotsonaya violonchelo. Noijki ok onitlatsotsonaya iuan grupo heavy-metal. Onikixmatki se ichpochtli tlen itoka Sussan uan san sekan opejki tichantij. Satepan Sussan okimatki inantsin okineltokaya Trinidad uan ne amo, ik non, onechtlajtlani: “¿Akin kijtoua tlen melauak?”. Ne onikilui non tlamachtil amo melauak uan maski ne amo uelis nikititiskia itech Biblia pero onikmatiaya akin uelis kipaleuiskia. Onikinmilui iTlaixpantijkauan Jehová okititiskiaj tlen kijtoua Biblia. Onikchi itlaj tlen yiuejkika amo onikchiuaya, oniktlatlaujti toTajtsin Dios uan onikilui manechpaleui.

Seki tonal satepan onikitak se tlakatl uan oniktlajtlani kox iTlaixpantijka Jehová. Xamo omomojti ijkuak onechitak pero onechnankili ijkuak oniktlajtlani ken mochiuaj nechikolmej. Ne onikmatiaya Jehová onechnankili tlen oniktlatlaujti. Ijkuak onimonechiko onimotlali hasta tlakuitlapan para amikaj manechita pero miakej onechixmatkej porque onimonechikouaya ijkuak onikatka nichokotsin. Oyolpakej porque onimonechiko uan onechnapalojkej ika tlasojtlalistli uan kuali onimomachili. Yetoskia ken onimokopki nokalijtik. Ijkuak onikitak tokni akin onechmachtiaya ijkuak onikatka nichokotsin onikilui oksepa manechmachti.

BIBLIA OKIPATLAK NONEMILIS. Se tonal oniktlajtolti Proverbios 27:11 kanin kijtoua: “Nokone xiyeto ixtlamatki uan techyolpakti”. Onechyolpakti nikmatis maski titlajtlakolejkej uelis tikyolpaktiskej akin okichijchi nochi tlen onka. Onikajsikamatki Jehová notajtsin akin nochipa oniknekiaya nikpias.

Oniknekiaya nikyolpaktis toTajtsin Dios uan nikchiuas tlen kineki pero miak xiuitl san onikmotlaliliaya drogas uan onechpaktiaya nitlauanas. Onikajsikamatki tlen Jesús otechmachti itech Mateo 6:24 kanin kijtoua “amaka tlakatl weletis kintekitilis ome inteko”. Noijki onechpaleui principio tlen kajki itech 1 Corintios 15:33 para ayakmo manikchiua tlen achto onikchiuaya, ompa kijtoua: “Tla nannentinemiskej iuan akinmej amo yolkualmej, namechijtlakoskej”. Onikajsikamatki amo uelis nikchiuaskia tlen kuali tla ok onimouikaya uan oniaya inmiuan noyolikniuan. Omonekiaya nikpejpenaskia nikchiuas tlen amo nechijtlakoskia ijkon ken kijtoua Biblia (Mateo 5:30).

Sapanoua onechpaktiaya nitlatsotsonas uan onikitak oui ayakmo nipouis itech grupo heavy-metal. Pero tokniuan onechpaleuijkej. Ayakmo onitlauanaya nion onikmotlaliliaya drogas, oniktekik notsonkal uan nobarba uan ayakmo onimotlakenti tliliuik. Ijkuak onikilui Sussan nikmotekiliskia notsonkal okinekiaya kimatis tleka uan onechilui: “Nias mouan kanin monechikouaj, nikneki nikitas tlen ompa kichiuaj”. Sapanoua okiyolpakti uan san niman opejki momachtia Biblia. Satepan otimonamiktijkej uan itech xiuitl 2008 otimoapolaktijkej ken iTlaixpantijkauan Jehová. Axkan tiyolpakij uan san sekan tiktekichiuiliaj Jehová iuan nonantsin.

TLATEOCHIUALISTLI TLEN YONIKSELI. Axkan melauak niyolpaki uan noyolikniuan ayakmo nechkajkayauaj. Ok nechpaktia tlatsotsonali pero axkan nikpejpena tlen nikkakis. Nikintlapouia nofamiliares uan oksekimej tlen onechpanok uan noijki telpochmej. Nikneki makajsikamatikan maski mota kualtsin nochi tlen onka amo techpaleuia porque yetoskia “kemi tlájsoli” (Filipenses 3:8).

Axkan nikinpia noyolikniuan itech tlanechikol tlen motlasojtlaj uan moyolseuijtokej, noijki nimouika iuan Jehová uan nikita ken notajtsin tlen nochipa oniknekiaya nikpias.

[Nota]

[Tlen moijtoua]

“Niyolpaki porque Jehová onechyoltilanki oksepa manimokopa”