Uumanen na Biblia so Bilay

ANTOY rason akin et pinmawil ed abangonan ton relihyon so sakey a laki? Panon ya aromog na sakey a kalangweran so klase na ama ya pirpirawat to? Basaen tayoy istoryay bilay da.

“Kaukolan Koy Ompawil ed si Jehova.”​—ELIE KHALIL

TAON NA INKIANAK: 1976

BANSA: CYPRUS

APALABAS: REBELYOSON ANAK

ISTORYAY BILAY KO: Nianak ak ed Cyprus, balet binmaleg ak diad Australia. Tasi nen Jehova iray ateng ko, tan ginawa ray anggaay nayarian dan ibangat ed siak ya aroen si Jehova tan say Salita to, say Biblia. Balet nen tinedyer ak la, nanrebelde ak. No labi et ontatakas ak ed abung mi pian minengnengan ed saray barkadak. Nantatakew kami ray kotse tan dakel a guloy ginawa mi.

Diad gapo et iyaamot ko ni irayan gagawaen ko ta antakot kon napaermen iray ateng ko. Balet, kalkalnan naandi itan a takot. Akaarok iray totoon mas maedad ed siak ya agmangaarod si Jehova, tan makapuy so impluensya rad siak. Ag-abayag, imbagak ed saray ateng ko ya agko la labay so milad relihyon da. Inanosan da ak ya tinulongan, balet ta imbaliwalak ya amin so ginawa ra. Asakisakitan irad saman a ginawak.

Nen tinmaynan ak ed abung mi, sinalik so nan-drugs. Nantanem tan nanlako ak ni ingen na marijuana. Imoral so panagbilay ko tan naynay ak ed saray night club. Nagmaliw ak ya misasanok. No walay agko agustoan ya imbaga o ginawa na arum, onsabon tampol so dalak, ya ingalan tan sakitan ko ra. Diad katuaan to, ginawak ya amin iray bengatlan agmanepeg ed sakey a Kristiano.

NO PANON YA INUMAN NA BIBLIA SO BILAY KO: Akaarok so sakey a kaparak ya manda-drugs ya asakbay a naulilad ama. Mabetbet kamin maniistoryaan ya anggad pegley labi. No maminsan et ibabaga tod siak so pakakailiw ton maong ed si ama to. Lapud naaralan ko nensaman a walay kioli ed bilay, agko naam-amtaan ya ibabagak lad sikatoy nipaakar ed si Jesus​—ya sikatoy amaoli na saray inaatey tan insipan ton gawaen to lamet itan diad arapen. (Juan 5:28, 29) Imbagak ed sikaton: “Isip mo pan napinengnengan mo lamet si tatay mo. Tan amin tayo et posiblin manbilay ya andi-anggaan diad Paraison dalin.” Atenyeg so liknaan na kaarok lapud sarayan imbagak.

 No maminsan, say labay na kaarok ya pantongtongan mi et say kaunoran iran agew odino say doktrinan Trinidad. Uusaren koy Biblia to pian ipabasad sikato so katuaan nipaakar ed Dios a Jehova, si Jesus, tan say kaunoran iran agew. (Juan 14:28; 2 Timoteo 3:1-5) No kapigan mabetbet kon ibabagad kaarok so nipaakar ed si Jehova, mabetbet met ya nanonotan koy Jehova.

Say bini na katuaan a nansagpotan ya intanem na atateng ko, ya tinmunda lan tinmubod pusok et kalkalnan sinmimit. Singa bilang, biglan nanonotan koy Jehova sano manda-drugs kami ray barkadak. Ibabaga na saray kakaarok ya inaro day Dios, balet agmet itan nanengneng ed saray gagawaen da. Lapud agko labay so miparad sikara, naisip kon walay kaukolan kon gawaen. Kaukolan koy ompawil ed si Jehova.

Mainomay ya amtaen no antoy duga, balet no maminsan et mairap so panggawad satan. Ingen, wala ray pananguman a mainomay ya gawaen. Singa bilang, nitundak a tampol so panag-drugs. Agak met la miuulop ed saray datin kakaarok, tan nampaiyaral ak na Biblia ed sakey ya elder.

