Beibele e Fetoša Maphelo

KE ENG seo se šušumeleditšego monna yo a bego a arogile go boela bodumeding bjo a godišeditšwego go bjona? Lesogana le itšego le ile la hwetša bjang tate yo le bego le hlologetše go ba le yena bophelo bja lona ka moka? Bala seo batho ba ba se bolelago.

“Ke be ke Nyaka go Boela go Jehofa.”—ELIE KHALIL

NGWAGA WA MATSWALO: 1976

NAGA: TSIPERO

BOPHELO BJA PELE E EBA MOKRISTE: MORWA WA LEHLASWA

BOPHELO BJA KA BJA NAKONG E FETILEGO: Ke belegetšwe Tsipero eupša ka golela Australia. Batswadi ba ka ke Dihlatse tša Jehofa, gomme ba ile ba dira sohle seo ba se kgonago go nthuta go rata Jehofa le Lentšu la gagwe, Beibele. Lega go le bjalo, ke ile ka thoma go rabela nywageng ya ka ya mahlalagading. Ke be ke etšwa ka ngwakong ke khukhuna bošego e le gore ke yo gahlana le bafsa ba bangwe. Re be re utswa dikoloi gomme re tsena mathateng gantši.

Mathomong ke be ke dira dilo tšeo ka sephiring ka gobane ke be ke boifa go se kgahliše batswadi ba ka. Eupša poifo yeo e ile ya fela ganyenyane-ganyenyane. Ke be ke gwerana le batho bao ba mphetago kgole ka bogolo bao ba bego ba sa rate Jehofa, gomme ba be ba ena le tlhohleletšo e mpe go nna. Mafelelong, ke ile ka botša batswadi ba ka gore ke be ke se sa nyaka go ba karolo ya bodumedi bja bona. Ba ile ba leka go nthuša ba sa fele pelo, eupša ke ile ka gana thušo ya bona ka moka. Batswadi ba ka ba ile ba kwa bohloko kudu.

Ka morago ga go huduga gae, ke ile ka thoma go diriša dihlaretagi, ka ba ka bjala patše e ntši le go e rekiša. Ke be ke phela bophelo bjo bo gobogilego e bile ke fetša nako e ntši ke ithabiša ke le di-night club. Ke ile ka ba ka thoma go fela pelo. Ge motho yo mongwe a be a ka bolela goba a dira selo se itšego seo ke bego ke sa se rate, ke be ke tlala bogale gomme gantši ke hlabela batho lešata le go ba itia. Ge e le gabotse, ke be ke dira dilo ka moka tšeo ke bego ke rutilwe go se di dire bjalo ka Mokriste.

KAMOO BEIBELE E FETOTŠEGO BOPHELO BJA KA: Ke ile ka gwerana le motho yoo ke bego ke diriša dihlaretagi le yena yoo a bego a hwetšwe ke tatagwe ge e be e sa le ngwana. Re be re dula go fihla bošego kudu re bolela. Mašegong a mangwe, o be a tšholla sa mafahleng gomme a bolela kamoo a gopotšego tatagwe ka gona. Ka ge ke be ke gotše ke tseba ka kholofelo ya tsogo, kapejana ke ile ka ikhwetša ke mmotša ka Jesu—gore o be a ile a tsoša bahu le gore o holofetša go dira bjalo gape nakong e tlago. (Johane 5:28, 29) Ke be ke fela ke re: “Akanya feela o bona tatago gape. Ka moka ga rena re ka phela ka mo go sa felego Paradeise mo lefaseng.” Dikgopolo tšeo di ile tša kgoma pelo ya mogwera wa ka.

Ka dinako tše dingwe, mogwera wa ka o be a bolela ka ditaba tše bjalo ka tša mehla ya bofelo goba  thuto ya Boraro Botee. Ke be ke tšea Beibele ya gagwe gomme ke mmontšha Mangwalo a fapafapanego ao a utollago therešo ka Jehofa Modimo, Jesu le ka mehla ya bofelo. (Johane 14:28; 2 Timotheo 3:1-5) Ge ke be ke bolela le mogwera wa ka kutšwanyana ka Jehofa, ke moo ke bego ke nagana kudu ka Jehofa.