Say sankairapan parad siak et say pangontrol ed pasnok ko. No maminsan et kalmado ak, balet wala ray panaon ya agkon talaga napokpokay alablabas a pasnok ko. Kayari to et aliwliway liknaan ko, isipen kon agak la makapanguman. Lapud impakadismayak, akitongtong ak ed samay elder ya mangiyaaral ed siak. Talagan baleg so epektod siak na inkaanos tan kaabigan to. Aminsan et impabasa tod siak so sakey ya artikulo na Say Panag-bantayan nipaakar ed kaimportantian na ag-isuko. * Nantongtongan mi no anto ray nepeg kon gawaen sano makakapasnok ak. Lapud inyaplikak so abasak tan masimsimoon ak a nampikasid si Jehova, kalkanan akontrol koy alablabas a pasnok ko. Sanen Abril 2000, abautismoan ak bilang sakey a Tasi nen Jehova. Siempre, agaylay liket na atateng ko!

MARAKEP IRAN RESULTA: Natan et walaan ak lay maligen a nonot tan malinis a konsiensia, ta intundak lay man-drugs tan say imoral ya kabibilay ko. Natan, nibagak a mas maliket ak la antokaman so gagawaen ko, mantratrabaho ak man, onaatendi ed saray Kristianon pantitipon, odino manrerelaks. Tan positibo lay panmoriak ed bilay.

Misalsalamat ak ed si Jehova ta wala ray atateng kon ag-amaulyan ed siak. Sankanonot ko met imay imbaga nen Jesus a walad Juan 6:44: “Anggapoy makadago ed siak no sikatoy ag-iyasingger na Ama ya angibaki ed siak.” Malikeliket ak ta akapawil ak ed si Jehova lapud inyasingger toy inkasikato ed siak.

 “Labalabay Koy Nawalaan na Ama.”​—MARCO ANTONIO ALVAREZ SOTO

TAON NA INKIANAK: 1977

BANSA: CHILE

APALABAS: MEMBROY DEATH-METAL BAND

ISTORYAY BILAY KO: Nanayam kami nen nanay ko diad Punta Arenas, sakey a balibalin syudad diad Strait of Magellan a walad bandad sampot ya abalaten na South America. Limay taon ko ni labat nen nansian so atateng ko, kanian pakaliknak et pinaulyanan da ak. Labalabay koy nawalaan na ama.

Inyaralan na saray Tasi nen Jehova si nanay, tan aawiten to ak ed saray Kristianon pantitipon diad Kingdom Hall. Balet agko labalabay so mila, tan mabetbet ya no paonla kami la et mantarampas ak. Tan sanen 13 años ko agak lan balot onaatendi.

Diad saman et ginmapoy hilig kod musika, tan adiskobrek ya sarasarag ko manaya itan. Nen 15 años ko, mantotogtog ak lay heavy-metal tan death-metal iran musika diad saray piesta, bar, tan nanduruman okasyon. Say impakapiulop kod saray marundunong ya musician so makasengeg no akin ya agustoan koy classical music. Nanaral ak na music ed sakey a conservatory diad lugar mi. Nen mantaon ak na 20, linma ak ed syudad na Santiago pian makapanaral ak nin maong. Legan na satan, mantotogtog ak nin siansia na heavy-metal tan death-metal kaibay bandak.

Diad inlabas na saraman a panaon, naliliknak ya wala nin siansiay kulang. Pian nabawasay ermen ko, uniinom tan manda-drugs ak kaibay bandak, ya ipapasen kon pamilyak. Nagmaliw ak a rebelyoso, tan napatnagan itan ed itsurak. Lanang a say sulong ko et andeket a kawes, nampadukey ak na balbas, tan say buek ko et anggad awak.

Lapud ugalik, mabetbet ak ya makakapikolkol tan aarestoey pulis. Aminsan lapud abuek ak, akipunitian ak ed grupo na drug dealer ya manggugulod siak tan ed saray kakaarok. Balet inambon da ak kanian abetag so pangak.

Say ansakisakit et say impanlokod siak na saray maapit a kakaarok. Naamtaan kon pigay taon la manayan walay relasyon na girlfriend tan best friend ko, tan iyaamot itan ed siak na amin a kakaarok. Asakisakitan ak.