Ganyenyane-ganyenyane, dipeu tša therešo ya Beibele tšeo di bego di dutše ka pelong ya ka—dipeu tšeo batswadi ba ka ba bego ba lekile ka thata go di bjala—di ile tša thoma go mela. Ka mohlala, ka dinako tše dingwe ge ke be ke le boithabišong ke diriša dihlaretagi le bagwera ba ka, ke be ke thoma go nagana ka Jehofa gateetee. Ba bantši ba bagwera ba ka ba be ba ipolela gore ba rata Modimo, eupša boitshwaro bja bona bo be bo bolela se se fapanego. Ka ge ke be ke sa nyake go ba ka tsela yeo, ke ile ka lemoga seo ke swanetšego go se dira. Ke be ke nyaka go boela go Jehofa.

Ke therešo gore go bonolo go tseba seo o swanetšego go se dira, eupša go se dira go thata kudu. Go be go le bonolo go dira diphetogo tše dingwe; ke ile ka kgaotša go diriša dihlaretagi gabonolo. Ke ile ka ba ka kgaotša go gwerana le bagwera ba ka ba kgale, gomme ka thoma go ithuta Beibele le mogolo wa Mokriste.

Lega go le bjalo, diphetogo tše dingwe di bile thata kudu. Ke ile ka thatafalelwa kudu ke go laola kgalefo ya ka. Ka dinako tše dingwe ke be ke kgona go e laola nako e teletšana gomme ka morago ke boela mokgweng wa go galefa kudu. Ke be ke ikwa ke nyamile kudu ka morago ga seo, ke nagana gore ke paletšwe. Ke ile ka batamela mogolo yoo a bego a ithuta Beibele le nna ke nyamile. Ka go se fele pelo le go ba botho bjalo ka mehleng, o ile a itlhatsela e le mothopo wa kgonthe wa kgothatšo. Lebakeng le lengwe, o ile a dira gore ke bale sehlogo sa Morokami seo se bolelago ka bohlokwa bja go se lape go dira maiteko. * Re ile ra ahlaahla megato yeo ke bego nka e gata ge ke ikwa ke galefile. Ganyenyane-ganyenyane, ke ile ka kgona go laola kgalefo ya ka, ge ke dutše ke nagana ka sehlogo seo le go rapela Jehofa kudu. Mafelelong, ka April 2000, ke ile ka kolobetšwa ka ba yo mongwe wa Dihlatse tša Jehofa. Batswadi ba ka ba ile ba thaba e le ruri.

KAMOO KE ILEGO KA HOLEGA KA GONA: Ga bjale ke na le khutšo ya monagano le letswalo le le hlwekilego, ka ge ke tseba gore ga ke sa šilafatša mmele wa ka ka dihlaretagi goba ka boitshwaro bjo bo gobogilego. Go sa šetšwe seo ke se dirago, e ka ba go šoma, go ya dibokeng tša Bokriste, goba go thabela mohuta o itšego wa boithabišo, ke thabile kudu. Ke na le pono e nepagetšego ka bophelo.

Ke leboga Jehofa ka batswadi ba ka, bao ba sa kago ba ntebala. Ke nagana le ka mantšu a Jesu a hwetšwago go Johane 6:44, a rego: “Ga go motho yo a ka tlago go nna ge a sa gogwe ke Tate yo a nthomilego.” Ke kgomega kudu ge ke nagana gore ke kgonne go boela go Jehofa ka gobane a nkgogile gore ke boe.

 “Ke be ke Hlologetše go ba le Tate.”—MARCO ANTONIO ALVAREZ SOTO

NGWAGA WA MATSWALO: 1977

NAGA: CHILE

BOPHELO BJA PELE E EBA MOKRISTE: SETHO SA SEHLOPHA SA MMINO WA DEATH-METAL

BOPHELO BJA KA BJA NAKONG E FETILEGO: Mma o nkgodišeditše Punta Arenas, motse o kgahlišago wo o lego Moseleng wa Magellan kgauswi le ntlha ya ka borwa ya Amerika Borwa. Batswadi ba ka ba ile ba arogana ge ke be ke ena le nywaga e mehlano, e lego seo se ilego sa dira gore ke ikwe ke lahlilwe. Ke be ke hlologetše go ba le tate.

Mma o be a ithuta Beibele le Dihlatse tša Jehofa, gomme o be a eya le nna dibokeng tša Bokriste Holong ya Mmušo. Lega go le bjalo, ke be ke sa rate go ya dibokeng, gomme ke be ke fela ke tsoša kgalefo ge re le tseleng ya go ya gona. Ge ke ena le nywaga e 13, ke ile ka kgaotša go ya dibokeng ka mo go feletšego.

Lebakeng leo, ke be ke thomile go rata mmino, gomme ke lemoga gore ke na le talente ya wona. Ge ke ena le nywaga e 15, ke be ke bapala mmino wa morethetho o matla le wa death-metal menyanyeng, dipareng, gotee le meletlong ya ka gae. Go gwerana ga ka le borammino bao ba nago le talente go ilego gwa ntutueletša go rata mmino wa classic. Ke ile ka thoma go ithutela mmino sekolong sa mmino. Ge ke ena le nywaga e 20, ke ile ka hudugela motsengmošate, e lego Santiago, bakeng sa go yo tšwetša pele dithuto tša ka. Ke ile ka ba ka tšwela pele ke bapala le dihlopha tša mmino wa morethetho o matla le wa death-metal.

Nakong ye ka moka, ke be ke tshwenywa ke maikwelo a go hloka mohola. Ke be ke leka go okobatša maikwelo ao ka go tagwa le go diriša dihlaretagi le bao ke bego ke bapala le bona mmino, bao ke bego ke ba lebelela e le ba lapa lešo. Ke be ke ena le mokgwa wa borabele, wo o bego o bonagatšwa ke ponagalo ya ka. Ke be ke apara diaparo tše ntsho, ke godišitše ditedu, e bile ke tlogetše moriri e le o motelele moo o bego o nyaka go fihla lethekeng.

Nako le nako, mokgwa wa ka o be o dira gore ke lwe le batho gotee le go ntsenya mathateng a tša molao. Lebakeng le lengwe, ke tagilwe, ke ile ka hlasela sehlopha sa bagweba-ka-dihlaretagi bao ba bego ba tshwenya nna le bagwera ba ka. Bagweba-ka-dihlaretagi bao ba ile ba mpetha o šoro moo ke ilego ka robega mohlagare.

Lega go le bjalo, ke ile ka kwešwa bohloko kudu ke batho bao ba lego kgauswi kudu le nna. Letšatšing le lengwe, ke ile ka lemoga gore kgarebe ya ka e be e ena le nywaga e mentši e ratana le mogwera wa ka wa paale, le gore bagwera ba ka ka moka ba be ba tseba seo eupša ba sa mpotše. Ke ile ka kwa bohloko o šoro.

Ke ile ka boela Punta Arenas, moo ke ilego ka thoma go ruta mmino le go šoma bjalo ka mmapadi wa seletšo seo se bitšwago cello. Ke ile ka tšwela pele ke bapala le go gatiša le dihlopha tša mmino wa morethetho o matla le wa death-metal. Ke ile ka kopana le ngwanenyana yo a kgahlišago yo a bitšwago Sussan, gomme ra thoma go dula mmogo. Nakwana ka morago, Sussan o ile a kwa gore mmagwe o be a dumela thutong ya Boraro Botee le gore nna ke be ke sa dumele go yona. O ile a mpotšiša gore: “Bjale, therešo ke efe?” Ke arabile ka gore ke be ke tseba gore thuto ya Boraro Botee ke maaka eupša ke be ke nka se kgone go hlatsela seo go tšwa Beibeleng. Lega go le bjalo, ke be ke tseba yo a ka dirago bjalo. Ke ile ka mmotša gore Dihlatse tša Jehofa di ka mmontšha therešo go tšwa Beibeleng. Ke moka, ka dira selo seo ke bego ke ena le nywaga e mentši ke sa se dire—ke ile ka rapela Modimo gomme ka kgopela thušo ya gagwe.