Pinmawil ak ed Punta Arenas, tan nambangat ak ditan na music tan nantrabaho ak bilang managtogtog na cello. Intultuloy ko met so pantogtog tan panrekord a kaibay heavy-metal tan death-metal band. Akabat koy sakey a magangganan bii a manngaray Sussan tan nanlive-in kami. Agnambayag, naamtaan nen Sussan a manisia manayad doktrinan Trinidad si nanay to, siak balet et andi. Kanian, intepet tod siak, “Anto siri’ duga ey?” Inkuan kod sikaton amtak ya aliwan tua itan a doktrina, ingen agko kabisadoy pakabasaan ed satan diad Biblia. Amtak ya Saray Tasi nen Jehova labat so makapangibagad sikato na katuaan manlapud Biblia. Insan kinerew koy tulong na Dios panamegley na pikakasi​—bengatlan abayag ko lan aggagawaen.

Kayari pigay agew, anengneng koy sakey a laki a pamilyar ed siak, tan tinepet ko no sikatoy Tasi nen Jehova. Anggano sikatoy natatakot ed itsurak, marespeto ton inebatan iray tepet ko  nipaakar ed saray pantitipon diad Kingdom Hall. Kombinsido ak ya saya la imay ebat ed pikakasik. Linma ak ed Kingdom Hall tan diad beneg so niyurongan ko pian agda ak naimano. Balet dakel so akabidbir ed siak ta atandaan dan onaatendi ak sanen ugaw ak. In-welcome tan nilakap da ak, tan aliknak a singa da ak kapamilya. Sanen anengneng ko imay brother ya angiyaral ed siak na Biblia nen ugaw ak, imbagak ed sikaton iyaralan to ak lamet.

NO PANON YA INUMAN NA BIBLIA SO BILAY KO: Aminsan, abasak imay ibabaga na Uliran 27:11: “Ana’ko, onkabat ka, tan paliketen mo so pusok.” Napaliket manaya na agperpekton too so Amalsa na uniberso. Diad saman ko labat naisip a si Jehova manaya imay Ama ya abayag ko lan aanapen!

Labay kon paliketen so Amak ya walad tawen tan gawaey linawa to, balet abayag ak lan aripen na druga tan alak. Atalosan ko imay bangat nen Jesus a walad Mateo 6:24 ya inkuan ton: “Anggapo so nayarin manpaaripen ed duaran katawan.” Legan kon gagawaey anggaay nayarian kon manguman, baleg so epektod siak na prinsipyon nabasad 1 Corinto 15:33: “Say piulop ed mauges et maneral ed maong iran ugali.” Naisip kon agko nitunday mauges iran kagagawak no naynay ak ed saray lugar a datin lalaen ko, tan mimila ed saramay datin kaulop ko. Malinew so bilin na Biblia: Kaukolan koy manggaway baleg iran pananguman pian naarawian iray bengatlan sengegay pankakasalananan ko.​—Mateo 5:30.

Lapud labalabay koy musika, say sankairapan ya desisyon a ginawak et say pangitundad pantogtog tan pandengel na heavy-metal. Balet agawaan ko itan diad tulong na saray kakaarok ed kongregasyon. Intundak so alablabas ya panag-inum tan panagdroga. Nampakatli ak la, inekal ko lay balbas ko, tan aliwa met lan naynay ya andeket so isusulong ko. Mankelaw a maong si Sussan nen imbagak ya manpakatli ak la. Say kuanto: “Mila ak ed sika ta nengnengen ko no antoy nagagawa ditad Kingdom Hall!” Agustoan toy anengneng tan nadngel to, kanian nampaiyaral met na Biblia. Ag-abayag nampakasal kami, tan nen 2008 abautismoan kami bilang Tasi nen Jehova. Malikeliket kami a kaibay nanay ko diad panlilingkor ed si Jehova.

MAABIG IRAN RESULTA: Natan et tuan liket lay naliliknak tan tuan kakaaro met lay kaulop ko. Labalabay ko nin siansiay musika, balet manpipili ak la natan. Iyiistoryak so agawad bilay ko pian natulongan iray kapamilyak tan arum, lalo lad saray kalangweran. Labay kon natalosan dan karaklan ed saray iyoopresi na mundo, anggaman singa marakep et magmaliw lanlamang a “dakerakel a dutak.”​—Filipos 3:8.

Akalmo ak na tuan kakaaro diad Kristianon kongregasyon, a kawalaan na peteg ya aroan tan kareenan. Manuna ed amin, lapud inmapit ak ed si Jehova, aromog kon siansiay Amak.

[Paimano ed leksab]

[Blurb ed pahina 13]

“Akapawil ak ed si Jehova lapud inyasingger toy inkasikato ed siak”