Matšatši a sego kae ka morago, ke ile ka bona monna  yoo ke bego ke mo swantšha, gomme ka mmotšiša ge e ba e le yo mongwe wa Dihlatse tša Jehofa. Gaešita le ge go be go le molaleng gore o be a tšhošwa ke ponagalo ya ka, o ile a araba dipotšišo tša ka ka botho tša mabapi le diboka tša Holong ya Mmušo. Ke be ke kgodišegile gore go kopana le monna yo e be e le karabo ya thapelo ya ka. Ke ile ka ya Holong ya Mmušo gomme ka dula ditulong tša moragorago e le gore ke se gopolwe ke motho. Lega go le bjalo, ba bantši ba ile ba thoma go gopola ge ke be ke kopanela ke sa le ngwana. Ba ile ba nkamogela gomme ba nkgokarela ka lerato kudu moo ke ilego ka ikwa ke aparelwa ke khutšo. Go be go le bjalo ka ge eka ke be ke boile gae. Ge ke be ke bona monna yo a bego a nthuta Beibele ge ke sa le yo monyenyane, ke ile ka mo kgopela gore a ithute le nna gape.

KAMOO BEIBELE E FETOTŠEGO BOPHELO BJA KA: Letšatšing le lengwe ke ile ka bala Diema 27:11, e rego: “Morwa wa ka, hlalefa gomme o thabiše pelo ya ka.” Ke ile ka kgahlwa ke gore motho wa nama le madi o be a ka thabiša pelo ya Mmopi wa legohle. Ke ile ka lemoga gore Jehofa e be e le Tate yoo ke bego ke mo nyaka bophelong bja ka ka moka!

Ke be ke nyaka go thabiša Tate wa legodimong le go dira thato ya gagwe, eupša ke be ke ena le nywaga e mentši ke le lekgoba la dihlaretagi le bjala. Ke ile ka thoma go kwešiša thuto ya Jesu e lego go Mateo 6:24, yeo e rego “ga go yo a ka bago lekgoba la marena a mabedi.” Ge ke be ke katanela go dira diphetogo, molao wa motheo wo o lego go 1 Bakorinthe 15:33 o ile a wa nkgoma kudu, ge o re: “Ditlwaelano tše mpe di senya mekgwa e holago.” Ke ile ka lemoga gore ke be nka se kgone go tlogela mekgwa e mebe ge e ba ke tšwela pele ke eya mafelong a swanago gotee le go gwerana le batho bao ke bego ke gwerana le bona. Keletšo ya Beibele e be kwagala: Ke be ke swanetše go dira maiteko a magolo go tlogela dilo tšeo di bego di ntiriša dibe.—Mateo 5:30.

Lerato la ka la mmino le ile la dira gore go tlogela go ya meletlong ya mmino wa morethetho o matla e be phetho e thata kudu yeo ke ilego ka e dira. Eupša mafelelong ke ile ka kgona go tlogela ka thušo ya bagwera ba ka ba phuthegong. Ke ile ka kgaotša go nwa ka mo go feteletšego le go diriša dihlaretagi. Ke ile ka ba ka kota moriri wa ka le ditedu, gomme ka kgaotša go apara diaparo tše ntsho feela. Ge ke be ke botša Sussan gore ke be ke nyaka go kota moriri wa ka, o ile a nyaka go tseba lebaka. O itše: “Ke ya le wena go yo bona gore go direga’ng moo Holong ya Mmušo!” O ile a rata seo a se bonego gomme go se go ye kae o ile a thoma go ithuta Beibele. Mafelelong, nna le Sussan re ile ra nyalana. Ka 2008, re ile ra kolobetšwa ra ba Dihlatse tša Jehofa. Re thabela go hlankela Jehofa gotee le mma.

KAMOO KE ILEGO KA HOLEGA KA GONA: Ke phologile lefaseng leo le nago le lethabo la bofora le bagwera ba baradia. Ke sa dutše ke rata mmino, eupša ga bjale ke a kgetha. Ke diriša diphihlelo tša ka go hola ditho tša lapa le ba bangwe, kudukudu bafsa. Ke nyaka go ba thuša go bona gore dilo tšeo lefase le di holofetšago di ka bonagala di gogela, eupša mafelelong e fo ba “e le maudi.”—Bafilipi 3:8.

Ke hweditše bagwera ba botegago ka phuthegong ya Bokriste, moo go renago lerato ke khutšo. Go feta tšohle, mafelelong ke hweditše Tate ka go batamela kgauswi le Jehofa.

[Mongwalo wa ka tlase]

[Ntlhakgolo go letlakala 13]

“Ke kgonne go boela go Jehofa ka gobane a nkgogile gore ke boe”